Arisitako—Badinaia Kara Ia Hahedinaraia Hebamo Tauna

APOSETOLO Paulo ida idia gaukara hebou kamonai taudia momo amo, Arisitako be ta. Iena ladana oi kamonaia neganai dahaka oi laloa? Gau ta, a? Keristani taudia ginigunadia edia namo totona ia karaia gaukara do oi gwauraia diba, a? Ena be Arisitako be Baibel sivaraidia lalonai ita diba momo lasi tauna ta, to Keristani Greek Revarevadia ai idia gwauraia sivaraidia haida lalonai ia noho.

Vadaeni, Arisitako be daika? Ia bona Paulo edia hetura dalana be edena bamona? Dahaka dainai ai gwau Arisitako be badinaia kara ia hahedinaraia hebamo tauna namona? Bona iena haheitalai amo dahaka ita dibaia?

Aposetolo edia Kara bukana ena sivarai lalonai, Arisitako be Efeso hanua dekenai, daradara bona gari havaraia oreana mai edia boiboi bogaraginai. (Kara 19:​23-​41) Demetrio bona Efeso ena siliva gaukaralaia taudia ma haida be moni bada idia abia dirava hahinena Diana ena siliva dubu maragidia idia karaia amo. Unai dainai, hanua lalonai Paulo ia haroro bena momo ese unai dirava hahinena tomadiho karana mai mirona idia negea neganai, Demetrio ese koroa taudia ma haida edia lalona ia ania. Ia hamaorodia Paulo ese edia moni davaria dalana ia hadikaia diba sibona lasi, to Diana tomadiho henia karana do ia ore danu.

Paulo idia davaria lasi dainai, unai badu oreana ese ia idia bamoa taudia, Arisitako bona Gaio idia veria vareai ruma badana lalonai. Idia ruaosi idia mase diba dainai, Paulo be ena turadia ese idia noia, “hebou ruma dekenai do ia hedinarai lasi,” ia mase garina.

Mani oi laloa oi be unai gabu dekenai. Hora rua bamona lalonai, unai gari havaraia oreana idia boiboi, “Efeso ena dirava, Diana, ia be bada herea momokani”! Unai nega be gari bada negana momokani Arisitako bona Gaio dekenai, lalo-auka oreana ese idia ia koua momokani bona idia ese edia maoro idia gwauraia diba lasi. Reana idia be do idia mauri eiava lasi idia lalohadailaia. To, idia mauri. Momokani, Luka ena sivarai ia hedinarai namonamo dainai, diba taudia haida idia gwau unai kara idia itaia taudia edia hereva amo, reana Arisitako bona Gaio edia amo, sivarai ia torea.

Gabeai hanua ena dagi bada tauna ese unai regerege badana ia hadokoa. Arisitako bona Gaio be mai edia kerere lasi herevana ia gwauraia idia kamonaia bona idia badinai dagedage karana ia ore idia itaia neganai, reana edia lalo-hekwarahi ia maragi.

Unai bamona kara ta oi dekenai ia vara murinai, emu hemami be edena bamona? Do oi gwau Paulo bamoa misinari gaukarana dekenai oi hegeregere lasi, dika oi davaria diba, bona do oi laloa mauri namona oi tahua be namo, a? Arisitako be unai bamona lasi! Ia be Tesalonika amo dainai, reana sivarai namona harorolaia dainai do ia abia dika idauidau ia diba vadaeni. Lagani rua gunanai iena hanua dekenai Paulo ia haroro neganai, dagedage karana ta ia vara danu. (Kara 17:​1-9; 20:⁠4) Arisitako be badinaia kara ia hahedinaraia, Paulo ia rakatania lasi.

Greece amo Idia Lao Ierusalema

Siliva gaukaralaia taudia edia dagedage karana murinai hua haida idia hanaia vadaeni, Paulo be Greece dekenai ia noho bona kahirakahira bouti amo Suria do ia lao guna bena Ierusalema do ia lao neganai, “hereva idia karaia vadaeni ia do idia alaia mase.” (Kara 20:​2, 3) Unai nega dikadia ai daika be Paulo ida ia noho? Arisitako!

Unai dagedage herevana dainai Paulo, Arisitako, bona edia bamodia be palani idia haidaua, Makedonia lalona amo idia hanaia lao guna, bona Asia Minor ena kone gabuna idia hanaia bena Patara amo Poinikia dekenai idia lao. (Kara 20:​4, 5, 13-​15; 21:​1-3) Unai laolao ena badina be Makedonia bona Akaia Keristani taudia edia harihari gaudia do idia abia lao Ierusalema dekenai idia dabu tadikakadia idia henia totona. (Kara 24:17; Roma 15:​25, 26) Orea badana idia laolao hebou, reana kongregesen idauidau edia amo unai maduna idia abia dainai. Momokani, unai orea ia bada dainai unai ese idia ia gimaia bamona.

