Abidadama Dainai Ita Haheauka Noho Bona Ita Guriguri Loulou
“Umui haheauka. Bona mai abidadama ena laloa goada danu, Lohiabada do umui naria noho, badina iena [noho] be kahirakahira.”—IAMESI 5:8.
1. Dahaka dainai Iamesi 5:7, 8 ita laloa be namo?
IESU KERISO ena “noho” (NW), taunimanima idia naria daudau vadaeni gauna, be ia vara vadaeni. (Mataio 24:3-14) Hari, idia gwau Dirava bona Keriso idia abidadama henia taudia iboudiai ese hahediba tauna Iamesi ena hereva idia laloa be mai badina: “Lauegu varavara taudia e, do umui haheauka noho ela bona Lohiabada do ia giroa mai. Umui laloa: Biru tauna ese iena uma anina ia naria, mai ena haheauka danu. Oibe, ia naria ela bona medu ginigunana bona medu dokona danu idia diho vadaeni. Umui danu do umui haheauka. Bona mai abidadama ena laloa goada danu, Lohiabada do umui naria noho, badina iena mai be kahirakahira.”—Iamesi 5:7, 8.
2. Iamesi ese ia tore henia taudia edia hekwakwanai haida be dahaka?
2 Lauma helaga ena siahu henunai Iamesi ese ena revareva amo ia tore henia taudia idia haheauka bona hekwakwanai idauidau idia hamaoromaoroa be namo. Idia momo edia kara be sibodia idia gwauraia Dirava abidadama henia taudia edia kara hegeregerena lasi. Hegeregere, idia haida edia kudouna dekenai ura haida idia vara dainai kara ta idia karaia be namo. Unai idaunegai Keristani taudia huanai, maino ia vara lou be gau badana. Danu, namona be haheauka bona guriguri loulou karana dekenai sisiba idia abia. Iamesi ena hereva idia dekenai ita laloa neganai, namona be iseda mauri lalonai edena dala ai unai sisiba ita gaukaralaia diba ita laloa danu.
Ura Dikadia ese Idia Hadikadia
3. Kongregesen idia hapararaia gaudia be dahaka dahaka, bona unai amo dahaka ita dibaia?
3 Sibodia idia gwauraia Keristani taudia haida huanai maino ia noho lasi, bona ena badina be ura dikadia idia noho. (Iamesi 4:1-3) Heai bona heatu ese maino idia hadikaia, bona idia haida be lalokau lasi dalana ai edia tadikaka idia hahemaoro henia. Unai ia vara badina ura dikadia be edia lalona bona tauanina dekenai idia tuari noho bamona. Reana ita danu do ita guriguri heduru ita abia tauanina ena ura dikadia, hegeregere ladana badana, siahu, bona kohu momo abia uradia do ita dadaraia totona, bona unai amo kongregesen ena maino hadikaia karadia do ita karaia lasi. (Roma 7:21-25; 1 Petero 2:11) Keristani taudia ginigunadia haida ese ma haida edia kohu idia ura henia dikadika dainai, inai henia karana bona ala-ala bamona lalohadai idia abia. Badina Dirava ese edia ura kereredia do ia hagugurua lasi, idia heai bona heatu noho idia tahua gaudia abia totona. Bema unai bamona ura kereredia ita abia, reana Dirava dekenai ita noinoi to unai noinoi do ia hagugurua lasi, badina iseda helaga Diravana ese unai bamona guriguri do ia haerelaia lasi.—Lalohisihisi ena Ane 3:44; 3 Ioane 9, 10.
4 Idaunegai Keristani taudia haida ese tanobada taudia edia lalohadai idia abia dae, idia mama, bona idia hekokoroku. (Iamesi 4:4-6) Iamesi ese idia haida ia gwauraia ‘headava kara ena taravatu idia makohia noho taudia,’ badina tanobada idia tura henia bona unai amo lauma dalanai idia heudahanai. (Esekiela 16:15-19, 25-45) Momokani, ita ura lasi tanobada taudia edia lalohadai, hereva, bona kara ita tohotohoa, badina bema unai bamona ita karaia Dirava ena inai taudia ai do ita lao. Iena Hereva ia hahedinaraia “hegahusi” (NW) be kara dika tauanina ena ura ta eiava ia hahedinaraia “laumana.” (Genese 8:21; Numera 16:1-3; Salamo 106:16, 17; Hadibaia Tauna 4:4) Unai dainai bema ita itaia mama, hekokoroku, eiava ura dikana ma ta be ita lalonai bona ita koua be namo, Dirava ena lauma helaga ena heduru ita tahua. Unai Dirava ena hariharibada amo ia henia siahuna ena goada be “hegahusi” ena goada ia hanaia. Iehova ese hekokoroku taudia ia dadaraia, to iena hariharibada do ia henia ita dekenai bema kara dika karaia uradia ita tuari henia noho.
