Mai Haheauka ida Oi Naria

ENA be uda sisia ia noho lasi, to mamoe naria tauna ta ia boiboi loulou “Uda sisia!”, bena ia davaria gabeai ia boiboi neganai, taunimanima ese idia kamonaia lasi. Hari inai negai be unai bamona, taunimanima momo ese Iehova ena dina be kahirakahira herevana idia abia dae lasi, badina unai bamona hereva momo idia kamonai vadaeni to idia guguru lasi. Taunimanima momo idia lalo-parara lasi edena hereva be maoro bona idia badinaia be namo, bona unai dainai Dirava ena inai tauna badana, Satani, “diari aneruna” koikoina, ia kwalimu.​—2 Korinto 11:14.

Bema idia naria namonamo lasi, lagani momo lalonai Iehova idia hesiai henia taudia danu be dika idia davaria diba. Dahaka dainai? Aposetolo taudia edia negai aposetolo Petero ese ia henia sisiba mani oi laloa.

Laloa Maoromaoro

Petero ese Dirava ena lauma amo ia torea revareva iharuana be hadibaia hereva namona Keristani taudia ginigunadia dekenai, bona hari ita dekenai danu. Ia torea: “Lauegu lalokau taudia e, inai be lauegu revareva iharuana umui dekenai. Lauegu revareva ruaosi edia badina be inai: Umui emui lalodia do lau hagoadaia. Vadaeni mai emui laloa maoromaoro danu, lauegu hadibaia hereva ma do umui laloa lou.” (2 Petero 3:1) Badina be dahaka Petero ese unai hereva ia gwauraia be maoro? Petero ese hevaseha taudia ia herevalaia, idia ese Dirava ena hesiai taudia idia noholaia negana, karaharaga lalohadaina idia abia be namo negana, ena anina idia hamaragia. Hari ita naria namonamo be namo, hevaseha taudia ese ita idia hakaua kerere garina. Unai dainai Petero ese duahia taudia ia hagoadaia, “peroveta helagadia gunaguna idia gwauraia hereva, . . . do umui laloatao.” (2 Petero 3:2; Kara 3:​22, 23) Unai peroveta taudia be dahaka idia gwau?

Nega momo Dirava ena hesiai taudia mai edia kamonai ese idia hahedinaraia Dirava ena hahemaoro karana ese gwau-edeede kara dikana ia haorea. Petero ese duahia taudia ia hadibaia lou, Dirava ese Noa ena negai, tanobada be kara dika amo ia honu neganai, Abata ia gaukaralaia unai dika ia haorea totona. Unai Abata badana ese unai negai tanobadana ia hadikaia ore momokani. To Dirava ese lagatoi ai, Noa bona ena famili taudia, bona “mauri gaudia ibounai” edia bese amo animal haida ia hamauridia. Tanobada hegegemadai idia noho sivaraidia ese Baibel ena sivarai idia hamomokania.a​—Genese 6:​19; 2 Petero 3:​5, 6.

Petero ia gwau taunimanima haida ‘idia ura idia laloaboio’ Dirava ese Abata amo tanobada ia hadikaia. Bena haida be hevaseha taudia edia hereva dainai, idia laloa namonamo lasi. To, namona be ita ese Iehova ia karaia karadia ta ita laloaboio lasi. Petero ese ita ia hadibaia, ia gwau: “Harihari idia noho guba bona tanobada be Dirava ese, iena oda hereva dekena amo ia naridia noho. Oibe, idia noho hegaegae, ela bona Kota Badana Dinana dekenai. Unai neganai, lahi badana ese tanobada bona guba do ia araia ore, bona Dirava idia negea taudia be do idia boio.” (2 Petero 3:7) Oibe, Dirava ese kara ta do ia karaia lou.

