Onesiporo—Hagoadaia Tauna mai Ena Boga-Auka

“DIBURA ruma lalonai idia koua taudia do umui laloa. Oibe, umui be idia danu dibura ruma dekenai umui noho bamona, do umui lalodia.” (Heberu 13:3) Lagani 61 C.E. bamona ai aposetolo Paulo be unai hereva ia torea neganai, ia sibona be nega tamona lasi to nega momo dibura lalonai ia noho vadaeni bona do ia noho lou, ena abidadama dainai idia do hamasea lasi neganai. (Kara 16:​23, 24; 22:24; 23:35; 24:27; 2 Korinto 6:5; 2 Timoteo 2:9; Filemona 1) Unai negai, bona hari danu, kongregesen taudia ese abidadama dainai hahetoho idia davaria tadikaka idia naridia be gau badana.

Aposetolo taudia edia negai, unai kara ia laloa bada hahediba tauna ta be Onesiporo. Paulo be nega iharuana Roma ena dibura lalonai ia noho neganai ia vadivadi henia. Aposetolo tauna be Onesiporo ia herevalaia, ia gwau: “Onesiporo mai ena ruma taudia danu, be Lohiabada ese do ia bogahisihisi henidia, badina be Onesiporo ese nega momo egu lalona ia hagoadaia, bona lau be dibura ruma lalonai lau noho, to ia be lau totona ia hemarai lasi. Ia be Roma dekenai ia ginidae neganai, lau ia tahua goadagoada ia mai bona lau ia davaria.” (2 Timoteo 1:16, 17) Nega ta unai hereva ena anina korikorina oi lalohadailaia vadaeni, a? Bema unai oi karaia, reana Onesiporo do oi laloa bada. Do oi itaia ia be hagoadaia tauna mai ena boga-auka.

Paulo be Dibura Lalonai Ia Noho Negana Iharuana

Paulo be nega ginigunana dibura rumana amo idia ruhaia murinai, Roma ena dibura lalonai ia noho lou to unai neganai ena noho be idau. Guna ena turadia be ia rentaia rumana dekenai ia idia vadivadi henia diba, bona ia laloa kahirakahira do idia ruhaia. Hari momo ese idia rakatania vadaeni, bona toana be ena abidadama dainai do idia hamasea.​—Kara 28:30; 2 Timoteo 4:​6-8, 16; Filemona 22.

Unai negai Paulo be dibura lalonai ia noho laganina be 65 C.E. bamona. Lagani tamona bamona gunanai​—July 64 C.E. ai​—lahi badana ese Roma ena kahana 14 amo 10 ia hadikaia momokani. Histori ia torea Roma tauna Tacitus ia gwau, Pavapava Nero be lalohadai ta, “ia sibona ena oda dainai unai lahi idia hamatamaia lalohadaina, ia koua diba lasi. Unai hereva ia kokia totona, Nero ia gwau kerere be Keristani taudia edia bona dagedage karana badana be unai taudia, edia kara be idau dainai taunimanima ese idia badu henidia taudia, dekenai idia karaia. . . . Taunimanima ese idia kirikirilaia dala dikadia ai idia hamasedia. Uda sisia edia kopina idia karaia bona sisia ese idia hadikadia bona idia hamasedia, eiava ikoko amo korosi dekenai idia kokoa kau, eiava dina ia diho murinai lahi amo idia gabudia, dibura idia hadiaria totona.”

Unai bamona negana lalonai, Paulo be dibura lalonai ia noho lou bona ia diba unai gaudia be ia dekenai idia vara diba danu. Unai dainai ita hoa lasi ena turana Onesiporo ena vadivadi ia moalelaidia bada! To unai nega ena anina Onesiporo dekenai ita laloa be namo.

Paulo, Dibura Tauna, Ia Vadivadi Henia

Toana be Onesiporo ena ruma bese taudia be Efeso dekenai idia noho. (2 Timoteo 1:​18; 4:​19) Onesiporo be sibona ena gaudia dainai unai basileia ena siti badana dekenai ia lao eiava Paulo ia vadivadi henia totona ia lao be ia hedinarai lasi. To aposetolo tauna ia gwau: ‘Roma dekenai ia ginidae neganai, nega momo egu lalona ia hagoadaia.’ (2 Timoteo 1:16, 17) Edena dala ai ia hagoadaia? Ena be Onesiporo ena heduru be reana tauanina dalanai ia henia danu, to Paulo ida ia noho ese Paulo ia hagoadaia. Momokani, Baibel haida ai idia gwau: “Nega momo egu lalona ia hamoalea.”

Unai nega lalonai bema ta ia ura Roma ena dibura lalonai ia noho Keristani tauna ia vadivadi henia, hekwakwanai idauidau ia davaria. Toana be, Roma dekenai idia noho Keristani taudia be hari Paulo idia davaria diba lasi, ena be nega ginigunana dibura lalonai ia noho neganai idia davaria. Roma bamona siti badana dekenai, kara dika idauidau dainai dibura lalonai idia koua taudia hutuma huanai dibura tauna ta davaria be auka. Unai dainai ia tahua namonamo be gau badana. Diba bada tauna Giovanni Rostagno ese unai kara inai bamona ia herevalaia: “Reana hekwakwanai be idauidau. Gau badana be ia tahua lalonai do ia naria namonamo. Gabu idauidau amo diba ia tahua bona ia hahedinaraia ia ura bada taravatu utua karadia dainai dibura dekenai idia negea tau burukana ta ia davaria karana be taunimanima ese do idia laloa momo.”

