Iehova Ena Ura Idia Karaia

Kara Dika Ia Gwauatao Haraga Tamana Ta

IDIA gwau ia be idia torea sivarai kwadogina namo hereana​—⁠badina maorona dainai unai bamona idia gwauraia. Iesu ena parabole, tama ta ena lalokau ena boio natuna merona totona be uindo ta bamona, ia amo ita ese Dirava ena hebogahisi idia helalo-kerehai kara dika taudia dekenai ita itaia goevagoeva.

Ia Boio Bona Idia Davaria Lou

Tau ta be mai ena natuna memero rua. Murinai ia vara merona ese iena tamana ia hamaoroa, ia gwau: ‘Lau ura hari egu ahuna do lau abia, lau ura lasi lau naria ela bona oi mase.’ Natuna ena ura hegeregerena, tamana ese iena kohu ibounai amo kahana ihatoina ia henia​—⁠taravatu ai unai be vara guna natuna murinai ia vara merona ena ahuna. (Deuteronomi 21:17) Karaharaga, mero matamatana ese iena kohu ia haboua bona tano daudauna dekenai ia lao, unuseniai ena moni ibounai be lebulebu maurina dekenai ia haorea.​—⁠Luka 15:​11-13.

Bena doe dikana ia vara. Ia ogogami bada dainai, unai mero matamatana ese boroma naria gaukarana ia karaia​—⁠Iuda taudia dekenai unai be gaukara dikana momokani. (Levitiko 11:​7, 8) Aniani be lasi momokani dainai ia ese, carob pods, boroma edia aniani ia ura henia! Vadaeni, unai mero matamatana ena lalona ia kehoa. Ia sibona dekenai ia laloa, ‘Egu tamana ena hesiai taudia be lau bamona lasi, idia be aniani namodia idia ania! Do lau giroa lou egu tamana dekenai, egu kara dika do lau gwauraia hedinarai, bona do lau noia iena gaukara tauna ta ai do lau lao.’a​—⁠Luka 15:​14-19.

Metairametaira unai mero matamatana be iena hanua dekenai ia raka giroa lou. Ita daradara lasi, iena toana be ia idau momokani. To herevana, iena tamana ese ena toana ia diba “ia be dala dekenai ia lao noho” neganai. Ia hebogahisi bada, ia heau lao, ena natuna ia rosia bona “ia kisi henia.”​—⁠Luka 15:⁠20.

Tamana ese mai hebogahisi ida ia abia dae dainai mero matamatana ese ena lalohadai ia gwauraia hedinarai be auka lasi. “Ia gwau: ‘Egu tamana e, lau be guba biaguna ena vairana dekenai, bona oiemu vairana dekenai, kerere lau karaia vadaeni, lau be hegeregere lasi oiemu natuna do oi gwauraia. [“Emu gaukara tauna ta ai lau oi halaoa” NW].’ To iena tamana ese iena hesiai taudia dekenai ia hamaoroa, ia gwau, ‘Dabua namo herea ta umui mailaia, iena tauanina dekenai umui atoa; Iena imana kwakikwaki gauna bona tamaka danu umui mailaia. Boromakau ena natuna, ubua gauna, umui mailaia, do umui alaia. Badina be inai egu natuna ia mase, to ia mauri lou vadaeni, ia boio, to lau davaria vadaeni.’ ”​—⁠Luka 15:​21-24.

Vadaeni aria badana idia karaia, mai miusiki bona mavaru danu. Vara guna merona be uma amo ia giroa mai neganai, regerege ia kamonai. Ia kamonai ena tadina ia giroa mai dainai unai aria idia karaia neganai, ia badu. Iena tamana dekenai ia maumau, ia gwau: ‘Lau be lagani momo lalodiai oiemu hesiai gaukara lau karaia, bona emu hereva ta lau utua lasi, to nega ta nani ena natuna ta oi henia lasi lau dekenai, egu turadia danu lau moale totona. To hari emu natuna, emu kohu ia haorea kava tauna ia mai neganai, oi ese aria badana oi karaia ia totona.’ Mai lalokau danu ena tamana ia haere, ia gwau: ‘Egu natuna e, oi be lau dekenai oi noho hanaihanai, bona lauegu kohu ibounai be oiemu. To aria ai karaia be namo, badina be oiemu tadina ia mase, to ia mauri lou vadaeni, ia boio, to ita davaria vadaeni.’​—⁠Luka 15:​25-32.

