Hadibaia Koikoi Taudia Dainai Umui Naria!

“Hadibaia koikoi taudia be umui emui huanai do idia hedinarai.”​—⁠2 PETERO 2:1.

1. Iuda ia laloa dahaka do ia torelaia, bona dahaka dainai ia torelaia gauna ia haidaua?

UNAI be dika bada herea gauna! Keristani kongregesen ginigunana lalonai hadibaia koikoi taudia idia noho! (Mataio 7:​15; Kara 20:29, 30) Iesu ena tadina Iuda ia diba unai ia vara. Ia gwau edia “hamauria ena hereva totona” ena tadikaka ia tore henia gwauraia, to idia ia hamaoroa: “Hari lau laloa hereva idauna ta umui dekenai do lau torea, inai bamona: Umui ese emui abidadama lalonai do umui gini goada noho.” Dahaka dainai ia torelaia gauna ia haidaua? Ia gwau, “badina be haida ese umui emui [kongregesen] dekenai hunia dala dekenai idia vareai vadaeni. . . . Idia ese Dirava ena hariharibada idia hadibaia kerere, edia lebulebu karadia do idia karaia diba totona.”​—⁠Iuda 3, 4.

2. Dahaka dainai 2 Petero karoa 2 bona Iuda ena buka edia hereva be kahirakahira idia hegeregere?

² Toana be Petero ese ena revareva iharuana ia torea daudau lasi murinai, Iuda ese iena ia torea. Iuda ese Petero ena revareva ia dibaia vadaeni. Momokani, iena revareva siahuna lalonai ia hahedinaraia lalohadai be unai revareva ena lalohadai momo hegeregerena. Unai dainai, 2 Petero karoa 2 ena anina ita tahua neganai, do ita itaia ia be Iuda ena revareva bamona.

Hahediba Koikoi Dainai Idia Vara Gaudia

³ Petero be ena tadikaka ia hagoadaia peroveta herevadia idia badinaia be namo, bena ia gwau: “Gunaguna peroveta koikoi taudia be [idaunegai] Israela taudia edia huanai idia hedinarai. Unai bamona danu, hadibaia koikoi taudia be umui emui huanai do idia hedinarai.” (2 Petero 1:⁠14–​2:⁠1) Dirava ena idaunegai orea taudia be peroveta hereva momokanina idia abia, to peroveta koikoi taudia edia hadibaia gagevadia idia haheaukalaia danu. (Ieremia 6:​13, 14; 28:​1-3, 15) Ieremia ia torea: “Ierusalema ena peroveta taudia lau itaia . . . , heudahanai idia karaia, bona hereva koikoi idia gwauraia danu”.​—⁠Ieremia 23:⁠14.

4. Dahaka dainai hadibaia koikoi taudia idia hadikaia ore be maoro?

⁴ Petero ese hadibaia koikoi taudia edia kara Keristani kongregesen lalonai ia herevalaia neganai, ia gwau: “Hunia dekenai hereva koikoi do idia gwauraia, bona taunimanima momo edia abidadama do idia hadikaia. Edia Lohiabada, ia ese idia ia hamauria vadaeni, to idia ese do idia negea. Vadaeni karaharaga Dirava ese idia do ia hadikaia ore.” (2 Petero 2:1; Iuda 4) Aposetolo taudia edia negai ia vara tomadiho hapararaia karana dainai, hari ita diba oreana, Kerisendom, ia vara. Petero ia hahedinaraia dahaka dainai hadibaia koikoi taudia idia hadikaia ore be maoro: “Taunimanima momo ese unai koikoi taudia edia lebulebu dala dikadia do idia badinaia. Bona unai bamona idia karaia dainai, haida ese hereva momokani ena dala do idia gwauraia dika.”​—⁠2 Petero 2:⁠2.

