King ta mai Ena Kohu Bona Aonega
Oi laloa kohu ese oi do idia hamoalea, a? Bema tau ta ese oi dekenai moni sisina bada ia henia, do oi moale, a? Reana oibe. Reana unai moni do oi gaukaralaia daladia oi laloa diba.
MOMOKANI, emu mauri ia namo bona oi moalelaia totona oi hoia diba gaudia momo idia noho. Moni ese “oi ia gimaia” diba idia vara kava hekwakwanai amo, hegeregere gorere neganai eiava gaukara be lasi neganai.—Hadibaia Tauna 7:12.
To moni ena anina moale dekenai be dahaka? Momo ese idia laloa hegeregerena, oi laloa, moale be kohu momo ese idia havaraia gauna ta, a? Unai henanadai edia haere ita davaria be reana ia auka badina moni ita duahia diba, to moale ita duahia diba lasi. Moale be sikele dekenai oi atoa bona ena metau oi davaria diba lasi.
Bona danu, taga taudia haida edia toana be idia moale, to haida be idia moale lasi. Unai ia momokani ogogami taudia dekenai danu. To, taunimanima momo—idia taga vadaeni taudia danu—idia laloa moni ma haida idia abia ese idia do ia hamoalea bada.
Unai bamona gaudia ia torelaia tauna ta be idaunegai Israela ena King Solomona. Ia be taga bada herea tauna ta. Baibel ena buka, King Taudia Ginigunana, karoa 10 lalonai iena taga ena bada sivarai oi duahia diba. Hegeregere oi itaia, siri 14 dekenai ia gwau: “Lagani ta ta ibounai king Solomona dekenai idia mailaia golo ena metau be 23,000 kilogaram.” Hari inai negai, unai bamona golo ena davana be U.S. dola 200,000,000 mai kahana bamona!
To, Solomona be ia taga sibona lasi; Dirava ese aonega amo ia hanamoa. Baibel ia gwau: “King Solomona ese kohu momo dekenai, bona aonega dekenai king ibounai ia hereaia momokani. Tanobada ibounai taudia ese Solomona ena aonega, Dirava ese ia henia gauna idia tahua. Idia ura Solomona dekenai idia mai, iena hereva [idia] kamonai.” (1 King Taudia 10:23, 24) Ita danu be Solomona ena aonega amo namo ita davaria diba, badina iena toretore be Baibel ena kahana ta. Ia ese kohu ena anina moale dekenai ia herevalaia dalana mani ita itaia.
[Picture Credit Line on page 3]
Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart