“Oi ese Lauegu Kara Oi Ura Henia Momokani Noho, A?”
“Oi mai, ita lao, bona do oi itaia dahaka siahu karadia Lohiabada dainai lau karaia noho.”—2 KING TAUDIA 10:16.
1, 2. (a) Tomadiho dalanai, Israela ena noho be edena bamona ia dika ia lao? (b) Lagani 905 B.C.E. ai, Israela dekenai edena gaudia be do idia idau?
LAGANI 905 B.C.E. ai, gau momo idia idau Israela dekenai. Lagani 100 gunanai, Iehova ese Israela hapararaia karana ia havaraia, Solomona be hereva momokani ia negea dainai. (1 King Taudia 11:9-13) Saut kahana basileiana, Iuda, be Solomona ena natuna Rehoboama ese ia lohiaia, to not basileiana, Israela, be Eparaima tauna King Ieroboama ese ia lohiaia. To madi, not basileiana ena matamana negana ai gau dikana ta ia vara. Ieroboama ia ura ia lohiaia taudia be saut basileiana dekenai idia lao lasi, dubu dekenai tomadiho idia karaia totona, Davida ena iduhu taudia dekenai idia giroa lou garina. Unai dainai boromakau natuna tomadiho henia karana ia hamatamaia Israela dekenai bona not basileiana ia noho negana ibounai lalonai unai kara ia noho.—1 King Taudia 12:26-33.
2 Omeri ena natuna Ahaba be king ai ai lao neganai, unai kara ia dika ia lao. Iena adavana Iesebele, idau hanua hahinena, ese Bala tomadiho henia karana ia habadaia bona Iehova ena peroveta taudia ia alaia. Ena be peroveta tauna Elia ese Ahaba ia sisiba henia goevagoeva, to Ahaba ese Iesebele ia koua lasi. To lagani 905 B.C.E. ai, Ahaba ia mase, bona ena natuna Iehorama ia lohia matamaia. Unai tano ena hagoevaia negana ia ginidae. Elia ena gabu ia abia tauna, Elisaia, ese tuari gunalaia tauna, Iehu, ia hamaoroa Iehova ese ia do ia horoa, Israela ena king ai do ia lao totona. Iena gaukara be dahaka? Ahaba ena kara dika besena do ia alaia, bona Iesebele dekenai davana do ia henia, peroveta taudia edia rara ia bubua kava dainai!—2 King Taudia 9:1-10.
3, 4. Edena dala ai Iehonadaba ia hahedinaraia ‘Iehu ena kara ia ura henia momokani’?
3 Iehu be Iehova ena hahegani ia badinaia, bona iena oda dainai unai hahine dikana, Iesebele, idia alaia, bona unai murinai ia lao Israela hagoevaia karana ia karaia totona, Ahaba ena bese taudia ia hamasea. (2 King Taudia 9:15–10:14, 17) Bena durua tauna ta ia davaria. “Dala dekenai Iehonadaba Rekaba danu idia hedavari. Vadaeni Iehu ese Iehonadaba ia hanamoa, ia gwau, ‘Oi ese lauegu kara oi ura henia momokani noho, lau ese oiemu kara lau ura henia momokani hegeregerena, a?’ Iehonadaba ese ia haere, ia gwau, ‘Io.’ Iehu ia gwau, ‘Bema unai bamona, oiemu imana lau dekenai oi henia.’ Vadaeni Iehu, ese iena kariota dekenai Iehonadaba ia abia daekau. Iehu ma ia gwau, ‘Oi mai, ita lao, bona do oi itaia dahaka siahu karadia Lohiabada dainai lau karaia noho.’ Vadaeni idia ruaosi be kariota dekenai Samaria dekenai idia lao.”—2 King Taudia 10:15, 16.