Toretore tauna P. N. Harrison ese hereva namodia amo unai ia herevalaia, ia gwau: “Ita ese idia raka taudia hutuma huanai tau ta ita itaia mai badina ta dainai ia loaloa, bona unai Aegean ena gabu daudau konena amo ia mai idau tauna ita gavaia mai eda ura ida, ia be ia diba lasi dala maragidia dekenai ia raka lao, iduara momo dekenai ia pidipidi, lalohadai ibounai ia tohoa, ia diba dika ia davaria diba, to ena gaukara ia rakatania lasi; ela bona idia hunia dibura ruma dekenai ia diba gado regena ia kamonai, bona Paulo ia davaria, Roma ena ami tauna dekenai seini amo idia kwatua.” Bema unai gabu be Roma ena dibura ma haida hegeregerena, reana ia be keru, dibura, bona miro gabuna mai ena seini bona dika idauidau momo herea.

Bema taunimanima idia diba ia be Paulo bamona dibura tauna ena turana, dika ia davaria diba. Bona ia vadivadi henia loulou neganai dika do ia davaria haraga diba. Sibona be Keristani tauna ai ia hahedinaraia tauna be idia abia diba bona lahi amo do idia hamasea diba. To Onesiporo ia ura lasi nega haida sibona Paulo ia vadivadi henia. “Nega momo” ia vadivadi, ia hemarai lasi bona ia gari lasi. Onesiporo be ena ladana ena anina, “Gau Namona Mailaia Tauna,” hegeregerena ia kara, ena be dika ia davaria diba to mai gari lasi bona lalokau ida heduru ia henia.

Dahaka dainai Onesiporo be unai ibounai ia karaia? Brian Rapske ia gwau: “Dibura be tauanina dalanai dika ia havaraia sibona lasi, to unuseniai idia vara gaudia dainai dibura tauna ia daradoko diba danu. Unai dainai, heduru taudia be dibura taudia ida idia noho bona hereva amo idia hagoadadia ese edia hemami ia hanamoa bada.” Toana be Onesiporo ese unai ia lalo-pararalaia bona mai gari lasi ida ena turana ia bamoa. Paulo be unai bamona heduru ia laloa bada!

Dahaka Ia Vara Onesiporo Dekenai?

Paulo ese Timoteo dekenai ia siaia revareva iharuana ai, ia ese hanamoa herevana ia siaia Onesiporo ena ruma bese taudia dekenai bona ia gwau: “Lohiabada ena bogahisihisi do ia davaria Dina Badana neganai.” (2 Timoteo 1:18; 4:19) Momo idia laloa unai hereva “Dina Badana neganai” ena anina be Dirava ena hahemaoro dinana badana bona unai dainai idia laloa Onesiporo ia mase vadaeni. Bema unai be momokani, P. N. Harrison ia gwau hegeregerena, reana “Onesiporo be unai gabu dikana dekenai ia lao ena davana be . . . ena mauri amo ia henia.” To momokani, reana unai nega ai Onesiporo be ruma dekenai ia noho lasi, eiava Paulo ese ena ruma bese taudia ida ia hanamoa hebou sibona.

Haida idia laloa unai hereva, “Lohiabada ena bogahisihisi do ia davaria Dina Badana neganai,” be mai ena anina idauna ta. Idia laloa unai hereva idia hahedinaraia mase murinai lauma gabu ta dekenai idia mauri noho bona reana hisihisi idia ania soul totona ita guriguri be maoro. To, unai lalohadai be Baibel ena hereva hegeregerena lasi, ia gwau mase taudia be gau ta idia diba lasi. (Hadibaia Tauna 9:​5, 10) Ena be Onesiporo ia mase vadaeni, Paulo ena hereva ena anina be ia ura Dirava ese ena turana do ia hebogahisi henia sibona. R. F. Horton ia gwau: “Unai ura be ibounai totona ita hahedinaraia diba. To mase taudia totona ita guriguri, bona Mass be idia totona ita karaia, be [aposetolo tauna] ena lalohadai hegeregerena lasi.”

Ma Haida Ita Hagoadaia Noho

Herevana Onesiporo be Paulo ia durua negana lalonai ia mase eiava lasi, to unai aposetolo tauna ia tahua bona dibura dekenai ia vadivadi henia neganai, sibona ena mauri ia laloa bada lasi. Bona ita diba momokani Paulo ese Onesiporo amo ia abia heduru bona hagoadaia mai anina ia laloa bada.

Iseda Keristani tadikaka ese hahetoho bona dagedage idia davaria neganai, eiava dibura dekenai idia noho neganai, reana ita ese heduru bona hagoadaia ita henidia diba. Unai dainai namona be idia totona ita guriguri bona idia totona ita henia diba heduruna ibounai be mai eda lalokau ida do ita henia. (Ioane 13:35; 1 Tesalonika 5:​25) Namona be ita danu be hagoadaia taudia mai eda boga-auka, Onesiporo bamona.

[Picture on page 31]

Onesiporo ese mai ena boga-auka ida dibura dekenai ia noho aposetolo Paulo ia hagoadaia