Iehova be Abidadama ai Ia Kara

PETER PALLISER ESE INAI SIVARAI IA GWAURAIA

Unai nega be December 1985. Nairobi, Kenya, ena peleini ia diho gabuna badana ai lao henia lalonai, aiemai moale ia bada. Motuka amo siti dekenai ai lao neganai, gau momo ai lalodia lou, toa bona rege gunadia ese ai idia hanogaia dainai.

KENYA dekenai ai mai Iehova ena Witness Taudia edia “Kara Maoromaoro Badinaia Taudia” Distrik Hebouhebou totona. Lagani 12 gunanai, lau bona egu hahine idia hagania Kenya do ai rakatania, badina emai haroro gaukarana idia taravatua. Unuseniai emai noho gabuna be Betele, unai ladana amo Iehova ena Witness taudia edia brens rumadia idia gwauraia. Vadivadi totona ai giroa lou neganai, ai hoa bada herea!

Betele dekenai dina tubua ena aniani idia hegaegaelaia Witness kekeni matamata ta be ena mauri lagani rua negana amo ia ai diba. Betele famili taudia 6 ai dibadia idia maragi neganai. Hari ai itaia uhau bona ulato badadia ai idia lao bona iboudiai, edia ruma besedia danu, ese hesiai gaukara idia goadalaia noho ese moale bada ia havaraia! Iseda Dirava Iehova ese idia ia naria Baibel ena gwauhamata hegeregerena, ia gwau: “Lohiabada e, oi dekenai idia abidadama henia taudia, be oi ese unai taudia oi durua noho. Bona kara maoromaoro taudia dekenai, oiemu kara maoromaoro oi hedinaraia.” (2 Samuela 22:26) Lau itaia egu matamata negana bona unai matamata taudia idia badinaia mauri dalana mai ahuna namona be idia idau herea!

Matamata Negana mai Ena Anina Lasi

Lau be Scarborough, England dekenai, lau vara, August 14, 1918 ai. Lagani rua murinai, egu sinana bona daelai taihuna be Canada dekenai idia lao, unai dainai murina laganidia toi lalonai lau be egu tamana, egu tubuna hahinena, bona egu lalana ida lau noho. Lauegu mauri lagani be ima neganai, Sinagu ese lau ia henaoa bona Montreal, Canada dekenai, lau ia abia lao. Lagani hani murinai lau ia siaia lou England dekenai Tamagu ida do lau noho bona lau sikuli totona.

Egu sinana bona daelai taihuna be hua 6 6 bamona ai lau idia tore henia. Edia revareva edia dokona ai, idia gwau edia ura be lau be emai tano tauna namona ai lau lao bona emai King bona tano do lau badinaia. Reana egu haere revarevadia ese idia habadua badina lau tore henidia lau gwau, bese abia isi karana bona tuari lau abia dae lasi. To, lalo-diari lau abia lasi dainai, egu matamata negana lalonai, lauegu mauri be mai ena anina lasi.

Bena July 1939 ai, pura 6 idia do noho bena Tanobada Ibounai Tuarina Iharuana do ia matamaia neganai, Britain ena ami dekenai lau idia atoa vareai. Unai neganai egu mauri lagani be 20 sibona. Daudau lasi aiemai ami oreana idia siaia France ena not kahana dekenai. Germany edia peleini ese ai idia pidia gwauraia neganai, ai memero ese emai ipidi be idia dekenai ai duduia bona idia ai pidia toho. Unai mauri dalana be mai garina momokani. Germany ena ami idia mai noho lalonai, ai be ai giroa lou, bena lau bona ma haida be unuseni amo ai lao Dunkirk, June 1940 ena pura ginigunana ai. Ami oreana ta ibounai edia mase tauanidia kone dekenai idia hekure edia toana be mai egu gari ida lau do laloatao. Unai gari karana amo lau roho mauri bona bouti maragina ta amo lau lao bona Harwich dekenai lau ginidae, England ena ist kahanai.

Murina laganina, March 1941 ai, lau idia siaia lao India dekenai. Unuseniai peleini ena masini hanamoa ena diba lau abia. Gabeai gorere dainai hospital dekenai nega taina lau noho murinai, lau idia siaia hanai Delhi, India ena siti badana, ena ami oreana dekenai. Egu hanua be daudau herea bona lau do namo momokani lasi, vadaeni vaira negana lau laloa matamaia. Lau laloa momo gauna be ita mase neganai ita dekenai dahaka ia vara.

