Iseda Lalokau Taudia Totona Ita Hegaegae

AFRICA ena niuspepa ta ese Annie ena hebogahisi sivaraina ia halasia. Annie ena adavana be bisinesi tauna ta. Lagani 1995 ai ia mase neganai, ia rakatania gaudia be motuka 15; banika akaun haida; dola 4,000 bamona (U.S.); sitoa ta; kekero muramura inua gabuna ta; bona ruma ta mai ena mahuta daiutu toi. Will pepana ia rakatania lasi.

Sivarai ia gwau Annie ena nakimi tau ese unai kohu bona moni ibounai ia abia bona Annie mai ena natudia 6 ida be edia ruma amo ia luludia. Hari idia ogogami bada, bona ia bona ena natudia be ena taihuna ida idia noho. Ena natudia hani be sikuli idia rakatania, badina moni be lasi sikuli ena davana bona sikuli dabua totona.

Annie be kota badana dekenai ia lao, bona unuseniai idia gwau kohu haida bona motuka ta do ia abia lou be maoro. To gau ta idia henia lou lasi. Taravatu pepana, ena nakimi do ia doria kota badana ena hereva ia badinaia pepana, do ia abia totona, kota dekenai do ia lao lou.

Dahaka Dainai Mase Ita Laloa be Namo?

Annie ena sivarai ese ia hahedinaraia dahaka ia vara diba bema ruma bese kwarana ese ena mase negana totona ia hegaegae lasi. Mase neganai, taunimanima ibounai ese “edia kohu bona moni idia rakatania, to tau ma haida ese unai moni idia abia noho.” (Salamo 49:10) Ma danu, mase taudia be ma haida ese edia kohu idia gaukaralaia dalana idia biagua diba lasi. (Hadibaia Tauna 9:​5, 10) Ta be ena kohu dekenai dahaka do ia vara ia biagua totona, gau badana be ia do mauri noho neganai unai gaudia ia hegaegaelaia.

Ena be ita ibounai ita diba do ita mase, to taunimanima momo be do idia mauri noho lalokau taudia naria totona idia hegaegae lasi. Ena be inai hereva ese Africa ena bese haida edia kara ia herevalaia bada, to tanobada ena kahana ma haida dekenai unai bamona hekwakwanai idia vara danu.

Oiemu mase negana murinai emu kohu do idia gaukaralaia dalana oi hahedinaraia totona hari kara haida oi karaia eiava lasi be oi sibona ese do oi abia hidi. (Galatia 6:5) To, reana ta ia henanadai diba, ‘Dahaka dainai tau ta ia mauri negana lalonai ena adavana bona ena natudia ia naria namo herea, to bema ia mase murinai edia noho namo totona be ia hegaegae lasi?’ Badina badana be ita momo ita ura lasi iseda mase ita laloa, bona mase totona palani karana ita ura lasi momokani. Oibe, Baibel ena hereva hegeregerena, iseda mase dinana ita diba lasi, ia gwau: “Umui diba lasi kerukeru dina dahaka do ia vara. Badina be emui mauri be dahaka? Umui be kwalahu maragina bamona, nega sisina ia hedinarai, vadaeni ia boio momokani.”—Iamesi 4:14.

Mase negana totona ita hegaegae be kara namona. Danu ia hahedinaraia idia do mauri noho taudia ita laloa. Bema ita ese iseda gau idauidau ita hegaegaelaia lasi, ma haida ese do idia karaia. Reana nega ta ita davaria lasi taudia ese iseda kohu gaukaralaia dalana bona mase neganai ita idia guria karana do idia abia hidi. Tano haida ai, bema unai bamona ia vara, gavamani be do ia gwau daika ese iseda moni bona kohu do ia abia. Ma gabu haida dekenai, varavara taudia ese unai do idia gwauraia, bona nega momo unai idia karaia neganai idia hepapahuahu bena ruma bese lalonai lalohisihisi ia vara. Ma danu, reana idia karaia gaudia be iseda ura amo idia idau momokani.

Kohu Henaoa Karana

Tau ia mase neganai ena vabu ese hisihisi bada do ia abia. Ena adavana ia mase ia lalohisihisilaia sibona lasi, to nega momo ena kohu idia henaoa danu. Unai be matamanai Annie ena sivarai amo ia hedinarai. Kohu henaoa karana ena badina ta be taunimanima edia lalohadai headava hahinedia dekenai. Bese haida ai, idia laloa tau ena hahine be ena ruma bese taudia ta lasi. Idia laloa ia be idau ruma bese hahine ta bona reana nega ta ena ruma bese dekenai do ia giroa lao eiava ruma bese ma ta lalonai ia headava diba. To, idia laloa tau ena tadikaka, taihu, bona ena tamana bona sinana ese ia do idia rakatania lasi. Bema ia mase, ena ruma bese taudia idia laloa ena kohu ibounai be idia edia, ena hahine bona natudia edia lasi.