4 Iehonadaba (eiava, Ionadaba) be Israela tauna lasi. To, ena ladana hegeregerena (ena anina be “Iehova Ena Lalona Ia Hegeregere,” “Iehova be Namo Bada Herea,” eiava “Iehova be Hariharibada Diravana”), ia be Iehova ia tomadiho henia tauna. (Ieremia 35:6) Momokani, ia ura dikadika Iehu ena “siahu karadia Lohiabada dainai” do ia itaia. Dahaka dainai unai ita diba? Dirava ia horoa king, Israela ena, ia hedavari kava lasi. Iehu be Iesebele bona Ahaba ena bese taudia haida ia hamasea vadaeni murinai, Iehonadaba ia lao Iehu ida ia hedavari totona. Iehonadaba be Iehu ena kariota dekenai ia guia neganai, unai kara ena anina ia lalo-pararalaia. Unai kara ese ia hahedinaraia goevagoeva, tomadiho koikoi bona tomadiho momokani hepapahuahuna lalonai, Iehu ena kahana—bona Iehova ena kahana—dekenai ia gini.
Hari Inai Negai Iehu Bona Hari Inai Negai Iehonadaba
5. (a) Tanobada taudia dekenai dahaka gaudia do idia idau? (b) Iehu Badana be daika, bona tanobada dekenai ena hereva idia gwauraia taudia be daidia?
5 Hari inai negai, tanobada taudia ibounai do idia davaria gau momo be do idia idau momokani, lagani 905 B.C.E. ai, Israela taudia dekenai idia vara gaudia hegeregerena. Kahirakahira Iehova ese tanobada do ia hagoevaia, bona Satani ena siahu dainai idia vara gau dikadia ibounai, tomadiho koikoi danu, be do ia haorea. To hari inai negai Iehu bamona tauna be daika? Ia be Iesu Keriso, bona inai peroveta herevana ese ia herevalaia, ia gwau: “Oiemu tuari kaia be gaba gauna dekenai do oi kwatua. Oi be mai hairaina, bona mai oiemu king siahuna danu. Oiemu hosi dekenai do oi guia, bona mai king siahuna danu do oi lao, do oi kwalimu. Hereva momokani bona kara maoromaoro gimaia totona, do oi tuari lao.” (Salamo 45:3, 4) Tanobada dekenai Iesu ena hereva idia gwauraia taudia be horoa Keristani taudia, “Dirava ena Israela momokani” taudia, bona “idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai.” (Galatia 6:16; Apokalupo 12:17) Lagani 1922 amo, Iesu ena horoa tadikaka be Iehova do ia karaia hahemaoro karadia idia harorolaia mai edia gari lasi.—Isaia 61:1, 2; Apokalupo 8:7–9:21; 16:2-21.
6. Bese idauidau amo idia mai taudia, horoa Keristani taudia idia durua taudia unai, be daidia, bona Iehu Badana ena kariota idia guia bamona karana be dahaka?
6 Horoa Keristani taudia sibona ese unai gaukara idia karaia lasi. Iehonadaba ia lao Iehu ida ia hedavari totona hegeregerena, bese idauidau taudia momo idia lao Iesu, Iehu Badana, bona ena hereva idia gwauraia taudia dekenai, edia hereva momokani badinaia karana ai idia bamoa totona. (Sekaraia 8:23) Iesu ese idia ia gwauraia ena “mamoe idaudia,” bona lagani 1932 ai idia diba idia be hari inai negai Iehonadaba bamona taudia bona hari inai negai Iehu bamona tauna ese idia ia boiria ‘ena kariota dekenai’ idia guia totona. (Ioane 10:16) Guia dalana be edena bamona? “Dirava ena taravatu idia badinaia momokani” bona horoa taudia ida “Iesu ena hereva momokani idia gwauraia hedinarai.” Hari inai nega ai, Dirava ese ena King Iesu henunai ia haginia Basileiana ena sivarai namona idia harorolaia. (Mareko 13:10) Lagani 1935 dekenai idia gwau unai “Ionadaba” bamona taudia be Apokalupo 7:9-17 (NW) ese ia gwauraia “hutuma bada herea” taudia.