Badinaia Karana Ma Ta

Lau be egu tano tauna ta, England tauna Bert Gale, ida daiutu tamona ai noholaia Delhi dekenai. Dina ta ia gwau “tomadiho be Diabolo ena amo,” unai hereva ese lauegu lalona ia veria. Iena adavana be Iehova ena Witness hahinena ta ai ia lao, bona nega ta ta ai, tau dekenai Baibel idia herevalaia bukadia ia siaia. Idia ta, Hope buklet, ese egu lalona ia veria. Toreisi lou helarona ia herevalaia dalana ese lau dekenai lalo-maino korikorina ia henia.

Lagani 1943 ena matamana ai, Bert ese England bona India vara hanai tauna ta, Teddy Grubert, ia hereva henia, ia be ami tauna lasi bona ai ida ami ena gabu dekenai ia gaukara. Ai diba matamaia Teddy be Witness tauna neganai, ai hoa. Lagani 1941 ai Iehova ena Witness taudia edia buka idia taravatua, to Witness taudia be Delhi dekenai idia hebou bona ia ese ai ia abia lao unuseniai. Unai kongregesen maragina ai, nega ginigunana egu mauri lalonai hebamo korikori mai lalokau ida lau mamia. Basil Tsatos, Keristani tadikaka gunana ta Greece amo, ese lau ia laloa bada bona egu henanadai ia haerelaidia. Ia ese Baibel ena haere namodia ia henia gau idauidau edia henanadai dekenai, hegeregere dahaka dainai ita buruka bona ita mase, toreisi lou, bona Dirava ia gwauhamatalaia kara maoromaoro tanobada matamatana.​—⁠Kara 24:15; Roma 5:​12; 2 Petero 3:​13; Apokalupo 21:​3, 4.

Buklet ladana Peace​—⁠Can It Last?, lagani 1942 ai idia halasia gauna, ese egu lalona ia veria badabada. Ia hahedinaraia League of Nations be “dagedage gauna kakakakana.” (Apokalupo 17:⁠3) Buklet ese Apokalupo karoa 17, siri 11, ena hereva ia torea bona ia gwau: “Hari ita gwau diba League be ‘guna be ia noho, to hari be ia noho lasi,’ ” Bona ma ia gwau: “Tanobada besedia edia orea be do ia toreisi lou.” Lagani 1945 ai, lagani toi mai kahana murinai, unai hegeregerena ia vara momokani United Nations oreana idia haginia neganai!

Witness taudia edia buka idia taravatua negana lalonai, lau be egu turana matamatadia lau durua diba. Peace​—⁠Can It Last? buklet ena maua ta ia mai neganai, kongregesen ese lau idia henia do lau naria totona. Daika do ia laloa ami kamepa do ia sekea, idia taravatua bukadia do ia tahua totona? Hebou lau lao negadia ta ta ai, buklet haida sibona do lau abia lao, tadikaka lau henidia totona. Bema edia ruma do idia sekea garina idia gari, idia sibona edia Baibel herevalaia bukadia do lau hunia danu. Gabeai, December 11, 1944 ai, taravatu idia kokia.

Lagani 1943 ai, aiemai ami oreana ese Kerisimasi moaledia idia hegaegaelaia neganai, Keristani hahediba do lau badinaia karana ia tohoa. Unai kara lau dadaraia, badina lau diba vadaeni Iesu be December ena keru negana ai ia vara lasi bona Keristani ginigunadia ese Kerisimasi idia moalelaia lasi.​—⁠Luka 2:​8-​12 itaia.

December 27 ia lao 30, 1944 ai, “United Announcers” Hebouhebouna be Jubbulpore (Jabalpur) ai idia karaia neganai, lau danu be hebou taudia 150 bamona edia huanai. Unai hebouhebou taudia momo be trein amo Delhi amo idia mai, bona idia heau ena daudau be kilomita 600 ia hanaia. Murimuri gabuna ta dekenai ai hebou ena mamina namona do lau laloaboio lasi, unuseniai Iehova ena orea ena heau dalana lau itaia.

Hebouhebou dainai idia mai taudia be sikuli ena mahuta rumadia dekenai idia atodia, bona unuseniai Basileia anedia ai abia bona Keristani hebamo karana ai moalelaia. Hebouhebou negana lalonai haroro gaukarana lalonai lau vareai, unai nega amo egu kudouna amo lau ura henia noho gaukarana unai.

Ful-Taim Hesiai Gaukarana England Dekenai

Lagani 1946 ai lau giroa lou England dekenai bena Wolverton Kongregesen lau bamoa matamaia. Herevana ai Basileia harorolaia taudia ibounai be 10 sibona, to idia dainai egu hemami ia namo, bona egu lalona ia hegeregere, guna India dekenai egu tadikaka huanai lau noho hegeregerena. Unai kongregesen lalonai Vera Clifton be kudou-namo momokani kekenina. Lau diba ia be lauegu ura bamona ia ura ia painia danu neganai, ai ruaosi ai headava, May 24, 1947 ai. Lau ese karavan ta, o veria loaloa rumana, lau hanamoa bena murina laganina ai emai painia gabuna ginigunana idia henia, Huntingdon taoni unai.

