Idia Dagedage Ena Badina

BEIBI ta, pura 27 sibona murinai ia vara beibina ta, be Denver, Colorado, U.S.A. dekenai ia vara. Unai mero maragina ia mase lasi, bona hua toi hospital dekenai ia noho murinai, ena tama sina dekenai idia henia. Pura toi murinai, unai mero be hospital dekenai ia noho lou. Dahaka dainai? Ena tamana ese mai dagedage ida ia udeudea dainai ena harana ia dika bada herea. Tamana ese beibi ena taitai ia haheaukalaia diba lasi. Unai nega amo unai mero maragina be matakepulu bona ena tauanina ia dika. Hari doketa taudia edia diba bada ese beibi ia vara haraga dainai ia davaria hekwakwanai amo ia idia hamauria diba to ena tamana ena dagedage amo idia naria diba lasi.

Natudia momo herea idia hadikaia, idia botaia, eiava idia hamasea, tanobada ena dagedage gabuna badana​—noho rumana​—dekenai! Haida idia gwau United States sibona dekenai, lagani ta ta ai tama sina ese natudia 5,000 idia hamasea! Bona natudia sibona be dika idia davaria lasi. World Health magasin ia gwau, United States dekenai “tatau ese edia adavana idia hadikaia karana be natudia idia havaraia diba hahinedia edia bero edia badina badana.” Tano ma haida be edena bamona? “[Ogogami tanodia dekenai] henanadai idia henia hahinedia amo 30 ia lao 50 pesen bamona idia gwau, edia adavana ese idia botadia.” Oibe, dagedage ese dika ia havaraia, bona nega momo noho rumadia dekenai ia vara.

Tatau momo bona edia adavadia be mai edia dagedage ida edia hekwakwanai idia hanaia toho. Tano haida ai, tama sina bona tisa taudia ese mai dagedage ida natudia dekenai edia badu idia hahedinaraia. Moale idia abia totona, haida ese manoka taudia idia hadikaia mai edia dagedage ida. Dahaka dainai taunimanima idia dagedage?

Taunimanima Idia Dagedage Ena Badina

Haida idia gwau idia vara negana amo taunimanima be dagedage taudia. Ena be United States dekenai dagedage raskol karadia edia namba ia diho, to matamata taudia huanai unai kara ia bada daekau. Bona hari taunimanima ese dagedage idia ura henia bada. Televisen steiseni badadia toi ese raskol karadia edia sivarai be nega rua amo idia habadaia bona ala-ala karadia edia sivarai be nega toi amo idia habadaia. Oibe, raskol karadia amo moni idia abia! Taunimanima edia harana gorere ia hanamoa doketa Karl Menninger ia gwau, “Ita ese dagedage ita haheaukalaia sibona lasi, to iseda niuspepa edia rau ginigunadia dekenai ita hahedinaraia. Iseda televisen program ena kahana 30 eiava 25 pesen bamona lalonai dagedage idia gaukaralaia iseda natudia hamoalea totona. Haheaukalaia! Egu lalokau turadia e, dagedage ita ura henia.”

Vanegai sibona saiens taudia idia tahua gaudia idia hahedinaraia harana ena kemikol bona ta ena mauri dalana be mai ena anina taunimanima edia dagedage karadia dekenai. University of Illinois Institute for Juvenile Research tauna ta, Dr. Markus J. Kruesi, ia gwau: “Ai laloa matamaia, hari natudia momo ese idia itaia bona idia mamia mauri dikadia ese dagedage bada herea ia havaraia.” Ma ia gwau: “Mauri dekenai idia vara gaudia ese harana dekenai gau haida idia haidaua bona taunimanima idia laloa namonamo lasi, to kara idia karaia haraga.” Buka ta, Inside the Brain, ia gwau inai bamona gaudia, hegeregere “ruma bese idia parara, tamana sibona eiava sinana sibona ese natudia ia naria, ia noho daudau ogogami, bona drag ania loulou karana ese taunimanima edia harana ena kemikol ia haidaua bena idia dagedage​—unai ia vara ena be guna ita laloa unai ia vara diba lasi.”

Idia gwau harana lalonai idia vara gaudia ta be badu ia koua diba kemikol, serotonin, ena bada ia diho. Idia tahua gaudia amo idia diba kekero muramura ese serotonin ena bada harana dekenai ia hadihoa diba, unai amo guna idia diba gauna, kekero muramura inua momo karana ena anina dagedage dekenai, be saiens dalanai idia hamomokania.

Hari inai negai dagedage ia bada ia lao ena badina ma ta ia noho danu. Momo idia abidadama henia peroveta bukana, Baibel, ia gwau: “Laloaboio lasi, nega dokona dekenai, metau dikadia do idia vara. Taunimanima ese sibona edia ura do idia tahua, idia mataganigani, idia hekokoroku bona heagi; . . . do idia kara namo lasi, idia hebogahisi lasi, haida edia ladana idia hadikaia, idia dagedage, bona idia badu; namo do idia ura henia lasi; edia turana idia samania, idia laloa namonamo lasi, bona idia hekokoroku bada . . . Unai bamona taudia amo oi siri.” (2 Timoteo 3:​1-5, Today’s English Version) Oibe, hari ita itaia dagedage karadia ese Baibel lalonai “nega dokona” ena peroveta herevana ia hagugurua.

Gau ma ta dainai hari inai nega be dagedage negana momokani. Baibel ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:12) Iesu ese guba amo Diabolo bona ena demoni anerudia ia negea diho bona hari edia badu badana be taunimanima dekenai idia hahedinaraia. Diabolo be “lauma dikadia edia biaguna” bona “Dirava idia kamonai henia lasi taudia edia lalona dekenai harihari ia gaukara noho,” unai amo ia ese dagedage amo inai tanobada ia hahonua.​—Efeso 2:2.

Edena bamona ita ese hari inai negai tanobada ena dagedage ita haheaukalaia diba? Bona edena bamona dagedage lasi dalanai hekwakwanai ita hamaoromaoroa diba?

[Blurb on page 3]

Natudia momo herea idia hadikaia, idia botaia, eiava idia hamasea, tanobada ena dagedage gabuna badana​—noho rumana​—dekenai!