Iehova Ena Ura Idia Karaia

Gwauatao Karana ta ese Hahemauri Dalana Ia Kehoa

AIGUPITO ena praiminista vairanai idia gini Iakobo ena natudia memero 10 be kara dikana ta idia hunia. Lagani haida idia hanaia vadaeni, idia ese edia tadina lahaina be hesiai tauna bamona idia hoihoilaia, bona palani idia karaia edia tamana do idia hamaoroa Iosepa be dagedage animal ta ese ia alaia mase.​—⁠Genese 37:​18-35.

Hari, lagani 20 murinai, doe badana dainai unai tatau 10 be Aigupito dekenai idia mai uiti idia hoia totona. To hekwakwanai haida idia vara. Hari praiminista, ia be aniani ia biagua tauna danu, ia gwau idia be spai taudia. Idia ta be dibura dekenai ia koua bona ia oda henidia edia hanua dekenai do idia giroa lao bona edia tadina maragina, Beniamina, do idia abia mai. Unai idia karaia neganai, praiminista ese dala ia karaia Beniamina be dibura dekenai ia koua totona.​—⁠Genese 42:​1–44:12.

Iakobo ena natuna ta, Iuda, be unai kara ia ura lasi. Ia gwau: ‘Bema ai giroa lao, to Beniamina ai abia giroa lasi, emai tamana do ia mase.’ Bena Iuda bona ia ida idia mai taudia ese idia laloa lasi gauna ta ia vara. Praiminista be ibounai ia oda henidia daiutu do idia rakatania, bona Iakobo ena natudia sibona idia noho neganai, ia taitai badabada. Bena taitai ia hadokoa neganai, ia gwau: “Lau inai Iosepa.”​—Genese 44:⁠18–​45:​3.

Hebogahisi Ia Hahedinaraia Bona Ia Hamauridia

Iosepa ese iena tadikaka lahaidia ia nanadaia: “Lauegu tamana be do ia mauri noho, a?” Haere ta idia henia lasi. Oibe, Iosepa ena tadikaka lahaidia idia diba lasi dahaka do idia hereva. Do idia moale, eiava do idia gari? Badina lagani 20 gunanai idia ese unai tauna be hesiai tauna bamona idia hoihoilaia. Iosepa be mai ena siahu dibura dekenai do ia atodia, aniani lasi ida edia hanua dekenai idia ia siaidia lou diba, eiava​—⁠ia vara diba gauna be​—⁠idia ia hamasea diba! Unai dainai, Iosepa ena tadikaka lahaidia “idia haere henia diba lasi ia dekenai, badina idia edia kudouna dekenai idia gari dikadika.”​—Genese 45:3.

Karaharaga Iosepa ese edia lalo-hekwarahi ia kokia. Ia gwau: “Umui mai kahirakahira lau dekenai.” Ia kahirakahira idia lao. Bena ia gwau: “Lau inai, umui emui tadina Iosepa, lau umui hoia, vadaeni lau mai Aigupito dekenai. Umui emui lalona do idia hisihisi lasi, umui sibona ta ta dekenai badu henia lasi, lau umui hoia vadaeni, lau mai iniseni dainai. Badina be Dirava ese lau ia siaia guna, umui emui vairana dekenai, umui do lau hamauria totona.”​—Genese 45:​4, 5.

Iosepa be hebogahisi ia hahedinaraia kava lasi. Ia ese edia helalo-kerehai toana ia itaia vadaeni. Hegeregere, Iosepa ese iena tadikaka lahaidia be spai taudia ia gwauraia neganai, ia kamonai idia sibona huanai idia gwau: “Momokani, ita kerere vadaeni iseda tadina dainai. . . . Unai dainai hari kerere ia mai ita dekenai.” (Genese 42:21) Danu, Iuda be sibona ia henia Beniamina ena gabu do ia abia bona hesiai tauna ai do ia lao, unai amo edia tadina maragina be iena tamana dekenai do ia giroa lao.​—Genese 44:33, 34.

