Matana amo Lasi, to Abidadama amo Ita Raka

“Badina iseda mauri be abidadama kara dekena amo, itaia kara dekena amo lasi.”​—⁠2 KORINTO 5:⁠7.

1. ‘Abidadama dekenai ita raka’ ena anina be dahaka?

DIRAVA ena Hereva ena hakaua herevadia hegeregerena ita guriguri negadia ibounai amo, ita hahedinaraia ita be mai iseda abidadama. Dirava ena Basileia be ma haida dekenai ita harorolaia neganai, abidadama ita hahedinaraia danu. Bona iseda mauri be Iehova dekenai ita gwauhamatalaia neganai, ita hahedinaraia iseda ura be ‘abidadama dekenai ita raka,’ ena anina be, iseda mauri dalana be abidadama ese ia biagua.​—⁠2 Korinto 5:7; Kolose 1:​9, 10.

2. Bema ta be kongregesen taudia ida kara haida ia karaia, dahaka dainai unai sibona ese ia hamomokania lasi ia be mai ena abidadama?

² To bema unai bamona do ita raka momokani, namona be iseda abidadama be mai ena badina aukana. (Heberu 11:​1, 6) Taunimanima momo be Iehova ena Witness taudia idia ura henia, badina idia itaia Witness taudia ese taravatu goevadia idia badinaia bona lalokau idia hahedinaraia. Unai be hamatamaia dalana namona, to ita gwau lasi ena anina be unai bamona taudia be mai edia abidadama. Reana haida edia adavana eiava edia tamana eiava sinana be abidadama goada tauna, bona edia lalokau tauna ese ia karaia karadia haida idia karaia danu. Ruma bese lalonai unai bamona haheitalai namona ia noho be hahenamo momokanina, to unai ese ta ena Dirava lalokau henia karana bona sibona ena abidadama hahedinaraia karana ena gabu ia abia lasi.​—⁠Luka 10:27, 28.

3. (a) Badina aukana latanai ia gini abidadama ita abia totona, namona be Baibel dekenai dahaka ita diba momokani? (b) Dahaka dainai taunimanima haida idia abia dae haraga Baibel be Dirava ena lauma ese ia havaraia to ma haida idia abia dae haraga lasi?

³ Abidadama dekenai idia raka momokani taudia ese idia abia dae momokani Baibel be Dirava ena Hereva. Hamomokania gaudia momo herea ese idia hahedinaraia Revareva Helagadia be “Dirava ena Lauma ese ia havaraia.”a (2 Timoteo 3:16) Tau ta be Baibel ia abia dae totona, unai hamomokania gaudia hida do ia itaia be namo? Reana unai be iena diba hegeregerena. Ta ena lalona ia veria momokani gauna be reana ma ta ena lalona do ia veria lasi. Nega haida, ena be tau ta dekenai ia hakoikoia diba lasi gaudia momo herea idia hadibaia, to idia hahedinaraia gauna ia abia dae lasi. Badina be dahaka? Iena kudouna lalonai idia noho uradia dainai. (Ieremia 17:⁠9) Unai dainai, ena be tau ta ia gwau ia be Dirava ena ura ia laloa bada, to reana ena kudouna be ia ura tanobada taudia edia lalo-namo do ia abia. Reana Baibel ena hakaua hereva ese idia gwauraia dika maurina ia ura lasi ia rakatania. To, bema tau ta be hereva momokani totona ia hitolo momokani, bema sibona ia koia lasi, bona bema ia manau, gabeai do ia lalo-parara Baibel be Dirava ena Hereva.

4. Bema tau ta ia ura abidadama ia abia, dahaka ia karaia be namo?

⁴ Nega momo hua haida sibona murinai, Baibel idia stadilaia taudia idia laloa idia dibaia hamomokania gaudia be hegeregere, bona idia abia dae Baibel be Dirava ena Hereva. Bema edia kudouna idia kehoa bona Iehova ena hadibaia karana idia abia dae, idia dibaia gaudia ese edia lalohadai dobudia, bona edia ura do idia biagua matamaia. (Salamo 143:10) Roma 10:10 ia gwau ta be ena ‘kudouna dekena amo’ abidadama karana ia karaia. Unai bamona abidadama ese ena kudouna dekenai ia noho momokani gauna do ia hahedinaraia, bona ena mauri dalana lalonai do ia hedinarai goevagoeva danu.

