Emui Kudouna Umui Hagoadaia

“Do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia.”​—HEBERU 10:36.

1, 2. (a) Aposetolo edia negai Keristani taudia momo dekenai dahaka ia vara? (b) Abidadama ia manoka ia lao haraga diba ena badina be dahaka?

BAIBEL idia torea taudia ibounai amo, aposetolo Paulo ese nega momo abidadama ia herevalaia. Bona nega momo ia ese edia abidadama ia manoka eiava ia mase vadaeni taudia ia herevalaia. Hegeregere, Humenaio bona Alesana “edia abidadama ia dika, vanagi be davara nadi dekenai ia kamokau, bona ia dika bamona.” (1 Timoteo 1:19, 20) Dema ese Paulo ia rakatania badina “inai tanobada ena mauri ia ura henia bada dainai.” (2 Timoteo 4:10) Haida ese edia Keristani lasi kara dikadia amo edia ‘abidadama Keriso dekenai idia negea vadaeni.’ Aonega koikoi ese ma haida ia koia bona edia “abidadama Iesu dekenai idia rakatania.”​—1 Timoteo 5:8; 6:20, 21.

² Badina be dahaka unai horoa Keristani taudia be unai dala idauidau ai idia moru? “Abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:1) Ita ese iseda matana amo ita itaia diba lasi gaudia ita abidadama henia. Abidadama be ita itaia diba gaudia totona lasi. Ita itaia diba kohu abia totona ita hekwarahi be auka lasi, to ita itaia diba lasi lauma kohu abia totona ita hekwarahi be auka. (Mataio 19:21, 22) Iseda matana amo ita itaia gaudia momo​—hegeregere tauanina bona matana idia ura gaudia​—ese iseda goevadae lasi tauanina ena ura idia habadaia bona iseda abidadama idia hamanokaia diba.​—1 Ioane 2:16.

3. Keristani tauna ese edena bamona abidadama ia habadaia be namo?

³ To, Paulo ia gwau, “tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. . . . Dirava idia tahua taudia ibounai, be davana namona Dirava ese do ia henidia.” Mose ena abidadama be unai bamona. Ia be “Dirava do ia henia davana namona ia laloa” bona “ena lalona ia goada noho, ita itaia diba lasi Diravana, be Mose ese matana dekenai ia itaia bamona.” (Heberu 11:6, 24, 26, 27) Namona be Keristani tauna ese unai bamona abidadama ia abia. Hereva gunana ai ita itaia vadaeni, Aberahamo ese unai dala ai haheitalai namona ia hahedinaraia.

Aberahamo be Abidadama Ena Haheitalai Namona

4. Aberahamo ena abidadama ena anina ena mauri lalonai be edena bamona?

⁴ Aberahamo be Uru dekenai ia noho neganai, Dirava ese ia gwauhamata henia iena amo garana ta do ia mai bona bese ibounai taudia dekenai hahenamo ta ai do ia lao. (Genese 12:​1-3; Kara 7:​2, 3) Unai gwauhamata dainai, Aberahamo ese Iehova ia kamonai henia, ia be Harana dekenai ia lao guna bena gabeai Kanana dekenai ia lao. Unuseniai, Iehova ia gwauhamata unai tano be Aberahamo ena garana dekenai do ia henia. (Genese 12:7; Nehemia 9:​7, 8) To, Iehova ese ia gwauhamatalaia gaudia momo be Aberahamo ia mase murinai do idia guguru. Hegeregere, Aberahamo ese Kanana ena kahana ta ia abia lasi​—guria gabuna totona ia hoia Makapela nadi matuna sibona. (Genese 23:​1-​20) To, ia ese Iehova ena hereva ia abidadama henia noho. Gau badana be, ia ese do ia mai “hanua badana ta totona ia naria noho, mai abidadama danu. Unai hanua be mai ena nadi badina aukana, bona mai goadana. Unai hanua be Dirava sibona ese iena palani hegeregerena ia karaia, bona ia haginia danu.” (Heberu 11:10) Unai abidadama ese ena mauri ibounai lalonai Aberahamo ia durua.