Arisitako ena hahenamo badana ta be Paulo ia bamoa Greece amo Ierusalema ia lao neganai. To, edia laolao iharuana be Iudea amo do idia lao ela bona Roma.

Roma Idia Lao Henia

Unai nega be ia idau. Paulo be lagani rua Kaisarea dekenai idia koua vadaeni, bona ia gwau Kaisara do ia hereva henia, vadaeni mai igui danu Roma dekenai do idia siaia lao. (Kara 24:27; 25:​11, 12) Mani Paulo ena bamona edia hemami oi laloa. Kaisarea ia lao Roma ena laolao be daudau bona edia lalona do ia hahisia, bona do ia vara gauna idia diba lasi. Daika be ia ida do ia lao, lalo-goada bona heduru henia totona? Tatau rua idia abia hidi eiava sibodia idia volantia. Idia be Arisitako bona Luka, Aposetolo edia Kara bukana ia torea tauna.​—⁠Kara 27:​1, 2.

Edena dala ai Luka bona Arisitako danu be unai laolao ena kahana ginigunana ai sisima tamona dekenai idia guia? Histori torea tauna Giuseppe Ricciotti ia gwau: “Idia ruaosi be moni idia henia idia guia totona . . . eiava, reana idia be Roma ami ofesa ena hebogahisi dainai idia ia gwauraia Paulo ena hesiai taudia bena idia guia, badina Roma taravatu ia gwau Roma ena tano tauna be hesiai taudia rua ese idia bamoa diba.” Edia noho bona hagoadaia daladia ese Paulo ena lalona ia hamoalea bada!

Luka bona Arisitako ese edia lalokau Paulo dekenai idia hahedinaraia, herevana edia mauri idia haboioa diba. Momokani, idia bona idia bamoa igui tauna dekenai edia mauri idia haboioa diba karana ta ia vara, edia sisima ia makohi Melita motumotu kahirakahira dekenai.​—⁠Kara 27:⁠13–​28:⁠1.

Paulo ida “Dibura Ruma Lalonai” Idia Atoa

Lagani 60-​61 C.E. lalonai, Paulo ese Kolose taudia bona Filemona dekenai ena revareva ia toredia neganai, Arisitako bona Luka be ia ida Roma dekenai idia noho. Unai revareva idia gwau Arisitako bona Epafra be Paulo ida “dibura ruma lalonai” idia atoa. (Kolose 4:​10, 14; Filemona 23, 24) Unai dainai, toana be Arisitako be nega sisina lalonai, Paulo ida dibura rumana ai idia koua.

Ena be lagani rua mai kahana lalonai Paulo be dibura tauna Roma dekenai, to dala idia karaia sibona ia rentaia rumana dekenai tuari tauna ta ese do ia naria, bona unuseniai ia be vadivadi taudia dekenai sivarai namona ia gwauraia diba. (Kara 28:​16, 30) Arisitako, Epafra, Luka, bona ma haida be Paulo ena gaukara idauidau idia karaia, unai amo idia durua bona hagoadaia.

“Idia Durua Bada Herea”

Baibel lalonai Arisitako idia herevalaia sivaraidia oi duahia murinai, ia be edena bamona oi laloa? Toretore tauna W. D. Thomas ia gwau, Arisitako “be dagedage ia haheaukalaia diba tauna bona ia hanaia murinai ena abidadama ia goada noho bona ena lalona ia hadaia ena hesiai gaukara do ia hadokoa lasi. Ia be nega namodia, dina be guba amo ia diari namonamo negana sibona ai lasi, to hemarai bona dagedage negadia ai danu Dirava ia lalokau henia tauna.”

Paulo ia gwau Arisitako bona ma haida ese ia “idia durua bada herea,” (Greek gado, pa·re·go·riʹa) anina be, ena lalona idia hanamoa. (Kolose 4:​10, 11) Paulo ia hagoadaia karana amo, Arisitako be hebamo tauna namona dika negadia ai. Lagani haida lalonai aposetolo tauna ia bamoa bona edia hetura ese ena lalona ia hamoalea bona lauma dalanai ia hagoadaia momokani.

Reana ita dekenai Arisitako ese ia mamia karadia do idia vara lasi. To, hari inai negai Keristani kongregesen taudia ibounai ese Keriso ena tadikaka lauma dalanai bona Iehova ena orea dekenai unai bamona badinaia kara idia hahedinaraia be gau badana. (Mataio 25:​34-​40 itaia.) Reana ita ida idia tomadiho hebou tadikakadia, ita diba taudia, be gabeai dika eiava lalohisihisi do idia davaria, reana ta ia mase dainai, gorere dainai, o hahetoho haida dainai. Bema idia dekenai ita noho bona idia ita durua bona hagoadaia karana amo, moale do ita davaria diba bona do ita hahedinaraia ita be badinaia kara ita hahedinaraia hebamo taudia.​—⁠Aonega Herevadia 17:17; Kara 20:⁠35 itaia.