7. Hari inai negai Keristani taudia be edena kara amo idia hahedinaraia Iesu ena kara idia “ura henia momokani noho”?
7 Lagani 1930 murinai, hutuma bada herea taudia bona edia horoa tadikaka be mai edia gari lasi ida tomadiho momokani idia abia isi. Gabu haida dekenai, hegeregere Eastern bona Western Europe, Asia, bona Africa dekenai, idia momo be edia abidadama dainai idia mase. (Luka 9:23, 24) Tano ma haida dekenai dibura ruma lalodiai idia negea, taunimanima hutuma ese idia dagedage henidia, bona ma dala idauidau ai idia hahisidia. (2 Timoteo 3:12) Edia abidadama sivaraidia be namo herea! Hesiai Laganina Ena Ripoti, lagani 1997 totona, ia hahedinaraia herevana dahaka ia vara idia dekenai, edia lalona idia hadaia Dirava do idia hesiai henia noho. Iesu ena kara idia “ura henia momokani noho.” Lagani 1997 ai, unai idia hahedinaraia, badina Basileia pablisa taudia 5,599,931, kahirakahira iboudiai be “Ionadaba” bamona taudia, be Iesu gwauraia hedinarai gaukara karaia totona hora 1,179,735,841 idia haorea.
Idia Haroro Goadagoada Noho
8 Iehu ena kara ta be ena kariota ia taria neganai ia heau haraga herea—ia hahedinaraia ia ura dikadika ena gaukara ia hagugurua. (2 King Taudia 9:20) Idia gwau Iehu Badana, Iesu, ena ura be “lahi bamona” bona ena lalona “ia gabua noho.” (Salamo 69:9) Ita hoa lasi taunimanima momo ese idia itaia hari inai negai Keristani taudia momokanidia be edia gaukara idia karaia goadagoada. Kongregesen lalonai bona taunimanima edia vairanai danu, ‘Sivarai Namona idia harorolaia goadagoada, nega namodia neganai, bona nega dikadia neganai danu.’ (2 Timoteo 4:2) Iseda Basileia Gaukara ena hereva ta ese ita ia hagoadaia idia hegeregere tadikaka ibounai be heduru painia gaukara idia karaia be namo, bona lagani 1997 ena matamana ai, tadikaka ese unai gaukara idia karaia mai edia ura bada ida. Tano ta ta ai, heduru painia gaukara do idia karaia taudia edia namba, edia tahua gauna, idia gwauraia guna. Dahaka ia vara? Momo herea ese idia karaia! Brens momo idia gwau idia abia hidi namba idia hanaia. Ecuador ena tahua gauna be 4,000, to March lalonai heduru painia gaukara idia karaia taudia edia namba be 6,936. Japan be ripoti ta ia siaia, ia gwau hua toi lalodiai tadikaka 104,215 be heduru painia gaukara idia karaia. Zambia ena tahua gauna be 6,000, to March lalonai ena heduru painia taudia edia namba be 6,414; April lalonai 6,532; bona May lalonai 7,695. Tanobada hegegemadai, heduru bona regula painia taudia edia namba badana be 1,110,251, unai namba ese lagani 1996 ena namba be pesen 34.2 amo ia hanaia!
9. Iehova ena Witness taudia be ruma-ta-ruma-ta gaukarana sibona amo lasi, to edena dala idauidau ai taunimanima idia davaria bona idia dekenai sivarai namona idia harorolaia?
9 Paulo be Efeso ena elda taudia ia hamaoroa, ia gwau: “Umui diba vadaeni umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai.” (Kara 20:20) Iehova ena Witness taudia be Paulo ena haheitalai namona idia tohotohoa bona ruma-ta-ruma-ta gaukarana amo sivarai namona idia harorolaia goadagoada. To, nega momo taunimanima be edia ruma dekenai idia davaria be auka. Unai dainai, ‘Hesiai tauna mai ena kamonai bona mai ena kara maoromaoro’ oreana ese Basileia pablisa taudia ia hagoadaia taunimanima idia hereva henia edia gaukara gabudia ai, dala dekenai, kone dekenai, loaloa uma gabudia ai—taunimanima idia davaria gabudia ibounai dekenai. (Mataio 24:45-47) Unai ese anina namona ia havaraia.