5 Edena dala ai Dirava ena hariharibada do ita davaria diba? (Iamesi 4:7-10) Iehova ena hariharibada abia totona, namona be ia ita kamonai henia, ia henia gaudia ita abia dae, bona iena ura gaudia ibounai ita abia dae. (Roma 8:28) Namona be Diabolo ita “tuari henia,” eiava ita ‘dadaraia.’ Bema Iehova ena guba bona tanobada lohiaia siahuna ita badinaia noho, Satani be ita “dekena amo do ia heau boio.” Iesu ena heduru do ita abia, ia ese tanobada ena orea dikadia ia koua, unai dainai ita idia hadikaia ore diba lasi. Bona namona be inai ita laloaboio lasi: Guriguri, hereva badinaia karana, bona abidadama amo, Dirava dekenai do ita raka kahirakahira lao, bona ia be ita kahirakahira momokani do ia noho.—2 Sivarai 15:2.
6. Dahaka dainai Iamesi ese Keristani taudia haida ia gwauraia “kara dika taudia”?
6 Dahaka dainai Iamesi ese sibodia idia gwauraia Dirava abidadama henia taudia ia gwauraia “kara dika taudia”? Badina “tuari” idia karaia bona ala-ala bona inai henia uradia idia noho—Keristani lasi gaudia unai. (Tito 3:3) Edia “imana” be kara dika amo idia honu dainai, idia huria be namo. Danu taunimanima ia doria gauna o edia “kudouna” idia hagoevaia be namo. (Mataio 15:18, 19) Unai “laloa rua” taudia be nega haida Dirava idia tura henia bona nega haida tanobada idia tura henia. Edia haheitalai dikana amo sisiba ita abia, namona be hanaihanai ita naria unai bamona gaudia be iseda abidadama idia hadikaia garina.—Roma 7:18-20.
7 Iamesi ese ena revareva idia duahia taudia ia hamaoroa ‘do idia lalohisihisi, bona idia taitai bada be namo.’ Bema Dirava dekenai idia kerere dainai idia lalohisihisi, unai be helalo-kerehai ena toana. (2 Korinto 7:10, 11) Hari inai nega ai, haida idia gwau idia be mai edia abidadama, to tanobada ena hebamo idia tahua. Bema ita ta ese unai dala ita badinaia, lauma dalanai ita manoka dainai ita taitai be namo bona karaharaga unai ita hanamoa, ani? Unai gaudia ita hanamoa bona Dirava ese eda kerere ia gwauatao neganai, moale do ita mamia badina iseda lalona ia goeva bona iseda helaro be mauri hanaihanai do ita abia.—Salamo 51:10-17; 1 Ioane 2:15-17.
Ta Ta Umui Hahemaoro Heheni Lasi
8, 9. Dahaka dainai iseda tadikaka ita gwauraia dika eiava ita hahemaoro henia be maoro lasi?
8 Tadikaka ta oi gwauraia dika be kara dikana. (Iamesi 4:11, 12) To haida be edia Keristani tadikaka idia maumauraia, reana idia laloa edia kara sibona be maoro eiava ma haida hadihoa amo sibodia do idia abia isi. (Salamo 50:20; Aonega Herevadia 3:29) Greek herevana idia hahanaia “gwauraia kerere” ia hahedinaraia ta ese ta ia inai henia bona reana ena kerere ia habadaia eiava ia samania koikoi. Unai be tadikaka hahemaoro henia bona gwauraia dika karana. Edena dala ai unai kara be ‘Taravatu gwauraia kerere bona Taravatu gwauraia dika’ karana? Taravatu hadibaia taudia bona Farisea taudia be ‘Dirava ena taravatu idia negea’ bona edia taravatu amo taunimanima idia hahemaoro henia. (Mareko 7:1-13) Danu, bema tadikaka ta ita gwauraia dika, to unai tadikaka be Iehova ese do ia gwauraia dika lasi, ita be Iehova ena ‘taravatu ita gwauraia dika’ bona mai kara dika ida ita hahedinaraia ita laloa unai taravatu be hegeregere lasi, ani? Bona badina ta lasi dainai iseda tadikaka ita maumauraia neganai, lalokau taravatuna ita hagugurua lasi.—Roma 13:8-10.
