Iehova ese Lau Dekenai Hahenamo Momo Ia Henia

Painia gaukara lau karaia matamaia neganai, Iehova ese lau dekenai hahenamo ta ia henia. (Efe. 3:20) To, reana do oi laloa edena dala ai? Mani unai lau sivarailaia.

Lau be lagani 1939 Germany Berlin ai lau vara, unai nega ai Tanobada Tuarina Iharuana ia matamaia. Lagani 1945 ai tuari ia ore ia lao noho neganai, Berlin ai bomu momo idia negea. Nega ta emai noho gabuna ai bomu ta idia negea dainai, lau, egu tama sina bona egu tadina kekeni be bomu ese ia hadikaia lasi gabuna ta dekenai ai heau lao. Emai mauri totona gabeai Erfurt, egu sinana ia vara gabuna dekenai ai lao.

Egu sinana be mai ena ura ida hereva momokani ia tahua. Ia ura hereva momokani ia dibaia dainai diba bada taudia ese idia torea bukadia ia duahia bona dubu idauidau edia heduru ia tahua, to heduru ta ia davaria lasi. Lagani 1948 ai, Iehova ena Witnes taudia rua be emai ruma dekenai idia mai. Emai sinana ese idia ia abia dae bona idia dekenai henanadai momo ia henia. Hora ta ia ore murinai, egu sinana be lau bona egu tadina kekeni ia hamaoroa, “Lau be hereva momokani lau davaria vadaeni!” Daudau lasi murinai, egu sinana, egu tadina kekeni bona lau be Erfurt ai idia karaia heboudia dekenai ai lao.

Lagani 1950 ai Berlin dekenai ai giroa lou, bona unuseniai Kreuzberg Kongrigeisen tadikaka taihu ai bamoa. To unai murinai, gabu ma ta dekenai ai noho bona Berlin-Tempelhof Kongrigeisen heboudia ai lao. Daudau lasi murinai, emai Sinana ia bapatiso to lau mamia lau do hegeregere lasi bapatiso totona. Dahaka dainai?

EGU HEMARAI KARANA LAU HANAIA

Lau be hemarai momo merona dainai ia auka Iehova lau hesiai henia totona. Ena be haroro gaukara ai ma haida lau bamoa, to lagani rua lalonai taunimanima lau hereva henia lasi. To edia abidadama goadana idia hahedinaraia tadikaka taihu lau bamoa neganai, egu hemarai karana lau hanaia. Idia haida be guna Nazi ena dibura kamepa eiava East German ena dibura ruma ai idia noho. To ma haida be hunia dalana ai East German ai iseda pablikeisen idia abia hanai. Edia haheitalai ese lau ia hagoadaia bada. Lau diba bema idia be Iehova bona edia tadikaka totona edia mauri idia haboioa diba, vadaeni namona be lau gaukara goada egu hemarai karana lau hanaia totona.

Lagani 1955 ai, spesel kempein haroro gaukara ai lau vareai neganai, egu hemarai karana lau hanaia matamaia. Guna idia gwauraia Informanta ena revareva ta ai Tadikaka Nathan Knorr ese ia hahedinaraia German dekenai nega bada idia atoa unai kempein gaukarana idia hegaegaelaia totona. Danu, ia gwau bema pablisa ibounai be unai gaukara lalonai idia vareai, “ai ibounai be unai hua lalonai ai karaia haroro gaukara do ai moalelaia bada.” Unai ia vara momokani! Daudau lasi murinai, Iehova dekenai egu mauri lau gwauhamatalaia bona lagani 1956 ai lau, egu tamana bona egu tadina kekeni be bapatiso ai abia. To, unai murinai mai anina bada abia hidi ta lau karaia.

Lagani momo lalonai lau abia dae painia be gaukara namona, to lau laloa gabeai do lau painia. Matamanai lau laloa reana Berlin ena wholesale badana ta dekenai lau gaukara bona tano ma haida amo aniani hoia bona siaia gaukarana lau karaia. Lau ura unai gaukara karaia dalana lau dibaia namonamo bena unai murinai lau painia diba. Unai dainai, lagani 1961 ai Germany ena siti badana ta Hamburg ai unai gaukara ta lau karaia. Unai gaukara lau ura henia bada dainai painia gaukarana lau karaia haraga lasi. Dahaka do lau karaia?

Lau moale badina Iehova be tadikaka taihu ia gaukaralaia lau idia durua painia gaukara lau laloa bada totona. Egu turana haida be idia painia matamaia bona lau dekenai idia be haheitalai namona. Guna Nazi ena dibura kamepa ai ia noho tauna, Tadikaka Erich Mundt ese lau ia hagoadaia Iehova lau abidadama henia totona. Tadikaka ia gwau, dibura kamepa ai idia noho tadikaka haida be Iehova ena heduru idia tahua lasi dainai edia abidadama ia manoka. To, Iehova ena heduru idia tahua tadikaka be iena orea idia badinaia bona kongrigeisen idia durua.