10, 11. Tano rua dekenai, pablisa taudia be edia ruma dekenai do idia davaria lasi kamonai taudia be edeseniai idia tahua?
10 Copenhagen, Denmark dekenai, pablisa taudia edia grup maragina ta be trein steiseni vairanai idia noho ariara dekenai idia haroro. January ela bona June dekenai, magasin 4,733 idia hariharilaia, momo ida idia herevahereva namo herea, bona lou henia momo idia karaia. Unai tano ena pablisa haida be sitoa haida idia vadivadi henia loulou, magasin idia ura idia abia hanaihanai taudia edia magasin henia totona. Taoni ta be Friday ta ta ibounai dekenai maketi badana idia karaia bona vadivadi taudia tausen momo idia lao. Unai dainai kongregesen ese maketi dekenai haroro gaukara idia karaia loulou. Gabu ta dekenai, sikuli gabudia idia vadivadi henia bona pasolo ta idia henia, ia lalonai be tisa taudia do idia durua buka, buklet, bona magasin.
11 Hawaii dekenai danu, idia hekwarahi edia ruma dekenai idia noho lasi taudia idia davaria totona. Idia ese teritori idaudia idia karaia; taunimanima idia noho gabudia (ariara, loaloa uma gabudia, motuka atoa gabudia, basi idia guia gabudia) ai, bisinesi momo gabudia siti lalonai, sitoa rumadia badadia, peleini gabudia, telefon amo, basi dekenai, bona kolesi gabudia ai idia haroro. To, idia naria namonamo Witness taudia edia namba ia hegeregere unai teritori totona bona idia lao taudia idia hadibaia namonamo guna. Inai gaukara, idia hegaegaelaia namonamo gaukarana unai, be ma tano momo lalonai idia karaia danu. Unai dainai, ruma-ta-ruma-ta gaukarana lalonai do idia davaria lasi kamonai taudia momo idia davaria.
Idia Gini Goada
12, 13. (a) Lagani 1997 ai, Satani be dahaka ia gaukaralaia Iehova ena Witness taudia hadikaia totona? (b) Tano ta dekenai, koikoi herevadia halasia karana ese edena bamona namo ia havaraia?
12 Lagani 1997 ai, tano momo lalodiai, Iehova ena Witness taudia hadikaia herevadia koikoidia idia halasia, badina be idia ura kota dekenai do idia abia lao, edia gaukara koua totona. To iseda tadikaka idia gini goada! (Salamo 112:7, 8) Salamo torea tauna ena guriguri idia laloatao: “Hekokoroku taudia ese, hereva koikoi dekena amo lau idia hadikaia noho, to lau ese oiemu hadibaia hereva lau kamonai henia, mai egu kudouna ibounai danu.” (Salamo 119:69) Unai koikoi herevadia halasia karana amo ia hedinarai Iesu ena peroveta herevana be momokani, Keristani momokani taudia do idia inai henia. (Mataio 24:9) Bona nega haida edia kara ese dika ia havaraia lasi to namo ia havaraia. Belgium dekenai, tau ta be taunimanima momo idia duahia niuspepa ta lalonai Iehova ena Witness taudia hadikaia herevana ta ia duahia. Iena hadikaia herevadia ia duahia neganai ia hoa, bena Sunday dekenai Kingdom Hall ai idia karaia hebou ia lao henia. Witness taudia ida Baibel ia stadilaia matamaia bona ia goada ia lao haraga. Guna, unai tau be raskol oreana ta lalonai ia noho. Iena Baibel stadi ese ia durua ena mauri dalana ia hanamoa totona, bona ena dekena taudia bona turadia ese unai kara idia hoalaia. Momokani, Witness taudia ia hadikaia herevana ia torea tauna ia laloa lasi unai bamona karana be do ia vara!