9 Namona be ita laloatao: “Taravatu atoa Tauna, bona kota biaguna be tamona sibona”—Iehova. Iena “Taravatu be ia namo momokani,” ia goevadae. (Salamo 19:7; Isaia 33:22) Dirava sibona be mai ena maoro hahemauri havaraia taravatudia ia haginia totona. (Luka 12:5) Unai dainai Iamesi ia henanadai: “Vadaeni, oi be daika, oi dekenai ia noho tauna do oi gwauraia kerere?” Ma haida hahemaoro henia bona gwauraia dika be iseda gaukara lasi. (Mataio 7:1-5; Roma 14:4, 10) Ita be kara dika taudia bona Iehova ena lohia siahuna bona taunimanima edia toana ia laloa lasi karana ita laloa neganai, ita do ia durua ma haida do ita hahemaoro henia lasi, sibona eda maoro hekokorokulaia totona.
Sibona Emu Goada Heagilaia Karana Oi Dadaraia
10. Dahaka dainai iseda mauri dinadia ta ta ai, Iehova ita laloa be gau badana?
10 Namona be hanaihanai Iehova bona ena taravatu ita laloa. (Iamesi 4:13-17) Sibona ena goada ia heagilaia tauna be Dirava ia laloa lasi, ia gwau: “Hari dina o kerukeru dina unai hanua badana do ita lao, unuseni lagani ta do ita noho, do ita hoihoi, moni momo do ita abia.” Bema ‘iseda kohu sibona ita haboua, to Dirava dekenai ita be gau momo ita henia lasi,’ iseda mauri be kerukeru ia ore diba bona Iehova hesiai henia dalana be lasi. (Luka 12:16-21) Iamesi ia gwau, ita be kwalahu maragina bamona “nega sisina ia hedinarai, vadaeni ia boio momokani.” (1 Sivarai 29:15) Ia noho daudau moalena bona mauri hanaihanai abia dalana tamona be Iehova ita abidadama henia.
11 Namona be mai heagi ida Dirava ita dadaraia lasi, to inai bamona ita laloa: “Bema Dirava ia ura, ita be ita mauri noho, vadaeni unai kara o inai kara do ita karaia.” Inai hereva “Bema Dirava ia ura” ita gwauraia ese ia hahedinaraia iena ura hegeregerena ita kara toho. Reana bisinesi ita karaia iseda ruma bese naria totona, Basileia gaukara lalonai ita loaloa diba totona, o ma gau haida karaia totona. To namo lasi ita heagilaia. “Unai bamona hekokoroku ibounai be dika” badina idia hahedinaraia Dirava amo gau ibounai ita abia be ita laloa lasi.—Salamo 37:5; Aonega Herevadia 21:4; Ieremia 9:23, 24.
12 Iamesi be heagi bona hekokoroku ia herevalaia ore neganai, ia gwau: “Bema kara namona karaia ena dala oi diba, to oi karaia lasi, unai be oi kara dika.” Namona be Keristani taudia ta ta ese mai manau ida idia hahedinaraia gau ibounai be Dirava amo idia abia. Bema ta ese unai ia hahedinaraia lasi ‘ia kara dika.’ Momokani, Dirava abidadama henia ena taravatu ma haida ita badinaia lasi neganai, unai hakaua herevana be mai anina.—Luka 12:47, 48.