Noa Ena Abidadama be mai Ena Badina Aukana Dainai Ia Kara

5, 6. Noa ena abidadama ena badina be dahaka?

⁵ Noa ena abidadama be badina aukana latanai ia haginia. (Heberu 11:⁠7) Noa ena abidadama ena badina be dahaka? Noa ese Dirava ena hereva be idia torea gauna amo ia abia lasi, to Dirava ese ia hereva henia. Genese 6:13 ia gwau: “Dirava ese Noa dekenai ia hereva, ia gwau, ‘Mauri gaudia ibounai do lau haorea. Ibounai do lau hamasea haorea, badina tanobada be edia kara dika dekenai ia honu momokani.’ ” Iehova ese Noa ia hamaoroa lagatoi do ia karaia, bona ia karaia dalana ena gau idauidau ia gwauraia hedinarai danu. Bena Dirava be ma ia gwau: “Lau be abata bada herea tanobada dekenai do lau siaia, mauri gaudia ibounai do lau haorea. Gau ibounai tanobada dekenai do idia mase ore.”​—⁠Genese 6:​14-​17.

⁶ Unai ia do vara lasi neganai, medu ia diho vadaeni, a? Baibel ese ia herevalaia lasi. Genese 2:5 ia gwau: “Dirava ese medu tanobada dekenai be ia do hadihoa lasi.” To, unai be Mose ena torea dalana lagani handred momo murinai. Mose ese Noa ena nega ia herevalaia lasi, to gunaguna idaunegai idia vara gaudia ia herevalaia. Genese 7:4 ia hahedinaraia, Iehova ese Noa dekenai medu ia herevalaia, bona toana be Noa ese ena hereva ia lalo-pararalaia. To, Noa ena abidadama be ia itaia gaudia dekenai ia atoa lasi. Aposetolo Paulo ia torea, “Dirava ese dohore idia vara gaudia Noa dekenai ia hadibaia.” New World Translation Baibel ena futnout Genese 6:​17 ai ese ia hahedinaraia Dirava ese Noa ia hamaoroa Ia ese “abata ranuna” eiava “guba davarana” do ia mailaia tanobada latanai. Ela bona unai negai, unai bamona kara ta ia vara lasi. To, Noa ia itaia diba mauri gaudia ibounai idia hamomokania Dirava ese unai bamona dika bada do ia havaraia abatana ia mailaia diba. Noa ena abidadama ese ia doria dainai, lagatoi ia karaia.

7. (a) Noa ese Dirava ena oda badinaia totona, dahaka gauna be mai anina lasi? (b) Noa ena abidadama ita laloa neganai dahaka namo ita davaria, bona edena dala ai iseda abidadama be ma haida ia hanamoa diba?

⁷ Dirava ese Noa dekenai Abata do ia mai dinana ia hadibaia lasi. To Noa ese unai dainai ia laloa lasi do ia naria bona dahaka do ia vara do ia itaia sibona, bona ena mauri lalonai lagatoi karaia gaukara bona haroro gaukara do ia atoa guna lasi. Lasi. Dirava ese Noa ia hamaoroa lagatoi lalonai do idia guia neganai, nega bada ia henia. To unai nega ia do ginidae lasi neganai, “Noa ese [Dirava ena oda] ia karaia, Dirava ena hereva ibounai hegeregere.” (Genese 6:22) Noa be matana amo lasi, to abidadama amo ia raka. Unai ia karaia dainai ita moale! Iena abidadama dainai, hari ita mauri noho. Ita hahedinaraia abidadama be mai anina bada danu, iseda mauri gabena ia haidaua diba sibona lasi, to iseda natudia bona ita bamoa taudia ma haida edia mauri ia haidaua diba danu.