Ita Dibaia Gaudia

Iesu ena parabole lalonai, tamana be iseda hebogahisi bada Diravana, Iehova, ia laulaulaia. Ia boio natuna mero bamona, haida be nega sisina lalonai Dirava ena ruma bese namona idia rakatania to gabeai idia giroa lou. Iehova ena lalohadai be dahaka unai bamona taudia dekenai? Iehova dekenai idia giroa helalo-kerehai momokani taudia idia diba momokani ‘ia ese do ia gwau henidia hanaihanai lasi. Iena badu be hanaihanai do ia noho lasi.’ (Salamo 103:⁠9) Parabole lalonai, tamana be ia heau ena natuna ia hedavari henia bona ia abia dae lou totona. Unai hegeregerena, Iehova ia ura sibona lasi, to ia ura dikadika helalo-kerehai taudia edia kara dika ia gwaudia tao. ‘Ia gini hegaegae, kara dika ia gwauatao totona,’ bona “do ia gwauatao momokani.”​—⁠Salamo 86:5; Isaia 55:7; Sekaraia 1:⁠3.

Iesu ena parabole ai, tamana ena lalokau momokani karana dainai natuna be mai gari lasi danu ia giroa lou be auka lasi. To, mani oi laloa: Dahaka ia vara bema tamana ese natuna mero ia hamaoroa ia be iena natuna lasi eiava mai badu bada ida ia hamaoroa do ia giroa lou lasi? Unai bamona kara ese mero be ena tamana amo ia utua oho momokani diba.​—⁠2 Korinto 2:​6, 7 itaia.

Vadaeni, unai dala amo, tamana be iena natuna mero ese ia rakatania neganai, do ia giroa lou dalana ia hegaegaelaia. Nega haida, Keristani elda taudia ese idia helalo-kerehai lasi kara dika taudia be kongregesen amo idia kokia. (1 Korinto 5:​11, 13) Unai idia karaia neganai, lalokau dalanai kara dika tauna idia hadibaia dahaka do ia karaia nega vairai kongregesen lalonai idia abia vareai lou totona. Lauma dalanai idia boio taudia momo be gabeai unai mai lalokau ida idia hereva henidia dalana idia laloa momo bona unai ese ia doridia idia helalo-kerehai bona Dirava ena ruma bese dekenai idia giroa lou haraga.​—⁠2 Timoteo 4:⁠2.

Natuna ia giroa neganai tamana ese lalokau ia hahedinaraia danu. Karaharaga tamana ese natuna ena helalo-kerehai korikori toana ia itaia. Bena, ia ese natuna ena kara dikadia ibounai ia diba totona ia henanadai lasi, to abia dae karana ia hahedinaraia, bona unai ia karaia mai ena moale bada ida. Keristani taudia ese unai haheitalai idia tohotohoa be namo. Ia boio tauna ta idia davaria lou neganai, namona be idia moale.​—⁠Luka 15:⁠10.

Tamana ena kara ese ia hahedinaraia goevagoeva nega daudau lalonai ena kamonai lasi natuna mero do ia lou mai negana ia naria. Oibe, unai be laulau sibona, ia hahedinaraia Iehova ia ura dikadika ena ruma bese idia rakatania taudia iboudiai do idia giroa mai. “Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:⁠9) Edia kara dika amo idia helalo-kerehai taudia ese idia abia dae momokani diba ‘Lohiabada ese goada matamata do ia henidia.’​—⁠Kara 3:⁠19.

[Footnotes]