Hereva Momokani Diravana Tohotohoa
“Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.”—EFESO 5:1.
1. Hereva momokani dekenai haida be dahaka idia abia dae, bona dahaka dainai unai be lalohadai kererena?
“HEREVA momokani be dahaka?” (Ioane 18:38) Kahirakahira lagani 2,000 gunanai, Pontio Pilato ese mai hemataurai lasi ida unai henanadai ia gwauraia, ia hahedinaraia momo ese hereva momokani idia davaria be auka. Hari inai negai, momo be iena hereva dekenai do idia lalo-tamona. Unai bamona lalohadai ese hereva momokani ia abia isi lasi. Reana oi kamonai taunimanima idia gwau, ta ta be sibodia idia abia hidi dahaka be hereva momokani, eiava hereva momokani tamona ia noho lasi, eiava hereva momokani be hanaihanai ia idau. Unai bamona lalohadai be lalohadai kererena. Tahua gaukara bona edukeisen edia badina badana be, ita idia durua ita noholaia tanobada ena hereva momokani ita dibaia totona. Hereva momokani be sibona eda lalohadai amo ita gwauraia herevadia sibona lasi. Hegeregere, taunimanima edia souli ia mase diba lasi eiava ia mase diba. Satani ia noho eiava ia noho lasi. Taunimanima edia mauri be mai anina eiava lasi. Idia ta ta dekenai, haere maorona be tamona sibona. Ta be momokani, bona ma ta be koikoi; ruaosi idia momokani diba lasi.
2. Edena dala ai Iehova be hereva momokani Diravana, bona hari dahaka henanadai do ita herevalaia?
2 Stadi hereva ginigunana ai ita itaia, Iehova be hereva momokani Diravana. Gau ibounai ia diba namonamo. Iehova ena kara be ena inai tauna Satani Diabolo amo ia idau momokani, ia be hanaihanai ia kara momokani. Ma danu, Iehova be mai hariharibada ida ma haida dekenai hereva momokani ia hahedinaraia. Aposetolo Paulo ese Keristani bamodia ia hagoadaia, ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” (Efeso 5:1) Ita be Iehova ena Witnes taudia dainai, iseda hereva bona kara amo edena bamona ia ita tohotohoa diba? Dahaka dainai unai bamona ita karaia be gau badana? Bona dahaka dainai ita diba momokani Iehova ese hereva momokani ena dala idia badinaia taudia ia abia dae? Mani ita itaia.
3, 4. Aposetolo Paulo bona Petero ese “nega ena dokona” dekenai do ia vara gauna be edena bamona idia gwauraia?
3 Tomadiho lalonai koikoi be bada negana lalonai ita noho. Paulo be Dirava ena lauma ena hakaua henunai ia peroveta bamona, inai “nega ena dokona” dekenai taunimanima momo ese Dirava badinaia kara be toana sibona do idia hahedinaraia, to ena anina momokani do idia negea. Haida “edia laloa be dika vadaeni” dainai hereva momokani idia dadaraia. Danu, “kara dika taudia bona koikoi taudia ese edia kara dika bona edia koikoi . . . idia habadaia. Idia ese tau haida . . . idia koia, bona ma tau haida ese idia danu . . . idia koia.” Ena be unai bamona taudia ese diba idia tahua noho, to “hereva momokani” ena diba maoromaoro idia davaria diba lasi.—2 Timoteo 3:1, 5, 7, 8, 13.
4 Dirava ena lauma ese aposetolo Petero danu ia hasiahua nega dokona ai do idia vara gaudia ia torea totona. Ia perovetalaia bamona, taunimanima ese hereva momokani idia dadaraia sibona lasi, to Dirava ena Hereva bona unai hereva momokani idia gwauraia taudia idia kirikirilaia. Unai bamona taudia “idia ura lasi idia laloa” Noa ena negai ranu ese tanobada ia hadikaia bona vaira dinana ena hahemaoro negana danu be unai bamona. Edia lalohadai kavakavadia dainai Dirava ese Ia idia negea taudia ia hadikaia neganai, idia ese dika do idia davaria.—2 Petero 3:3-7.
Iehova Ena Hesiai Taudia be Hereva Momokani Idia Diba
5. Peroveta tauna Daniela ena hereva hegeregerena, “dokona negana” ai dahaka do ia vara, bona edena dala ai unai peroveta herevana ia guguru?