5, 6. Iehova ena gwauhamata be edena dala ai Aberahamo ena abidadama ia tohoa?

⁵ Aberahamo ena garana be bese badana ai do ia lao gwauhamatana lalonai, unai ia hedinarai goevagoeva. Unai do ia vara totona Aberahamo ese natuna mero ia abia be namo, bona nega daudau ia naria unai hahenamo ia abia totona. Nega ginigunana Dirava ena gwauhamata ia kamonai neganai ena mauri lagani be hida ita diba lasi, to laolao daudauna ia karaia Harana dekenai ia lao neganai, Iehova ese natuna ta ia do henia lasi. (Genese 11:30) Harana dekenai ia noho negana ia hegeregere ‘kohu bona gaukara memero ia abia,’ bona Kanana dekenai ia lao neganai, ena mauri lagani be 75 bona Sarai ena mauri lagani be 65. To, natuna mero idia do abia lasi. (Genese 12:​4, 5) Sarai ena mauri lagani be 75 bamona neganai, ia laloa ia buruka dainai ia hegeregere lasi Aberahamo dekenai natuna ia henia. Unai dainai, unai nega ena kastom hegeregerena, ia ese Aberahamo dekenai ena hesiai hahine Hagara ia henia, bona ia amo natuna mero ia abia. To unai be Iehova ese ia gwauhamatalaia natuna lasi. Gabeai, Hagara bona ena natuna mero, Isamaela, idia lulua lao. To, Aberahamo be idia totona Iehova ia noia neganai, Iehova ia gwauhamata Isamaela do ia hanamoa.​—Genese 16:​1-4, 10; 17:15, 16, 18-​20; 21:​8-​21.

⁶ Dirava ese ena negana korikorina ai​—gwauhamata idia kamonai bena nega daudau murinai​—Aberahamo ena mauri lagani be 100 bona Sarai ena mauri lagani be 90 neganai, idia ese natuna mero, Isako, idia abia. Unai be gau namo hereana momokani! Unai buruka taudia ruaosi idia laloa, edia “mase” tauanidia idia toreisi lou bamona badina idia amo mauri matamatana ia vara. (Roma 4:19-​21) Nega daudau idia naria, to gwauhamata ia guguru neganai, idia itaia idia naria kava lasi.

7. Abidadama bona haheauka be edena bamona ita hakapua diba?

⁷ Aberahamo ena haheitalai ese ita ia hadibaia, namo lasi abidadama be nega kwadogina gauna sibona. Paulo ese abidadama bona haheauka ia hakapua, ia gwau: “Do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia. . . . Ita be boio taudia lasi. Lasi, to ita be abidadama taudia dainai, mauri do ita abia.” (Heberu 10:36-39) Taunimanima momo ese nega daudau lalonai gwauhamata ena guguru negana idia naria. Haida be edia mauri ibounai lalonai unai idia naria. Edia abidadama goadana ese idia ia hagoadaia. Bona, Aberahamo bamona, Iehova ia abia hidi vadaeni negana ai, davana namona do idia abia.​—Habakuku 2:3.