Unai negadiai ai be daba momokani ai, baisikele amo hanua gabudia dekenai ai lao. Dina ibounai lalonai ai haroro to nega kwadogi sibona dina tubua paraoa ania totona ai laga-ani. Herevana lai goada herea o medu bada herea lalonai ai heau lao ruma, to Lohiabada ena gaukara lalonai ai moale bona emai lalona ia namo.

Gabeai ai ura emai hesiai gaukara ai habadaia bona idau tano taudia dekenai “Sivarai Namona” do ai kikilaia. (Mataio 24:14) Unai dainai aplikeisini ai siaia Gilead misinari sikuli ai lao totona, South Lansing, New York, U.S.A. dekenai. Ai idia abia dae Gilead ena klas namba 26 lalonai bona February 1956 ai, sikuli ai haorea.

Hesiai Gaukara Ia Bada Africa Dekenai

Misinari gaukara totona ai idia siaia gabuna be Northern Rhodesia (hari Zambia), Africa dekenai. Ai ginidae bena daudau lasi murinai, ai idia boiria unai tano ena Betele dekenai hesiai gaukara karaia totona. Egu Betele gaukarana ena anina ta be East Africa tadikakadia dekenai revareva lau siaia bona abia. Lagani 1956 ai, Kenya​—⁠unai be East Africa tanona ta​—⁠dekenai Witness taudia be hani sibona, to Northern Rhodesia dekenai edia momo be 24,000 ia hanaia. Lau bona Vera ai laloa matamaia heduru idia ura gabuna dekenai hesiai gaukara do ai karaia be namo herea.

Bena, lau laloa lasi negana ai, lau idia boiria lao Gilead Sikuli dekenai, hua 10 lalonai gunalaia taudia edia kosi karaia totona. Northern Rhodesia dekenai Vera lau rakatania bena lau lao New York City, unai neganai Gilead Sikuli be unuseniai idia karaia. November 1962 ai kosi lau haorea murinai, lau idia siaia lao Kenya dekenai brens opesi ta haginia totona. Unai nega ai Kenya dekenai Witness taudia edia momo be 100 ia hanaia vadaeni.

Northern Rhodesia dekenai Vera hedavari henia totona lau giroa lou lalonai, lau be Nairobi, Kenya dekenai, do lau diho nega kwadogi sibona. To lau ginidae neganai, Bill Nisbet, Gilead ena klas namba 25 tauna ta, ese lau ia hedavari henia bena lau ia hamaoroa gavamani ena gwaumaoro abia dalana ta ia noho maoromaoro Kenya dekenai lau vareai diba totona. Gwaumaoro henia taudia dekenai ai lao bona miniti haida sibona murinai, lagani ima unuseni lau gaukara diba ena gwaumaoro pepana idia henia. Unai dainai Northern Rhodesia dekenai lau giroa lou lasi; to, Vera ia mai bona Nairobi dekenai ai hedavari.

Swahili gado ena sikuli ai haorea murinai, Nairobi kongregesen maragina ai bamoa haroro gaukarana ai. Nega haida Swahili gado ai emai haroro herevana ai duahia murinai, ruma tauna do ia gwau: “Lau be English gado lau diba lasi!” To herevana, ai haheauka bona metairametaira gado ena hekwakwanai ai hanaia.

Aiemai teritori lalonai be ruma oreadia ta ta danu, mai edia Baibel ladadia haida hegeregere Jerusalem bona Jericho. Idia kamonai haraga, bona unuseni amo Basileia harorolaia taudia matamatadia momo idia mai. Baibel ena hereva momokanina ese unai taudia ia haidaua momokani! Iduhu abia isi karana ia boio bona Basileia badinaia karana ese Iehova ena taunimanima ia hatamonaia. Iduhu idauidau idia headava heheni danu, Witness lasi taudia huanai ia vara lasi karana ta unai.

Basileia harorolaia taudia matamatadia ese hereva momokani idia ura henia mai edia lalo-goada ida. Hegeregere, Samson ia ura dikadika iena hanua dekenai Baibel ena hereva momokani do ia vareai, unai dainai painia do idia siaia lao totona ia noinoi hanaihanai. Iena ruma Ukambani distrik dekenai ia habadaia danu, do idia noho totona. Daudau lasi murinai, unuseniai Basileia harorolaia taudia edia kongregesen matamata ta idia haginia.

