Keristani Taudia Idia Hunia Diba Lasi Hunia Herevana Ta!
“Tanobada taudia dekenai hereva lau gwauraia hedinarai. . . . Lauegu hereva be lau hunia lasi.”—IOANE 18:20.
GREEK gado herevana my·steʹri·on be New World Translation of the Holy Scriptures Baibel lalonai nega 25 idia hahanaia “sacred secret” (hunia herevana helagana) bona nega toi idia hahanaia “mystery” (lalo-parara diba lasi gauna). Bema hunia herevana idia gwauraia helaga, ia be mai anina bada gauna, ani! Namona be unai bamona hunia gauna ia dibaia tauna ia lalo-parara hahenamo badana ia abia, badina tanobada bona guba edia Ataiai Diravana ia diba hunia herevana ia diba danu.
2 Vine ena Expository Dictionary of Old and New Testament Words ia hamomokania “hunia herevana helagana” be hahanaia dalana namona, “lalo-parara diba gauna” ia hereaia. Inai hereva my·steʹri·on ia herevalaia, ia gwau: “[Keristani Greek Revarevadia] lalonai, unai hereva be mystery (English hereva ena anina hegeregerena) lasi, to ena anina be taunimanima ese unai hereva do idia lalo-pararalaia lasi bema Dirava ese ia hahedinaraia lasi. Dirava ia abia hidi dalana amo, ia makaia negana ai, bona Iena Lauma amo sibona unai diba do idia abia. Mystery be vaia ia hahedinaraia, diba haida idia do abia lasi; to Baibel lalonai, unai hereva ena anina be hereva momokani ia hedinarai. Unai hereva ida idia hahegeregerea herevadia be ‘hadibaia,’ ‘hahedinaraia,’ ‘hedinarai,’ ‘harorolaia,’ ‘lalo-pararalaia,’ bona ‘hariharilaia.’ ”
3 Unai ese ia hahedinaraia dahaka dainai aposetolo taudia edia negai idia noho hehuni tomadiho oreadia bona Keristani kongregesen matamatana edia idau be bada. Hehuni oreadia lalonai idia vareai taudia ese gwauhamata idia karaia edia tomadiho ena hahediba herevadia do idia herevalaia lasi, Keristani taudia be unai bamona taravatu henunai lasi. Momokani, aposetolo Paulo ese ia “harorolaia aonega be Dirava ena. Inai aonega be hunia gauna,” bona Paulo ia gwau ia be “tanobada taudia idia diba lasi gauna,” badina “inai tanobada ena gunalaia taudia” dekenai ia be hunia herevana. To Keristani taudia dekenai ia be hunia lasi gauna, badina Dirava be ena lauma amo idia dekenai ia hahedinaraia, do idia harorolaia totona.—1 Korinto 2:7-12; Aonega Herevadia 1:20 itaia.
‘Hunia Herevana’ Helagana Ia Hahedinaraia
4 Iehova ena ‘hunia herevana’ helagana ena kahana badana be Iesu Keriso. Paulo ia gwau: “[Iehova] ese sibona ena ura gauna, iena palani, gunaguna ia laloa, hunia gauna, ita dekenai ia hadibaia. Inai palani be Keriso dekena amo Dirava ese do ia karaia haorea. Inai palani do ia haorea nega korikori ia ginidae neganai, Dirava ese do ia karaia haorea. Inai palani ena anina be, Dirava ia karaia gaudia ibounai, guba dekenai bona tanobada dekenai, be Keriso ese do ia biagua.” (Efeso 1:9, 10) Paulo ese unai ‘hunia herevana’ helagana ena anina ia hahedinaraia goevagoeva, ia gwau namona be “Dirava ena hunia hereva ena anina do umui diba. Keriso sibona be inai hunia hereva ena anina.”—Kolose 2:2.
5 To unai ‘hunia herevana’ helagana be mai ena kahana idauidau. Iesu be Garana o Mesia be ena anina tamona sibona lasi; Dirava ena ura hagugurua totona Iesu ena gaukara be mai anina danu. Guba gavamanina, Dirava ena Mesia Basileiana danu be mai anina, bona Iesu ese unai ia hahedinaraia ena hahediba taudia dekenai, ia gwau: “Guba Basileia ena hunia hereva umui dekenai be idia hedinarai, to haida dekenai be lasi.”—Mataio 13:11.