5. Hadibaia koikoi taudia edia siahu dainai dahaka ia vara?

⁵ Mani unai oi laloa! Hadibaia koikoi taudia edia siahu dainai, kongregesen taudia momo ese lebulebu karadia do idia karaia. Greek herevana idia hahanaia “lebulebu dala dikadia” ena anina be kara namo taravatudia badinaia lasi momokani, matabodaga karadia, hemarai karadia. Petero ia gwau guna, Keristani taudia ese ‘tanobada ena mase, bona iena kara bodaga dekena amo idia heau mauri.’ (2 Petero 1:⁠4) To kongregesen lalonai hadibaia koikoi taudia idia noho dainai, haida be unai kara bodaga dekenai do idia giroa gwauraia! Unai dainai hereva momokani ena dala badinaia taudia edia ladana do idia hadikaia. Madi! Momokani, hari Iehova ena Witness taudia ibounai dekenai inai gauna be mai anina bona idia naria namonamo be gau badana. Namona be inai ita laloaboio lasi, iseda kara dainai Iehova Dirava bona ena orea taudia edia ladana ita hanamoa eiava ita hadikaia diba.​—⁠Aonega Herevadia 27:11; Roma 2:​24.

Hahediba Herevadia Koikoidia Idia Gwauraia Hedinarai

6. Hadibaia koikoi taudia ia doria gauna be dahaka, bona edena dala ai edia ura gaudia idia tahua?

⁶ Aonega dalana be unai hadibaia koikoi taudia edia lalohadai dikadia gwauraia hedinaraia dalana ita laloa. Petero ia gwau guna, hunia dalana amo, eiava mai regerege bada lasi dalanai idia karaia. Ma ia gwau: “Edia mataganigani dainai, inai hadibaia koikoi taudia ese, sivarai koikoi dekena amo umui emui lalona do idia ania.” The Jerusalem Bible ia hahedinaraia goevagoeva hadibaia koikoi taudia ia doria gauna be mataganigani, ia gwau: “Edia lalona veria herevadia amo, umui do idia hoia toho mai edia ura bada ida.” Unai hegeregerena, James Moffatt ia hahanaia Baibel ia gwau: “Mai edia lebulebu ida, edia ura do umui karaia totona, aonega herevadia idia gaukaralaia.” (2 Petero 2:​1, 3) Lauma dalanai ia naria namonamo lasi tauna dekenai hadibaia koikoi taudia edia hereva ena toana be maoro, to idia abia hidi namonamo herevadia ese taunimanima idia “hoia,” mai edia koikoi ida idia veridia edia ura idia karaia totona.

7. Aposetolo taudia edia negai, taunimanima momo be edena hadibaia herevadia idia abia dae?

⁷ Reana aposetolo taudia edia nega ai idia noho hadibaia koikoi taudia edia lalona idia veria lalohadai be tanobada taudia amo idia abia. Petero be ena revareva ia torea negana lalonai, taunimanima momo ese Gnostic taudia edia hadibaia herevadia idia abia dae. Gnostic taudia idia laloa tauanina gaudia ibounai be dika bona lauma gaudia sibona be namo. Unai dainai, idia haida idia gwau tau ta be dahaka ia karaia ena tauanina amo be mai anina lasi. Idia gwau gabeai taunimanima be edia tauanina do idia rakatania. Unai dainai, idia laloa tauanina kara dika karadia​—⁠lebulebu karadia danu​—⁠be anina lasi gaudia. Toana be sibodia idia gwauraia Keristani taudia haida ese unai lalohadai idia abia dae matamaia.

⁸ Baibel tahua namonamo tauna ta ia gwau, “Ekalesia lalonai haida be kara dika gwauatao hadibaia herevana” o “Dirava ena hariharibada idia hagagevaia.” (Efeso 1:​5-7) Ia gwau haida edia lalohadai be inai bamona: “Oi gwau Dirava [ena hariharibada] ena bada be hegeregere kara dika ta ta iboudiai koua totona, a? . . . Bema unai bamona namona be kara dika ita karaia noho, badina Dirava [ena hariharibada] ese kara dika ibounai do ia dahua oho. Bema kara dika momo ita karaia, Dirava [ena hariharibada] gaukaralaia karadia be momo danu.” Guna, unai bamona laloa dalana ena gageva ia hanaia herevana oi kamonai, a?

8, 9. (a) Edena laloa dalana gagevana ese idaunegai Keristani taudia haida ia hadikaia? (b) Iuda ia itaia kongregesen taudia haida be dahaka idia karaia?

⁹ Aposetolo Paulo ese unai Dirava ena hebogahisi laloa kerere karana dainai, ia gwau: “Namona be kara dika ita karaia noho, vadaeni unai dekena amo Dirava ena hariharibada do ia bada lao noho, a?” Ma danu ia henanadai: “Kara dika ita karaia be namo, a? Badina be Taravatu henunai lasi, to Dirava ena hariharibada henunai ita noho dainai?” Unai henanadai ta ta dekenai Paulo be mai goada ida ia haere: “Lasi bona lasi momokani.” (Roma 6:​1, 2, 15) Iuda ia itaia goevagoeva, haida be “Dirava ena hariharibada idia hadibaia kerere, edia lebulebu karadia do idia karaia diba totona.” To Petero ia gwau “Dirava ese idia do ia hadikaia ore. Dirava be ia mahuta lasi, ia noga noho.”​—⁠Iuda 4; 2 Petero 2:⁠3.

Sisiba Idia Henia Sivaraidia

10, 11. Petero ese edena sisiba idia henia sivaraidia toi ia gwauraia?

¹⁰ Petero ese mai edia ura ida kara dika idia karaia taudia dekenai Dirava be kara ta do ia karaia ia hahedinaraia totona, Baibel amo sisiba idia henia sivaraidia toi ia gwauraia. Ginigunana be, ia gwau: “Gunaguna aneru haida ese kara dika idia karaia, to Dirava ia bogahisihisi henidia lasi.” Iuda ia gwau: “Aneru haida danu, edia dagi korikori ena maka dekenai idia noho lasi, bona edia gabu korikori [guba] idia rakatania.” Abata ia do mai lasi neganai tanobada dekenai idia mai bona taunimanima edia tauanina idia atoa, taunimanima edia natudia kekeni ida mahuta hebou karana idia karaia totona. Unai maoro lasi karana dainai “Tartarus” (NW) eiava Iuda ena revareva lalonai ia gwauraia “dibura masemase gabuna” dekenai idia negea diho, bona “unai gabu dekenai do idia noho, ela bona Dirava ena Kota Bada Dinana.”​—⁠2 Petero 2:4; Iuda 6; Genese 6:​1-3.

¹¹ Unai murinai, Petero ese Noa ena negai idia noho taudia ia herevalaia. (Genese 7:​17-​24) Ia gwau Noa ena nega ai, “taunimanima momo ese Dirava idia kamonai henia lasi neganai, ia ese idia ia bogahisihisi henia lasi. . . . Abata bada herea ia havaraia, vadaeni ibounai idia mase.” Vadaeni, Petero ia torea ‘Sodoma bona Gomora be lahi dekena amo ia araia ore’ neganai “Dirava ese ia dekenai idia gari henia lasi taudia ia hagaridia. Badina be do idia diba, edia kerere davana be dohore.” Iuda ese ma hereva haida ia gwauraia, ia gwau unai taudia ese “sihari kava bona kara bodaga idauidau idia karaia momo.” (2 Petero 2:​5, 6; Iuda 7) Tatau be sihari kava karana idia karaia hahine ida sibona lasi to kara bodaga idia ura idia karaia ma tatau ida, bona reana animal ida danu.​—⁠Genese 19:​4, 5; Levitiko 18:​22-​25.

¹² To, nega tamona ai, Petero ia diba Iehova be ia idia hesiai henia abidadama taudia dekenai davana namona ia henia. Hegeregere, ia gwauraia hedinarai Dirava ese Abata ia mailaia neganai, “Noa, kara maoromaoro ia harorolaia tauna, bona taunimanima 7” ia hamauria. Danu, Petero be Sodoma ena nega ai Iehova ese “kara maoromaoro tauna Lota” ia hamauria sivaraina ia gwauraia. Ia gwau: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.”​—⁠2 Petero 2:​5, 7-9.