Bona danu Tadikaka Martin Poetzinger, gabeai ia be Hakaua Oreana ena memba ta ai ia lao, ese tadikaka ia hagoadaia ia gwau: “Umui goada be mai anina bada!” Unai hereva lau laloa dobu neganai, egu moni gaukara lau rakatania bona lagani 1963 June ai painia gaukarana lau karaia matamaia. Lau moale badina unai be abia hidi hereadaena! Hua rua murinai, moni gaukara ta lau tahua matamaia neganai, lau idia boiria spesel painia gaukara lau karaia totona. Lagani haida idia ore murinai, Iehova ese lau dekenai hahenamo momo ia henia. Bona lau idia boiria Gilead Sikuli klas namba 44 dekenai lau lao totona.

GILEAD SIKULI AI MAI ANINA BADA GAUNA LAU DIBAIA

Tadikaka Nathan Knorr bona Lyman Swingle ese mai anina bada herevana ta idia gwauraia, idia gwau: “Emui asainmen dekenai umui hesiku haraga lasi.” Edia hereva amo gau ta lau dibaia. Ena be emai asainmen ai hekwakwanai do idia vara, to ai idia hagoadaia ai hesiku haraga lasi totona. Tadikaka Knorr ia gwau: “Do umui laloa bada gauna be dahaka? Do umui lao gabuna be miro, bugs, eiava ogogami maurina? Eiava au, flaoaflaoa bona taunimanima edia moale toana do umui laloa, a? Taunimanima umui ura henia!” Dina ta Tadikaka Swingle ena lalona ia manoka dainai ia tai, badina tadikaka ma haida be edia asainmen idia rakatania ena badina ia herevalaia. Nega sisina lalonai ena tok ia hadokoa bena ena lalona ia goada murinai ia hereva lou. Unai ese lau ia hagoadaia bada dainai egu lalona lau hadaia Keriso eiava iena abidadama hesiai tadikaka totona ful-taim hesiai gaukara do lau karaia noho.​—⁠Mat. 25:40.

Emai asainmen ai abia neganai, Betele ai idia gaukara tadikaka toi be ai idia nanadaia bona idia ura diba edeseniai do ai lao. Emai asainmen totona hagoadaia herevadia idia gwauraia, to lau gwau, “Congo (Kinshasa)” neganai, idia hoa. “To, ai idia hamaoroa Iehova be umui do ia naria!” Unai negai Congo (Kinshasa) dekenai tuari ena sivarai momo ai kamonai, tano idauidau idia lao soldia taudia idia noho bona ala-ala karana be ia bada. To, Gilead sikuli dekenai lau dibaia gaudia lau laloa lou. Lagani 1967 September ai, emai Gilead gradueisen murinai, lau, Heinrich Dehnbostel, Claude Lindsay be Congo ena siti badana Kinshasa dekenai ai lao.

MISINARI TAUDIA EDIA TREININI GABU NAMONA

Kinshasa dekenai ai ginidae neganai, hua toi lalonai French gado ai dibaia matamaia. Bena, Lubumbashi, guna idia gwauraia Elisabethville, ia be Zambia ena boda kahirakahira Congo ena saut kahana dekenai ai lao. Siti huanai ia noho misinari rumana dekenai ai noho.

Ai moale bada badina Lubumbashi ena gabu momo dekenai hereva momokani ai harorolaia, bona ai be unuseniai ai lao taudia ginigunadia. Daudau lasi murinai, Baibel stadi momo ai hamatamaia. Gavamani bona pulisi totona idia gaukara taudia ai haroro henidia danu. Momo be Dirava ena Hereva bona haroro gaukara idia matauraia bada. Unuseniai idia noho taudia be Swahili gado ai idia hereva diba, unai dainai lau bona Claude Lindsay be unai gado ai dibaia danu. Unai murinai, Swahili gado idia herevalaia kongrigeisen dekenai ai idia siaia lao.

Ena be hahenamo momo ai moalelaia, to hekwakwanai momo ai davaria danu. Nega haida kekero soldia taudia be edia ipidi amo ai idia hagaria eiava pulisi taudia haida be ai idia samania koikoi. Nega ta, misinari ruma ai emai kongrigeisen hebou ai abia lalonai pulisi taudia momo be mai edia ipidi ida idia vareai bona ai idia abia lao pulisi steiseni dekenai. Unuseniai ai helai ela bona 10 o’klok hanuaboi bena ai idia siaia giroa lou.