Edia adavadia ida idia herevahereva namonamo lasi tatau be unai bamona lalohadai idia hagoadaia. Mike ese ena bisinesi gaudia be ena tadikaka sibona ida ia herevalaia. Idia be iena kohu ibounai idia diba, to ena hahine be unai gaudia ia diba sisina sibona. Unai tau ia mase neganai, ena tadikaka be ena hahine dekenai idia mai bona ena tau ese ia naria monina idia noia. Ia be unai gauna ia diba lasi momokani. Gabeai, idia ese ena fotokopi masini bona taipraita idia abia, ena tau ese ia totona ia hoia gaudia unai. Dokonai, unai tau ena tadikaka ese edia ruma bona ia lalonai idia noho kohu ibounai idia abia. Unai vabu bona ena kekeni maragina be idia lulua, edia dabua sibona idia abia diba.

“Idia Ruaosi be Tauanina Tamona Do Idia Noho Hebou”

Keristani tatau ese edia adavadia idia lalokau henia bona idia abidadama henia. Unai bamona tatau ese Baibel ena sisiba idia badinaia, ia gwau: “Namona be tatau ese edia adavana do idia lalokau henia, idia [sibona] edia tauanina idia lalokau henia hegeregerena.” Unai tatau ese Dirava ena lauma amo ia gwauraia herevana idia abia dae danu, ia gwau: “Tau ese iena tamana bona sinana do ia rakatania, vadaeni iena adavana sibona dekenai do ia hakapua. Bona idia ruaosi be tauanina tamona do idia noho hebou.”—Efeso 5:28, 31.

Dirava idia badinaia tatau ese Keristani aposetolo Paulo ena hereva idia abia dae danu, ia torea: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Unai hakaua hereva hegeregerena, bema Keristani headava tauna ta be laolao ta totona ia hegaegae, do ia hegaegae namonamo ia loaloa neganai ena ruma bese taudia do idia noho namonamo. Unai hegeregerena, bema hari ia hegaegae, ena mase murinai ena adavana bona natudia do idia noho namonamo totona, unai be lalohadai maorona, ani? Dika ia vara diba dainai ita hegaegae be kara namona sibona lasi, to ia be lalokau hahedinaraia karana.

Mase Guria Karadia

Keristani tatau be mase neganai ia vara gauna ma ta idia laloa namonamo be namo. Vabu ese ena adavana, ena kohu, bona reana ena natudia danu ia haboioa dainai ia lalohisihisi lalonai, gabu haida dekenai ia idia doria sene karana ai mase taitailaia karadia do ia karaia. Nigeria ena The Guardian niuspepa ia gwau gabu haida dekenai, sene karadia dainai vabu idia doria ena adavana ena mase tauanina ia noho daiutu diburana dekenai ia mahuta. Ma gabu haida dekenai, vabu be kahirakahira hua 6 mase taitailaia negana lalonai, edia ruma idia rakatania diba lasi. Unai nega lalonai, do idia digudigu lasi, bona edia imana idia huria aniani vairanai eiava murinai danu be taravatu.

Unai sene karadia ese hekwakwanai idia havaraia Keristani vabudia dekenai. Idia ura Dirava idia hamoalea dainai Baibel ena hahediba herevadia idia utua sene karadia idia karaia lasi. (2 Korinto 6:​14, 17) To, vabu ta ese unai sene karadia ia karaia lasi dainai, reana do idia dagedage henia. Reana ia heau mauri be namo.

Kara ta Taravatu Hegeregere

Mai aonega ida Baibel ia gwau, gaukara goada tauna ena palani ese anina ia havaraia. (Aonega Herevadia 21:5) Ruma bese kwarana ese edena palani ia karaia diba? Gabu momo dekenai ta ese will pepana eiava ma pepa ta ia karaia diba, ia mase neganai ena kohu do idia haria dalana hahedinaraia totona. Reana unai pepa lalonai ia do idia guria dalana ia hahedinaraia. Reana unai pepa ese ia hahedinaraia danu ia ura edena mase guria karadia eiava sene karadia ena adavana ese do ia badinaia (eiava do ia badinaia lasi).