Inai Kara Dainai Panisi Do Idia Abia

¹³ Petero ese Dirava ena hahemaoro do idia abia taudia ia gwauraia, idia be, “tauanina ena ura dikadia, matabodaga karadia idia karaia noho, bona Dirava ena siahu idia laloa be anina lasi.” Petero ese idia ia gwauraia neganai ena badu ita mamia diba bamona, ia gwau: “Mai edia hekokoroku, bona idia sibona edia ura idia karaia noho. Unai dainai idia ese guba noho taudia idia hereva dika henia, idia gari henidia lasi momokani.” Iuda ia torea “idia noho tau dikadia ese nihi idia abia, vadaeni sibodia edia tauanina idia hadikaia noho. . . . Idia ese danu guba noho taudia idia hereva dika henia.” (2 Petero 2:​10; Iuda 8) Idia nihi neganai, reana lebulebu karadia idia nihilaia, bona unai ese edia sihari kava tahua karana ia hagoadaia. To edena dala ai idia ese “Dirava ena siahu idia gwauraia be anina lasi” bona “guba noho taudia idia hereva dika henia”?

14. Edena dala ai hadibaia koikoi taudia be “Dirava ena siahu idia gwauraia be anina lasi” bona “guba noho taudia idia hereva dika henia?”

¹⁴ Idia karaia badina be Dirava amo siahu idia abia taudia idia matauraia lasi. Keristani elda taudia be Iehova Dirava bona ena Natuna edia ladana ai gaukara idia karaia bona, unai dainai, hairai sisina idia abia. Momokani, kerere idia karaia, Petero ese ia karaia hegeregerena, to Baibel ese kongregesen taudia ia hagoadaia unai hairai idia abia taudia henunai idia noho be namo. (Heberu 13:17) Edia kerere be badina namona lasi idia ita gwauraia dika totona. Petero ia gwau aneru ese hadibaia koikoi taudia “idia samania lasi, o hereva dika henia lasi,” ena be idia henia be namo. Petero ma ia gwau: “Inai tau dikadia be uda boroma bamona, idia be mai edia lalona lasi. Idia ese tauanina ena ura sibona idia karaia. Unai bamona idia vara, bona unai bamona do idia mase. Idia diba lasi gaudia idia hereva dika henia. Uda boroma idia mase bamona, idia danu do idia mase ore.”​—⁠2 Petero 2:​10-​13.

“Umui Danu Idia Aniani Neganai”

¹⁵ Ena be unai tau dikadia be ‘dina ena diari lalonai lebulebu karadia idia karaia noho mai edia moale danu’ bona “hemarai bona laloa metau idia havaraia noho,” to koikoi dalanai unai gaudia idia karaia. Petero ia herevalaia vadaeni hegeregerena, “hunia dekenai hereva koikoi” idia gwauraia. (2 Petero 2:​1, 3, 13) Reana elda taudia be Dirava ena taravatu lebulebu karadia dekenai idia gwauraia hedinarai neganai unai taudia be taunimanima vairanai do idia dadaraia lasi o edia lebulebu karadia do idia karaia lasi. To, Petero ia gwau: “Umui danu idia aniani neganai, . . . nega ibounai edia koikoi daladia idia moalelaia noho.” Bona Iuda ia torea: “Umui emui ekalesia aniani hebou umui abia neganai, inai dika taudia ese emui turana dalana idia hadikaia noho.” (Iuda 12) Oibe, ranu henunai idia noho nadi mai edia isena ese vanagi ena henunai kahana ia darea oho bona idia naria lasi bouti taria taudia do idia maloa mase hegeregerena, unai hadibaia koikoi taudia be “aniani hebou” negadia ai, idia naria namonamo lasi taudia dekenai koikoi lalokau henia karana idia hahedinaraia, bona edia kara goeva idia hadikaia noho.

16. (a) Guna “aniani hebou” negadia be dahaka, bona hari edena negadia ai lebulebu taudia be ma haida idia veria toho? (b) Hadibaia koikoi taudia ese daidia idia tahua guna, unai dainai namona be unai bamona taudia be dahaka idia karaia?