Dirava Ena Hereva Ia Kamonai Henia

8. Edena dala ai Dirava ena hereva ita kamonai henia hari, bona dahaka dainai unai ese iseda abidadama ia hagoadaia?

⁸ Aberahamo ena abidadama idia hagoadaia gaudia badadia be hani, bona unai gaudia ese ita idia durua diba danu. Gau ginigunana be, Iehova ia hereva neganai ia kamonai, unai amo ia hahedinaraia ‘ia abidadama Dirava ia mauri noho.’ Unai dala ai, ia be Ieremia ena negai Iuda taudia amo ia idau, idia ese Iehova idia abidadama henia to ena hereva idia abidadama henia lasi. (Ieremia 44:15-​19) Hari inai negai, Iehova ese ena lauma amo ia havaraia Herevana, Baibel, amo ita ia hereva henia noho. Petero ia gwau Baibel be “lamepa, dibura gabuna ia hadiaria bamona, . . . emui kudouna lalonai.” (2 Petero 1:19) Baibel ita duahia bona ita laloa namonamo neganai, abidadama herevadia amo sibona ‘ita ubua noho.’ (1 Timoteo 4:6; Roma 10:17) Danu, inai dina gabedia lalonai, “hesiai tauna mai ena kamonai, bona mai ena kara maoromaoro” oreana ese “aniani neganai” lauma aniani ia henia, ita idia durua Baibel ena hakaua herevadia ita badinaia bona Baibel ena peroveta herevadia ita lalo-pararalaia totona. (Mataio 24:45-​47) Unai dala idauidau ai Iehova ena hereva ita kamonai henia be gau badana, iseda abidadama ia goada totona.

9. Bema Keristani helarona ita abia dae momokani, dahaka do ia vara?

⁹ Aberahamo ena abidadama dekenai ena helaro be mai anina bada. Ena helaro dainai, ia abia dae “bese momo herea edia tamana” ai do ia lao. (Roma 4:​18) Unai be ita ia durua diba gauna iharuana. Namona be ita laloaboio lasi Iehova ese ‘ia idia tahua taudia ibounai dekenai davana namona do ia henia.’ Aposetolo Paulo ia gwau: “Ita hekwarahi bona ita hisihisi noho. Badina be Mauri Diravana ita abidadama henia noho.” (1 Timoteo 4:10) Bema Keristani helarona ita abia dae momokani, iseda mauri dalana ibounai ese iseda abidadama do ia hahedinaraia, Aberahamo ese ia karaia hegeregerena.

Dirava Dekenai Ia Hereva

10. Edena bamona guriguri ese iseda abidadama ia hagoadaia diba?

¹⁰ Aberahamo be Dirava dekenai ia hereva, bona unai be iena abidadama ia hagoadaia gauna ihatoina. Hari inai negai, ita danu be Iehova dekenai ita hereva diba, Iesu Keriso amo Ia ita guriguri henia diba be harihari gauna namona. (Ioane 14:6; Efeso 6:​18) Iesu ese guriguri hanaihanai karana ia hahedinaraia goevagoeva parabolena ia gwauraia murinai, ia henanadai: “Taunimanima ena Natuna do ia mai neganai, tanobada dekenai abidadama do ia davaria o?” (Luka 18:8) Abidadama ia hagoadaia gurigurina be mai iseda lalona ibounai ida ita henia gauna, ia be ita gwauraia kava gauna lasi. Unai be mai anina bada herea karana. Hegeregere, mai anina bada gauna ita abia hidi neganai, eiava ita lalo-hekwarahi bada neganai, mai iseda kudouna ibounai ida ita guriguri be gau badana.​—Luka 6:​12, 13; 22:41-​44.

11. (a) Aberahamo ese ena kudouna dekenai idia noho gaudia be Dirava dekenai ia hahedinaraia neganai, Iehova ese edena dala ai Aberahamo ia hagoadaia? (b) Aberahamo ena haheitalai amo dahaka ita diba?

¹¹ Aberahamo ia buruka bona Iehova ese gwauhamata garana ia do henia lasi neganai, ia ese Dirava dekenai ia laloa momo gauna ia herevalaia. Iehova ese ia hagoadaia. Bena dahaka ia vara? “Aberamo ese Lohiabada dekenai ia abidadama henia, unai dainai Lohiabada ia gwauraia, Aberamo be maoro.” Bena, Iehova ese toa ta amo ena hagoadaia herevadia ia hamomokania. (Genese 15:​1-​18) Bema iseda kudouna dekenai idia noho gaudia be guriguri amo Iehova dekenai ita gwauraia, bema Iehova ena Hereva, Baibel, lalonai idia noho hagoadaia herevadia ita abia dae, bona mai abidadama goadana ida ia ita kamonai henia, Iehova ese iseda abidadama do ia hagoadaia.​—Mataio 21:22; Iuda 20, 21.

