Iehova Ena Imana Dekenai Idia Noho Dina Bona Nega

“Egu Tamana sibona ena siahu dekenai ia laloa dina bona nega, umui be diba lasi.”—KARA 1:7.

1. Aposetolo taudia be nega totona idia henanadai neganai, Iesu ese edena bamona ia haere henidia?

KERISENDOM bona tanobada ibounai lalonai idia karaia ‘kara dika rohoroho ibounai dainai idia taitai bona lalohisihisi noho’ taudia be vaia idia henanadai edena nega ai inai nega dikana do ia ore bona ena gabu ai Dirava ena kara maoromaoro tanobada matamatana do ia vara, ani? (Esekiela 9:⁠4; 2 Petero 3:​13) Iesu ia do mase lasi neganai bona mase amo ia toreisi lou murinai, iena aposetolo taudia be nega idia henanadailaia. (Mataio 24:3; Kara 1:⁠6) To, Iesu ese ia haere henidia neganai, nega do idia duahia dalana ta ia gwauraia lasi. Haere ta lalonai, ia ese toa mai ena kahana idauidau ia gwauraia, bona haere ma ta lalonai ia gwau: “Egu Tamana sibona ena siahu dekenai ia laloa dina bona nega, umui be diba lasi.”​—⁠Kara 1:⁠7.

² Ena be Iesu be Iehova ena Natuna tamona sibona, to ena Tamana ia diba negadia haida be ia diba hanaihanai lasi. Iesu be dina gabedia ia herevalaia neganai, mai ena manau ida ia gwau: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.” (Mataio 24:36) Iesu ia ura mai ena haheauka ida ena Tamana ia naria, ia dekenai inai tanobada ena oromana dikana do ia haorea negana do Ia hahedinaraia totona.a

3. Iesu ese Dirava ena ura hagugurua negadia dainai idia gwauraia henanadai ia haerelaia dalana amo dahaka ita diba?

³ Iesu ese Dirava ena ura hagugurua negadia dainai idia gwauraia henanadai ia haerelaia dalana amo, gau rua ita dibaia. Gau ginigunana be, Iehova be mai ena nega gau iboudiai totona; bona gau iharuana be, ia sibona ese unai nega ia abia hidi, bona ena hesiai taudia do idia laloa lasi ia ese ia abia hidi dinadia bona negadia edia hereva idauidau do idia diba goevagoeva guna.

Iehova Ena Dina Bona Nega

4. Kara 1:7 dekenai, Greek herevadia idia hahanaia “dina” bona “nega” edia anina be dahaka?

⁴ Unai hereva “dina” bona “nega” edia anina be dahaka? Iesu ena hereva Kara 1:7 dekenai be nega ena kahana rua ia herevalaia. Greek herevana idia hahanaia “dina,” ena anina be “nega ena daudau,” ena lata (kwadogi eiava lata) ia herevalaia. To hereva ma ta idia hahanaia “nega,” ena anina be nega mai ena hetoana, gau ta ena nega, gau haida ese ena toana idia hahedinaraia negana. W. E. Vine ese unai hereva ruaosi ia herevalaia ia gwau: “Kara 1:7 dekenai, dina (chronos), nega edia daudau, bona nega (kairos), kara haida ese idia makaia negadia, be ‘Tamana ese Ia sibona ena siahu henunai ia atoa.’ ”

⁵ Abata Badana ia do vara lasi neganai, Dirava ese lagani 120 negana ena hetoana ia atoa, unai be taunimanima bona tanobada tauanina idia karaia gwau-edeede anerudia ese idia havaraia tanobada dikana ena nega hetoana. (Genese 6:​1-3) Unai neganai, Dirava badinaia tauna, Noa, ena mauri laganidia be 480. (Genese 7:⁠6) Ia be natuna lasi bona ma lagani 20 unai bamona ia noho. (Genese 5:​32) Nega daudau murinai, Noa ena natuna memero be tatau ai idia lao bona idia headava murinai, Dirava ese Iena ura be Noa dekenai ia gwauraia. Ia ura tanobada amo kara dika do ia kokia. (Genese 6:​9-​13, 18) Unai neganai, Noa be gaukara rua ia abia, ia ese lagatoi do ia karaia bona taunimanima do ia haroro henidia. Iehova ese ia abia hidi negana be Noa dekenai ia gwauraia lasi.​—⁠Genese 6:​14; 2 Petero 2:⁠5.