5 Peroveta tauna Daniela ese “dokona negana” ia perovetalaia neganai, ia ese Dirava ena taunimanima huanai do ia vara gau idauna ma ta ia herevalaia—tomadiho hereva momokanina do idia goadalaia lou. Ia gwau: “Taunimanima momo do idia heau lao, heau mai, bona aonega do ia bada herea.” (Daniela 12:4) Koikoi Tauna badana ese Iehova ena taunimanima ia hadaradaraia eiava edia matana ia hakepuludia lasi. Baibel stadilaia karana amo diba momokanina idia abia. Aposetolo edia negai, Iesu ese ena hahediba taudia ia hadibadia. Ia ese “Buka Helaga ena anina ia hadibaia idia dekenai, ela bona edia lalona idia kehoa.” (Luka 24:45) Iseda nega lalonai, Iehova be unai bamona ia karaia danu. Iena Hereva, ena lauma, bona ena orea amo, tanobada hegegemadai taunimanima milioni 6 ia durudia ia diba vadaeni gauna—hereva momokani—idia lalo-pararalaia totona.
6. Hari inai negai, edena hereva momokani Baibel amo be Iehova ena taunimanima ese idia lalo-pararalaia?
6 Ita be Dirava ena taunimanima dainai, gau momo ita lalo-pararalaia, bema ita be Dirava ena taunimanima lasi reana gau momo do ita lalo-pararalaia lasi. Lagani tausen momo lalonai tanobada ena aonega taudia momo ese idia haerelaia diba lasi henanadaidia edia haere ita diba. Hegeregere, ita diba dahaka dainai hisihisi ia vara, dahaka dainai taunimanima idia mase, bona dahaka dainai tanobada dekenai taunimanima be maino bona lalo-tamona ai idia noho lasi. Vaira negana ai do idia vara gaudia—Dirava ena Basileia, tanobada paradaisona, bona mauri goevadaena ela bona hanaihanai—ita diba danu. Iehova, Ataiai Momokani Tauna ita diba. Iena kara namodia ita dibaia bona iena hahenamo ita abia totona ita karaia gaudia danu ita dibaia vadaeni. Hereva momokani dibaia karana ese ita ia durua hereva koikoi ita lalo-pararalaia totona. Hereva momokani badinaia karana dainai, ita ese anina lasi gaudia ita tahua lasi, ita ia durua mauri namona ita abia totona, bona nega vaira totona helaro namona ia henia.
7. Baibel ena hereva momokani be daidia ese idia lalo-pararalaia, bona daidia ese idia lalo-pararalaia lasi?
7 Baibel ena hereva momokani oi lalo-pararalaia, a? Bema oibe, unai be hahenamo badana. Toretore tauna ese buka ta ia torea neganai, nega momo unai buka ia karaia dalana amo duahia taudia edia lalona ia veria. Buka haida be edukeisen bada idia abia taudia totona, ma haida be natudia totona, bona ma haida be gaukara idauidau idia karaia taudia totona idia torea. Ena be Baibel be taunimanima ibounai ese idia abia diba, to orea ta sibona ese do ia lalo-pararalaia bona moalelaia. Iehova ese tanobada dekenai idia noho manau taudia totona ia karaia. Unai bamona taudia ese Baibel ena anina idia lalo-pararalaia diba, herevana edia edukeisen, kastom, dagi, eiava iduhu be idauidau. (1 Timoteo 2:3, 4) To, Baibel ena hereva momokani lalo-pararalaia karana be kudou maoro lasi taudia dekenai ia henia lasi, ena be idia be diba bada eiava edukeisen bada taudia. Hekokoroku bona heagi taudia ese Dirava ena Hereva ena hereva momokani namo hereana idia lalo-pararalaia diba lasi. (Mataio 13:11-15; Luka 10:21; Kara 13:48) Dirava sibona ia hegeregere unai bamona buka ia karaia.
Iehova Ena Hesiai Taudia be Hereva Momokani Idia Gwauraia
8. Dahaka dainai Iesu be hereva momokani ena badina?
8 Iehova bamona, iena abidadama Witnes taudia be hereva momokani idia gwauraia. Iesu Keriso, Iehova ena Witnes tauna hereadaena, be ia hadibaia gaudia amo, iena mauri dalana bona mase amo hereva momokani ia hamomokania. Iehova ena hereva ena hereva momokani bona gwauhamata ia abia isi. Unai dainai, Iesu be sibona ia gwauraia hereva momokani ena badina.—Ioane 14:6; Apokalupo 3:14; 19:10.
