‘Iehova Ena Dina’ amo Roho Mauri Dalana
“Badina be [Iehova] ena dina be dina badana, bona mai ena gari bada. Inai dina dekenai be daika ese ia mauri diba?”—IOELA 2:11.
1. Dahaka dainai ‘Iehova ena dina mai ena gari bada’ be moale negana?
“MAI ena gari bada”! Unai hereva amo Dirava ena peroveta tauna Ioela ese ‘Iehova ena dina’ ia gwauraia. To ita, Iehova ita lalokau henia bona Ia dekenai Iesu ena mauri davalaia boubouna dainai iseda mauri ita gwauhamatalaia taudia, be Iehova ena dina ena mai dekenai ita gari dikadika lasi. Unai dina be dina badana momokani, to ia be hahemauri dinana badana danu, badina unai neganai taunimanima do ia ruhaia lagani tausen momo lalodia idia ia hahisia tanobada dikana amo. Ioela ese unai dina ia laloa dainai, Dirava ena taunimanima ia hamaoroa, “do umui gari lasi. Do umui moale bada, badina lau Lohiabada ese kara badadia, be umui totona lau karaia vadaeni.” Ma ia hamaoroa: “Durua totona Lohiabada idia noia taudia ibounai, ese mauri do idia davaria.” Bena Dirava ena Basileia henunai ‘do idia heau mauri. Dirava ese ia abia hidi taudia ibounai, be do idia mauri.’—Ioela 2:11, 21, 22, 32.
2. Dirava ena ura hegeregerena, dahaka do ia vara (a) “Lohiabada ena Dina” ai (b) bona ‘Iehova ena dina’ ai?
2 To namo lasi ita laloa Iehova ena gari havaraia dinana be Apokalupo 1:10 ia herevalaia “Lohiabada ena Dina.” Apokalupo ia gwauraia dinana lalonai, Apokalupo karoa 1 ia lao karoa 22 dekenai idia herevalaia matahanai 16 edia anina do idia vara. Unai nega lalonai Iesu ia perovetalaia gaudia, ena hahediba taudia edia henanadai idia haerelaia gaudia ibounai unai, do idia vara. Edia henanadai be: “Oiemu hereva gauna edena negai do idia vara? Do oi giroa mai, bona tanobada dokona danu, ena toana be dahaka?” Iesu ena noho negana ai ia be guba dekenai ia noho, to unai nega ai tanobada dekenai idia vara gaudia be, ‘tuari, hitolo bada, inai heheni karadia, daihanai goreredia, bona taravatu utua karana.’ Unai dika idauidau idia bada idia lao noho lalonai, Iesu ese Dirava idia gari henia taudia ia durua dalana be, hari inai negai, hahediba taudia ia siaia “Basileia ena Sivarai Namona be tanobada ibounai dekenai do idia harorolaia” totona. Bena, Lohiabada ena dina ena kahana badana do ia vara; inai tanobada dikana ena “dokona,” Iehova ena gari havaraia dinana be do ia hamatamaia. (Mataio 24:3-14; Luka 21:11) Satani ena tanobada dikana dekenai, unai be Iehova ena hahemaoro henia haraga dinana. “Guba bona tanobada do idia mareremarere. To Lohiabada ese iena bese taudia do ia naria namonamo, dika do idia davaria lasi.”—Ioela 3:16.
Iehova be Kara ta Ia Karaia Noa Ena Nega Ai
3. Edena dala ai Noa ena nega ai idia vara gaudia bona iseda nega ai idia vara gaudia idia hegeregere?
3 Hari tanobada dekenai idia vara gaudia be lagani 4,000 gunanai “Noa ena nega” lalonai idia vara gaudia hegeregerena. (Luka 17:26, 27) Genese 6:5 ai, inai hereva ita duahia: “Lohiabada ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.” Unai be hari tanobada hegeregerena! Ia be gwau-edeede kara dikana, mataganigani, bona lalokau lasi karadia amo ia honudae. Reana nega haida ita laloa taunimanima edia kara dika be bada herea vadaeni dainai do idia habadaia noho diba lasi. To aposetolo Paulo ese ia perovetalaia “nega ena dokona” dekenai do idia vara gaudia idia guguru noho: “Kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.”—2 Timoteo 3:1, 13.