Dirava Ia Metairametaira Lasi

Lagani tausen momo idia hanaia vadaeni. Badina be dahaka Dirava ese taunimanima edia hekwakwanai do ia kokia totona ia naria daudau? Petero ese hereva ma ta ia gwauraia. Ia gwau: “Lauegu lalokau taudia e, inai hereva tamona do umui laloaboio lasi: Lohiabada ena vairana dekenai, dina tamona be lagani 1000 bamona, bona lagani 1000 be dina tamona bamona.” (2 Petero 3:8) Iehova ese nega ia laloa dalana be idau bona ita ese nega ita laloa dalana be idau. Hanaihanai ia noho Diravana dekenai, nega ena lata Adamu ia havaraia amo ema bona hari be pura tamona sibona bamona. To herevana edena dala ai nega ita laloa, idia hanaia lagani bona dina ta ta ese Iehova ena ura ia guguru negana kahirakahira ita idia hakaua lao.

“Lahi dekenai ranu oi raraia neganai, do ia siahu haraga lasi,” unai hereva ia hahedinaraia bema gau ta ita naria noho, toana be ia vara haraga lasi. To, Petero ia gwau namona be ‘Iehova ena dina ena ginidae ita naria bona laloa noho.’ (2 Petero 3:12, NW) Edena dala ai iseda laloa dalana ita haidaua diba, bena Dirava ena kara do ia karaia negana be kahirakahira ita laloatao noho?

Kara ese Hereva Ia Hanaia

Petero ese kara ena anina dekenai iseda lalona ia veria. Ia ese ‘kara helaga’ bona ‘Dirava badinaia’ karadia ia herevalaia. (2 Petero 3:​11) Unai kara edia anina be dahaka?

Dirava ena hesiai tauna korikorina ese Ia ia hamoalea dalana ai ia kara. Unai bamona tomadiho tauna momokanina ena abidadama be ena kara amo ia hedinarai. Unai amo ia be idia gwau Dirava bona ena gwauhamata idia abidadama henia taudia amo ia idau. Reana oi itaia Iehova ena Witness taudia idia karaia haroro gaukarana ese ia hahedinaraia idia be idau. Idia ese oiemu ruma idia vadivadi, Baibel lalonai idia noho Dirava ena gwauhamata dekenai oiemu lalona idia veria totona. To danu, taunimanima idia davaria gabudia ibounai dekenai edia helaro bona abidadama idia gwauraia hedinarai.

Ma haida dekenai ena abidadama ia harorolaia goadagoada Witness tauna ese unai kara amo sibona ena abidadama ia hagoadaia. Ia gwauraia gaudia ese ena lalohadai idia hagoadaia bona nega tamona ai moale korikorina idia havaraia. Ita ese Dirava ena Basileia ena sivarai namona ita harorolaia neganai, Iehova danu ita hamoalea. Petero ena aposetolo turana Paulo ia hereva bamona, ita diba ‘Dirava ena kara be gagevagageva lasi, unai dainai ia ese iseda lalokau kara namodia do ia laloaboio lasi.’​—Heberu 6:10; Roma 10:​9, 10.

Hari ia noho tanobada dikana ena dina gabedia edia dokona be kahirakahira neganai, Basileia ena sivarai namona harorolaia gaukarana ita laloa bada dainai, dahaka ia vara? Kudou-maoro taudia handred tausen momo ese Iehova ena turana ai idia lao dalana idia dibaia, ena hebogahisi amo namo idia abia bona paradaiso ai mauri hanaihanai helarona ena moale momokanina idia davaria.

Inai Gaudia Umui Diba Vadaeni

Ena be Baibel amo ita diba Iehova Dirava be ena nega ai kara ta do ia karaia, to Petero ese ia henia sisiba ma haida do ita badinaia be namo. “Inai gaudia umui diba vadaeni. Unai dainai do umui naria namonamo, koikoi taudia ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.”​—2 Petero 3:17.

Iehova be guna ia diba vadaeni, ena kara be taunimanima idia laloa negana ai ia karaia lasi dainai, edia abidadama be goada lasi taudia idia lalo-manoka diba. Ia diba danu, ia idia dadaraia taudia ese ena hesiai taudia momokanidia edia lalona idia hadikaia diba, eiava Dirava ese ena ladana ia hahelagaia negana be kahirakahira dekenai edia abidadama idia hamanokaia. Dika bada herea, bema inai nega dokona lalonai iseda gini goada karana amo ita moru!