Aberahamo Ena Abidadama

8, 9. (a) Aberahamo ena abidadama be dahaka badina latanai ia haginia? (b) Edena dala ai Iehova be Aberahamo dekenai ia “hedinarai”?

⁸ Haheitalai ma ta​—⁠Aberahamo ena​—⁠mani oi laloa. (Heberu 11:​8-​10) Aberahamo ena abidadama be dahaka badina latanai ia haginia? Uru, Kaldea taudia edia tano, be kohu ura henia bada bona kaivakuku tomadiho henia gabuna, bona unuseniai Aberahamo ia tubu daekau. To gau ma haida dainai Aberahamo ena laloa dalana ia idau. Ena mauri lagani 150 lalonai, Noa ena natuna Sema ia do mauri noho bona ia bamoa diba. Aberahamo ia diba momokani Iehova be “Ataiai Momokani Dirava, guba bona tanobada ia karaia Diravana.”​—⁠Genese 14:⁠22.

⁹ Gau ma ta ese Aberahamo ena mauri ia haidaua. “Aberahamo ia noho Mesopotamia neganai, Harana dekenai ia noho lasi neganai, Hairai Diravana ese ia dekenai ia hedinarai. Ia gwau, ‘Oiemu tano bona oiemu varavara oi rakatania, bona tano dohore lau hadibaia oi, unai tano dekenai do oi lao.’ ” (Kara 7:​2, 3) Iehova be Aberahamo dekenai edena dala ai ia “hedinarai”? Aberahamo be Dirava ia itaia momokani lasi. (Esodo 33:20) To, reana Iehova be nihi ta lalonai Aberahamo dekenai ia hedinarai, mai siahu bona hairai karana ida, eiava ena hereva ia gwauraia aneruna amo. (Genese 18:​1-3; 28:⁠10-​15; Levitiko 9:​4, 6, 23, 24 itaia.) Edena dala ai Iehova be Aberahamo dekenai ia hedinarai be herevana, to unai abidadama tauna ia diba Iehova ese ia vairanai mai anina bada hahenamo ta ia atoa. Aberahamo be mai abidadama ida ia kara.

10. Edena dala ai Iehova ese Aberahamo ena abidadama ia hagoadaia?

¹⁰ Aberahamo be Dirava ese do ia siaia lao tanona ena toana idauidau ia diba eiava ia diba lasi be mai anina bada lasi ena abidadama dekenai. Edena negai unai tano do ia abia ia dibaia be gau badana lasi ena abidadama dekenai. Ia be mai ena abidadama badina ia diba Iehova be Siahu Ibounai Diravana. (Esodo 6:⁠3) Iehova ese Aberahamo ia hamaoroa natuna do ia havaraia, to nega haida Aberahamo ia daradara edena bamona unai do ia vara diba, badina ia buruka ia lao noho. (Genese 15:​3, 4) Iehova ese Aberahamo ena abidadama ia hagoadaia totona, ia hamaoroa hisiu do ia itaia bona bema ia hegeregere do ia duahia. Dirava ia gwau: “Oiemu tubuna edia momo be dohore unai bamona.” Unai ese Aberahamo ena kudouna ia hamarerea bada. Ia hedinarai goevagoeva unai guba gaudia ia Havaraia Tauna be iena gwauhamata ia hagugurua diba. Aberahamo be “Lohiabada dekenai ia abidadama henia.” (Genese 15:​5, 6) Aberahamo be ia kamonaia gauna ia ura henia dainai ia abidadama lasi; lasi, iena abidadama be mai ena badina aukana.

11. (a) Aberahamo ena mauri lagani be kahirakahira 100 ia abia bona Dirava ia gwauhamata hahine burukana, Sara, be natuna merona do ia havaraia neganai, dahaka ia karaia? (b) Aberahamo ese ena natuna merona ia abia lao Moraia Ororona dekenai bona do ia bouboulaia hahetohona lalonai, ena abidadama be edena bamona?