13 Belgium dekenai, kudou namo taudia haida be mai edia gari lasi unai hadikaia herevadia idia gwauraia dika. Idia ta be praiminista gunana ta, ia gwau Iehova ena Witness taudia ia laloa bada idia karaia vadaeni gaukara namona dainai. Bona gavamani tauna badana ta ia torea, ia gwau: “Nega ta ta taunimanima be samania herevadia idia halasia, to lau dekenai [Iehova ena Witness taudia] edia toana be Gavamani oreadia idia hadikaia diba lasi taudia. Idia be maino idia ura henia taudia, edia maduna idauidau idia laloa bada, bona gavamani taudia idia kara henia mai edia hemataurai ida.” Petero ena hereva be aonega herevana, ia gwau: “Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.”—1 Petero 2:12.
Memorial Hebouna Namo Hereana Ta
14. Lagani 1997 Memorial dekenai idia lao taudia edia sivarai namodia haida be dahaka?
14 Iesu idia gwauraia hedinarai taudia dekenai, ena mase laloatao hebouna be lagani ena dina badana. March 23, 1997 ai, taunimanima 14,322,226 idia hebou unai dina idia laloatao totona. Unai ese lagani 1996 ai idia hebou taudia edia namba be taunimanima 1,400,000 amo ia hanaia. (Luka 22:14-20) Tano momo lalodiai, Memorial dekenai idia lao taudia edia namba be Basileia pablisa taudia edia namba ia hanaia momokani, bona ia hahedinaraia tadikaka edia namba do ia bada ia lao. Hegeregere lagani 1997 ai, Haiti ena pablisa taudia edia namba ia bada daekau 10,621 dekenai, bona taunimanima 67,259 be Memorial dekenai idia lao. Rau 18 ia lao 21 dekenai lagani ena ripoti oi itaia diba bena do oi diba edena tano idauidau ai Memorial dekenai idia lao taudia be momo herea bema edia pablisa taudia edia namba ida oi hahegeregerea.
15. Tano haida lalonai, iseda tadikaka be Memorial idia karaia totona, hekwakwanai badadia be edena bamona idia hanaia?
15 Taunimanima haida dekenai Memorial lao henia be auka. Albania dekenai, 7:00 p.m. murinai, taunimanima idia loaloa diba lasi taravatuna ia noho, badina taunimanima momo be gavamani idia badu henia. Unai tano lalonai grup maragidia 115 idia karaia, bona Memorial idia hamatamaia 5:45 p.m. ai. Nisan 14 be dina ia diho murinai do ia hamatamaia, bona unai ia vara 6:08 p.m. ai. Paraoa bona uaina idia henia 6:15 p.m. ai. Grup momo edia guriguri ginigabena be 6:30 p.m. ai idia gwauraia, bona loaloa lasi taravatu ia do matamaia lasi neganai, hebou taudia idia giroa haraga edia ruma dekenai. To, Memorial dekenai idia lao taudia edia namba be 3,154, bona pablisa taudia edia namba badana be 1,090 sibona. Africa ena tano ta dekenai, taunimanima be gavamani idia badu henia bona edia heai karadia dainai tadikaka idia hebou diba lasi Kingdom Hall dekenai. Unai dainai elda rua idia laloa elda ma ta ena ruma dekenai do idia hebou, Memorial totona kongregesen taudia be grup maragidia dekenai do idia hapararaia dalana do idia hegaegaelaia totona. Unai elda rua be unai ruma dekenai idia lao totona, koupa ta do idia hanaia guna. To, taunimanima be unai gabu dekenai idia tuari noho, bona unai koupa idia hanaia taudia idia pidia. Elda ta ia hanaia haraga bona gau ta ia vara lasi. Elda iharuana ia hanaia neganai ipidi ena regena ia kamonaia. Karaharaga tano dekenai ia hekure bona buleti be ena kwarana ataiai idia pidia hanai lalonai, gabu namona ta dekenai ia rau lao. Elda taudia be edia hebou idia karaia, bona kongregesen durua gaudia idia karaia.