6. (a) Noa be edena bamona ia hahedinaraia Iehova ena imana dekenai nega ia rakatania? (b) Edena dala ai Noa ena haheitalai ita tohotohoa diba?

⁶ Lagani momo lalonai​—⁠reana lagani 50 bamona​—⁠Noa be ‘Dirava ena hereva ibounai hegeregerena’ ia karaia. Ena be Noa be unai dina korikorina ia diba lasi, to unai bamona ia karaia badina “Dirava ia abidadama henia.” (Genese 6:​22; Heberu 11:⁠7) Iehova ese do idia vara gaudia edia nega korikori ia hadibaia lasi ela bona pura tamona ia noho bena Abata do ia vara neganai ia hadibaia. (Genese 7:​1-5) Noa ese Iehova ia abidadama henia momokani dainai, nega be Dirava ena imana dekenai ia rakatania diba. Bona Abata negana lalonai Iehova ese Noa ia gimaia bona lagatoi amo Dirava ia hagoevaia tanona dekenai ia raka lasi neganai, ia moale bada herea! Iseda helaro be unai bamona hahemauri do ita abia dainai, namona be Dirava dekenai unai bamona abidadama ita hahedinaraia, ani?

7, 8. (a) Bese idauidau bona tanobada ena siahu basileiadia be edena bamona idia vara? (b) Edena dala ai Iehova ese ‘taunimanima edia nega bona edia tano ena hetoa maka ia gwauraia guna’?

⁷ Abata murinai, Noa ena tubuna momo be Iehova tomadiho henia momokani karana idia rakatania. Edia ura be gabu tamona dekenai idia noho dainai, idia ese hanua ta bona tomadiho koikoi totona kohoro ta idia haginia. Iehova be unai nega ia abia hidi, kara ta ia karaia totona. Ia ese edia gado ia haidaua bona “[Babela] dekena amo ia luludia, tanobada kahana kahana ibounai dekenai idia lao.” (Genese 11:​4, 8, 9) Gabeai, unai gado idauidau oreadia be bese badadia ai idia lao, bona idia haida be bese ma haida idia abia bena gabu ta ena siahu basileiadia ai idia lao, bona tanobada ena siahu basileiadia ai idia lao danu.​—⁠Genese 10:32.

⁸ Dirava be ena ura ia hagugurua totona, nega haida ia ese bese edia tano hetoana bona edena nega ai bese ta do ia lohia eiava tanobada ena siahu basileiana ai do ia lao, ia gwauraia hidi. (Genese 15:​13, 14, 18-​21; Esodo 23:31; Deuteronomi 2:​17-​22; Daniela 8:​5-7, 20, 21) Aposetolo Paulo be Atena dekenai Greek aonega taudia ia hereva henia neganai, unai dala ai Iehova ena dina bona nega ia herevalaia. Ia gwau: “Tanobada bona ena lalonai noho gaudia ibounai ia karaia Diravana be guba bona tanobada ena Lohiabada. . . . Rara tamona dekenai ia ese taunimanima bese ibounai ia karaia, bona tanobada ena kahana ibounai dekenai idia noho. Ia sibona ese edia nega, bona edia tano hetoa maka ia gwauraia guna.”​—⁠Kara 17:​24, 26.

9. Edena dala ai Iehova ese king edia ‘dina bona nega ia haidaua’?

⁹ Ita gwau lasi unai ena anina be nega ibounai bese idauidau huanai bese ta ia kwalimu eiava gau haida idia idau neganai, ena badina be Iehova ese ia durudia dainai. Lasi, to ia be ena lalohadai hegeregerena kara ta ia karaia diba, iena ura do ia hagugurua totona. Unai dainai, peroveta tauna Daniela, gabeai Tanobada Siahu Basileiana Babulonia ena siahu ia ore bona Mede bona Parasa ese ena gabu ia abia karana ia itaia tauna, ese Iehova ia herevalaia, ia gwau: “[Dina bona] nega be ia ese ia biagua bona ia haidaua. Ia ese king ia atoa, bona king ia kokia. Aonega bona diba ia henia taunimanima dekenai.”​—⁠Daniela 2:​21; Isaia 44:24–45:⁠7.

