Hevaseha Taudia Dainai Oi Naria Namonamo!

Hari inai negai, peroveta herevadia be momo, bona gabeai idia vara gaudia idia gwauraia bisinesi ese moni bada idia abia noho. London ena niuspepa ladana The Daily Telegraph ia gwau: “Lagani 2000 ia mai kahirakahira neganai, gau idaudia idia vara noho bona unai ita hoalaia lasi. Tanobada hegegemadai taunimanima tausen momo ese vaira negana ena matahanai idaudia idia itaia, bona nega momo unai matahanai ese gari idia havaraia.” Diba taudia momo idia gwau taunimanima ese vaira negana idia laloa bada, badina be guna idia laloa edia mauri be do ia idau to unai ia vara lasi bona hari idia laloa reana gabeai do ia vara.

LAGANI 1800 murinai, hosi idia veria treila be idia momo idia lao neganai, tau ta ia gwau gabeai Europe ena siti ibounai be hosi edia kukuri amo do idia honu. Momokani, ita diba ena peroveta herevana be momokani lasi. Unai dainai, London ena niuspepa The Times ese peroveta herevadia be hanaihanai idia guguru lasi karana ia herevalaia neganai, ia gwau: “Vaira negana be hosi edia kukuri bamona.”

Ma haida ese vaira negana ai dika do ia vara lalohadaina idia abia taudia idia hevasehalaia. Hegeregere, U.S. ena iunivesiti ta dekenai bisinesi karadia ia hadibaia profesa ta ese hodahoda, ranu, bona tano be dika idia lao herevadia idia gwauraia taudia ia hevasehalaia bona ia gwau namona be unai dika do ia bada ia lao eiava lasi herevana dekenai laki gadara do idia karaia. Unai profesa ena lalohadai be New Scientist magasin ese ia hahedinaraia bona ia gwau “iseda mauri be ia namo ia lao noho bona unai bamona do ia vara ela bona hanaihanai.”

Haida idia gwauraia peroveta herevadia be ma haida ese idia gorea negana lalonai, taunimanima momo idia laloa gau ibounai be do idia idau lasi. Dirava ese taunimanima do ia kara henidia lalohadaina idia hevasehalaia neganai, idia ese aposetolo taudia edia negai idia noho hevaseha taudia edia lalohadai idia hahedinaraia.

Gau ta be Idau Lasi, A?

Keristani aposetolo Petero be lagani 64 C.E. bamona ai Dirava ena lauma amo ia torea revareva iharuana ena sisiba ia gwau: “Nega dokona ai hevaseha taudia do idia mai, mai edia hevaseha herevadia ida, bona sibodia edia ura hegeregerena do idia karaia.”​—2 Petero 3:3, NW.

Hevaseha taudia idia ura idia hevasehalaia gaudia be anina lasi gaudia bamona taunimanima vairanai. Hevaseha karana ia gaukaralaia tauna ese sibona ena ura tahua karana ia badinaia, badina nega momo hevaseha taudia idia ura kamonai taudia ese edia lalohadai idia abia dae. Reana Petero ese ena sisiba ia henia neganai ia herevalaia hevaseha taudia be “sibodia edia ura hegeregerena” idia kara taudia. Duahia taudia edia lalona ia kehoa totona, aposetolo tauna ese unai hereva ia gwauraia loulou. Ia gwau “hevaseha taudia do idia mai, mai edia hevaseha herevadia ida.”

Aposetolo taudia edia negai idia noho hevaseha taudia idia gwau, sedira Keriso “do ia giroa mai” lasi. Idia gwau: “Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.” (2 Petero 3:4) Idia dekenai toana be unai bamona. To guna, lagani 33 C.E. ai, Iesu ia peroveta Ierusalema ena siti dekenai dika bada do ia vara. Ia gwau: “Negana do ia ginidae, oi dekenai idia tuari henia taudia ese tano do idia haboua bada, tuari ena magu do idia karaia, oi do idia koua hagegea, oiemu taudia idia raka murimuri dekenai be dala lasi. Vadaeni idia ese oi do idia hadikaia ore momokani, oiemu taudia danu oiemu magu lalonai be do idia mase ore, bona nadi ta nadi ta latanai do idia noho lasi. Badina be oi hamauria totona, Dirava ese oi dekenai ia vadivadi henia ena nega be oi diba lasi.” Unai sisiba idia hevasehalaia taudia idia kerere momokani! Lagani 70 C.E. ai, Roma ena tuari taudia ese Ierusalema idia koua hagegea bona siti idia hadikaia, bona unai siti ena taunimanima momo herea idia mase. Dahaka dainai unai siti ena taunimanima momo ese unai dika totona idia hegaegae lasi? Badina idia lalo-parara lasi Dirava ese ena Natuna, Iesu, amo edia kara ia tahua namonamo vadaeni.​—Luka 19:43, 44.

Aposetolo Petero be Siahu Ibounai Diravana ese gabeai do ia karaia karana ia herevalaia. Petero ia gwau: “Iehova ena dina be henaoa tauna bamona do ia mai.” (2 Petero 3:10, NW) Unai nega ai, Dirava ese ia idia dadaraia taudia be tanobada ibounai amo do ia kokia bona ia gwauraia kara maoromaoro taudia do ia hamauria. Inai magasin ese ia hahedinaraia loulou hegeregerena, Keriso Iesu ena “giroa mai” negana be lagani 1914 ai ia matamaia. To ia be Dirava ena Kota Henia Tauna bamona kara dika do ia kokia be gabeai do ia karaia. Unai dainai, aposetolo tauna ena sisiba, hevaseha taudia dainai ita naria namonamo sisibana, be mai anina bada hari.

Dirava ese taunimanima ia kara henidia negana be reana nega daudau oi naria vadaeni. Dahaka ese oi do ia durua, mai haheauka ida oi naria noho bona hevaseha taudia ese oi do idia hakaua kerere lasi totona? Mani do oi duahia noho.

[Blurb on page 4]

“Negana do ia ginidae, oi dekenai idia tuari henia taudia ese . . . oi do idia koua hagegea, . . . oi do idia hadikaia ore momokani, . . . bona nadi ta nadi ta latanai do idia noho lasi.” Unai hereva be idia hevasehalaia gauna lasi. Roma ena tuari taudia ese Ierusalema idia hadikaia ore, bona taunimanima momo herea idia mase.