6 Dirava ese Mesia Basileiana ena badina ia gwauraia negana ginigunana murinai, lagani momo do idia ore ela bona iena “hunia gauna, do ia karaia haorea.” (Apokalupo 10:7; Genese 3:15, NW) Basileia ia haginia neganai, unai hunia gauna do ia karaia haorea, Apokalupo 10:7 bona 11:15 oi itaia unai oi hamomokania totona. Momokani, Basileia gwauhamata ginigunana Eden dekenai ela bona Dirava ia Abia Hidi King ia hedinarai lagani 29 C.E. ai, lagani 4,000 idia ore. Bena ma lagani 1,885 idia ore ela bona Basileia be guba dekenai idia haginia lagani 1914 ai. Unai dainai kahirakahira lagani 6,000 lalodiai “hunia hereva” helagana ia hedinarai noho. (Rau 16 itaia.) Paulo ena hereva ia maoro, ia gwau: “Inai sivarai momokani be hunia herevadia, idaunegai ia mai bona hari be idia hunia, to harihari Dirava ese ia hedinaraia namonamo vadaeni.”—Roma 16:25-27; Efeso 3:4-11.
7 Taunimanima idia diba edia mauri laganidia idia kwadogi, to Iehova be nega do ia ore garina dainai ena hunia herevadia ia hahedinaraia haraga lasi. Unai dainai Baibel henanadai haida edia haere ita abia haraga lasi neganai, ita haheauka be namo. Hesiai tauna mai ena kamonai bona mai ena kara maoromaoro oreana, nega korikori ai Keristani oreana dekenai lauma aniani idia henia oreana unai, be mai edia manau ida edia gaukara idia karaia, bona mai hekokoroku ida idia do lalo-pararalaia goevagoeva lasi gaudia idia gwauraia toho kava lasi. Hesiai oreana idia ura lasi lalohadai aukadia, idia gwau do idia haidaua lasi lalohadai unai, idia halasia. Idia hekokoroku lasi dainai, idia diba hari henanadai ibounai idia haerelaia diba lasi, bona Aonega Herevadia 4:18 idia laloa noho. Ita moale bada herea, badina ita diba Iehova be ena nega korikori ai bona iena dala ai, ena ura ena hunia herevadia do ia hahedinaraia! Namona be Iehova ia henia gaudia ita dadaraia lasi, bona mai hekokoroku ida hehuni herevadia ia Hahedinaraia Tauna ita hanaia toho lasi. Ita diba hari inai negai Iehova ese ia gaukaralaia oreana ese unai ia karaia lasi dainai, iseda lalona ia hagoadaia bada! Unai orea be abidadama bona lalo-maoromaoro oreana.—Mataio 24:45; 1 Korinto 4:6.
Ia Hahedinaraia Hunia Herevana Idia Harorolaia be Namo!
8 Iehova ese Keristani taudia dekenai ia hahedinaraia “hunia hereva” helagana ia ura lasi idia hunia. Iesu ia hahedinaraia ena murinai idia raka taudia iboudiai—pris taudia haida sibona lasi—ese do idia herevalaia, badina ia gwau: “Umui be tanobada taudia ibounai edia diari. Ororo dekenai ia noho hanua be ia hunia diba lasi. Lamepa idia gabua neganai, maua ena henunai do idia atoa lasi, to lamepa gabuna dekenai do idia atoa, vadaeni ena diari be ruma taudia ibounai do idia itaia. Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.”—Mataio 5:14-16; 28:19, 20.