4. Idaunegai, tomadiho koikoi ese dahaka ia havaraia?
4 Noa ena nega lalonai, tomadiho ese taunimanima ia durua diba, a? Lasi, hereva momokani ia negea tomadihona, unai neganai ia noho tomadihona, ese taunimanima idia karaia kara dika ia habadaia. Iseda tama sina ginigunadia ese ‘idaunegai gaigaina, iena ladana be Diabolo bona Satani’ ena hahediba koikoi idia abia dae. Adamu ena tubudia edia nega dekenai, “taunimanima ese Lohiabada ena ladana helagana dekenai guriguri idia hamatamaia,” to toana be unai be Dirava ena ladana hadikaia karana. (Apokalupo 12:9; Genese 3:3-6; 4:26) Gabeai, gwau-edeede aneru, Dirava badinaia karana idia rakatania anerudia, be tanobada tauanina idia atoa, kekeni mai edia hairai ida sihari kava karana idia karaia totona. Unai hahine ese taunimanima badadia badadia, o Nephilim, idia havaraia, bona idia ese taunimanima ma haida idia dagedage henia bada. Demoni ese taunimanima edia lalona idia veria dainai, “taunimanima ibounai edia kara be dika momokani.”—Genese 6:1-12.
5. Noa ena nega lalonai idia vara gaudia dainai, Iesu ese dahaka sisiba ia henia ita dekenai?
5 To famili ta be Iehova badinaia karana idia rakatania lasi. Unai dainai, Dirava ese “abata bada herea ia havaraia, vadaeni ibounai idia mase. Noa, kara maoromaoro ia harorolaia tauna, bona taunimanima 7, idia sibona” ia hamauria. (2 Petero 2:5) Unai Abata be Iehova ena gari havaraia dinana ia laulaulaia bona unai dina be inai tanobada ena oromana dikana haorea dinana. Iesu ese ia perovetalaia, ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba. Noa ena nega bamona, Taunimanima ena Natuna do ia mai neganai, be unai bamona gaudia do idia vara. Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.” (Mataio 24:36-39) Hari inai negai be unai hegeregerena, unai dainai Iesu ese ita ia hagoadaia, sibona do ‘ita naria namonamo, ita hegaegae, bona nega ibounai do ita guriguri, unai dika ibounai dekena amo do ita heau mauri’ totona.—Luka 21:34-36.
Iehova Ena Kota Karana Sodoma Bona Gomora Dekenai
6, 7. (a) Lota ena nega ai idia vara gaudia ese dahaka idia laulaulaia? (b) Edena sisiba goevagoeva ita abia unai amo?
6 Lagani handred momo Abata murinai, Noa ena tubudia be tanobada dekenai idia momo neganai, abidadama tauna Aberahamo bona ena tadina ena natuna Lota ese Iehova ena gari havaraia dinana ma ta be edia matana amo idia itaia. Lota bona ena ruma bese taudia be Sodoma hanua dekenai idia noho. Unai hanua bona ia kahirakahira ia noho hanuana Gomora lalonai taunimanima be kara bodaga idia manadalaia momokani. Kohu idia ura henia dikadika danu, bona gabeai unai kara be Lota ena adavana ena lalona ia veria danu. Iehova be Aberahamo ia hamaoroa, ia gwau: “Sodoma bona Gomora be dika rohoroho, bona edia kara dika be bada herea.” (Genese 18:20) Aberahamo be Iehova ia noia unai hanua rua ia hadikaia lasi, idia noho kara maoromaoro taudia ia hadikaia garina, to Iehova ia gwau kara maoromaoro taudia 10 ia davaria diba lasi. Dirava ia siaia anerudia ese Lota bona ena kekeni rua idia durua ia noho kahirakahira hanuana Soara dekenai idia heau mauri totona.