Nega haida aiemai tadikaka East Africa tanona Ethiopia dekenai lau vadivadi henidia. Haroro gaukara ai hua ta ta idia haorea hora ena averes be 20 ia hanaia, herevana dibura dekenai idia atodia, idia dadabaia, bona idia tahudia. Nega ta Ethiopia tadikaka bona taihu be basi rua amo wiki ta lalonai idia laolao, ororo edia dala aukadia idia hanaia, Kenya dekenai distrik hebouhebou idia lao totona. Basileia bukadia edia tano ai abia vareai totona dala idauidau idia hegaegaelaia be ai hoalaia. Kenya dekenai ai moale idia ai durua unai gaudia idia abia totona.

Lagani 1973 ai, gavamani ese emai gaukara Kenya dekenai ia taravatua, bona misinari taudia idia hagania unai gabu idia rakatania. Unai neganai Kenya dekenai Witness taudia edia momo be 1,200 ia hanaia, bona idia momo be peleini gabuna idia lao ai idia siaia totona; unai ai laloaboio diba lasi. Idia mai dainai, ai ida ia lao gwauraia tauna ta ia henanadai ai be ladana bada taudia haida eiava. Lau bona Vera ai giroa lao England bona unuseniai gaukara ta idia henia toho, to ai ura dikadika do ai giroa lou Africa dekenai.

Ai Giroa Lou Africa Dekenai

Hua haida sibona murinai, aiemai gaukara matamata idia henia; do ai lao west Africa tanona Ghana ena siti badana Accra dekenai, Betele dekenai do ai gaukara totona. Unuseniai lau karaia gaukarana amo emai tadikaka edia metau lau itaia goevagoeva. Betele famili ena aniani bona gau ma haida lau hoia neganai, lau itaia aniani edia davana idia bada herea momokani dainai lau hoa. Nega momo oi ura abia gaudia oi hoia be hegeregere lasi. Petrol be hegeregere lasi bona motuka hanamoa ena kohu ma haida davaria be auka, unai ese aiemai hekwarahi idia habadaia.

Mai haheauka ida naria karana ena anina lau lalo-pararalaia, aiemai Ghana tadikaka ese idia manadalaia karana unai. Koikoi dalana ai mauri durua gaudia idia abia diba, to unai hahetoho idia dadaraia mai edia moale ida ese lau ia hagoadaia bada. Edia kara dainai, Ghana taudia idia diba momokani Iehova ena taunimanima be koikoi lasi taudia bona gavamani taudia momo ese idia lalo-namo henidia.

Herevana tauanina gaudia dekenai idia hegeregere lasi, to lauma dalanai idia tubu daekau. Unai tano ibounai lalonai, aiemai Baibel herevalaia bukadia be ruma ibounai dekenai idia noho. Bona ai ginidae negana lagani 1973 ai, Basileia harorolaia taudia edia namba be 17,156, bona unai amo ia daekau 23,000 ia hanaia lagani 1981 ai. Unai lagani ai kopina ena kensa lau abia, badina lagani momo lalodiai India bona Africa ai dina ese lau ia abia momo. Unai dainai Ghana ai rakatania bena ai giroa lao England, idia hanamoa noho totona.

Noho Dalana Matamatana England Dekenai

Ai giroa lou neganai, unai ena anina lau dekenai be egu haroro dalana do lau haidaua. Dirava bona Baibel idia matauraia taudia ida lau herevahereva karana lau manadalaia vadaeni. To London dekenai, unai bamona kara davaria be auka. Britain tadikaka edia haheauka karana lau hoalaia. Lau ia durua lauma dalanai “idia manokamanoka, bona idia lao idau gabu idau gabu dekenai” taudia do lau hebogahisi henidia.​—⁠Mataio 9:⁠36.

Africa amo ai giroa mai murinai, lau bona Vera be London ena Betele dekenai ai gaukara ela bona Vera ia mase, September 1991 ai, ena mauri laganidia be 73 neganai. Lagani momo lalodiai hesiai gaukara ai karaia hebou turana, mai ena abidadama lau haboioa be lalohisihisi bada gauna. Ena hebamo lau reaia momokani. To emai Betele famili taudia 250 bamona edia heduru dainai lau moale.

Iehova ena orea ia heau lao noho bona momo herea ese ful-taim hesiai gaukara edia mauri lalonai idia karaia lau itaia be momokani hahenamo ta. Oi lau hamaoroa, unai mauri dalana be ma dala ta ese ia hereaia lasi, badina be ‘iena abidadama taudia, be Iehova ese do ia rakatania lasi.’​—⁠Salamo 37:⁠28.

[Picture on page 23]

Lagani 1947 ia lao 1955 England dekenai painia gaukara ai karaia

[Picture on page 23]

Haroro gaukara ginigunana India ena hebouhebou negana lalonai

[Picture on page 23]

Northern Rhodesia ai misinari gaukara ai karaia negana

[Picture on page 23]

Lagani 1985 ai, lagani 12 lalodiai ai itadia lasi turadia ida