“Negana be Kahirakahira”

10, 11. (a) Lagani hida gunanai Iehova ese nega ia gwauraia hidi, igui amo Aberahamo ena bese taudia do ia ruhaia totona? (b) Dahaka ese ia hahedinaraia Israela taudia idia diba lasi edena nega ai Dirava ese do ia hamauridia?

¹⁰ Lagani 400 idia do noho neganai, Iehova ese Tanobada Basileiana Aigupito do ia hahemaraia bona igui hesiai amo Aberahamo ena bese do ia ruhaia negana ia makaia. Dirava ese Aberahamo dekenai ena ura ia gwauraia hedinarai neganai, ia gwauhamata ia gwau: “Momokani, oiemu tubuna be idau tano dekenai dohore idia noho, idau taudia bamona. Unuseni hesiai gaukara davana lasi do idia karaia, bona hisihisi do idia abia lagani 400 dekenai. To idia dekenai hesiai gaukara do idia henia besena be do lau panisia, bona unai tano oiemu bese taudia ese do idia rakatania neganai, kohu momo do idia abia lao.” (Genese 15:​13, 14) Stefano be Kaunsolo taudia vairanai Israela besena ena sivarai ia gwauraia neganai, unai lagani 400 negana ia herevalaia bona ia gwau: “Dirava ena gwauhamata Aberahamo dekenai ia hamomokania negana be kahirakahira neganai, iseda sene taudia Aigupito lalonai edia hutuma be ia bada daekau. Ela bona idau king ta Aigupito ia naria, ia diba lasi Iosepa.”​—⁠Kara 7:​6, 17, 18.

¹¹ Farao matamatana ese Israela taudia be hesiai taudia ai ia halaodia. Unai neganai, Mose ese Genese bukana ia do torea lasi, to Iehova ena gwauhamata herevana be reana uru ta ta dekenai uduna amo eiava toretore amo idia gwauraia. Ena be unai bamona ia vara, to ia hedinarai Israela taudia idia abia dibana ese ia durudia lasi hisihisi amo edia hahemauri do ia vara negana korikorina idia davaria totona. Dirava ia diba idia do ia hamauria, to hisihisi idia abia noho Israela taudia ia hadibaia lasi. Sivarai ita duahia, ia gwau: “Lagani momo murinai, Aigupito ena king, Farao, ia mase. To Israela taudia idia taitai noho, mai lalohisihisi danu, gaukara metau momokani idia karaia noho dainai. Idia taitai Dirava dekenai. Idia edia taitai Dirava ese ia kamonai, bona iena gwauhamata, Aberahamo bona Isako bona Iakobo dekenai ia gwauhamata henia gauna ia laloa. Vadaeni Dirava ese Israela taudia dekenai ia itaia, bona edia hisihisi ia laloa noho.”​—⁠Esodo 2:​23-​25.

12. Stefano ese edena bamona ia hahedinaraia Mose be Iehova ena dina ia do ginidae lasi neganai kara ta ia karaia?

¹² Israela taudia be edia hahemauri do ia vara negana korikorina idia diba lasi be Stefano ena hereva amo ia hedinarai. Mose ia herevalaia neganai, ia gwau: “Mose ena lagani 40 neganai, laloa ta ia abia, iena varavara Israela taudia ia itaia gwauraia. Bona idia ta ia itaia, Aigupito tauna ese ia hadikaia noho, vadaeni ia lao, ia hadikaia tauna ia durua, Aigupito tauna ia alaia mase, davana ia henia vadaeni. Ia laloa iena varavara taudia be inai bamona dohore idia laloa, ‘Dirava ese Mose ena imana dekena amo ita dohore ia hamauria.’ To inai bamona idia laloa lasi.” (Kara 7:​23-25) Mose ese unai kara ia karaia neganai, lagani 40 idia do noho bena Dirava ena dina do ia ginidae. Stefano ese ia hahedinaraia, Mose be ma lagani 40 do ia naria bena ‘Dirava ese iena imana dekena amo Israela taudia dohore ia hamauria.’​—⁠Kara 7:​30-​36.