Taga Taudia Dainai Sisiba Ia Henia
13. Iamesi ese edia taga kohudia idia gaukaralaia kerere taudia be edena bamona ia herevalaia?
13 Badina idaunegai Keristani taudia haida be kohu idia ura dikadika bona taga taudia idia laloa bada, Iamesi ese hereva aukadia amo taga taudia haida ia herevalaia. (Iamesi 5:1-6) Tanobada taudia ese edia kohu idia gaukaralaia kerere bona Dirava ese edia kara davana ia henia neganai, ‘do idia taitai, mai boiboi danu do idia tai, metau bona hisihisi idia dekenai do idia ginidae dainai.’ Unai nega lalonai, taunimanima momo edia taga gaudia badadia be dabua, uiti, bona uaina. (Ioela 2:19; Mataio 11:8) Edia kohu haida ia dika diba eiava “pitopito ese idia ania ore” diba, to Iamesi ese taga gaudia idia dika diba ia herevalaia sibona lasi, ena hereva ena anina be taga tahua be anina lasi karana. Ena be golo bona siliva idia raraka lasi, to bema unai gaudia ita haboua bona ita hunia sibona, edia namo be idia raraka vadaeni gaudia hegeregerena. “Raraka” ia hahedinaraia unai kohu bada herea idia gaukaralaia namonamo lasi. Unai dainai namona be ita ibounai ita laloatao “inai dokona dinadia lalonai” kohu idia abidadama henia taudia ese Dirava ena badu do idia mamia, lahi bamona. Badina be “dokona negana” ai ita noho, unai hereva be mai anina bada ita dekenai.—Daniela 12:4; Roma 2:5.
14 Nega momo taga taudia ese edia uiti idia utua taudia dekenai edia gaukara davana idia henia lasi, unai dainai “mai boiboi danu idia maumau noho.” (Genese 4:9, 10 itaia.) Tanobada taga taudia ese ‘idia ura henia karadia bona gaudia idia moalelaia.’ Lebulebu karadia idia karaia badabada dainai edia kudouna be digara bamona gaudia amo idia habadaia bona ia auka, bona edia mase “dinana” ia ginidae neganai unai kara idia karaia noho. Idia ese ‘kara maoromaoro taudia idia gwauraia kerere, bona idia aladia mase.’ Iamesi ia gwau: “Bona idia [kara maoromaoro taudia] ese unai emui dika idia koua lasi.” Unai dainai taga taudia ita laloa guna be maoro lasi. Namona be iseda mauri lalonai lauma gaudia ita atoa guna.—Mataio 6:25-33.
Abidadama ese Ita Ia Durua Ita Haheauka Noho Totona
15, 16. Dahaka dainai ita haheauka noho be mai anina bada gauna?
15 Iamesi ese tanobada ena dagedage taga taudia ia herevalaia murinai, dagedage idia davaria Keristani taudia ia hagoadaia idia haheauka totona. (Iamesi 5:7, 8) Bema Keristani taudia be mai boga-auka ida edia hekwakwanai idia haheaukalaia, Keriso ena noho negana lalonai edia gini goada ena davana do idia abia, unai neganai edia inai taudia ese hahemaoro do idia abia. (Mataio 24:37-41) Unai Keristani taudia ginigunadia be biru tauna bamona idia kara be namo. Mai haheauka ida ia ese keru negana ena matamana ai do ia mai medu ginigunana ia naria, unai neganai ia hadoa diba, bena siahu negana ia matamaia neganai, uma ena anina do ia hatubua medu dokona ia naria. (Ioela 2:23) Namona be ita danu ita haheauka noho bona iseda kudouna ita hagoadaia, badina Iesu Keriso ena noho negana be inai!
16 Dahaka dainai ita haheauka noho be namo? (Iamesi 5:9-12) Tadikaka ta ese ita ia habadua neganai, haheauka ese ita do ia durua do ita maumauraia lasi. Bema ‘ita ta ta dekenai do ita maumau’ mai lalohadai dikana ida, Kota Biaguna tauna Iesu Keriso ese ita do ia gwauraia dika. (Ioane 5:22) Hari ena ‘noho’ ia hamatamaia vadaeni bona “ia gini hegaegae noho iduara dekenai,” unai dainai namona be iseda tadikaka, abidadama tohoa gaudia momo idia davaria taudia, dekenai iseda boga-auka ita hahedinaraia bona unai amo maino do ita habadaia. Bema ita laloatao Dirava ese Iobu dekenai davana namona ia henia badina mai ena boga-auka ida hetoho ia haheaukalaia, iseda abidadama do ia hagoadaia. (Iobu 42:10-17) Bema abidadama ita hahedinaraia bona ita haheauka noho, do ita itaia Iehova “be mai ena bogahisihisi, bona iena hariharibada be bada herea.”—Mika 7:18, 19.