12, 13. (a) Aberahamo ese Iehova ena hakaua herevadia ia badinaia neganai, edena hahenamo ia abia? (b) Edena bamona ekspiriens ese iseda abidadama idia hagoadaia?

¹² Aberahamo ena abidadama ia hagoadaia gauna ihahanina be inai, Dirava ena hakaua herevadia ia badinaia neganai Iehova ese ia durua. Aberahamo be tuari idia karaia king taudia amo Lota ia abia lou totona ia lao neganai, Iehova ena heduru dainai ia kwalimu. (Genese 14:16, 20) Aberahamo be ena garana ese do idia abia tanona dekenai ia noho neganai, Iehova ese tauanina dalana ai ia hanamoa. (Genese 14:21-​23 itaia.) Ena hesiai tauna ese Isako totona adavana namona ia tahua neganai, Iehova ese ena hekwarahi ia hanamoa. (Genese 24:10-​27) Oibe, Iehova ese “Aberahamo ena kara ibounai lalonai, ia hanamoa.” (Genese 24:1) Unai gaudia dainai Aberahamo ena abidadama ia goada momokani bona Iehova Dirava ia tura henia namo herea dainai, Iehova be Aberahamo ia gwauraia “lauegu turana.”​—Isaia 41:8; Iamesi 2:​23.

¹³ Hari inai negai unai bamona abidadama goadana ita abia diba, a? Oibe. Bema Aberahamo bamona, Iehova ena hahegani badinaia karana amo ia ita tohoa, ia ese ita do ia hanamoa danu, bona unai ese iseda abidadama do ia hagoadaia. Hegeregere, Hesiai Laganina 1998 Ena Ripoti ese ia hahedinaraia momo be sivarai namona harorolaia haheganina idia badinaia neganai, dala namo hereana ai hahenamo idia abia.​—Mareko 13:10.

Abidadama Hari Inai Negai

14. Iehova ese Basileia Sivaraina Namba 35 hariharilaia gaukarana be edena bamona ia hanamoa?

¹⁴ October 1997 ai, Witness taudia milioni momo edia ura bada dainai, tanobada hegegemadai Basileia Sivaraina Namba 35 hariharilaia gaukarana ese anina namona ia havaraia. Ghana dekenai ia vara gauna be haheitalai ta. Gado hani ai, pepapepa milioni 2.5 bamona idia hariharilaia, bona unai dainai taunimanima kahirakahira 2,000 ese Baibel stadi idia noia. Cyprus dekenai, Basileia Sivaraina idia hariharilaia Witness taudia rua idia itaia pris tauna ese idia murinai ia raka noho. Nega sisina murinai, ia dekenai Basileia Sivaraina idia hahedinaraia. To ia ese kopi ta ia abia vadaeni bona ia gwau: “Lau ese ena hereva lau laloa bada dainai lau ura ia idia karaia taudia lau hanamoa.” Denmark dekenai, Basileia Sivaraina pepadia milioni 1.5 idia hariharilaia bona anina namona ia havaraia. Unai gabu ai, taunimanima idia lalo-tamona heheni gaukarana ia karaia hahinena ta ia gwau: “Unai pepapepa ena hereva be mai anina taunimanima iboudiai dekenai. Oi lalo-pararalaia be auka lasi, bona emu lalona ia hamarerea, do oi ura oiemu diba oi habadaia. Ena hereva be namo herea momokani!”

15. Edena sivarai idia hahedinaraia Iehova ese taunimanima idia noho gabudia iboudiai ita haroro henidia hekwarahina ia hanamoa?