¹³ Ena be “Dirava ena gwauhamata Aberahamo dekenai ia hamomokania negana be kahirakahira” bona Dirava ese unai lagani ia makaia vadaeni, to Mose bona Israela taudia ibounai be Iehova idia abidadama henia be namo. Namona be ia ese ia makaia negana idia naria sibona, badina unai nega idia duahia bona davaria diba lasi. Ita danu ita diba momokani, inai nega dikana amo do ita roho mauri negana be ia kahirakahira. Ita diba ita be “nega ena dokona” ai ita noho. (2 Timoteo 3:​1-5) Unai dainai namona be iseda abidadama ita hahedinaraia bona Iehova ese iena dina badana totona ia abia hidi negana ita naria, ani? (2 Petero 3:​11-​13) Unai neganai, ita be Mose bona Israela taudia hegeregerena, hahemauri anena ta do ita abia, Iehova hanamoa totona.​—⁠Esodo 15:​1-​19.

“Nega Korikori Ia Ginidae Neganai”

14, 15. Edena bamona ita diba Dirava ese nega ta ia abia hidi iena Natuna be tanobada dekenai do ia mai totona, bona peroveta taudia bona aneru danu be dahaka idia naria?

¹⁴ Iehova ese ena natuna tamona tanobada dekenai do ia mai bona Mesia ai do ia lao negana be guna ia abia hidi. Paulo ia gwau: “To nega korikori ia ginidae neganai, Dirava ese sibona ena Natuna ia siaia. Hahine ena bogana dekena amo ia vara, bona Iuda edia Taravatu henunai ia noho.” (Galatia 4:⁠4) Unai be Dirava ena gwauhamata hegeregerena, ia gwau garana ta do ia siaia​—⁠‘Silo, bese ibounai ese do idia kamonai henia tauna.’​—⁠Genese 3:​15, NW; 49:⁠10.

¹⁵ Dirava ena peroveta taudia​—⁠aneru danu​—⁠be unai “nega,” tanobada dekenai Mesia do ia hedinarai bona goevadae lasi taudia edia hahemauri dalana do ia kehoa negana, idia naria. Petero ia gwau: “Peroveta taudia ese Dirava ena hariharibada, umui dekenai do ia ginidae gauna idia herevalaia. Idia ese inai hamauria ena anina idia tahua goadagoada, bona ia totona idia henanadai momo. . . . Unai peroveta taudia edia lalona . . . ese idia ia hadibaia, Keriso ese hisihisi do ia abia, gabeai hairai bada do ia abia. Bona idia ese inai henanadai idia nanadaia, idia gwau, ‘Keriso edena negai do ia mai?’ Ma idia henanadai, idia gwau, ‘Keriso ena mai neganai dahaka do ia vara?’ . . . Inai kara bona Sivarai Namona, be aneru danu idia ura dikadika do idia itaia bona diba.”​—⁠1 Petero 1:​1-5, 10-12.

¹⁶ Iehova be ena peroveta tauna Daniela​—⁠abidadama goada tauna​—⁠amo pura 70 (“lagani 490”) perovetalaia herevana ia gwauraia. Unai peroveta herevana ese aposetolo edia nega lalonai idia noho Iuda taudia do ia hadibaia Mesia do ia hedinarai negana ia mai noho. Unai peroveta herevana ena kahana ta ia gwau: “Ierusalema haginia lou herevana idia gwauraia ela bona Mesia ia ginidae be lagani ibounai 483 [pura 69] be do idia ore.” (Daniela 9:​24, 25) Iuda, Katolik, bona Protestan diba bada taudia idia abia dae, unai siri dekenai pura idia gwauraia ena anina be lagani puradia. Daniela 9:25 dekenai unai pura 69 (“lagani 483”) be lagani 455 B.C.E. ai ia matamaia. Unai neganai, Parasa ena King Aratasaseta ese Nehemia dekenai “Ierusalema haginia lou” ena gwaumaoro ia henia. (Nehemia 2:​1-8) Unai pura 69 be lagani 483 murinai idia ore​—⁠lagani 29 C.E. ai, Iesu ia bapatiso bona lauma helaga amo Dirava ese ia horoa, bena Mesia ai ia lao negana unai.​—⁠Mataio 3:​13-​17.