‘Bese Idauidau Bona Iduhu Idauidau Bona Gado Idauidau Amo’
16. ‘Hesiai tauna mai ena kamonai bona mai ena kara maoromaoro’ oreana ese dahaka idia hegaegaelaia, gado idauidau grup maragidia dekenai sivarai namona ita harorolaia diba totona?
16 Aposetolo Ioane ia gwau hutuma bada herea be “bese idauidau bona iduhu idauidau bona kopina idauidau bona gado idauidau amo” do idia mai. (Apokalupo 7:9, NW) Unai dainai, Hakaua Oreana ese dala idia karaia gado momo dekenai edia buka bona magasin idia printaia, bona unai namba ia bada ia lao—gabu daudau dekenai sibodia idia noho besedia bona grup maragidia edia gado dekenai idia printaia danu. Hegeregere Mozambique dekenai, Mauri mai Mainona Tanobada Matamatana Lalonai pepapepana be ma gado ima dekenai idia halasia. Nicaragua dekenai, buklet ladana Mauri Hanaihanai Tanobada Dekenai Oi Abia! be Miskito gado dekenai idia halasia—unai be Watch Tower Society ia printaia gauna ginigunana unai gado dekenai. Miskito Indian taudia momo ese unai buklet idia abia dae mai edia moale bada ida, badina ia be edia gado korikori dekenai idia printaia gauna. Lagani 1997 ai, Society ese gwau-maoro ia henia ma gado 25 dekenai buka bona magasin idia printaia totona bona idia ese magasin bilioni ta idia printaia.
17. Korea dekenai, edena gado idauna taudia idia durua, bona edena dala ai vidio be unai taudia ia durua bada?
17 Korea dekenai gado idauna taudia idia durua. Lagani 1997 hebouhebouna ta ai, Korea taia kudima taudia edia gado ai program idia karaia. Korea dekenai, taia kudima taudia totona kongregesen 15 idia noho, bona edia pablisa taudia edia namba be 543, to hebouhebou dekenai idia lao taudia be 1,174, bona 21 be bapatiso idia abia. Taia kudima taudia ese hereva bona toretore idia lalo-pararalaia haraga lasi dainai, vidio idia karaia noho taia kudima taudia edia gado idauidau 13 dekenai, buka o magasin edia hereva idia hahedinaraia totona. Unai amo, taia kudima taudia idia durua hereva momokani idia “duahia” bona idia stadilaia totona, bona edia gaukara ese anina namona ia havaraia. United States dekenai, guna, taia kudima tauna be lagani ima bamona murinai ia hegeregere bapatiso abia totona. To hari, vidio haida idia noho America Taia Kudima Taudia Edia Gado ai dainai, taia kudima taudia haida be lagani tamona murinai idia hegeregere bapatiso totona.
‘Kariota Dekenai Oi Noho’
18. Iehu be Iehonadaba ida ia hedavari murinai, ia lao dahaka ia karaia totona?
18 Gunaguna, lagani 905 B.C.E. ai, Iehonadaba be Iehu ia bamoa murinai, Iehu ia lao tomadiho koikoi hadikaia ore totona. Bala idia tomadiho henia taudia ibounai ia boiria, ia gwau: “Hebou badana ta, Bala hanamoa totona do umui gwauraia hedinarai.” Bena tano ibounai lalonai, Iehu ese ena hereva gwauraia taudia ia siaia lao, Bala tomadiho henia tauna ta ia reaia garina. Taunimanima hutuma be unai koikoi diravana ena dubu badana dekenai idia aru vareai neganai, Iehu ese ia hamomokania guna Iehova tomadiho tauna ta be unuseniai ia noho lasi. Vadaeni, Iehu bona ena tuari taudia be Bala tomadiho henia taudia idia alaia mase. “Unai dala dekenai, Iehu ese Bala tomadiho henia kara be Israela dekena amo ia haorea momokani.”—2 King Taudia 10:20-28.