Lagani 1969 ai, lau idia boiria sekit naria gaukarana lau karaia totona. Sekit naria tauna ena gaukara lau karaia neganai, lau be Africa ena gabu haida dekenai kopukopu bona uda badadia lalonai lau raka. Hanua ta dekenai lau noho neganai egu hekure gabuna henunai, kokoroku ta mai ena natuna ida idia noho. Dina ia do daekau lasi neganai kokoroku ena boiboi regena ese lau ia hanogaia, bona unai do lau laloaboio lasi. Tadikaka taihu ida ai helai hebou bona hereva momokani ai herevalaia negadia lau laloatao.

Ai davaria hekwakwanai badana ta be, emai huanai tadikaka haida be hunia dalanai Kitawala oreana idia durua noho.b Bona idia haida be hehuni dalana ai kongrigeisen maduna idia huaia danu. Unai bamona tadikaka be “ranu henunai idia noho nadi bamona,” to tadikaka taihu be edia koikoi karadia idia diba. (Iuda 12) Daudau lasi murinai, Iehova ese kongrigeisen amo unai bamona taudia ia kokia. Bona taunimanima be hereva momokani lalonai idia vareai.

Lagani 1971 ai, lau idia boiria Kinshasa ena brens ofesi ai lau gaukara totona. Unuseniai gaukara idauidau hegeregere, revareva lau torea, kongrigeisen ena literature bona Service Dipatmen ai lau gaukara. Betele ai lau noho neganai, unai siti badana totona gaukara idauidau hegaegaelaia namonamo karana lau dibaia, to unai negai gau momo idia heau namonamo lasi. Nega haida peleini amo ai siaia revareva momo be hua haida murinai kongrigeisen dekenai idia ginidae. Unai revareva be peleini amo idia kokia bona bouti amo idia siaia, to bouti be wiki haida lalonai ia heau lasi badina ranu ataiai idia tubu ava (hyacinths) ese sinavai ia koua. Ena be unai ia vara, to unai ese emai gaukara ia koua lasi.

Lau hoalaia gauna be, herevana tadikaka taihu be moni dalanai idia hegeregere lasi, to hebouhebou badadia momo idia hegaegaelaia diba. Hegeregere tok idia henia platfom be dimairi (termite) ena ruma amo idia karaia bona haba bona helai gabudia be ava latadia (elephant grass) amo idia karaia. Baubau audia amo hebouhebou rumana idia karaia bona danu geda, guhi bona teibolo idia karaia. Unai negai ikoko be lasi dainai au ena kopina idia utua maragimaragi bona ikoko bamona gaudia ai idia halaoa. Lau hoa badina tadikaka taihu be edia aonega bona diba idia gaukaralaia unai gau idauidau idia karaia totona. Idia lau lalokau henia bada. Asainmen matamata ta lau abia bona gabu ma ta dekenai lau lao neganai, idia lau reaia bada!

KENYA AI EMAI HESIAI GAUKARA AI KARAIA

Lagani 1974 ai, Nairobi, Kenya ena brens ofesi dekenai lau idia siaia. Unuseniai gaukara bada ia noho, badina brens ofesi be Africa ena tano 10 ena haroro gaukara ia durua danu, unai tano haida be gavamani ese iseda haroro gaukara ia taravatua. Lau idia abia hidi unai tano ta ta lau vadivadi henia bona Ethiopia be unai tano ta. Unuseniai, iseda tadikaka be dagedage bona hahetoho momo idia davaria. Idia momo be idia botadia bona dibura ruma ai idia atodia, haida be idia hamasea. To, idia momo be idia haheauka badina edia hetura karana Iehova bona edia tadikaka ida be ia goada.

Lagani 1980 ai, Gail Matheson lau adavaia. Gail be Canada amo, bona ai ruaosi be guna Gilead klas namba 44 ai lao. Ai ruaosi be revareva ai torea heheni. Gail be Bolivia dekenai misinari gaukara ia karaia. Lagani 12 ia ore murinai New York dekenai ai hedavari lou. Daudau lasi murinai Kenya ai ai headava. Lau moale bada badina Gail be Iehova ia lalokau henia bona ena mauri ai gau momo ia laloa lasi. Ia be nega ibounai lau ia durua bona ia be adavana namona.

Lagani 1986 ai, lau bona Gail idia abia hidi sekit gaukara ai karaia bona danu lau be Brens Komiti ena memba ta. Ai be Kenya brens henunai idia noho teritori dekenai sekit naria gaukara ai karaia.