7 Unai murinai dahaka ia vara? Luka 17:28-30 ese iseda “nega ena dokona” bona Lota ena nega ia hahegeregerea, ia gwau: “Lota ena nega dekenai danu, unai bamona sibona ia karaia. Idia aniani, idia inuinu, idia hoihoi, idia hadohado, ruma idia karaia. To Lota be Sodoma dekena amo ia raka siri dina dekenai, lahi bona nadi siahu, guba dekena amo idia moru, ibounai ia alaia ore. Taunimanima ena Natuna do ia hedinarai dina dekenai danu, unai bamona kara do ia vara.” Sodoma bona Gomora dekenai Iehova ena hahemaoro dinana ai idia vara gaudia ese ita, Iesu ena noho negana ai ita noho taudia, dekenai sisiba goevagoevana ia henia. Hari inai negai taudia “ese sihari kava bona kara bodaga idauidau idia karaia momo.” (Iuda 7) Danu, iseda nega lalonai idia karaia sihari karadia ese Iesu ia perovetalaia ‘daihanai goreredia’ momo idia havaraia hari.—Luka 21:11.
Israela Besena ese “Lai Guba Bada Herea” Ia Mamia
8. Israela taudia be Iehova ida idia karaia gwauhamatana idia badinaia, eiava?
8 Gabeai, Iehova ese Israela besena be ‘bese ibounai edia huanai amo ia abia hidi besena, hahelaga taudia bona bese helagana do idia lao.’ To unai do ia karaia bema ena ‘hereva do idia kamonai henia, bona ena taravatu do idia badinaia.’ (Esodo 19:5, 6) Unai hahenamo badana idia matauraia, a? Lasi vaitani! Momokani, abidadama taudia unai besena amo ese Dirava idia badinaia noho—Mose, Samuela, Davida, Iehosapata, Hesekaia, Iosaia, bona abidadama peroveta tatau bona hahine danu. To unai bese ena taunimanima momo herea be Dirava idia badinaia lasi. Gabeai, unai basileia idia hapararaia bona idia be rua—Israela bona Iuda. Nega momo unai bese rua ese tomadiho koikoi bona dekena besedia edia Dirava hadikaia kastom idauidau idia tohotohoa.—Esekiela 23:49.
9. Iehova be edena dala ai gwau-edeede iduhu 10 basileiana ia hahemaoro henia?
9 Iehova ese unai kara ia hahemaoro henia dalana be edena bamona? Vaia ena kara, dahaka do ia karaia ia gwauraia guna, bona unai be Amosa ia herevalaia hakaua herevana hegeregerena, ia gwau: “Momokani, kara ibounai Lohiabada Dirava ia ura karaia gwauraia neganai, ia ese iena hesiai taudia, peroveta taudia ia hamaorodia guna.” Amosa ese not kahana basileiana, Israela, dekenai do ia vara dika ia gwauraia, ia gwau: “Lalohisihisi bada momokani do umui davaria! Unai dina dekenai dahaka namo do umui davaria? Umui laloa ia be diari ena dina, a? Lasi momokani. Inai dina be dibura ena dina umui dekenai.” (Amosa 3:7; 5:18) Danu, Amosa ena nega ai ia noho peroveta tauna ma ta, Hosea, ia gwau: “Israela taudia ese lai idia hadoa neganai, ena anina be, lai guba bada herea do idia havaraia.” (Hosea 8:7) Lagani 740 B.C.E. ai, Iehova ese Asuria ena tuari taudia ia gaukaralaia unai not kahana basileiana, Israela, ia hadikaia ore ela bona hanaihanai totona.
Iehova ese Tomadiho Momokani Idia Negea Besena Iuda Ia Kota Henia
10, 11. (a) Dahaka dainai Iehova be Iuda ena dika ia gwauatao lasi? (b) Edena bamona kara bodaga be unai bese ia hadikaia?