9 Iesu be gavamani hamorua tauna ta lasi, ia ura lasi hehuni oreana mai ena memba taudia ia haginia, hunia palanina do idia tahua totona. Early Christianity and Society bukana lalonai, Robert M. Grant ese lagani 100 C.E. murinai ia noho tomadiho ena anina gwauraia tauna Justin Martyr ena hereva, Keristani taudia ia gwauraia namo herevana, ia herevalaia, ia gwau: “Bema Keristani taudia be gavamani hamorua taudia, edia tahua gauna abia totona, edia kara do idia hunia.” To Keristani taudia be edena bamona “edia kara do idia hunia” diba bema idia be “ororo dekenai ia noho hanua” bamona? Edia diari be bosea ta henunai idia hunia diba lasi! Unai dainai, gavamani ese edia kara idia garilaia lasi be maoro. Unai buka ia torea tauna ese idia ia gwauraia “maino bona noho namo habadaia totona, idia be lohia tauna ena durua taudia namodia.”
10 Iesu ia ura lasi ena hahediba taudia idia hunia idia be taunimanima idia gwauraia dika tomadiho oreana ta ena memba taudia. (Kara 24:14; 28:22) Hari inai negai bema iseda diari ita hahedinarai lasi, Keriso bona ena Tamana, hehuni herevadia ia Hahedinaraia Tauna, do idia moale lasi, bona do ita moale lasi danu.
11 Iehova “ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9; Esekiela 18:23; 33:11; Kara 17:30) Helalo-kerehai taudia edia kara dika gwauatao dalana tamona be Iesu Keriso ia henia boubou idia abidadama henia. Iena mauri ia bouboulaia haida totona sibona lasi—taunimanima iboudiai totona ia mase—bena “idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Gau badana be taunimanima ita durua edia kara idia haidaua, bena hahemaoro negana ia mai neganai, nanigosi edia kahana ai lasi, to mamoe edia kahana ai do idia gini.—Mataio 25:31-46.
12 Keristani dalana momokanina ita hunia lasi; namona be dala maorodia ibounai ita gaukaralaia ita hahedinaraia totona. Iesu ese haheitalai maorona ia hahedinaraia. Hahelaga tauna badana ese iena hahediba taudia bona iena hahediba herevadia dainai, Iesu ia henanadai henia neganai, Iesu ia haere: “Tanobada taudia dekenai hereva lau gwauraia hedinarai. Nega ibounai dubu lalonai bona Dubu Helaga dekenai lau hadibaia, Iuda taudia idia haboua gabudia ibounai dekenai. Lauegu hereva be lau hunia lasi.” (Ioane 18:19, 20) Iena haheitalai hegeregerena, edena Dirava gari henia tauna be Dirava ia gwau ita hunia lasi herevana ia ura ia hunia? Daika be “aonega ena ki,” mauri hanaihanai dekenai ia hakaua lao ki ta, ia ura ia hunia? Unai bamona kara be aposetolo taudia edia nega ai idia noho tomadiho gunalaia taudia koikoidia edia kara hegeregerena.—Luka 11:52; Ioane 17:3.
13 Namona be tau ta lasi ia gwau diba ita Iehova ena Witness taudia be Dirava ena Basileia sivaraina ita hunia! Herevana idia abia dae eiava idia abia dae lasi, to namona be taunimanima do idia diba unai sivarai ita harorolaia vadaeni. (Esekiela 2:5; 33:33 itaia.) Unai dainai taunimanima dekenai hereva momokani haroro henia daladia idia noho neganai do ita gaukaralaia, herevana taunimanima be edeseniai ita davaria.
Kimai be Satani Ena Aukina ai Do Ia Atoa
14 Tano momo lalodia, niuspepa bona niusi ese Iehova ena Witness taudia idia herevalaia momo. Keristani taudia ginigunadia dekenai ia vara hegeregerena, hereva koikoi idia halasia bona idau dubu maragidia bona hunia oreadia ida idia atoa hebou. (Kara 28:22) Iseda haroro gaukara ita hunia lasi dainai, dagedage taudia ese ita do idia heatu henia haraga, a? Iesu ena sisiba hegeregerena, aonega karana be dala ia noho neganai, heai lalonai do ita vareai lasi. (Aonega Herevadia 26:17; Mataio 10:16) To, Basileia harorolaia gaukarana bona taunimanima durua edia mauri idia hanamoa totona gaukara do ita hunia lasi. Unai ese Iehova ia hanamoa, ia abia isi, bona taunimania ia durua Dirava bona ia haginia vadaeni Basileiana idia laloa totona. Ita moale taunimanima momo be Eastern Europe bona Africa ena tano haida ai Baibel ena hereva idia abia dae, bona unai ia vara badina hari hereva momokani idia harorolaia diba taunimanima vairanai.