17 Bema ita haheauka lasi, lalo-hekwarahi negana ai reana iseda malana do ita gaukaralaia kerere. Hegeregere, reana gwauhamata ita karaia kava. Iamesi ese unai gwauhamata kava karana ia sisibalaia, ia gwau: “Umui gwauhamata lasi.” Emu hereva oi gwauraia sibona lasi to hanaihanai oi gwauhamatalaia, ena toana be oi be koikoi tauna. Unai dainai, namona be hereva momokani sibona ita gwauraia, bona ita gwau oibe neganai ena anina be oibe, bona ita gwau lasi neganai ena anina be lasi. (Mataio 5:33-37) Momokani, Iamesi ia gwau lasi tanobada ena kota dekenai do oi gwauhamata lasi hereva momokani sibona do oi gwauraia totona.
Abidadama Bona Iseda Guriguri
18 Bema ita ura iseda hereva ita biagua, ita haheauka, bona Dirava ita abidadama henia goadagoada noho, namona be iseda mauri lalonai guriguri be mai anina bada gauna. (Iamesi 5:13-20) Hetoho ita davaria neganai namona be ita “guriguri.” Bema ita moale, namona be “Dirava hanamoa ane” ita abia, Iesu ese ena mase laloatao hebouna o Memorial ia hamatamaia neganai ia bona ena aposetolo taudia idia karaia hegeregerena. (Mareko 14:26) Nega haida ita ura Dirava ita tanikiu henia bada dainai iseda lalona dekenai ane ita abia. (1 Korinto 14:15; Efeso 5:19) Keristani heboudia dekenai, ane amo Iehova ita hanamoa neganai, ita ia hamoalea bada!
19 Bema lauma dalanai ita manoka, reana kara dikana ta ita karaia eiava Iehova ena pata dekenai lauma aniani ita abia hanaihanai lasi dainai, iseda hemami be ita ura lasi ane ita abia. Bema ita be unai bamona, namona be mai manau ida elda taudia edia heduru ita noia bona ‘ita dainai do idia guriguri.’ (Aonega Herevadia 15:29) Ita dekenai “dehoro do idia atoa, Lohiabada ena ladana dekenai.” Edia hagoadaia herevadia bona Baibel amo idia henia sisiba be bero ia hanamoa dehoro bamona, iseda lalo-metau, daradara, bona gari do idia hanamoa. ‘Inai guriguri mai abidadama danu ese ita do ia hanamoa’ bema ita danu be mai iseda abidadama. Bema elda taudia idia davaria kara dika badana ta ita karaia dainai lauma dalanai ita gorere, mai edia hebogahisi ida ita do idia hamaoroa iseda kerere be dahaka bona ita do idia durua. (Salamo 141:5) Bona bema ita helalo-kerehai, ita diba Dirava ese edia guriguri do ia kamonai henia bona iseda kerere do ia gwauatao.
20 ‘Ita ta ta dekenai iseda kara dika ita gwauraia hedinarai’ ese kara dika ma haida karaia urana do ia koua. Unai ese hebogahisi heheni karana do ia habadaia, bona ita do ia doria ita ‘ta ta totona do ita guriguri.’ Ita diba unai kara ese namo do ia havaraia, badina “kara maoromaoro tauna”—abidadama ia hahedinaraia bona Dirava ena matana ai ia kara maoro tauna—ena guriguri be mai ena siahu Iehova dekenai. (1 Petero 3:12) Peroveta tauna Elia be mai ena manoka gaudia, ita bamona, to ena guriguri ese anina ia havaraia. Ia guriguri, bona lagani toi mai kahana lalonai medu ia diho lasi. Ia guriguri lou neganai, medu ia diho.—1 King Taudia 17:1; 18:1, 42-45; Luka 4:25.