¹⁵ Lagani 1998 ai, ita hekwarahi taunimanima edia ruma dekenai sibona lasi, to taunimanima idia noho gabudia iboudiai dekenai ita haroro henidia. Côte d’Ivoire dekenai, misinari tadikaka bona ena adavana be uopu dekenai idia noho sisima 322 idia vadivadi henia. Idia ese buka 247, magasin 2,284, buklet 500, bona pepapepa handred momo idia hariharilaia. Vidio idauidau idia hariharilaia danu davara dekenai idia noho neganai, sisima gaukara taudia ese do idia raraia totona. Canada dekenai, Witness tauna ta be motuka hanamoa gabuna dekenai ia lao. Biaguna ia ura ia kamonai, bona tadikaka be hora hani mai kahana ia noho, to hora tamona sibona lalonai ia haroro diba, badina taunimanima momo be unai bisinesi idia vadivadi dainai. Vadaeni, idia hegaegae hanuaboi 10 okaloka ai stadi do idia karaia. To nega haida, hanuaboi momokani sibona idia hamatamaia bona idia karaia ela bona daba 2 okaloka ai. Unai sediual dainai idia hekwarahi, to anina namona ia havaraia. Unai tau ese Sunday ta ta ibounai ena bisinesi ia koua, hebou dekenai ia lao diba totona. Nega daudau lasi murinai, ia bona ena ruma bese taudia be lauma dalana ai idia goada idia lao.

16. Edena sivarai ese idia hahedinaraia Dahaka Ita Karaia? buklet bona Diba bukana be tulu namodia iseda haroro bona hadibaia gaukarana lalonai?

¹⁶ Dirava Ia Ura Dahaka Ita Karaia? buklet bona Diba ese Mauri Dekenai Ita Ia Hakaua Lao bukana be tulu namodia iseda haroro bona hadibaia gaukarana lalonai. Italy dekenai, basi ia naria dubu sisita ta ese Basileia Sivaraina pepana ia abia dae. Dina ta murinai, ia idia haroro henia lou bona Dahaka Ita Karaia? buklet ia abia dae. Unai murinai dina ta ta ibounai, miniti 10 ia lao miniti 15 lalonai, basi naria gabuna ai Baibel idia stadilaia. Hua ta mai kahana murinai, ena lalona ia hadaia convent do ia rakatania bona Guatemala dekenai do ia giroa lou bona unuseniai ena stadi do ia karaia noho. Malawi dekenai, dubu dekenai ia lao hanaihanai hahinena, Lobina, ena natuna kekenidia ese Iehova ena Witness taudia ida Baibel idia stadilaia matamaia neganai ia moale lasi. To, dala ia kehoa neganai, unai kekenidia ese edia sinana dekenai Baibel ena hereva momokani idia hahedinaraia. June 1997 ai, Lobina ese Diba bukana ia itaia bona inai hereva ‘Diba ese Ia Hakaua’ ese ena lalona ia veria. July dekenai Baibel stadi ia abia dae. August lalonai distrik hebouhebou dekenai ia lao bona program ibounai ia kamonai namonamo. Unai hua ena dokonai, ena dubu ia rakatania vadaeni bona ia hegeregere bapatiso lasi pablisa ai ia lao. November 1997 ai bapatiso ia abia.

17, 18. Edena dala ai Society ena vidio idauidau ese taunimanima idia durua lauma gaudia idia “itaia” totona?