15 Momokani, taunimanima vairanai Iehova ena Witness taudia idia karaia haroro gaukarana, idia moalelaia lauma paradaisona, bona edia noho namona—edia taunimanima edia goada bona edia kohu—be tanobada taudia ese idia itadia. Unai gaudia ese kudou namo taudia idia veria mai, to reana dagedage taudia do idia doria oho. (2 Korinto 2:14-17) Reana unai gaudia ese Satani bona ena orea taudia do idia veria mai Iehova ena taunimanima do idia tuari henia totona.
16 Unai ita lalo-hekwarahilaia be namo, a? Iehova ena peroveta herevana Esekiela karoa 38 ai ia hahedinaraia ita lalo-hekwarahilaia lasi be namo. Ia peroveta Goga, Magoga tano tauna, unai be lagani 1914 ai Basileia haginia bena Iesu ese Satani Diabolo ia negea diho tanobadana ai murinai ia gwauraia ladana, ese Dirava ena taunimanima do ia tuari henia. (Apokalupo 12:7-9) Iehova ese Goga ia hamaoroa: “Do oi gwau, ‘Lau ese mai edia magu lasi hanuadia edia tano do lau tuari henia. Lau ese mai maino danu idia noho taudia, tuari idia laloa lasi taudia do lau tuari henia. Badina idia be mai hanua magudia lasi, mai edia magu iduaradia lasi, mai edia auri be loka gaudia lasi. Unai guna idia dika hanuadia lalonai idia noho taudia edia kohu do lau henaoa, bona edia gau do lau abia kava. Idia be bese idauidau edia huanai, gabu idauidau dekena amo idia haboua lou, bona hari, mai edia boromakau bona mamoe momo Israela tano ena huanai momokani idia noho.’ ” (Esekiela 38:11, 12) Siri 4 ia hahedinaraia Dirava ena taunimanima ese unai tuari henia karana dainai idia gari lasi be namo, badina be Iehova ia havaraia dainai ia vara. Dahaka dainai Iehova ese unai bamona dagedage karana ena taunimanima dekenai do ia koua lasi—rakatania? Siri 23 ai Iehova ena haere ita duahia, ia gwau: “Unai dekena amo egu ladana ena namo herea bona egu helaga do lau hedinaraia, bona bese momo edia vairana dekenai egu kara do lau hedinaraia. Unai neganai do idia diba lau be Lohiabada.”
17 Unai dainai, Iehova ena taunimanima be Goga ena tuari henia negana idia garilaia lasi, to unai Baibel peroveta hereva hamomokania gauna idia laloa noho mai edia moale ida. Tanobada dekenai, Iehova ese ena orea ia habadaia bona hanamoa neganai, ia ese kimai ia atodia Satani ena aukina dekenai, ia bona ena tuari orea ia veria mai ia hamorudia totona!—Esekiela 38:4.
Hari Edia Gaukara Idia Habadaia!
18 Hari iseda nega ai, ena be taunimanima momo idia ura lasi, to Iehova ena Witness taudia be edia lalohadai idauidau, Baibel amo idia abia lalohadai, idia herevalaia taunimanima vairanai. Lagani momo lalodiai, kuku bona drag ania kava, natudia matakani henia lasi, sihari kava bona dagedage moale karadia, bona rara henia hanai karadia edia dika idia gwauraia hedinarai vadaeni. Idia be evolusen herevana ena momokani lasi herevadia idia hahedinaraia loulou. Taunimanima momo herea be hari idia gwau, “Iehova ena Witness taudia edia hereva be momokani.” Bema taunimanima vairanai iseda lalohadai ita gwauraia hedinarai lasi, unai bamona hereva do idia gwauraia lasi. Bona unai bamona hereva idia henia neganai, ia hahedinaraia reana gabeai do idia gwau, “Satani, oi be koikoi tauna badana; Iehova ena hereva be maoro.” Unai ese ita ia hagoadaia Iesu ena haheitalai, taunimanima vairanai hereva momokani ia herevalaia haheitalaina, ita tohotohoa noho totona!—Aonega Herevadia 27:11.
