Moale Korikori—Davaria Dalana be Dahaka?
DIRAVA ese taunimanima ia havaraia do idia moale totona. Dahaka dainai unai ita diba momokani? Mani taunimanima edia matamana negana ita laloa.
Iehova Dirava ese taunimanima ginigunadia ruaosi ia havaraia neganai, moale abia hemamina ia henidia danu. Adamu bona Heva be paradaiso ta, moale davaria umana ladana Eden, lalonai ia atodia. Havaraia Tauna ese edia mauri durua gaudia ibounai ia henia. Uma lalonai “toana namo au ibounai ia havaraia, bona aniani idia atoa audia danu.” (Genese 2:9) Adamu bona Heva idia gorere lasi, idia goada, bona idia be mai edia hairai—idia be goevadae taudia bona idia moale momokani.
To, edia moale havaraia gauna be dahaka? Ia be edia paradaiso noho gabuna eiava edia goevadae tauanina, a? Dirava ena amo unai harihari gaudia idia abia bona mauri idia moalelaia. To unai bamona tauanina gaudia ese edia moale abia dalana ia havaraia lasi. Eden umana be gabu mai hairaina ta sibona lasi. Ia be gabu helagana, Dirava tomadiho henia gabuna. Moale hanaihanai idia davaria dalana be mai lalokau ida Dirava idia tura henia bona unai turana karana idia gimaia. Idia moale totona, lauma gaudia idia laloa be namo.—Mataio 5:3 itaia.
Lauma Gaudia Goadalaia Karana ese Moale Ia Havaraia
Matamanai Adamu be lauma dalanai Dirava ena turana. Mai edia lalokau ida idia hetura heheni, tamana ta bona ena natuna idia hetura heheni namonamo bamona. (Luka 3:38) Eden umana ai, edia noho be namo dainai, Dirava tomadiho henia urana idia hagugurua diba. Mai edia ura bona lalokau ida Iehova idia kamonai henia neganai, idia be animal idia karaia diba lasi dalana ai Dirava do idia hanamoa bona hairai do idia henia. Mai edia aonega ida Dirava idia hanamoa diba ena kara namo hereadia dainai bona ena lohia siahuna idia abia isi diba. Bona Iehova ese mai ena lalokau bona hebogahisi ida idia do ia naria noho.
Havaraia Tauna ida unai bamona idia hakapua bona ena taravatu idia badinaia ese iseda tamana bona sinana ginigunadia dekenai moale korikori ia henia. (Luka 11:28) Adamu bona Heva be lagani momo herea lalodiai dala idauidau do idia tohoa lasi, moale dalana idia davaria totona. Dirava ese ia havaradia negana amo idia moale matamaia. Dirava ida maino ai idia noho bona iena siahu henunai idia noho dainai idia moale.
To, Dirava idia kamonai henia lasi negana ai, unai moale ia ore. Adamu bona Heva idia gwau-edeede neganai, lauma dalanai edia hetura karana Iehova ida idia hadikaia. Idia be Dirava ena turana lasi. (Genese 3:17-19) Toana be uma amo ia atodia siri dinana ai, Iehova be idia ia hereva henia lou lasi. Edia goevadae maurina, mauri hanaihanai dalana, bona edia noho umana idia haboioa. (Genese 3:23) To idia haboioa gauna mai anina bada be, edia hetura karana Dirava ida idia haboioa dainai, moale davaria dalana idia haboioa.
Ita ese Dala Ita Abia Hidi Diba
Adamu bona Heva idia do mase lasi neganai, taunimanima edia kara toana, edia lalona ena hemami, bona lauma gaudia goadalaia dibana be edia natudia dekenai idia henia hanai. Taunimanima edia mauri oromana ia diho lasi animal edia hegeregerena. Dirava ida ita hetura lou diba. (2 Korinto 5:18) Taunimanima be mai edia aonega dainai, idia abia hidi diba Dirava do idia kamonai henia eiava lasi. Lagani handred momo murinai unai ia hedinarai, Iehova ese bese matamatana Israela vairanai do idia abia hidi gaudia, mase eiava mauri, ia atoa neganai. Dirava be ena hereva halasia tauna Mose ena amo ia gwau: “Hari dina dekenai, namo bona dika, mauri bona mase, be umui emui vairana dekenai lau atoa.”—Deuteronomi 30:15-18.
Hari inai negai danu, lagani tausen momo idia hanaia vadaeni Paradaiso ginigunana ia boio murinai, ita taunimanima be dala maorona ita abia hidi diba. Iseda lalona ia gaukara noho bona ita be Dirava ena taravatu ita badinadia diba. Baibel ese “ita lalonai tauna” bona “lalona” tauna ia herevalaia. (2 Korinto 4:16, NW; Roma 7:22, NW) Unai hereva ese ita lalonai ia noho goadana dainai Dirava ena kara ita hahedinaraia diba idia herevalaia, anina be iena lalohadai ita abia, o lauma gaudia ita goadalaia diba.