Unai dainai, Iosepa ese hebogahisi ia hahedinaraia be kara maorona. Oibe, ia lalo-parara iena famili ibounai do ia hamauria bema unai bamona ia karaia. Unai dainai, Iosepa ese iena tadikaka lahaidia ia hamaoroa edia tamana, Iakobo, dekenai do idia giroa lao bona do idia hamaoroa: “Oiemu natuna Iosepa ia gwau: ‘Dirava ese Aigupito ena tano ibounai ena lohia lau ia halaoa vadaeni. Vadaeni, umui mai lau dekenai, umui karaharaga. Gosena tano dekenai do umui noho, lauegu badibadinai, oi bona oiemu natuna bona oiemu tubuna bona oiemu mamoe ibounai, bona oiemu boromakau ibounai, bona oiemu gau ibounai. Bema Gosena dekenai umui noho, do lau naria diba umui.’ ”​—Genese 45:​9-​11.

Iosepa Badana

Iesu Keriso ita gwauraia diba Iosepa Badana, badina idia ruaosi edia sivarai be hegeregere. Iosepa hegeregerena, Iesu be iena tadikaka, Aberahamo ena tubudia, ese idia kara dika henia. (Mani Kara 2:​14, 29, 37 itaia.) To, hoa dalanai idia ruoasi edia mauri dalana idia haidaua. Nega ia hanaia murinai, Iosepa ena hesiai tauna ena dagi ia idau bona praiminista ai ia lao, Farao sibona ena siahu henunai ia noho. Unai hegeregerena, Iehova ese mase amo Iesu ia hatoreaisi lou bona dagi badana ‘iena imana idibana kahana dekenai’ ia henia.​—⁠Kara 2:33; Filipi 2:​9-11.

Ia be praiminista dainai, Iosepa ese Aigupito dekenai idia mai uiti idia hoia taudia ibounai dekenai aniani ia henia diba. Hari, Iosepa Badana be mai ena hesiai tauna mai ena kamonai, bona mai ena kara maoromaoro tanobada dekenai. Unai orea amo ia ese nega korikori ai aniani ia henia. (Mataio 24:​45-47; Luka 12:​42-44) Momokani, Iesu dekenai idia mai taudia “do idia hitolo lou lasi, do idia ranu mase lou lasi . . . Badina be Mamoe ena Natuna, helai gabuna badana ena huanai ia noho, ese idia do ia naria. Ia ese mauri ranuna, ia lohilohi gauna, dekenai do ia hakaudia lao.”​—⁠Apokalupo 7:​16, 17.

Ita Dibaia Gauna

Iosepa ese hebogahisi karana ena haheitalai namona ia hahedinaraia. Bema hahemaoro dalana aukana ia badinaia, ia be hesiai tauna bamona idia hoihoilaia taudia ia panisidia diba. Dala idauna ai, hebogahisi kava mamina ese ia doria diba edia kara dika ia laloaboio sibona totona. Iosepa be unai ia karaia lasi. To, ia ese iena tadikaka lahaidia edia helalo-kerehai karana ia tohoa. Bena, ia itaia edia helalo-kerehai karana be momokani neganai, ia gwaudiatao.

Iosepa ita tohotohoa diba. Bema ita ia kara dika henia tauna ta ese helalo-kerehai momokani ena toana ia hahedinaraia, ita gwauatao be namo. Momokani, ita ura lasi hebogahisi mamina ese ita ia koia bona kara dika badana ita gwauatao kava. To danu, namo lasi ita badu dainai helalo-kerehai momokani karadia ita itaia lasi. Unai dainai namona be ‘ita haheauka heheni bona iseda dika ita gwauatao heheni noho mai eda ura ida.’ (Kolose 3:​13, NW) Unai ita karaia neganai, ita be iseda Dirava, Iehova, ita tohotohoa, ia gini hegaegae noho ‘iseda kara dika ia gwauatao’ totona.​—Salamo 86:5; Mika 7:​18, 19.