“Hereva Momokani ese Umui Do Ia Ruhaia”

“Hereva momokani be do umui diba, bona hereva momokani ese umui do ia ruhaia.” Iesu be Ierusalema ena dubu dekenai taunimanima hutuma ia hadibaia neganai, unai bamona ia hereva. (Ioane 8:32) Iesu ena aposetolo taudia be maoromaoro idia itaia Iesu ena hahediba herevadia be hereva momokani. Edia hadibaia tauna be Dirava amo ia mai idia hamomokania gaudia momo idia itaia vadaeni.

TO, HARI inai negai, taunimanima haida idia davaria ia auka Iesu ese ia herevalaia hereva momokanina idia diba totona. Peroveta tauna Isaia ena nega hegeregerena, hari inai negai haida ese ‘dika idia gwauraia namo, bona namo idia gwauraia dika. Ma dibura idia gwauraia diari, bona diari idia gwauraia dibura. Ma danu idia gwau, uduna dekenai mamina ia dika gauna be gaiho, bona gaiho gauna idia gwau ena mamina be dika.’ (Isaia 5:20) Hari inai negai, lalohadai, aonega herevadia, bona mauri daladia idauidau momo idia abia isi toho dainai, taunimanima momo idia laloa gau iboudiai be mai edia hetoana, bona hereva momokani be lasi.

Iesu ese iena kamonai taudia dekenai hereva momokani be idia do ia ruhaia herevana ia gwauraia neganai, idia haere idia gwau: “Ai be Aberahamo ena besena, ai be nega ta tau ta ia guia lasi ai, lasi bona lasi momokani. Dahaka dainai oi gwau, ‘Umui do ia ruhaia’?” (Ioane 8:33) Idia laloa tau ta eiava gau ta ese idia do ia ruhaia be anina lasi. To unai murinai Iesu ia gwau: “Momokani, momokani umui lau hamaoroa, kara dika taudia be dika ese ia guia, vadaeni idia be dika ena hesiai gaukara idia karaia.” (Ioane 8:34) Iesu ese ia herevalaia hereva momokanina be mai ena dala kara dika amo tau ta ia ruhaia totona. Iesu ia gwau: “Bema Natuna ese umui do ia ruhaia neganai, umui be do ia ruhaia momokani.” (Ioane 8:36) Unai dainai, taunimanima ia ruhaia hereva momokanina be Iesu Keriso, Dirava ena Natuna, ia herevalaia hereva momokanina. Tau ta be Iesu ena boubou ia abidadama henia neganai sibona, kara dika bona mase amo ia do ia ruhaia diba.

Ma nega ta ai, Iesu ia gwau: “Hereva momokani dekena amo idia do oi hahelagaia, oiemu hereva be hereva momokani.” (Ioane 17:17) Dirava ena hereva, Baibel lalonai idia torea herevadia, be hereva momokani bona ia ese gari kava herevadia bona tomadiho koikoi amo taunimanima ia ruhaia diba. Baibel lalonai Iesu Keriso ena sivarai momokanina ia noho, bona unai ese taunimanima ia durua ia idia abidadama henia totona bona dala ia kehoa helaro namona idia abia totona. Dirava ena Hereva lalonai ia noho hereva momokanina ita dibaia be gau namo herea!

Hereva momokani ita diba be gau badana, a? Hari inai negai, tomadiho oreadia momo idia gwau Baibel idia badinaia to taunimanima edia aonega herevadia bona edia sene karadia idia badinaia momo. Nega momo, tomadiho gunalaia taudia be edia hereva ia maoro eiava lasi idia laloa bada lasi, to taunimanima momo be edia hereva do idia abia dae idia laloa bada. Haida idia laloa Dirava be tomadiho daladia ibounai ia moalelaia, bema mai edia ura ida idia karaia. To Iesu Keriso ia gwau: “Nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho.”​—Ioane 4:⁠23.

Bema ita ura Dirava ese iseda tomadiho ia abia dae, gau badana be hereva momokani ita diba. Unai be mai anina bada. Ia be gau badana ita moale hanaihanai totona. Unai dainai namona be ita ibounai be sibona ita nanadaia: ‘Dirava ese lauegu tomadiho dalana ia abia dae, a? Momokani lau ura Dirava ena Hereva ena hereva momokani lau dibaia, a? Eiava lau tahua namonamo neganai, do lau davaria gaudia dainai lau gari, a?’