¹⁶ Aposetolo taudia edia nega ai unai “aniani hebou” negadia be Keristani taudia edia aniani bona hebamo heheni negadia. Hari inai negai danu Iehova ena Witness taudia idia hebamo heheni, reana headava negana ai, pikiniki, eiava adorahi ta vadivadi heheni karana amo. Edena dala ai taunimanima dikadia be unai bamona negadia idia gaukaralaia ma haida veria totona? Petero ia torea: “Idia edia matana ese nega ibounai hahine idia tahua noho. . . . Manoka taudia edia lalona idia ania, vadaeni kara dika ena dala dekenai idia hakaudia vareai.” “Edia kudouna be mataganigani dekenai idia manada momokani” bona lauma dalanai idia goada lasi taudia, hereva momokani idia do abia dae vaitani lasi taudia unai, idia tahua guna. Unai dainai namona be Petero ena dina dekenai idia vara gaudia edia sisiba oi laloaboio lasi, bona oi naria! Edia lebulebu lalohadai oi dadaraia, bona unai bamona taudia edia kara toana eiava edia tauanina ena hairai ese oi ia koia lasi be namo!​—⁠2 Petero 2:​14.

Balama Ena Dala

17. Balama ena dala be dahaka, bona dahaka ia vara Israela taudia 24,000 dekenai?

¹⁷ Unai ‘Dirava ese do ia hadikaia’ taudia be nega sisina daudau hereva momokani idia diba vadaeni. Reana toana be kongregesen ai idia gaukara noho. To Petero ia gwau: “Idia ese dala maoromaoro idia rakatania vadaeni, bona idia raka kerere, Balama, Beoro ena natuna bamona. Balama ese kerere ia karaia, moni do ia davaria totona, badina moni ia ura henia dikadika dainai.” (2 Petero 2:​14, 15) Peroveta tauna Balama ia badinaia dalana be sihari kava veria karana ia sisibalaia, moni ia abia totona. Moaba King Balaki ia hamaoroa bema Israela taudia edia lalona idia veria diba, sihari kava karana karaia totona, Dirava ese hadikaia herevana do ia gwauraia idia dekenai. Unai dainai Moaba hahine ese Dirava ena orea taudia momo idia veria, bona 24,000 idia hamasea edia lebulebu karana dainai.​—⁠Numera 25:​1-9; 31:​15, 16; Apokalupo 2:​14.

¹⁸ Petero ia gwau Balama ena doniki ese ia hereva henia neganai, ena dala ia koua, to Balama ese “moni ia ura henia dikadika dainai,” ena “kara kava” karana ia hadokoa lasi. (2 Petero 2:​15, 16) Unai be kara dika momokani! Balama bamona taudia, Dirava ena taunimanima idia dibagania toho lebulebu karadia karaia bona edia kara namo hadikaia totona, ese dika do idia davaria momokani! Balama be ena kara dika dainai ia mase, bona ena dala idia badinaia taudia ibounai dekenai unai do ia vara danu.​—⁠Numera 31:⁠8.

Diabolo Bamona Veria Karadia

19, 20. (a) Balama bamona taudia be dahaka gaudia bamona, bona dahaka dainai? (b) Daidia idia veria, bona edena dala amo? (c) Dahaka dainai ita gwau diba edia veria dalana be Diabolo ena bamona, bona edena dala ai ita bona ma haida ita naria diba?

¹⁹ Balama bamona taudia ia herevalaia neganai, Petero ia torea: “Inai taudia be ranu guri, ranu ia noho lasi gauna bamona. Bona idia be ori, lai ese ia hodaia lao bamona.” Tano kaukauna dekenai ia laolao ranu mase tauna dekenai, ranu gurina lalonai ranu ia noho lasi dainai reana do ia mase. Unai dainai ita hoa lasi unai gaudia bamona taudia totona ia ese “gabu ta ia karaia hegaegae idia edia, dibura masemase gabunai”! Petero be ma ia gwau: “Mai hekokoroku danu idia hereva kava noho, bona taunimanima hakaua kerere totona, tauanina ena ura dikadia, bona heudahanai kara idia herevalaia noho. Inai bamona idia karaia, be vanegai sibona dika dekena amo mauri idia davaria taudia do idia hakererea lou totona.” Petero ia gwau aonega idia do abia lasi taudia idia veria “ura kwalimu” gwauhamata amo, to “unai dika taudia sibona be dika bona mase ena hesiai taudia, idia be ura kwalimu lasi taudia.”​—⁠2 Petero 2:​17-​19; Galatia 5:​13.