9. Hereva momokani gwauraia karana dekenai, Baibel be dahaka ia gwau?
9 Iesu be “bogahisihisi kara bona hereva momokani dekenai ia honu momokani” bona “hereva koikoi be nega ta ia gwauraia lasi.” (Ioane 1:14; Isaia 53:9) Keristani taudia momokanidia be ma haida dekenai hereva momokani idia gwauraia karana amo Iesu ena haheitalai idia badinaia. Paulo ese abidadama tamona taudia ia sisiba henia, ia gwau: “Umui ibounai ta ta dekenai hereva momokani do umui gwauraia, badina ita ibounai be Keriso ena tauanina tamona ena kahana taudia.” (Efeso 4:25) Guna, peroveta tauna Sekaraia ia gwau: “Umui ta ta dekenai hereva momokani sibona do umui gwauraia.” (Sekaraia 8:16) Keristani taudia idia ura Dirava idia hamoalea dainai hereva momokani idia gwauraia. Iehova be hereva momokani Diravana bona koikoi herevana amo ia vara dika ia diba. Unai dainai, iena hesiai taudia be hereva momokani idia gwauraia be maoro.
10. Dahaka dainai taunimanima idia koikoi, bona dahaka anina dikana ia havaraia?
10 Taunimanima momo dekenai, hereva koikoi gwauraia karana be dala namona gau namodia haida idia abia totona. Taunimanima idia hereva koikoi panisi idia heautania totona, dala haida ai moni idia abia totona, eiava ma haida ese idia hanamoa totona. To, koikoi karana be kara dikana. Ma danu, koikoi tauna ese Dirava ena lalo-namo ia abia diba lasi. (Apokalupo 21:8, 27; 22:15) Bema taunimanima idia diba nega ibounai ita hereva momokani, ita gwauraia gaudia idia abia dae; ita idia abidadama henia. To, bema taunimanima idia davaria ita be koikoi herevana ta ita gwauraia, gabeai do ita gwauraia herevana do idia abia dae lasi. Africa taudia edia aonega hereva ta be inai: “Koikoi herevana ta ese hereva momokani tausen ia hadikaia.” Aonega herevana ma ta ia gwau: “Koikoi tauna ena hereva do idia abia dae lasi, ena be hereva momokani ia gwauraia.”
11. Edena dala ai kara momokani be hereva momokani gwauraia karana sibona lasi?
11 Kara momokani ena anina be hereva momokani gwauraia karana sibona lasi. Ia be mauri dalana ta. Ia hahedinaraia ita be edena bamona taudia. Iseda hereva bona kara amo danu hereva momokani be ma haida dekenai ita gwauraia hedinarai. Aposetolo Paulo ia henanadai: “Taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, ‘Henaoa lasi,’ to umui be umui henaoa, a? Umui gwau, ‘Heudahanai lasi,’ to umui be umui heudahanai, a?” (Roma 2:21, 22) Bema ma haida dekenai hereva momokani ita gwauraia, namona be dala ibounai dekenai ita kara momokani. Bema taunimanima idia diba ita be hereva momokani gwauraia taudia, ita hadibaia gaudia do idia kamonai henia.
12, 13. Kekeni matamatana ta ese kara momokani dekenai dahaka ia torea, bona kara maoromaoro taravatudia ia badinaia ena badina be dahaka?
12 Iehova ena hesiai taudia huanai idia noho matamata taudia ese kara momokani ena namo idia lalo-pararalaia danu. Guna ena mauri lagani 13 kekenina, Jenny, be ena sikuli dekenai sivarai ta ia torea, ia gwau: “Kara momokani be lau laloa bada karana. To madi, hari inai negai taunimanima momo idia kara momokani lasi. Sibona dekenai lau gwauhamata, egu mauri lalonai do lau kara momokani. Do lau kara momokani ena be hereva momokani gwauraia karana amo lau bona egu turadia ese karaharaga namo do ai abia lasi. Egu turadia be hereva momokani idia gwauraia taudia bona kara momokani taudia.”
13 Jenny ena tisa ese ena sivarai ia herevalaia neganai, ia gwau: “Ena be oi be matamata momokani, to oi ese kara maoromaoro taravatudia oi badinaia. Lau diba emu hereva do oi badinaia badina kara namo oi goadalaia.” Dahaka dainai unai sikuli kekenina ese kara maoromaoro badinaia karana ia goadalaia? Jenny ena hamatamaia hereva dekenai ia gwau, ena tomadiho ese “ena mauri totona taravatu ia henia.” Lagani 7 gunanai, Jenny ese unai hereva ia torea. Iena tisa ia hereva bamona, Jenny be Iehova ena Witnes kekeni dainai ena mauri lalonai kara maoromaoro taravatudia ia do badinaia noho.