10 Iehova ese ena peroveta taudia be saut basileiana, Iuda, dekenai ia siaia danu. To, Iuda ena king taudia, hegeregere Manase bona ena gabu ia abia tauna Amona, ese Dirava ena matana ai kara dika bada idia karaia noho, ‘kerere lasi taudia momo herea idia alaia mase bona kaivakuku tomadiho karana idia karaia.’ Ena be Amona ena natuna merona Iosaia ese Iehova ena matana ai kara namo ia karaia, to ia murinai idia mai king taudia, bona idia lohiaia taudia danu, ese gwau-edeede kara dikadia idia hamatamaia lou. Unai dainai Iehova ese “unai rara habubua kava ena dika ia gwauatao lasi.”—2 King Taudia 21:16-21; 24:3, 4.
11 Iehova be ena peroveta tauna Ieremia amo ia gwau: “Hoa bada bona gari bada gauna ta, be emui tano dekenai ia vara vadaeni, gauna be inai: Peroveta taudia be idia peroveta koikoi noho, bona hahelagaia taudia ese, sibodia edia laloa hegeregerena taunimanima idia naria noho, bona egu bese taudia be inai bamona dala idia ura henia noho. To nega ena dokona do ia ginidae neganai, dahaka do umui karaia?” Iuda besena be rara bubua kava karana badana idia karaia vadaeni, bona ena taunimanima edia kara ia gageva vadaeni; idia henaohenao, idia ala-ala, idia heudahanai, idia gwauhamata koikoi, dirava koikoidia murinai idia raka, bona kara bodaga ma haida idia karaia. Dirava ena dubu be “henaoa taudia edia hunia gabuna” ai idia halaoa.—Ieremia 2:34; 5:30, 31; 7:8-12.
12. Iehova be edena dala ai gwau-edeede hanuana Ierusalema ia hahemaoro henia?
12 Iehova ia gwau: “Tuari bona dika, be mirigini kahana [Kaldea] dekena amo, lau Lohiabada ese lau mailaia noho, bona inai dika ese gau ibounai do ia hadikaia ore.” (Ieremia 4:6) Unai dainai, ia ese unai nega ena siahu bada basileiana Babulonia, ‘tanobada ena kahana ibounai ia botaia bona ia makohia maragimaragi hama badana,’ ia gaukaralaia gwau-edeede hanuana Ierusalema bona ena dubu ia hadikaia ore totona. (Ieremia 50:23) Lagani 607 B.C.E. ai, unai hanua idia koua hagegea nega aukana murinai, Nebukanesa ena ami badana ese ia hamorua. “Vadaeni Babulonia ena king ese Sedekaia ena natudia tau be iena vairana dekenai ia aladia mase, Ribila dekenai. Babulonia ena king ese Iuda ena lohia taudia ibounai danu ia aladia mase. Nebukanesa ese danu Sedekaia ena matana ia hakepulua, bona auri seini dekenai Sedekaia ia guia, Babulonia dekenai do ia abia lao totona. Babulonia taudia ese Sedekaia ena ruma badana be lahi dekenai idia gabua ore, bona taunimanima edia ruma danu idia gabua ore, bona Ierusalema ena magudia idia makohia, bona idia veria diho. Unai neganai Nebusaradana, Babulonia ena gima taudia edia biaguna, ese Heberu taudia, do mauri noho taudia, be ia abidia lao Babulonia dekenai. Ia dekenai idia hanaia lao taudia, bona taunimanima oredia danu be Babulonia dekenai ia abidia lao.”—Ieremia 39:6-9.