16, 17. (a) Edena peroveta herevana amo Iehova ese aposetolo edia nega ai idia noho Iuda taudia ia durua, Mesia idia naria totona? (b) Daniela ena peroveta herevana dainai Iuda taudia ese Mesia be edena bamona idia naria?

¹⁷ Aposetolo taudia edia nega lalonai idia noho Iuda taudia ese unai lagani 483 ia matamaia negana korikorina idia diba eiava lasi be ita diba lasi. To, Ioane Bapatiso ena haroro gaukarana ia hamatamaia neganai, “taunimanima idia laloa daradara, bona idia laloa momo, idia gwau, ‘Sedira Ioane be Keriso o?’ ” (Luka 3:15) Baibel idia tahua taudia haida idia gwau Daniela ena peroveta herevana dainai unai laloa momo karana ia vara. Matthew Henry be unai siri ia herevalaia neganai, inai hereva ia torea: “Iniseniai ita ia hamaoroa . . . dahaka dainai taunimanima be, Ioane ena haroro bona bapatiso gaukarana amo, Mesia idia laloa, bona idia laloa ia be iduara dekenai bamona. . . . Daniela ena pura 70 negana be ia ore gwauraia unai.” Vigouroux, Bacuez, bona Brassac ese idia torea France gado bukana, Manuel Biblique, ia gwau: “Taunimanima idia diba Daniela ese ia gwauraia pura 70 laganidia idia ore gwauraia; Ioane Bapatiso ese Dirava ena Basileia ia kahirakahira herevana ia harorolaia neganai, kamonai taudia ta ia hoa lasi.” Iuda diba tauna Abba Hillel Silver ia torea herevana ia gwau unai neganai “taunimanima momo be nega ena lata idia diba” hegeregerena, “idia laloa Mesia be lagani 25 C.E. ia lao lagani 50 C.E. lalonai do ia hedinarai.”

Idia Vara Gaudia ​—⁠Nega Duahia Karana Lasi

18. Ena be Daniela ena peroveta herevana ese Iuda taudia ia durua Mesia do ia hedinarai negana idia lalo-pararalaia totona, to Iesu ena Mesia dagina ia hamomokania gauna badana be dahaka?

¹⁸ Toana be unai nega duahia karana ese Iuda taudia ia durua Mesia do ia hedinarai negana idia lalo-pararalaia totona, to gabeai idia vara gaudia ese idia hahedinaraia unai ese idia momo ia durua lasi Iesu ena Mesia dagina idia abia dae totona. Kahirakahira lagani ta ia do noho bena do idia hamasea negana ai, Iesu ese hahediba taudia ia nanadaia, ia gwau: “Taunimanima be dahaka idia gwau, lau be daika?” Bena idia haere: “Haida idia gwau, oi be Ioane Bapatiso, to haida idia gwau oi be Elia, ma haida idia gwau peroveta tauna gunana ta ia toreisi lou vadaeni.” (Luka 9:​18, 19) Idia torea sivaraidia ta ese ia hahedinaraia lasi Iesu be pura edia peroveta herevana ia gwauraia lou, ena Mesia dagina ia hamomokania totona. To ia be nega ta ia gwau: “Gau ta ese Ioane ena hereva lau totona ia hereaia momokani. Inai be lauegu gaukara, Dirava ese lau ia hamaoroa do lau karaia gaukaradia. Inai gaukara ese idia hedinaraia momokani, lauegu Tamana ese lau ia siaia vadaeni.” (Ioane 5:36) Nega duahia karana lasi, to Iesu ena haroro gaukara, iena hoa karadia, bona iena mase neganai idia vara karadia (gabu ia dibura, dubu ena dabua ia darea, bona tano ia mareremarere), ese idia hamomokania ia be Mesia, Dirava ese ia siaia tauna.​—⁠Mataio 27:​45, 51, 54; Ioane 7:​31; Kara 2:⁠22.