¹¹ Aberahamo ena mauri lagani be kahirakahira 100 ia abia bona ena adavana, Sara, ena mauri lagani be kahirakahira 90 ia abia neganai, Iehova ese ena gwauhamata, Aberahamo be natuna mero ta do ia abia bona Sara ese do ia havaraia, ia gwauraia lou. Aberahamo ese edia mauri ia lalohadailaia. “To iena abidadama ia goada noho. Dirava ese unai gwauhamata ia henia dainai, Aberahamo ia laloa daradara lasi. To iena abidadama ia bada dainai, Dirava ese siahu ia henia, unai dainai Aberahamo ese Dirava ia hanamoa henia. Ia diba momokani Dirava ese iena gwauhamata do ia hamomokania.” (Roma 4:​19-​21) Aberahamo ia diba Dirava ese unai gwauhamata ia henia dainai do ia moru lasi. Gabeai, ena abidadama dainai, Dirava ese ia hamaoroa ena natuna mero, Isako, do ia abia lao Moraia tanona dekenai bona do ia bouboulaia neganai, Aberahamo ia kamonai. (Genese 22:​1-​12) Dirava be hoa karana amo dala ia karaia unai natuna mero ia vara totona dainai, Aberahamo ia diba momokani Dirava ese mase amo do ia hamauria lou diba, ia dekenai Ia gwauhamatalaia gaudia ma haida do Ia hagugurua totona.​—⁠Heberu 11:​17-19.

12. Aberahamo be abidadama dekenai ia raka ela bona edena negai, bona ia bona iena abidadama ruma bese taudia ese edena bamona ahuna do idia abia?

¹² Aberahamo be nega ta ta abidadama ia hahedinaraia lasi, to ena mauri dalana ibounai be abidadama ese ia biagua. Aberahamo ena mauri ibounai lalonai, unai Gwauhamata Tanona ena kahana ta be Dirava amo ia abia lasi ena ahuna bamona. (Kara 7:⁠5) To, Aberahamo ia hesiku lasi bona Kaldea taudia edia tano Uru dekenai ia giroa lou lasi. Lagani 100 lalodiai, ela bona ia mase, Dirava ese ia siaia lao tanona ai ia be palai rumadia dekenai ia noho. (Genese 25:⁠7) Heberu 11:16 ese Aberahamo bona ena adavana Sara, edia natuna merona Isako, bona edia tubuna merona Iakobo ia herevalaia neganai, ia gwau: “Dirava idia gwauraia edia Dirava, bona Dirava be idia dainai ia hemarai lasi. Ia ese idia totona hanua badana ia karaia hegaegae vadaeni.” Oibe, Iehova ese ena Mesia Basileiana henunai, tanobada dekenai gabu ta do ia henidia.

13. Hari Iehova ena hesiai taudia bogaraginai, daidia idia hahedinaraia edia abidadama be Aberahamo ena bamona?

¹³ Hari inai negai Aberahamo bamona taudia be Iehova ena hesiai taudia bogaraginai idia noho. Lagani momo lalodiai idia be abidadama dekenai idia raka. Dirava ese ia henia goadana amo, idia ese ororo bamona koua gaudia idia hanaia. (Mataio 17:20) Edia abidadama ia manoka lasi badina idia diba lasi edena negai Dirava ese ia gwauhamatalaia ahuna do ia henia idia dekenai. Idia diba Dirava ena hereva ia moru diba lasi, bona idia laloa iena Witness taudia huanai idia noho be hahenamo badana. Oiemu hemami be unai bamona, a?