Iehova Ena Hesiai Taudia ese Hereva Momokani Idia Hahedinaraia
14. Dahaka dainai Dirava ena hesiai taudia be mai edia maduna badana hereva momokani idia abia isi totona?
14 Momokani, Iehova ena Witnes taudia sibona lasi to reana ma haida danu ese hereva momokani idia gwauraia bona kara momokani idia hahedinaraia toho. To, ita be Dirava ena hesiai taudia dainai, iseda maduna badana be hereva momokani ita abia isi. Baibel ena hereva momokani—ta be mauri hanaihanai dekenai do ia hakaua lao hereva momokanina unai—ita abia vadaeni. Unai dainai, iseda maduna be ma haida dekenai unai diba ita henia. Iesu ia gwau, “Gau momo ia dekenai do idia henia tauna dekena amo, be gau momo do idia tahua.” (Luka 12:48) Momokani, Dirava ena diba idia abia taudia amo ‘gau momo idia tahua.’
15. Ma haida dekenai Baibel ena hereva momokani oi hadibaia neganai, edena bamona moale oi davaria?
15 Ma haida dekenai Baibel ena hereva momokani gwauraia karana ese moale ia havaraia. Iesu ena hahediba taudia ginigunadia bamona, sivarai namona—kudouna ia hamoalea helaro sivarai unai—be “tauanina idia manokamanoka, bona idia lao idau gabu idau gabu dekenai, mamoe idia naria lasi bamona” taudia bona “lauma dikadia edia hadibaia hereva” dainai idia matakepulu bona daradara taudia dekenai ita harorolaia. (Mataio 9:36; 1 Timoteo 4:1) Aposetolo Ioane ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioane 4) Ioane ena “natudia”—reana ia dainai hereva momokani idia diba taudia—edia abidadama ese ia dekenai moale bada ia mailaia. Taunimanima ita itaia idia ese Dirava ena Hereva idia abia dae neganai, ita moale.
16, 17. (a) Dahaka dainai taunimanima ibounai ese hereva momokani idia abia dae lasi? (b) Baibel ena hereva momokani oi harorolaia neganai, dahaka moale oi mamia?
16 Momokani, taunimanima ibounai ese hereva momokani do idia abia dae lasi. Iesu ese Dirava ena hereva momokani ia gwauraia, herevana taunimanima momo ese idia ura henia lasi. Ia idia inai henia Iuda taudia dekenai ia gwau: “Edena bamona umui abidadama henia lasi lau dekenai? Dirava ena natuna tauna ese Dirava ena hereva ia kamonai. Umui be umui kamonai lasi, badina umui be Dirava ena natudia lasi.”—Ioane 8:46, 47.
17 Iesu bamona, mai gari lasi ida Iehova ena hereva momokani ita herevalaia. Ita laloa lasi taunimanima ibounai ese ita herevalaia gaudia do idia abia dae, badina momo ese Iesu ia herevalaia gaudia idia abia dae lasi. To, ita moale badina ita diba ita be kara maorona ita karaia noho. Iehova ena hebogahisi mai lalokauna dainai ia ura taunimanima dekenai hereva momokani ia hahedinaraia. Keristani taudia be hereva momokani idia diba taudia dainai, inai diari lasi tanobadana lalonai idia be diari halasia taudia ai idia lao. Iseda hereva bona kara amo hereva momokani ena diari ita hahedinaraia, unai amo ma haida ita durua diba iseda guba Tamana idia hanamoa totona. (Mataio 5:14, 16) Ita hahedinaraia goevagoeva Satani ena hereva koikoi ita dadaraia bona Dirava ena Hereva goevana ita abia isi. Ita dibaia bona harorolaia hereva momokanina idia abia dae taudia ese ura kwalimu momokanina idia abia diba.—Ioane 8:32.
Hereva Momokani Ena Dala Dekenai Oi Raka
18. Dahaka dainai bona edena dala ai Iesu ese Natanaela ia abia dae?
18 Iesu ese hereva momokani ia ura henia bona ia herevalaia. Tanobada ai ena hesiai gaukara ia karaia neganai, hereva momokani idia gwauraia taudia ia hanamodia. Iesu ese Natanaela be inai bamona ia herevalaia: “Israela tauna korikori be inai, ia be koikoi diba lasi momokani tauna!” (Ioane 1:47) Gabeai, Natanaela, idia gwauraia Batolomeo danu, be Iesu ena aposetolo 12 ta ai ia lao. (Mataio 10:2-4) Unai be hahenamo badana ta!