Hahine ta ladana Leah ena adavana be lagani 1992 ai ia mase. Ia gwau: “Egu natudia be ima​—kekeni hani bona mero ta. Egu adavana be nega sisina daudau ia gorere bena ia mase. To ia do gorere lasi neganai, ia ese pepa ta ia torea vadaeni, ia lalonai ia hahedinaraia ia ura ena kohu ibounai be lau bona emai natudia ese do ai abia. Unai be insurens moni, uma tanona, ubua animal, bona ruma ta. Ia ese unai pepa ia sainia bona lau dekenai ia henia. . . . Egu adavana ia mase murinai, ena varavara idia ura ena kohu amo ahuna do idia abia. Idia lau hadibaia egu adavana ese sibona ena moni amo unai uma tanona ia hoia bona idia be mai edia maoro lasi ahuna ta idia noia totona. Egu adavana ia torea will pepana idia itaia neganai, unai idia abia dae.”

Ruma Bese Taudia ida Gau Idauidau Oi Herevalaia

Reana hekwakwanai idia vara bema ta ese ia abia dae gaudia bona ena ura be ena ruma bese taudia ida ia herevalaia lasi. Tau ta ena sivarai mani oi laloa. Ena varavara idia ura dikadika edia sene karadia hegeregerena hanua dekenai do idia guria. Idia ese ena vabu mai ena natudia idia hamasea gwauraia neganai, tau ena mase tauanina be varavara dekenai idia rakatania. Mai taitai ida ia gwau: “Bema egu adavana ese ena tamana maragina ta eiava ena kasin ta ia hadibaia edena bamona ia ura do idia guria, edia sene karadia do idia badinaia auka lasi.”

Bese haida lalonai ta ena hereva be do idia badinaia pepa dekenai ia torea herevana do idia badinaia hegeregerena. Swaziland ena kahana haida dekenai be unai bamona, unuseniai taunimanima momo ese sene dalana ai mase guria bona taitailaia karadia idia goadalaia. Unai ia diba dainai, Keristani tauna ta ladana Isaac ese ena varavara, idia be Iehova ena Witness taudia lasi, be hebou ta dekenai ia boiria, bena ena mase murinai do idia karaia gaudia dekenai iena ura ia herevalaia. Idia ia hadibaia daika ese kohu haida do idia abia, bona ia hahedinaraia goevagoeva edena dala ai ia do idia guria. Ia mase murinai, gau ibounai be ena ura hegeregerena idia vara. Isaac be Keristani dalana ai idia guria, bona ena hahine be idia naria namonamo.

Oiemu Ruma Bese Oi Naria

Do oi mase neganai oiemu ruma bese naria totona dahaka oi hegaegaelaia be oi sibona do oi abia hidi, to Keristani tauna ta ladana Edward ia gwau: “Insurens ta lau abia egu ruma bese taudia 8 do ia durua totona. Egu adavana ena ladana be egu banika dekenai lau henia. Unai dainai bema lau mase neganai, unai akaun amo moni ia abia diba. . . . Will pepana lau torea egu ruma bese taudia ese heduru do idia abia totona. Bema do lau mase, egu kohu ibounai be egu adavana bona natudia totona. Lagani ima gunanai egu will pepana lau torea. Loea ta ese ia karaia, bona egu adavana bona natuna merona be mai edia kopi ta. Egu will pepana lalonai lau hahedinaraia, egu varavara ese lau idia guria dalana do idia hegaegaelaia lasi. Lau be Iehova ena orea lalonai lau noho. Unai dainai ena be Witness taudia tamona eiava rua sibona idia noho lau idia guria totona, unai be do ia hegeregere. Egu varavara ida unai lau herevalaia vadaeni.”

Dala ta ai, unai bamona oi hegaegae be harihari gauna oiemu ruma bese taudia dekenai. Momokani, mase negana totona oi hegaegae be harihari gaudia hegeregere sokoledi maua ta eiava palaoapalaoa bamona lasi. To, ia ese oiemu lalokau ia hahedinaraia. Ia hahedinaraia oi ura oiemu ‘ruma bese taudia oi ubua’ idia ida oi noho lasi neganai danu.

[Box/Picture on page 21]

Iesu ese Kara ta Ia Karaia Ena Sinana Ia Noho Namo Totona

“Satauro ena badibadinai Iesu ena sinana bona iena sinana maragina bona Maria, Klopa ena adavana, bona Maria, Magadala hahinena, idia gini noho. Iesu ese iena sinana bona ia lalokau henia diba tahua tauna ia itaia, ia kahirakahira idia gini noho. Vadaeni iena sinana dekenai ia hereva henia, ia gwau, ‘Hahine e, oi itaia, oiemu natuna be unai.’ Unai diba tahua tauna dekenai danu ia hereva henia, ia gwau, ‘Oi itaia, oiemu sinana be unai.’ Unai negana ia lao, unai diba tahua tauna [Ioane] ese Maria ia abia dae iena ruma dekenai.”—Ioane 19:25-27.

[Picture on page 22]

Mai laloa namonamo ida Keristani taudia momo ese kara ta idia karaia edia ruma bese taudia naria totona