19 Nega daudau vadaeni, Iehova ena taunimanima ese unai haroro gaukara maduna idia lalo-pararalaia. Distrik hebouhebou badana ta, lagani 1922 ai, Watch Tower Society ena presiden, J. F. Rutherford, ese idia mai taudia ia hamoalea bada, ia gwau: “Umui aonega, umui gima, umui gaukara, umui gari lasi. Mai emui kamonai bona momokani ida Lohiabada ena hereva umui gwauraia. Umui tuari karaia noho ela bona Babulonia ena kahana maragimaragi iboudiai idia moru. Sivarai namona umui harorolaia tanobada ena kahana ibounai dekenai. Gau badana be tanobada taudia idia diba Iehova be Dirava bona Iesu Keriso be pavapava edia Pavapava bona lohia edia Lohia. Hari be dina iboudiai edia dina badana. Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro; Pavapava bona iena basileia umui harorolaia.”
20 Lagani 1922 ai unai hereva be mai anina, to hari, lagani 75 murinai, Keriso be Hahemaoro bona Davana Henia Tauna ia hedinarai negana be kahirakahira momokani dainai, unai hereva be mai anina bada! Iehova ia haginia vadaeni Basileiana bona Dirava ena taunimanima idia moalelaia lauma paradaisona be “hunia hereva” helagana, to unai hereva be namo herea dainai ita hunia diba lasi. Iesu ese ia hahedinaraia goevagoeva, ia murinai idia raka taudia be lauma helaga ena heduru amo, “tanobada ena kahana ibounai” lalonai, ena dagi badana Iehova ena palani lalonai do idia gwauraia hedinarai. (Kara 1:8; Efeso 3:8-12) Momokani, ita be hunia herevadia ia hahedinaraia Diravana, Iehova, ena hesiai taudia dainai, unai hunia herevana ita hunia lasi be namo!
Edena Bamona Do Oi Haere?
◻ “Hunia hereva” helagana be dahaka?
◻ Edena bamona ita diba ita harorolaia be namo?
◻ Goga be Iehova ena taunimanima do ia tuari henia totona, ia veria gauna be dahaka, bona edena bamona ita laloa be namo?
◻ Namona be ita ta ta be iseda lalona ita hadaia dahaka do ita karaia totona?
[Study Questions]
1, 2. Baibel lalonai, Greek gado herevana my·steʹri·on ena anina be dahaka?
3. Aposetolo taudia edia nega ai ia noho Keristani kongregesen bona hehuni tomadiho oreadia edia idau be dahaka?
4. Daika be “hunia hereva” helagana ena kahana badana, bona edena bamona?
5. “Hunia hereva” helagana ena kahana ma haida be dahaka dahaka?
6. (a) Dahaka dainai ia maoro ita gwau unai “hunia hereva” helagana be “idaunegai ia mai bona hari be idia hunia”? (b) Edena dala ai ia hedinarai noho?
7. Dahaka dainai hesiai tauna mai ena kamonai bona mai ena kara maoromaoro oreana ita abidadama henia diba?
8. Dahaka dainai ita diba “hunia hereva” helagana ita harorolaia be namo?
9. Haida idia gwau Iesu be gavamani hamorua tauna, to edena hereva ia gwau unai be momokani lasi?
10. Dahaka dainai Keristani taudia idia hunia lasi idia be Keristani oreana lalonai?
11, 12. (a) Dahaka dainai Iehova ia ura Keristani dalana ita hahedinaraia? (b) Iesu be edena dala ai haheitalai namona ia haginia?
13. Dahaka dainai, dala ia noho negadia ibounai ita haroro be namo?
14. Dahaka dainai iseda tomadiho henia karana ita hahedinaraia mai gari lasi be namo?
15, 16. (a) Taunimanima vairanai iseda gaukara ita karaia bona lauma dalanai ita taga ese dahaka ia havaraia, unai ita lalo-hekwarahilaia momo be namo, a? (b) Dahaka dainai Iehova be kimai ia atodia Satani ena aukina dekenai?
