Hoa Karana amo Gorere Hanamoa Karadia Idia Do Vara Noho, A?
“IESU oi abia dae bona do oi namo!” Unai bamona hereva ese Alexandre, Evangelical dubu ena memba tauna ena lalona ia veria bona ia laloa bema muramura ia abia iena gorere totona unai ese do ia hahedinaraia ia be abidadama lasi. Ia abia dae momokani iena abidadama sibona ese do ia hanamoa diba hoa karana amo. São Paulo, Brazil, ena Aparecida do Norte dubuna dekenai hoa karadia idia vara ia kamonai neganai, unai ese Katolik hahinena goadana Benedita ena lalona ia veria momokani. Benedita be ena sinana badana ese ia hadibaia meamea herevadia haida amo Our Lady of Aparecida, Anthony, bona “helaga taudia” ma haida dekenai ia guriguri gorere taudia hanamoa siahuna abia totona.
Ia hedinarai, hari inai nega lalonai danu, taunimanima momo be hoa karadia amo gorere hanamoa karadia idia abia dae—to dahaka dainai? Momo be doketa ese edia lalokau taudia, nega momo edia natudia, edia gorere bona edia hisihisi idia hanamoa diba lasi dainai idia badu. Hanaihanai idia gorere taudia be idia laloa hari inai nega muramura edia davana be bada herea dainai, abidadama amo gorere idia hanamoa taudia dekenai idia lao edia noho ena dika do ia habadaia lasi. Haida be TV dekenai idia itaia dubu haida bona taunimanima ta ta be AIDS, daradoko, kensa, kwarana ia kavakava, rara ia bada daekau, bona gorere ma haida momo idia hanamodia diba. Herevana idia ese unai kara idia abidadama henia eiava lasi, dala ma ta be lasi neganai, momo be idia dekenai idia lao. Idia abia dae edia gorere be lauma dikadia ese idia havaraia taudia be idia laloa doketa edia muramura be siahu lasi idia hanamodia totona.
To, ma haida be idia mase vadaeni “helaga taudia” eiava idia do mauri noho hanamoa taudia edia hoa karadia idia gwauraia dika bona idia dadaraia vaitani. Jornal da Tarde niuspepa lalonai, tauanina ena goada gorere koua dalana ia diba momo doketa ta, Dráusio Varella ia laloa hoa karadia abidadama henia karana ese “idia gima lasi taudia bona edia gorere hanamoa haraga dalana idia tahua taudia ia koidia.” Ma ia gwau: “Idia laloa hoa karadia ese edia gorere do ia hanamoa taudia momo ese mai anina bada medikal heduru idia rakatania unai koikoi karana dainai.” The New Encyclopædia Britannica ia gwau: “Guna, gorere hanamoa karadia idaudia be tomadiho gabudia ai bona tomadiho karadia amo idia vara dainai, medikal saiens taudia idia gwau gorere idia hanamoa badina be gabu bona nega be namo taunimanima edia lalona idia veria totona.” To, momo idia abia dae hoa karana ese ia hanamodia. Idia laloa idia dekenai, unai hanamoa karana be ia gaukara momokani!
Baibel idia diba taudia idia diba Iesu Keriso be nega momo “Dirava ena siahu” amo gorere taudia ia hanamodia. (Luka 9:42, 43) Unai dainai idia henanadai, ‘Hari, Dirava be hari ena siahu ia do gaukaralaia noho hoa karadia amo gorere hanamoa totona, a?’ Bema unai bamona ia karaia, dahaka dainai hoa karadia idia gwauhamatalaia hahenamo idia havaraia lasi? Gorere tauna ena abidadama be hegeregere lasi eiava ia henia monina be ia bada lasi dainai, a? Keristani tauna be hisihisi bada eiava hanamoa dalana be lasi gorerena ia abia neganai, hoa karana ia tahua ena gorere hanamoa totona be maoro, a? Bona Iesu ese ia karaia gorere hanamoa momokani hoa karadia do idia vara lou diba, a? Hereva gabena lalonai unai mai anina bada henanadai edia haere oi davaria diba.