¹⁹ Unai hegeregerena, Iesu ia mase murinai, Keristani ginigunadia be heduru gauna ta idia abia lasi, Iuda taudia edia nega oromana ena dokona do idia tahua bona diba totona. Momokani, Daniela ena pura edia peroveta herevana ese unai nega oromana do ia ore ia herevalaia. (Daniela 9:​26b, 27b) To unai do ia vara pura 70 (lagani 455 B.C.E.–36 C.E.) idia ore murinai. Anina be Idau Bese taudia ginigunadia be lagani 36 C.E. ai Iesu ena hahediba taudia ai idia lao murinai, Keristani taudia be Daniela karoa 9 ese ia gwauraia nega badadia lalonai idia noho lasi. Nega duahia karana lasi, to do idia vara karadia ese do idia hadibadia Iuda taudia edia nega oromana be kahirakahira do ia ore. Unai kara, Iesu ese ia perovetalaia karadia unai, be lagani 66 C.E. amo idia guguru matamaia. Unai lagani ai Roma tuari oreadia ese Ierusalema idia tuari henia bena idia giroa lao. Unai ese idia noga noho, abidadama Keristani taudia Ierusalema bona Iudea dekenai edia dala ia kehoa “ororo dekenai do idia heau lao.” (Luka 21:​20-​22) Nega duahia dalana ta idia abia lasi dainai, unai Keristani taudia ginigunadia idia diba lasi edena nega ai Ierusalema hadikaia ore karana do ia vara. Edia abidadama goadana dainai edia ruma, uma, bona bisinesi gaukara rumadia idia rakatania bona lagani hani Ierusalema dekenai idia noho lasi, ela bona Roma tuari taudia be lagani 70 C.E. ai idia giroa lou bena Iuda taudia edia nega oromana idia hadikaia ore!​—⁠Luka 19:​41-​44.

20. (a) Noa, Mose, bona Keristani ginigunadia edia haheitalai amo edena bamona heduru ita abia diba? (b) Hereva gabena ai dahaka do ita herevalaia?

²⁰ Noa, Mose, bona Iudea dekenai Keristani ginigunadia hegeregerena, hari inai negai ita be mai abidadama ida Iehova ena imana dekenai dina bona nega ita rakatania diba. Nega duahia kava dainai lasi, to Baibel ena peroveta herevadia hegeregerena idia vara momokani karadia dainai ita diba momokani ita be nega ena dokona ai ita noho bona iseda hahemauri negana be kahirakahira. Danu, ena be Keriso ena noho negana lalonai ita noho, to unai be abidadama hahedinaraia karana bona noga karana amo do ita laga-ani negana lasi. Namona be mai eda ura ida Baibel ese ia gwauraia vadaeni karadia ita naria noho. Hereva gabena ai unai do ita herevalaia.

[Footnote]

Riviu

◻ Iehova ena dina bona nega idia herevalaia neganai, Iesu ese ena aposetolo taudia be dahaka ia hamaorodia?

◻ Noa be edena nega ai Abata Badana do ia vara negana ia diba?

◻ Dahaka ese ia hahedinaraia Mose bona Israela taudia idia diba lasi edena nega ai Dirava ese Aigupito amo do ia hamauridia?

◻ Baibel lalonai Iehova ena dina bona nega sivaraidia ese edena bamona ita idia durua?

2. Dahaka dainai ita gwau diba Iesu be ena Tamana ia gwauraia gaudia, nega dokona ai do idia vara gaudia, edia nega ia diba hanaihanai lasi?

5. Edena nega ai tanobada dikana hadikaia ore totona Iehova ese Noa dekenai Iena ura ia gwauraia hedinarai, bona Noa be dahaka gaukara rua ia karaia?

13. Edena dala ai iseda nega be Dirava ese Aigupito amo Israela taudia ia do hamauridia lasi negana bamona?

19. (a) Keristani taudia be edena bamona do idia diba Ierusalema hadikaia ore negana be ia kahirakahira? (b) Dahaka dainai Ierusalema amo idia heau siri Keristani taudia ginigunadia edia abidadama ia goada noho be namo?

[Picture on page 11]

Noa be mai ena abidadama dainai Iehova ena imana dekenai nega ia rakatania