17. Goga ena tuari henia gwauraia karana be edena bamona ita laloa be namo?
18. (a) Hari taunimanima momo be dahaka idia gwau, bona dahaka dainai? (b) Basileia haroro gaukara idia kamonai taudia haida edia hereva ese edena bamona ita ia hagoadaia?
19, 20. (a) Lagani 1922 ai, Iehova ena Witness taudia ese dahaka hereva idia halasia, bona hari unai hereva be mai anina, a? (b) Iehova ena “hunia hereva” helagana be edena bamona ita laloa?
[Box on page 16]
“Hunia Hereva” Helagana Be Ia Hedinarai Noho
◻ 4026 B.C.E. murinai: Dirava ese Garana ia gwauhamatalaia, ia ese Satani do ia hadikaia ore.—Genese 3:15, NW
◻ 1943 B.C.E.: Dirava ese Aberahamo ia abia gwauhamatana ia hamomokania, bona ia gwau Garana be Aberahamo ena bese amo do ia mai.—Genese 12:1-7
◻ 1918 B.C.E.: Isako ia vara, gwauhamata be iena bese amo do ia mai.—Genese 17:19; 21:1-5
◻ 1761 B.C.E. bamona: Iehova ese ia hamomokania Garana be Isako ena natuna, Iakobo, ena bese amo do ia mai.—Genese 28:10-15
◻ 1711 B.C.E.: Iakobo ia hahedinaraia unai Garana be ena natuna Iuda ena bese amo do ia mai.—Genese 49:10
◻ 1070-1038 B.C.E.: King Davida ia dibaia Garana be ena bese amo do ia mai, bona do ia lohia ela bona hanaihanai.—2 Samuela 7:13-16; Salamo 89:35, 36
◻ 29-33 C.E.: Ia hedinarai Iesu be Garana, Mesia, nega vairai hahemaoro henia tauna, bona Dirava ese ia Abia Hidi King.—Ioane 1:17; 4:25, 26; Kara 10:42, 43; 2 Korinto 1:20; 1 Timoteo 3:16
◻ Iesu ese ia hahedinaraia ma haida be ia ida do idia lohia bona hahemaoro henia gaukarana do idia karaia, guba Basileiana henunai idia noho taudia be tanobada dekenai idia noho, bona unai taudia ibounai be Basileia harorolaia taudia.—Mataio 5:3-5; 6:10; 28:19, 20; Luka 10:1-9; 12:32; 22:29, 30; Ioane 10:16; 14:2, 3
◻ Iesu ese ia hahedinaraia Basileia haginia be mai ena nega, tanobada dekenai idia vara gaudia ese unai nega do idia hamomokania.—Mataio 24:3-22; Luka 21:24
◻ 36 C.E.: Petero ia dibaia Iuda Lasi taudia be Basileia ai Iesu ida do idia noho danu.—Kara 10:30-48
◻ 55 C.E.: Paulo ese ia gwauraia hedinarai Keriso do ia noho negana ai, Basileia do idia abia taudia do idia toreisi lou bona bodaga lasi bona mase diba lasi maurina do idia abia.—1 Korinto 15:51-54
◻ 96 C.E.: Iesu be horoa taudia ia lohia vadaeni, bona ia hahedinaraia edia namba be 144,000 sibona.—Efeso 5:32; Kolose 1:13-20; Apokalupo 1:1; 14:1-3
◻ 1879 C.E.: Zion’s Watch Tower be lagani 1914 ia makaia, Dirava ena “hunia hereva” helagana hagugurua laganina badana unai
◻ 1925 C.E.: The Watch Tower ese ia hahedinaraia Basileia ia vara lagani 1914 ai; Basileia ena “hunia hereva” helagana idia harorolaia be gau badana.—Apokalupo 12:1-5, 10, 17
[Picture on page 15]
Edia Gunalaia Tauna, Iesu, bamona, Iehova ena Witness taudia be taunimanima vairanai Iehova ena Basileia idia harorolaia