Aposetolo Paulo be ita eda kara korikori bona eda lalona ia herevalaia, ia gwau: “Iuda lasi taudia be Mose ena Taravatu idia diba lasi, to idia haida ese sibodia edia laloa diari dekena amo taravatu idia badinaia. Inai taudia ese madi Taravatu idia davaria lasi, to edia laloa maoro dekena amo sibodia edia taravatu idia haginia. Idia edia kara ese ia hedinaraia, Dirava ena Taravatu be edia kudouna dekenai ia noho vadaeni. Idia edia kudouna ena laloa ese ia hamomokania Dirava ena Taravatu be edia kudouna lalonai ia noho. Unai dainai nega haida edia lalona dekenai idia gwau, ‘Egu kara ia kerere,’ bona nega haida edia lalona dekenai idia gwau, ‘Egu kara be ia maoro.’ ”—Roma 2:14, 15.
Dirava amo Ia Mai Aonegana Bona Kamonai Karana
Reana ta do ia henanadai, ‘Bema vaia iseda ura ta be Dirava do ita tomadiho henia bona, unai amo, moale ita davaria, dahaka dainai taunimanima momo herea idia moale lasi?’ Unai ena badina be, ita moale totona, ita ta ta be lauma dalanai ita goada ita lao be namo. Ena be Dirava ese guna iena toana hegeregerena ita ia havaraia, to taunimanima be idia ia Havaraia Tauna ena amo idia siri. (Efeso 4:17, 18) Unai dainai, ita ta ta ibounai ese kara haida ita karaia be namo, lauma dalanai Dirava ida ita hetura bona unai ita gimaia. Unai hetura karana do ia vara kava lasi.
Iesu ese mai anina bada hakaua herevadia rua ia gwauraia, lauma dalanai ita goada ita lao totona. Ta be Dirava ita dibaia maoromaoro, bona ma ta be mai eda kamonai ida iena ura ita karaia. (Ioane 17:3) Iesu ese Dirava ena Hereva ia gwauraia lou, ia gwau: “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.’ ” (Mataio 4:4) Ma nega ta ai, Iesu ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Moale ita davaria totona, lagani momo lalodiai dala idauidau ita tohoa be anina lasi. Dala idauidau dibaia be moale davaria dalana lasi. To, Dirava amo ia mai aonegana bona ita ia Havaraia Tauna kamonai henia karana sibona ese iseda mauri lalonai moale korikori ia havaraia diba.—Salamo 19:7, 8; Hadibaia Tauna 12:13.
Ia hedinarai goevagoeva, Dirava ena amo ia mai aonegana gaukaralaia bona Dirava vairanai raka maoromaoro noho karadia amo ia mai moalena be ita ese ita abia diba. (Kara 17:26, 27) Iehova bona iena ura be taunimanima ibounai ese idia dibaia diba. Gado momo herea ai Baibel ena kopi bilioni momo idia noho dainai, buka iboudiai amo ia be tanobada hegegemadai idia halasia badabada bukana. Baibel ese oi ia durua diba Dirava ena turana ai oi lao bona moale korikori oi davaria totona, badina be Baibel ese ita ia hamaoroa, “edia Dirava be [Iehova], ena bese taudia be idia moale noho.”—Salamo 144:15.
[Box on page 6]
Kara Haida Moale Davaria Totona
1. Lauma gaudia lalo-pararalaia bona goadalaia. Iesu ia gwau: “Dirava ena hereva idia kamonaia bona idia badinaia taudia be idia moale bada.”—Luka 11:28.
2. Oi abia dae Dirava ena lalo-namo oi abia be mai anina bada, taga bona kohu haboua ena anina ia hereaia. Paulo be inai ia torea: “To momokani, Dirava ia badinaia tauna ese kohu momokani do ia davaria. Oibe, ia davaria, badina unai tau be mai ena kohu namona, gauna be, iena lalona be namo. . . . Bema ita be mai iseda aniani bona dabua neganai, moni dekenai ita laloa momo lasi be namo.”—1 Timoteo 6:6-8.
3. Oi hekwarahi Baibel amo emu lalona oi hadibaia bona unai hemami hegeregerena oi kara totona.—Roma 2:14, 15.
4. Oiemu lalona oi hadaia Iehova Dirava do oi kamonai henia, unai amo ia ena taunimanima ta ai do oi lao. Idaunegai Davida be inai ia torea: “Edia Dirava be [Iehova], ena bese taudia be idia moale noho.”—Salamo 144:15.
[Picture on page 7]
“Idia diba lauma gaudia idia tahua be namo taudia idia moale.”—Mataio 5:3, “NW”