13. Iehova ena dina lagani 607 B.C.E. ai, idia roho mauri taudia be daidia, bona dahaka dainai idia roho mauri?
13 Unai be gari havaraia dinana momokanina! To idia haida, Iehova idia kamonai henia taudia unai, be unai hahemaoro henia karana amo idia roho mauri. Idia haida be Israela lasi Rekaba taudia, bona idia be unai Iuda besena taudia bamona lasi, to idia be manau taudia bona kamonai karana idia hahedinaraia. Idia roho mauri taudia ma haida be abidadama opesa tauna Ebede Meleke, ia be ranu guri mai ena kopukopu amo Ieremia ia ruhaia tauna, bona Ieremia ena abidadama toretore tauna Baruku danu. (Ieremia 35:18, 19; 38:7-13; 39:15-18; 45:1-5) Unai bamona taudia dekenai, Iehova ia gwau: “Lau lohiabada ese egu palani umui totona lau diba . . . , umui do lau durua, vadaeni noho namo do umui davaria, dika ta lasi. Bona natuna momo do umui havaraia, emui bese hagoadaia totona.” Lagani 539 B.C.E. ai, unai gwauhamata be dala maragina ai ia guguru. Babulonia ia hamorua tauna, King Kurese, be Dirava gari henia Iuda taudia ia ruhaia, bona idia giroa Ierusalema dekenai, unai hanua bona ena dubu haginia lou totona. Hari inai negai, Babulonia bamona tomadiho oreadia idia rakatania bona Iehova ena tomadiho goevana idia hamatamaia taudia ese Iehova ia havaraia lou Paradaiso dekenai maino hanaihanai do idia moalelaia diba.—Ieremia 29:11; Salamo 37:34; Apokalupo 18:2, 4.
Aposetolo Taudia Edia Nega ai Ia Vara “Hisihisi Bada Herea”
14. Dahaka dainai Iehova ese Israela besena ia dadaraia vaitani?
14 Aposetolo taudia edia nega ai idia vara gaudia mani ita laloa. Unai nega ai, Iuda taudia ese tomadiho momokanina idia negea lou. Iehova ese ia sibona ia havaraia Natuna tamona ia siaia tanobada dekenai, iena Horoa Tauna, eiava Mesia ai ia lao totona. Lagani 29 C.E. ia lao lagani 33 C.E. padadiai, Iesu be Israela ena tano ibounai lalonai ia haroro, ia gwau: “Emui lalona umui giroa, badina Guba Basileia be kahirakahira ia mai vadaeni.” (Mataio 4:17) Danu, hahediba taudia ia haboua bona ia hadibaia ia ida Basileia ena sivarai namona idia harorolaia totona. Iuda taudia idia biagua taudia ese dahaka idia karaia? Iesu ena ladana idia hadikaia bona kara dika rohorohona idia karaia, edia hereva dainai Iesu be satauro dekenai mai hisihisi ida ia mase. Iehova ese Iuda besena ia negea, idia be iena taunimanima lasi. Unai neganai unai bese ia dadaraia vaitani.
15. Idia helalo-kerehai Iuda taudia ese dahaka hahenamo idia abia?
15 Pentekoste dinana 33 C.E. ai, ia toreisi lou vadaeni tauna Iesu ese lauma helaga ia bubua, bona unai ese ena hahediba taudia ia hasiahua bona idia hebou haraga Iuda bona Iuda tomadiho idia abia dae taudia edia gado idauidau ai idia hereva diba. Petero ese idia hebou taudia ia hereva henia, ia gwau: “Inai Iesu be Dirava ese ia hatorea isi vadaeni, ai ibounai be ai itaia, bona ai diba vadaeni. . . . Unai dainai, Israela bese taudia ibounai idia diba momokani be namo, inai Iesu, satauro dekenai umui hamasea tauna, be Dirava ese Lohiabada bona Keriso ia halaoa vadaeni.” Kudou-momokani Iuda taudia be dahaka idia karaia? “Idia gari momo” bona edia kara dika amo idia helalo-kerehai, bona bapatiso idia abia. (Kara 2:32-41) Basileia harorolaia gaukarana idia haharagaia, bona lagani 30 murinai, ‘tanobada ibounai dekenai idia harorolaia vadaeni.’—Kolose 1:23.
