Iehova Ena Ura Idia Karaia

Paulo be mai Goada ida Dagi Bada Taudia Dekenai Ia Haroro

TATAU rua be idia idau vaitani. Ta ena kwarana dekenai korona ia atoa bona ma ta be seini amo idia kwatua. Ta be king; ma ta be dibura tauna. Lagani rua lalonai aposetolo Paulo be dibura rumana lalonai ia noho vadaeni, bona hari Iuda taudia edia lohia tauna, Heroda Agripa Iharuana, vairanai ia gini. Unai king bona ena hahine, Berenike, “idia mai, king ena toana gaudia momo danu, hebou ruma lalonai idia raka vareai. Idia danu be tuari biagudia bona hanua tau badadia.” (Kara 25:23) Buka ta ia gwau: “Reana taunimanima handred haida idia noho.”

Vanegai gavana dagina ia abia tauna, Festo, ese unai hebou ia hegaegaelaia. Gavana tauna gunana, Feliki, ese dibura rumana ai Paulo ia rakatania sibona. To Festo be Paulo idia samania be maoro eiava lasi ia daradaralaia. Paulo be ia hereva goadagoada ia gwau ia kerere lasi, bona ia ura Kaisara dekenai ena sivarai ia herevalaia! Paulo ena sivarai ese King Agripa ena lalona ia veria. Ia gwau: “Lau danu, lau ura inai tauna ena hereva lau kamonai.” Festo be ia hegaegae haraga, bona reana ia laloa King be dahaka do ia laloa unai dibura tauna idauna dekenai.​—Kara 24:​27–​25:⁠22.

Dina tamona murinai, Paulo be dagi bada taudia momo vairanai ia gini. Agripa dekenai ia gwau: “Lau be moale, badina be Iuda taudia ese lau idia samania gaudia ibounai be oiemu vairanai do lau haere. Badina korikori be, Iuda taudia edia kara bona edia hepapahuahu gaudia oi diba namonamo vadaeni. Unai dainai lau noinoi, egu hereva oi kamonai, mani emu kara oi hesiku haraga lasi.”​—Kara 26:​2, 3.

Paulo be mai Goada ida Ia Hereva

Paulo ese Agripa dekenai Keristani taudia ia dagedage henidia ena sivarai ia gwauraia guna. Ia gwau: “Lauegu ura be idia ese Iesu ena ladana do idia hadikaia . . . Idau bese edia hanua dekenai lau lao, idia do lau dagedage henia totona.” Unai murinai Paulo ese ia itaia matahanai, ia herevalaia. Unai matahanai lalonai ia toreisi lou vadaeni tauna, Iesu, ese ia nanadaia ia gwau: “Badina dahaka lau dekenai oi dagedage? Oi sibona ikoko matana oi moia, vadaeni oi hisihisi.”a​—Kara 26:​4-14.

Unai murinai Iesu ese Saulo ia hagania, bese iboudiai dekenai “oi itaia gaudia, bona oi dekenai do lau hedinarai gaudia danu be do oi gwauraia hedinarai.” Paulo ia gwau ia hekwarahi bada ena gaukara ia hagugurua totona. To, Agripa ia hamaoroa: “Inai lau karaia dainai, Iuda taudia ese Dubu Helaga lalonai lau idia dogoatao, lau idia alaia gwauraia.” Paulo ia diba Agripa be Iuda taudia edia tomadiho karadia ia laloa bada dainai, ia hahedinaraia namonamo Mesia ena mase bona toreisi lou sivaraina ia harorolaia neganai, ‘idau hereva ia gwauraia lasi, ia be peroveta taudia bona Mose, guna idia ese idia hereva gaudia sibona ia gwauraia noho.’​—Kara 26:​15-23.

Festo ese ena hereva ia utua. Ia gwau: “Oiemu aonega badana dainai oiemu lalona ia kavakava.” Paulo ia haere: “Tau namo herea Festo e, lau be kavakava lasi, hereva momokani bona maoromaoro lau gwauraia inai.” Bena Paulo be Festo dekenai Agripa ia herevalaia, ia gwau: ‘King ena vairanai lau hereva mai siahu danu, badina be inai gaudia ibounai ia diba. Lau diba vadaeni inai gau ta ia hunia lasi ia dekenai, badina inai gaudia be hunia gabu dekenai idia vara lasi.’​—Kara 26:​24-26.

Unai murinai Paulo be Agripa dekenai ia gwau: “King Agripa e, peroveta taudia edia hereva oi abia dae, a?” Reana unai henanadai dainai Agripa be ia gari sisina. Ia be ladana bada tauna bona bema ia hahedinaraia Paulo ena hereva ia abia dae, anina be Festo ese ia gwauraia “kavakava” herevana ia abia dae. Reana Paulo be ia itaia Agripa be ia haere haraga lasi dainai, sibona ena henanadai ia haerelaia. Ia gwau: “Lau diba vadaeni oi abia dae.” Agripa be ia hereva, to ena lalohadai ia hahedinaraia lasi, ia gwau: “Oi laloa inai nega kwadogi lalonai Keristani tauna oi halaoa lau, a?”​—Kara 26:​27, 28.

Paulo ese Agripa ena hereva ia gaukaralaia namonamo mai anina bada hereva ia gwauraia totona. Ia gwau: “Nega kwadogi o daudau be herevana, to Dirava ena vairanai lauegu ura tamona be inai, oi bona egu hereva idia kamonai taudia ibounai be lau hegeregere do umui lao. To inai auri kwatua gaudia sibona lau ura lasi umui abia.”​—⁠Kara 26:⁠29.

Agripa bona Festo be Paulo do idia hamasea eiava dibura dekenai do idia atoa ena badina ta idia davaria lasi. To, ena noinoi Kaisara dekenai ena sivarai do ia gwauraia idia haidaua diba lasi. Unai dainai Agripa be Festo dekenai ia gwau: “Bema inai tau be Kaisara dekenai ia noinoi lasi neganai, do ita ruhaia diba.”​—Kara 26:​30-32.

Ita Dibaia Gaudia

Paulo be dagi bada taudia vairanai ia haroro dalana be haheitalai namona ita dekenai. Mai aonega ida King Agripa ia hereva henia. Ia be Agripa bona Berenike edia sivarai dikana ia diba vadaeni. Idia noho hebou be ia maoro lasi badina Berenike be Agripa ena taihuna korikori. To unai nega ai, Paulo be kara goeva ia harorolaia lasi. Lasi, to ia bona Agripa idia lalo-tamona gaudia ia herevalaia. Unai sibona lasi, ena be Paulo ia hadibaia tauna be Farisea tauna, Gamaliela, to, ia hahedinaraia ia abia dae Agripa be Iuda taudia edia kara ia diba namonamo. (Kara 22:⁠3) Ena be Agripa be kara goeva tauna lasi to, iena dagi dainai Paulo ese mai hemataurai ida ia hereva henia.​—⁠Roma 13:⁠7.

Iseda hahediba herevadia ita harorolaia goadagoada neganai, namo lasi idia kamonai taudia edia kara dikadia ita hahedinaraia eiava gwauraia dika. To, hereva momokani idia abia dae totona, sivarai namona ena hereva namodia ita gwauraia hedinarai namonamo, bona ita iboudiai ita ura do idia vara gaudia ita herevalaia momo. Bema edia mauri lagani be bada o dagi bada taudia ita hereva henia neganai, ita matauraidia be namo. (Levitiko 19:32) Unai dala amo, Paulo ena kara do ita tohotohoa, ia gwau: “Lau ese taunimanima idauidau ibounai edia mauri dalana lau abia dae, dala idauidau ibounai dekena amo, haida do lau veria mauri totona.”​—1 Korinto 9:⁠22.

[Footnote]