Lau laloatao lagani 1992 ai, guna idia gwauraia Asmara (Eritrea ai) dekenai hebouhebou ta totona gabu ai tahua, bona unai nega ai gavamani ese haroro gaukara idia taravatua lasi. Gabu ta ai davaria lasi dainai animal edia aniani idia haboua ruma ta ai abia hidi, ena be ena murimuri kahana be namo sisina to ena lalona kahana be dika momokani. Hebouhebou negana ai lau lao neganai, lau hoa badina tadikaka taihu ese unai ruma idia hanamoa bona Iehova tomadiho henia gabuna ai idia halaoa. Ruma bese momo be dabua namodia idia gaukaralaia unai ruma ena toana idia hahairaia totona. Unai hebouhebou ai moalelaia bada bona idia lao taudia ibounai be 1,279.

Sekit gaukara ai karaia neganai, ai be wiki ta ta ai gabu idauidau ai noho. Nega ta, ai be kone badinai ia noho ruma badana ta dekenai ai noho, bona nega ma ta be ruma maragina momokani ta dekenai ai noho bona unai ruma ena toilet ia noho gabuna ena daudau be 100 mita bamona. Herevana edeseniai emai hesiai gaukara ai karaia, to painia bona pablisa taudia ibounai ida ai karaia gaukara namona do ai laloaboio diba lasi. Emai asainmen ma ta ai abia neganai, gabu ma ta dekenai ai lao unai dainai emai tura namodia do ai reaia bada.

ETHIOPIA AI HAHENAMO MOMO AI ABIA

Lagani 1980 bona 1990 huanai Kenya brens henunai idia noho tanodia be edia haroro gaukara idia karaia diba, bona gavamani be unai ia taravatua lasi. Unai dainai Kenya dekenai brens bona ofesi ma haida idia haginia. Lagani 1993 ai, Addis Ababa, Ethiopia ena ofesi ta dekenai ai idia siaia. Unuseniai lagani momo gunanai hunia dalanai iseda gaukara idia karaia ela bona gavamani ese gwaumaoro idia henia iseda haroro gaukara ita karaia totona.

Iehova ese Ethiopia ai idia karaia gaukara ia hanamoa. Tadikaka taihu momo be painia gaukara idia karaia. Pablisa taudia ibounai amo 20 pesen bamona be lagani 2012 amo painia gaukara idia karaia. Danu, treinini namona abia totona orea ese sikuli momo ia hegaegaelaia bona Kingdom Hall ibounai 120 mai kahana idia haginia. Lagani 2004 ai Betele famili be bildin matamatana dekenai idia hanaia, bona unai gabu tamona dekenai Assembly Hall matamatana idia haginia bona unai be hahenamo badana ta.

Lagani momo lalonai, lau bona Gail be emai hetura karana Ethiopia ai idia noho tadikaka taihu ida ai moalelaia bada. Idia ai lalokau henia bada badina hanaihanai ai dekenai hebogahisi karana bona kara namodia idia hahedinaraia. Lagani haida lalonai ai gorere, unai dainai emai asainmen idia haidaua bona Central Europe brens dekenai ai idia siaia. Unuseniai, ai idia naria namo herea, to Ethiopia ai idia noho tadikaka taihu ai reaia bada.

IEHOVA ESE EMAI HESIAI GAUKARA IA HANAMOA BADA

Ai itaia Iehova ese emai hesiai gaukara ia hanamoa bada. (1 Kor. 3:6, 9) Hegeregere, matamanai Congo ai copper idia tahua Rwanda taudia lau haroro henia, to unai negai Rwanda dekenai pablisa ta ia noho lasi. To hari Rwanda ai tadikaka taihu 30,000 mai kahana idia noho. Lagani 1967 ai, Congo (Kinshasa) ai pablisa ibounai 6,000 idia noho. Bona hari edia pablisa ena namba be 230,000 mai kahana bona lagani 2018 ai taunimanima milioni ta mai kahana be Memorial dekenai idia lao. Kenya brens henunai idia noho tanodia ibounai edia pablisa ena namba ia daekau 100,000 mai kahana bamona.

Lagani 50 gunanai Iehova ese tadikaka idauidau ia gaukaralaia lau idia durua ful-taim hesiai gaukara lau karaia totona. Herevana hari danu lau hemarai, to Iehova abidadama henia karana ese lau ia durua. Africa ai lau dibaia gaudia ese lau idia durua haheauka karana lau hahedinaraia bona gau momo lau laloa momo lasi totona. Lau bona Gail be iseda tadikaka taihu edia heabidae karadia, hekwakwanai idia haheaukalaia daladia bona Iehova abidadama henia karana ai moalelaia bada. Iehova ena hebogahisi karana lau moalelaia. Ia ese lau dekenai hahenamo momo ia henia.​—Sal. 37:4.