16. Iehova be edena dala ai gau haida ia biagua, Israela besena korikorina ia hahemaoro henia totona?
16 Iehova ia dadaraia besena, Israela besena korikorina, ena hahemaoro henia negana ia ginidae. Unai nega lalonai idia diba gabudia amo, bese idauidau taudia tausen momo ese Keristani kongregesen idia vareai, Dirava ese ena lauma helaga amo idia ia horoa bona “Dirava ena Israela momokani orea taudia” ai idia lao. (Galatia 6:16) Unai neganai Iuda taudia ese inai heheni bona tuari heheni karadia idia karaia badabada. Paulo ena hereva “taunimanima ibounai ese gavamani do idia kamonai henia” idia badinaia lasi, to idia ia lohia gavamanina, Roma, idia gwau-edeede henia bona unai kara idia hunia lasi. (Roma 13:1) Toana be Iehova ese idia vara gaudia ia biagua. Lagani 66 C.E. ai, Jeneral Gallus henunai, Roma tuari taudia idia lao Ierusalema hanuana do idia hagegea totona. Ierusalema idia tuari henia Roma taudia ese unai hanua idia vareai ela bona dubu ena magu henunai guri idia geia. Josephus ena rekodi dekenai ia gwau hanua bona hanua taudia dekenai hisihisi badana ia vara.a To karaharaga unai tuari taudia idia heau. Unai ese dala ia kehoa, Iesu ena hahediba taudia be iena peroveta herevana Mataio 24:15, 16 ai ia noho haheganina idia badinaia totona, ‘ororo dekenai idia heau lao.’
17, 18. (a) Iehova be edena hisihisi badana ia gaukaralaia, Iuda taudia ia hahemaoro henia totona? (b) Edena taudia be ‘mauri idia davaria,’ bona unai ese edena nega ia laulaulaia?
17 To, Iehova ena hahemaoro henia karana ibounai, unai hisihisi badana ena hagugurua negana ai, be ia do vara lasi. Lagani 70 C.E. ai, Jeneral Titus henunai, Roma tuari taudia idia giroa bona idia dagedage henia lou. Unai neganai tuari dekenai idia kwalimu! Idia tuari heheni Iuda taudia ese unai Roma taudia idia lulua diba lasi. Roma taudia ese unai hanua bona ena dubu idia hadikaia ore. Iuda taudia milioni ta mai kahana be hitolo dainai idia hisihisi bona idia mase, bona mase tauanidia 600,000 be hanua ena geiti amo idia negea lao. Unai hanua ia moru murinai, Iuda taudia 97,000 idia abia lao hesiai gaukara karaia totona, bona gabeai idia momo be Roma taudia edia steidiam ai idia karaia heatu-helulu lalonai idia mase. Momokani, unai hisihisi badana ena laganidia amo idia roho mauri momokani taudia be Ioridane murinai ororo dekenai idia heau kamonai Keristani taudia sibona.—Mataio 24:21, 22; Luka 21:20-22.
18 Unai amo, Iesu ena “tanobada dokona” peroveta herevana badana ena hagugurua negana ginigunana ia vara, bona lagani 66-70 C.E. ai, unai gwau-edeede Iuda besena dekenai, Iehova ena davana henia dinana ia vara. (Mataio 24:3-22) To, unai nega be Iehova ena dina badana mai garina ia laulaulaia sibona; unai hisihisi ginigabena be kahirakahira tanobadana ibounai dekenai do ia vara. (Ioela 2:31) Edena bamona oi be ‘mauri do oi davaria’? Hereva gabena ese unai do ia haerelaia.
[Footnotes]
a Josephus ia gwau Roma tuari taudia ese unai hanua idia hagegea, ena haba ena kahana ta henunai guri idia geia bona idia vareai, bona Iehova ena dubu idia gabua gwauraia. Ia lalonai idia noho bona idia rakatania diba lasi Iuda taudia be momo bona idia gari dikadika, badina idia laloa do idia mase.—Wars of the Jews, Buka II, karoa 19.
Riviu Henanadai
◻ Edena dala ai ‘Iehova ena dina’ be mai anina “Lohiabada ena Dina” dekenai?
◻ Noa ena nega ita laloa neganai, dahaka sisiba ita badinaia be namo?
◻ Dahaka sisiba ita abia Sodoma bona Gomora edia sivarai amo?
◻ Aposetolo taudia edia nega ai ia vara ‘hisihisi badana’ amo idia roho mauri taudia be daidia?
[Picture on page 15]
Iehova be roho mauri dalana ia kehoa Noa bona Lota bona edia ruma bese taudia dekenai, bona lagani 607 B.C.E. ai bona lagani 70 C.E. ai ia karaia danu