¹⁷ Society ena vidio ese momo idia durua lauma gaudia idia “itaia” totona. Mauritius dekenai, tau ta ese ena dubu ia rakatania badina idia lalo-tamona lasi. Misinari tadikaka ta ese United by Divine Teaching vidio amo Iehova ena Witness taudia edia lalo-tamona ia hahedinaraia. Ia ese unai vidio ia laloa bada bona ia gwau: “Umui Iehova ena Witness taudia be Paradaiso dekenai umui noho vadaeni!” Ia ese Baibel stadi ia abia dae. Japan dekenai, taihu ta ese ena abidadama lasi adavana dekenai Jehovah’s Witnesses​—The Organization Behind the Name vidio ia hahedinaraia, bona unai ese adavana ena lalona ia hamarerea bona ia ese Baibel stadi ia abia dae. United by Divine Teaching vidio ia itaia murinai, ia ura Iehova ena Witness tauna ai ia lao. The Bible​—A Book of Fact and Prophecy ena vidio toi ese ia idia durua ena mauri lalonai Baibel ena hakaua herevadia ia badinaia totona. Vadaeni, Jehovah’s Witnesses Stand Firm Against Nazi Assault vidio ia itaia, bona ia dekenai ia hedinarai Satani ena dagedage lalonai Iehova ese ena taunimanima ia hagoadaia. October 1997 ai, unai tau be bapatiso ia abia.

¹⁸ Unai be hesiai laganina gunanai idia moalelaia ekspiriens haida sibona. Idia amo ita itaia Iehova ena Witness taudia edia abidadama ia goada bona Iehova ese edia gaukara ia hanamoa karana amo unai abidadama ia hagoadaia.​—Iamesi 2:​17.

Hari Inai Negai Abidadama Hagoadaia

19. (a) Edena dala ai iseda diba ese Aberahamo ena diba ia hereaia? (b) Lagani gunanai, taunimanima hida idia hebou Iesu ena mauri bouboulaia karana idia laloa lou totona? (c) Lagani gunanai, edena tanodia dekenai Memorial dekenai idia mai taudia edia namba ia bada herea? (Rau 12 ia lao 15 dekenai ia noho ripoti itaia.)

¹⁹ Dala momo ai, hari inai negai iseda diba ese Aberahamo ena diba ia hereaia. Ita diba Iehova ese ena gwauhamata ibounai Aberahamo dekenai ia hagugurua. Aberahamo ena tubudia ese Kanana idia abia, bona idia be bese badana ai idia lao. (1 King Taudia 4:​20; Heberu 11:12) Danu, Aberahamo be Harana ia rakatania bena lagani 1,971 bamona murinai, Ioane Bapatiso ese Aberahamo ena tubuna ta, Iesu, be ranu dekenai ia bapatisoa bena Iehova ese lauma helaga amo ia bapatisoa, ia be Mesia, lauma dalana ai Aberahamo ena Garana ai ia lao totona. (Mataio 3:​16, 17; Galatia 3:​16) Nisan 14, 33 C.E. ai, Iesu ese ena mauri ia henia ia idia abidadama henia taudia edia mauri ia davalaia totona. (Mataio 20:28; Ioane 3:​16) Taunimanima milioni momo ese ia dainai sibodia do idia hanamoa diba. Lagani gunanai, Nisan 14 ai, taunimanima 13,896,312 idia hebou unai lalokau karana badana idia laloa lou totona. Unai be Iehova, Gwauhamata Hagugurua Tauna Badana, ena hereva hamomokania karana badana!

20, 21. Keristani taudia ginigunadia edia negai, edena dala ai bese iboudiai ese Aberahamo ena Garana dainai sibodia idia hanamoa, bona hari inai negai edena dala ai sibodia idia hanamoa diba?

²⁰ Keristani taudia ginigunadia edia negai, bese iboudiai taudia momo​—idia ginigunadia be Israela taudia​—ese Aberahamo ena Garana idia abidadama henia bona Dirava ena horoa natudia, Dirava ena lauma Israela matamatana ai idia lao. (Galatia 3:​26-​29; 6:​16; Kara 3:​25, 26) Idia diba momokani idia be Dirava ena Basileia lalonai do idia lohia bona guba dekenai doko diba lasi lauma maurina do idia abia. Taunimanima 144,000 sibona ese unai hahenamo idia abia, bona idia haida sibona be idia do noho. (Apokalupo 5:​9, 10; 7:4) Lagani gunanai, 8,756 ese Memorial lalonai paraoa idia ania bona uaina idia inua karana amo idia hahedinaraia idia abia dae idia be unai taudia.