19-21. Matakepulu tauna ta be mai ena gari lasi ida hereva momokani ia gwauraia dainai, dahaka hahenamo ia abia?
19 Baibel bukana Ioane ena karoa ta lalonai, Iesu ese ia hanamoa kara momokani tauna ta ena sivarai ia noho. Iena ladana ita diba lasi. Ita diba gauna be unai tauna be noinoi tauna bona ia vara neganai ena matana be kepulu. Iesu ese ena matana ia hanamoa lou neganai taunimanima idia hoa. Unai hoa karana be Farisea taudia haida, hereva momokani idia inai henia taudia unai, ese idia kamonaia, idia sibona huanai idia lalo-tamona vadaeni Iesu idia abidadama henia taudia ibounai be dubu amo do idia luludia. Matakepulu tauna ena tama sina idia gari dainai Farisea taudia dekenai idia koikoi idia gwau, idia diba lasi edena bamona edia natuna be ia itaia lou diba eiava daika ese ia hanamoa.—Ioane 9:1-23.
20 Farisea taudia be Iesu ese ia hanamoa tauna idia boiria lou. Herevana ia dekenai dahaka do ia vara be ia laloa lasi, to mai gari lasi ida hereva momokani ia gwauraia. Idia dekenai Iesu ese ena matana ia hanamoa dalana ia gwauraia hedinarai bona ia hamaorodia danu Iesu ese unai ia karaia. Unai tauna ia hoa badina unai lada bada bona sikuli bada taudia idia abia dae lasi Iesu be Dirava amo, unai dainai mai gari lasi ida idia ia hamaoroa Iesu do idia abia dae, ia gwau: “Inai tau be Dirava dekena amo bema ia mai lasi, be ia ese gau ta do ia karaia diba lasi.” Farisea taudia be dala lasi unai tauna ena hereva idia hakoikoia totona, unai dainai idia ese ia idia gwauraia hemataurai lasi tauna bena dubu amo idia lulua.—Ioane 9:24-34.
21 Iesu be unai ia kamonai neganai, mai ena lalokau ida nega ia atoa unai tau ia tahua totona. Unai matakepulu tauna ia davaria murinai, iena abidadama ia hagoadaia. Iesu be unai tauna dekenai ia hahedinaraia ia be Mesia. Unai tauna ese hereva momokani ia gwauraia dainai hahenamo ia abia! Oibe, hereva momokani idia gwauraia taudia ese Dirava ena lalo-namo idia abia.—Ioane 9:35-37.
22. Dahaka dainai hereva momokani ena dala ita badinaia be namo?
22 Hereva momokani gwauraia karana ita laloa bada be namo. Unai kara be mai anina bada taunimanima bona Dirava ida hetura karana namona ita haginia totona. Ta ese hereva momokani ia gwauraia ena anina be ia gwauraia hedinarai, ia momokani, ma haida ia hereva henia diba, bona haida ese ena hereva idia abidadama henia, bona unai kara dainai Iehova ena lalo-namo ia abia. (Salamo 15:1, 2) Hereva koikoi gwauraia tauna ia koikoi, haida ese ena hereva do idia abidadama henia lasi, bona Iehova ena lalo-namo ia abia lasi. (Aonega Herevadia 6:16-19) Unai dainai, iseda lalona ita hadaia hereva momokani ena dala ita badinaia totona. Momokani, hereva momokani Diravana ita tohotohoa totona, namona be hereva momokani ita diba, hereva momokani ita gwauraia, bona iseda mauri lalonai hereva momokani ita badinaia.
Edena Bamona Do Oi Haere?
• Dahaka dainai hereva momokani ita diba dainai ita moale?
• Hereva momokani gwauraia karana dekenai, edena bamona Iehova ita tohotohoa?
• Baibel ena hereva momokani be ma haida dekenai ita herevalaia karana amo dahaka namo ita abia?
• Dahaka dainai hereva momokani ena dala ita badinaia be namo?
[Pictures on page 27]
Keristani taudia be Baibel ena hereva momokani idia abia vadaeni dainai, mai edia ura bada ida ma haida dekenai idia herevalaia
[Pictures on page 28]
Iesu ese ia hanamoa matakepulu tauna ese hereva momokani ia gwauraia dainai, hahenamo bada ia abia