Mose Ia Doria Abidadama

14. Mose ena abidadama ena badina be edena bamona idia haginia?

¹⁴ Abidadama ia haheitalaia tauna ma ta be Mose. Ena abidadama ena badina be dahaka? Ia do beibi neganai idia haginia. Ena be Farao ena natuna kekeni ese Naila Sinavai dekenai papyrus bosea lalonai Mose ia davaria, bona iena natuna ai ia halaoa, to Mose ia do maragi neganai, ena sinana, Heberu hahinena Iokebeda, ese ia ubua bona ia naria. Iokebeda ese ia hadibaia namonamo, Iehova do ia lalokau henia bona Iena gwauhamata Aberahamo dekenai do ia laloa bada totona. Gabeai, Mose be Farao ena ruma bese tauna ai ia noho neganai, “Aigupito taudia edia aonega ibounai” idia hadibaia. (Kara 7:​20-22; Esodo 2:​1-10; 6:20; Heberu 11:23) Ena be Mose be dagi bada tauna, to iena kudouna be Dirava ena igui hesiai taudia ida ia noho.

15. Mose ia ura Iehova ena taunimanima ida ia noho dainai, ena anina ia dekenai be dahaka?

¹⁵ Ena mauri lagani be 40 neganai, Mose ese Aigupito tauna ta ia alaia mase, ia kara dika henia Israela tauna ta ia hamauria totona. Unai ese Mose ena lalohadai Dirava ena taunimanima dekenai ia hahedinaraia. Momokani, “Mose ese Dirava ia abidadama henia dainai, ia bada neganai, ia ura lasi ia idia gwauraia Farao natuna hahine ena natuna.” Aigupito ena lohia taudia edia ruma ai, Mose be “kara dika ena moale, nega daudau lasi idia noho gaudia, be ia ura lasi,” to abidadama ese ia doria Dirava ena taunimanima, hisihisi idia ania taudia ida ia ura ia noho.​—⁠Heberu 11:​24, 25; Kara 7:​23-25.

16. (a) Mose dekenai Iehova ese dahaka gaukara ia henia, bona edena dala ai Dirava ese ia durua? (b) Mose be ia abia gaukarana ia hagugurua neganai, edena dala ai abidadama ia hahedinaraia?

¹⁶ Mose ia ura dikadika kara ta do ia karaia iena bese taudia durua totona, to Dirava ena nega idia ia ruhaia totona ia do ginidae lasi. Mose ese Aigupito ia heautania. Lagani 40 idia ore murinai, Iehova ese aneru ta amo, Mose ia hagania Aigupito dekenai do ia giroa lou, Israela taudia be unai tano amo ia hakaua oho totona. (Esodo 3:​2-10) Mose ese dahaka ia karaia? Iehova ese Israela taudia do ia ruhaia karana ia daradaralaia lasi, to ia laloa ia be hegeregere lasi Dirava ese ia henia gaukarana ia karaia totona. Mai lalokau ida, Iehova ese Mose ia hagoadaia. (Esodo 3:⁠11–4:​17) Mose ena abidadama ia goada ia lao. Aigupito dekenai ia giroa lao bona Farao vairanai ia gini bona ia hamaoroa loulou, bema Israela taudia ia ruhaia lasi, Iehova do idia tomadiho henia totona, Aigupito latanai hisihisi badadia do idia vara. Mose be mai ena siahu lasi unai hisihisi idauidau ia havaraia totona. Matana amo lasi to abidadama amo ia raka. Iehova bona ena hereva ia abidadama henia. Farao ese Mose ia hagaria toho. To Mose ia gini auka. “Mose ese Dirava ia abidadama henia. Unai dainai ia toreisi, Aigupito ia rakatania, king ena badu dekenai ia gari lasi. Mose ena lalona ia goada noho, ita itaia diba lasi Diravana, be Mose ese matana dekenai ia itaia bamona.” (Heberu 11:27) Mose be goevadae lasi tauna. Kerere ia karaia. (Numera 20:​7-​12) To Dirava ese unai gaukara ia henia neganai, iena mauri ibounai be abidadama ese ia biagua.

17. Ena be Noa, Aberahamo, bona Mose be Dirava ena tanobada matamatana idia do itaia lasi neganai idia mase, to abidadama dekenai idia raka dainai, dahaka ia vara?