Hari be Iehova ese do ia karaia karadia ita daradaralaia negana lasi. (Heberu 12:⁠1, NW) To, namona be Iehova ena haheauka karana ese ia havaraia gauna​—hahemauri ena helaro idia abia bona hisihisi badana amo do idia roho mauri taudia milioni momo edia hutuma bada herea bese idauidau amo​—ita laloa bada. (Apokalupo 7:​9, 14, NW) Petero ia gwau: “Iseda Lohiabada bona Hamauria Tauna Iesu Keriso ena hariharibada, bona iena diba, bona laloa diari lalonai do umui tubu daekau noho. Hairai diarina bona mataurai bada be iena, harihari ia lao bona hanaihanai.”​—2 Petero 3:18.

“Dirava Ena Lalokau Lalonai Do Umui Noho”

Basileia haroro gaukarana ita karaia goadagoada bona Dirava ita tomadiho henia bona iena Hereva ita stadilaia totona hanaihanai Keristani hebou dekenai ita lao karana ese ita ia gimaia. Bema unai bamona ita kara, ita be nega lasi, inai tanobada ai idia vara dika gaudia ita laloa bada totona. Gari bona lalo-hekwarahi ese Keristani taudia momokanidia edia mauri idia biagua lasi. (1 Korinto 15:58) Bema Iehova ena gaukara lalonai ita bisi bada herea, nega ia heau haraga.

Iuda, Petero ena negai ia noho tauna bona Iesu ena tadina, ia gwau: “Umui, lauegu lalokau taudia e, emui abidadama helagana ena latanai emui mauri do umui haginia goada. Lauma Helaga ena siahu dekena amo do umui guriguri noho. Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.” (Iuda 20, 21) Guriguri noho karana ese ia habadaia lalo-goada ena anina mani oi itaia. (1 Tesalonika 5:​17) Iuda be ma ia gwau: “Abidadama goada lasi taudia be do umui durua, mai bogahisihisi danu. Haida be lahi dekena amo karaharaga do umui veria mauri. Ma haida do umui bogahisihisi henia, to mai emui gari danu. Haida edia tauanina edia kara dikadia bona matabodaga dainai, edia dabua be idia miro vadaeni. Umui durudia noho, to edia dabua idia hamiroa karadia do umui ura henia lasi momokani.” (Iuda 22, 23) Hari inai nega dikana lalonai, ita ta ta ita hagoadaia heheni be gau badana! Bona gau badana be hahetoho lalonai do ita moru lasi, ia do noho ‘hahemauri dinana’ ai hari tanobada dekenai idia karaia momo “lebulebu karadia” ita karaia totona.​—Iuda 4; 2 Korinto 6:​1, 2.

Petero, Paulo, bona Iuda be lalokau dalana ai idia henia sisiba oi kamonai bona Dirava ena hesiai gaukara oi karaia goadagoada neganai, Iehova ena kara be mai haheauka ida oi naria noho diba. To do oi naria, a?

Karaharaga oiemu gabu dekenai idia noho Witness taudia edia heduru oi noia, Havaraia Tauna ena mauri hanaihanai gwauhamatana dekenai oiemu abidadama oi hagoadaia totona. Do oi dibaia edena dala ai do oi hegeregere ia mai noho hisihisi badana negana ai do ia ore gaukara, gabeai do ita karaia lou lasi haroro gaukarana unai, do oi karaia. (Mareko 13:10) Bena Iehova ia gwauhamatalaia kara maoromaoro tanobadana ai, mauri do oi abia diba. (2 Petero 3:​13) Ena sisiba oi kamonaia! Mai haheauka ida oi naria! Oi gaukara goadagoada!

[Footnote]

[Picture on page 7]

Hari Dirava ena Paradaiso gwauhamatana oi dibaia

[Picture Credit Line on page 5]

Wolf: Animals/Jim Harter/Dover Publications, Inc.; young shepherd: Children: A Pictorial Archive from Nineteenth-Century Sources/Grafton/Dover Publications, Inc.