19. Taunimanima dekenai do ia vara gauna ita laloa neganai, namona be iseda kara be edena bamona, bona namona be edena gaukara ita karaia goadagoada?
19 Hari inai nega ai, tomadiho koikoi oreadia ibounai edia hahemaoro dinana ginigabena be kahirakahira. Aneru edia hahekau henunai, Keristani taudia be taunimanima ibounai dekenai sivarai namona idia harorolaia, bona idia hagoadadia Dirava idia gari henia bona tomadiho koikoi amo idia siri. (Apokalupo 14:6-8; 18:2, 4) Manau taudia idia hagoadaia Dirava ena Basileia, bona Iehova ena terona latanai ia helai King, Iesu Keriso, henunai idia noho be namo. (Apokalupo 12:10) Inai be moale bada negana, tomadiho momokanina totona ita gini goada lalonai, namona be iseda ura ia manoka ia lao lasi.
20. Hesiai laganina 1998 ai, emu lalona oi hadaia dahaka do oi karaia totona?
20 Nega ta, King Davida be hekwakwanai badana ia haheaukalaia neganai, ia guriguri: “Dirava e, egu kudouna lalonai, egu abidadama ia goada momokani. Egu abidadama ia goada momokani oi dekenai. Oi hanamoa totona ane do lau abia, ane namona do lau abia. Lohiabada e, bese idauidau edia huanai lau ese oi do lau hanamoa.” (Salamo 57:7, 9) Namona be iseda kudouna lalonai iseda abidadama ia goada momokani danu. Hesiai laganina 1997 ai, ena be hekwakwanai momo idia vara, to Iehova Dirava hanamoa karana badana ita karaia. Namona be unai bamona gaukara, eiava ita habadaia gaukarana, do ita karaia hesiai laganina 1998 dekenai. Bona herevana Satani be dahaka ia karaia ita ia hamanokaia eiava ita ia koua totona, to do ita gaukara noho. Unai amo do ita hahedinaraia Iehu Badana, Iesu Keriso, ena kara ita ura henia momokani noho, bona iseda lalona ena goada ibounai amo inai Dirava ena lauma amo ia mai herevana do ita badinaia: “Kara maoromaoro taudia e, do umui moale! Lohiabada ena kara dainai do umui moale! Lohiabada umui kamonai henia taudia e, mai moale bada danu do umui boiboi.”—Salamo 32:11.
Oi Gwauraia Hedinarai Diba, A?
◻ Lagani 905 B.C.E. ai, dahaka gaudia idia idau Israela dekenai?
◻ Hari inai negai, daika be Iehu bamona, bona edena dala ai “hutuma bada herea” oreana ia hahedinaraia iena kara idia “ura henia momokani noho”?
◻ Lagani 1997 ena hesiai laganina ena ripoti dekenai, edena gaudia idia hahedinaraia Iehova ena Witness taudia be edia gaukara idia karaia mai edia ura ida?
◻ Herevana Satani ese dahaka ia karaia ita dekenai, to lagani 1998 ena hesiai laganina ai dahaka kara do ita hahedinaraia?
8. Iehova ena Witness taudia edia tomadiho momokani ura henia karana be edena dala ai idia hahedinaraia?
[Chart on page 18-21]
IEHOVA ENA WITNESS TAUDIA EDIA HESIAI LAGANINA 1997 ENA RIPOTI
(For fully formatted text, see publication.)
[Picture on page 15]
Memorial dekenai idia lao taudia edia namba badana ia hahedinaraia tadikaka edia momo do ia bada ia lao
[Caption on page 16]
Iehonadaba be Iehu ia durua hegeregerena, “hutuma bada herea” oreana be Iehu Badana, Iesu Keriso, bona ena horoa tadikaka idia durua