¹⁷ Namona be oiemu abidadama be Noa, Aberahamo, bona Mose edia abidadama bamona. Momokani, Dirava ena tanobada matamatana be edia nega ai idia itaia lasi. (Heberu 11:39) Dirava ia abia hidi negana ia do ginidae lasi; iena ura gaudia ma haida idia vara guna be namo. To, edia abidadama Dirava ena hereva dekenai ia manoka lasi, bona edia ladana be Dirava ena mauri bukana lalonai idia noho.

¹⁸ Aposetolo Paulo ia gwau idia totona, “Dirava ese inai dala namona ia laloa.” Ena anina be, Keriso ida guba maurina do idia abia taudia, Paulo bamona taudia totona, Dirava ese gau namo hereana ta ia laloa hegaegae. (Heberu 11:40) Paulo ese 2 Korinto 5:7 ena hereva ia torea neganai, unai bamona taudia ia laloa, ia gwau: “Badina iseda mauri be abidadama kara dekena amo, itaia kara dekena amo lasi.” Unai siri ia torea neganai, idia ta be ena guba ahuna ia do abia lasi. Edia matana korikorina amo idia itaia lasi, to edia abidadama ia dekenai be mai ena badina aukana. Keriso be mase amo ia toreisi lou vadaeni, ia be guba maurina ena hahenamo idia abia taudia ginigunana. Bona guba dekenai ia do daekau lasi neganai, uitnesi taudia 500 ese idia itaia. (1 Korinto 15:​3-8) Badina momo dainai edia mauri dalana ibounai be abidadama ese ia biagua. Ita danu be mai iseda badina namodia, abidadama dekenai ita raka noho totona.

19. Heberu 1:​1, 2 ia hahedinaraia hegeregerena, Dirava ese daika amo ita ia hereva henia?

¹⁹ Hari, Iehova be aneru ta amo iena taunimanima ia hereva henia lasi, Mose be ia araia auna dekenai ia hereva henia hegeregerena. Dirava be iena Natuna amo ena hereva ia gwauraia vadaeni. (Heberu 1:​1, 2) Dirava be ia amo Ia gwauraia herevadia be Baibel lalonai idia torea, bona unai be tanobada taudia edia gado idauidau ai idia hahanaia.

20. Dahaka dainai iseda noho be Noa, Aberahamo, bona Mose edia noho ia hereaia?

²⁰ Hari ita abia gaudia be Noa, Aberahamo, eiava Mose idia abia gaudia idia hanaia. Dirava ena Hereva ibounai ita abia​—⁠bona ena kahana badana be ia guguru vadaeni. Baibel ese ia herevalaia tatau bona hahine, hahetoho idauidau negadiai idia hamomokania idia be Iehova ena abidadama witness taudia unai, ita laloa murinai, Heberu 12:1 ia gwau: “Namona be ita idia hametaua gaudia ibounai, bona ita idia guia noho kara dikadia do ita negea momokani. Vadaeni iseda vairana dekenai ia noho heau helulu, be mai haheauka danu do ita heau goada.” Namona be iseda abidadama ita laloa bada noho. “Ita idia guia noho kara dikadia” ta be abidadama lasi karana. ‘Abidadama dekenai ita raka’ noho totona, ita gaukara goada be namo.

[Footnote]

Emu Haere be Dahaka?

◻ ‘Abidadama dekenai ita raka’ ena anina be dahaka?

◻ Noa ena abidadama hahedinaraia dalana amo, dahaka namo ita abia?

◻ Aberahamo ena abidadama hahedinaraia dalana ese edena bamona ita ia durua?

◻ Dahaka dainai Baibel ia gwau Mose be abidadama ia haheitalaia tauna namona?

18. Guba maurina do idia abia taudia dekenai, dahaka dainai abidadama dekenai idia raka be gau badana?

[Picture on page 10]

Aberahamo be abidadama dekenai ia raka

[Picture on page 10]

Mose bona Arona be Farao vairanai edia abidadama idia hahedinaraia