²⁰ Unai hadibaia koikoi taudia edia veria karadia be Diabolo ena bamona. Hegeregere reana idia gwau: ‘Dirava ia diba ita manoka bona tauanina ena ura ia noho. Unai dainai bema unai mahuta hebou urana ita hagugurua, Dirava ese do ia hebogahisi henia. Bema iseda kara dika ita gwauraia hedinarai, do ia gwauatao, hereva momokani ita vareai neganai hegeregerena.’ Mani oi laloa, Diabolo ese unai bamona hereva ia gaukaralaia Heva dekenai, ia gwauhamata ia kara dika diba bona panisi do ia abia lasi. Ia gwau Heva ena kara dika Dirava dekenai dainai aonega bona ura kwalimu do ia abia. (Genese 3:​4, 5) Bema unai bamona tauna dikana ita davaria kongregesen lalonai, ita sibona bona ma haida ita naria be iseda maduna dainai, Keristani kongregesen naria taudia do ita hamaoroa.​—⁠Levitiko 5:⁠1.

Diba Maoromaoro ese Ia Naria

²¹ Petero ese unai kahana ena revareva lalonai ia hadokoa neganai, guna ia herevalaia “mauri hanamoa gaudia ibounai, bona [Dirava] ia badinaia totona goada ibounai” durua dibana ia badinaia lasi tauna dekenai do idia vara gaudia ia herevalaia. (2 Petero 1:​2, 3, 8) Ia torea: “Momokani, taunimanima momo ese iseda Lohiabada bona Hamauria Tauna Iesu Keriso idia diba [maoromaoro] dainai, tanobada ena miro dekena amo idia roho mauri vadaeni. To unai taudia bema unai miro karadia dekenai ma idia giroa lou neganai, idia be edena bamona? Madi, edia dika gunana be maragi, to edia dika, gabeai gauna, be bada.” (2 Petero 2:​20) Madi o! Petero ena nega ai, unai bamona taudia ese nega kwadogina lalonai mahuta hebou urana hagugurua totona edia helaro namona, guba dekenai mase diba lasi maurina, idia negea.

21-23. (a) Diba maoromaoro gaukaralaia lasi davana be dahaka? (b) Petero ese dahaka hekwakwanai ma ta, hereva gabena ai do ita laloa gauna, ia herevalaia?

²² Unai dainai Petero ia gwau: “Momokani, unai taudia ese kara maoromaoro dalana ena diba idia davaria lasi guna be namo. Badina korikori be, unai dala idia davaria vadaeni, bona taravatu helagana idia diba, to idia ura lasi, bona idia negea vadaeni. Inai kara idia karaia, ena anina be aonega hereva momokani rua bamona, idia gwau, ‘Sisia be iena mumuta dekenai ma ia giroa lao noho,’ bona ‘Boroma be idia huria, to kopukopu dekenai ma ia giroa lou.’ ”​—⁠2 Petero 2:​21, 22; Aonega Herevadia 26:⁠11.

²³ Idaunegai Keristani taudia ese hekwakwanai ma ta idia davaria, bona hari haida ese unai bamona hekwakwanai idia davaria danu. Unai neganai haida be Keriso ena noho negana, ia gwauhamatalaia gauna, ia do mai lasi idia maumauraia. Namona be Petero ese unai gauna ia herevalaia dalana ita laloa.

Oi Laloatao, A?

◻ Petero ese edena sisiba idia henia sivaraidia toi ia gwauraia?

◻ Edena dala ai hadibaia koikoi taudia ese “Dirava ena siahu idia gwauraia be anina lasi”?

◻ Balama ena dala be dahaka, bona unai dala idia badinaia taudia be edena bamona ma haida idia veria toho?

◻ Diba maoromaoro gaukaralaia lasi davana be dahaka?

3. Dahaka ia vara guna bona Petero ia gwau do ia vara lou?

12. Petero ia gwau kara maoromaoro ena davana namona be dahaka?

13. Dirava ena hahemaoro do idia abia taudia be daidia, bona dahaka idia nihilaia?

15. Hadibaia koikoi taudia idia gaukaralaia daladia be dahaka, bona edena gabu ai edia veria karadia idia karaia?

18. Balama ese ena kara ia rakatania, eiava, bona ia dekenai ia vara gauna ese ia hahedinaraia dahaka do ia vara hadibaia koikoi taudia dekenai?

[Picture on page 16, 17]

Balama ena sivarai ese ita dekenai sisiba ia henia