²¹ Hari inai negai, Iehova ena Witness taudia kahirakahira ibounai be Apokalupo 7:​9-​17 (NW) ese ia perovetalaia “hutuma bada herea” taudia. Idia ese Iesu dainai sibodia idia hanamoa bona edia helaro be tanobada paradaisona dekenai do idia mauri noho ela bona hanaihanai. (Apokalupo 21:​3-5) Lagani 1998 ai, haroro gaukara idia karaia taudia 5,888,650 idia hahedinaraia momokani unai hutuma be “bada herea” momokani. Ita ia hamoalea bada gauna be, nega ginigunana Russia bona Ukraine edia pablisa taudia edia namba ese 100,000 ia hanaia. United States amo ia mai ripotina be namo herea danu​—August lalonai edia pablisa be 1,040,283! Lagani gunanai edia pablisa edia namba ese 100,000 ia hanaia tanodia 19 amo idia be toi.

Kahirakahira Helaro be Do Ia Guguru

22, 23. (a) Badina be dahaka hari iseda kudouna ita hagoadaia be namo? (b) Edena bamona ita hamomokania diba ita be Aberahamo hegeregerena, bona ita be Paulo ia gwauraia abidadama lasi taudia bamona lasi?

²² Memorial dekenai idia lao taudia idia hadibaia lou Iehova ena gwauhamata be kahirakahira do idia guguru vaitani. Lagani 1914 ai, Iesu be Dirava ena guba Basileiana ena King ai ia lao, ia be Basileia siahuna ai ia noho vadaeni. (Mataio 24:3; Apokalupo 11:15) Oibe, Aberahamo ena Garana be hari guba dekenai ia lohia vadaeni! Iamesi ese ena negai idia noho Keristani taudia ia hamaoroa, ia gwau: “Do umui haheauka. Bona mai abidadama ena laloa goada danu, Lohiabada do umui naria noho, badina iena mai be kahirakahira.” (Iamesi 5:8) Hari ia mai vadaeni! Unai be badina namona iseda kudouna ita hagoadaia totona!

²³ Namona be hanaihanai Baibel ita stadilaia bona mai anina bada guriguri ita gwauraia karadia amo iseda abidadama Dirava ena gwauhamata dekenai ita hagoadaia noho. Namona be Iehova ena Hereva ita kamonai henia lalonai, ena hahenamo ita abia noho. Bena ita be Aberahamo hegeregerena, Paulo ia gwauraia taudia, edia abidadama ia manoka bona ia mase vadaeni taudia, hegeregerena lasi. Gau ta ese iseda abidadama helagana amo ita ia hapararaia diba lasi. (Iuda 20) Ita guriguri unai be do ia momokani Iehova ena hesiai taudia iboudiai dekenai, hesiai laganina 1999 lalonai ela bona hanaihanai.

Oi Diba, A?

◻ Hari inai negai, edena dala ai Dirava ita kamonai henia diba?

◻ Mai anina bada guriguri be Dirava dekenai ita henia neganai, dahaka namo ita abia?

◻ Bema Iehova ena hakaua herevadia ita badinaia, edena dala ai unai ese iseda abidadama do ia hagoadaia?

◻ Hesiai laganina ena ripoti dekenai (rau 12 ia lao 15) dahaka gau oi laloa bada?

[Chart on page 12-15]

IEHOVA ENA WITNESS TAUDIA EDIA HESIAI LAGANINA 1998 ENA RIPOTI

(See bound volume.)

[Picture on page 16]

Bema Iehova ena Hereva ita kamonai henia, iseda abidadama ena gwauhamata dekenai do ia goada

[Picture on page 18]

Haroro gaukara ese iseda abidadama ia hagoadaia