21 To bema kongregesen tauna ta be “hereva momokani ena dala dekena amo ia raka siri,” bona hahediba herevadia maorodia bona kara namodia ia rakatania matamaia be edena bamona? Reana Baibel ena sisiba, guriguri, bona durua karadia ma haida amo ia ita hakaua lou diba bona ena kara kerere do ia rakatania. Bema ita kwalimu, Keriso ena mauri davalaia boubouna henunai do ia noho bona lauma dalanai bona tauanina dalanai do ia mase lasi. Kerere tauna ita durua neganai, “ena kara dika momo” ita koua. Sisiba ia abia dae kara dika tauna be dala dikana ia rakatania, ia helalo-kerehai, bona ena dika gwauatao dalana ia tahua neganai, do ita moale ita be ena kara dika momo koua totona ita gaukara.—Salamo 32:1, 2; Iuda 22, 23.
Ita Ibounai Totona Gau Namona ta Ia Noho
22, 23. Iamesi ena hereva dainai dahaka do ita karaia be namo?
22 Ita itaia goevagoeva diba, Iamesi ena revareva lalonai ita ibounai totona gau namona ta ia noho. Hetoho haheaukalaia dalana ia hahedinaraia ita dekenai, haida sibona kara namo henia karana ia sisibalaia, bona ita ia ha-uraia kara namodia ita karaia totona. Iamesi ese ita ia hamaoroa iseda malana ita biagua, tanobada ena lalohadai ita dadaraia, bona maino ita habadaia be namo. Iena hereva ese ita idia durua ita haheauka bona ita guriguri loulou totona.
23 Momokani, Iamesi ese ena revareva ia siaia idaunegai horoa Keristani taudia dekenai. To, namona be ita ibounai ese ena sisiba ita gaukaralaia iseda abidadama ita dogoatao auka totona. Iamesi ena hereva ese iseda abidadama ia hagoadaia diba bena ita do ia doria Dirava ena hesiai gaukara lalonai kara ta ita karaia. Bona inai revareva, Dirava ena lauma helaga ese ia havaraia gauna, ese do ia noho daudau abidadama ia havaraia, bona ita ia durua hari inai negai, Iesu Keriso ena ‘noho’ negana ai, ita Iehova ena Witness taudia ita haheauka noho, bona ita guriguri loulou.
Edena Bamona Do Oi Haere?
◻ Dahaka dainai guna Keristani taudia ginigunadia haida ese edia lalohadai bona edia kara idia haidaua be namo?
◻ Iamesi ese dahaka sisiba ia henia taga taudia dekenai?
◻ Dahaka dainai ita haheauka noho be namo?
◻ Dahaka dainai ita guriguri loulou be namo?
4. Dahaka dainai Iamesi ese haida ia gwauraia ‘headava kara ena taravatu idia makohia noho taudia,’ bona ena hereva ena anina ita dekenai be dahaka?
5. Dirava ena hariharibada moalelaia totona, dahaka ita karaia be namo?
7. Dahaka dainai Iamesi ese ia haida ia hamaoroa ‘do idia lalohisihisi, bona idia taitai bada be namo’?
11. Inai hereva, “Bema Dirava ia ura” ita gwauraia, ena anina be dahaka?
12. Iamesi 4:17 ena hereva ena anina be dahaka?
14. Nega momo taga taudia edia kara be edena bamona, bona unai dainai dahaka ita karaia be namo?
17. Dahaka dainai Iamesi ia gwau, “Umui gwauhamata lasi”?
18. Edena negai ita “guriguri” bona ‘ane ita abia’ be namo?
19. Bema lauma dalanai ita manoka, dahaka ita karaia be namo, bona dahaka dainai unai kara ita karaia?
20. Dahaka dainai iseda kara dika ita gwauraia hedinarai bona ita ta ta totona ita guriguri be namo?
21. Bema Keristani tauna ta be “hereva momokani ena dala dekena amo ia raka siri,” dahaka ita karaia diba?
[Picture Credit Line on page 19]
Pictorial Archive (Near Eastern History) Est.
[Picture on page 23]
Guna, Keristani taudia ginigunadia haida ese edia tadikaka dekenai boga-auka idia hahedinaraia be namo
[Picture on page 24]
Namona be Keristani taudia idia haheauka noho, lalokau idia hahedinaraia, bona idia guriguri loulou