Sila—Ma Haida Ia Hagoadaia Tauna

KERISTANI taudia edia sivarai ia matamaia negana amo, loaloa naria taudia mai edia abidadama edia gaukara be mai anina bada, Dirava ena orea taudia edia kongregesen idia hagoadaia bona tanobada ena kahana daudaudia dekenai sivarai namona idia harorolaia. Idia abia hidi naria taudia ginigunadia ta be Sila, peroveta tauna ta bona Ierusalema ena kongregesen gunalaia tauna badana ta. Ia ese haroro gaukara habadaia dalana ia durua bona ia be Europe dekenai idia haroro misinari taudia ginigunadia ta. Sila ese unai ia karaia namonamo diba ena badina be dahaka? Bona iena kara dekenai dahaka ita tohotohoa be namo?

Kopina Utua Karana Ena Hepapahuahu

Lagani 49 C.E. ai, kongregesen ia hadikaia diba hepapahuahu, kopina utua karana ena hepapahuahu, ia vara neganai, Ierusalema dekenai ia noho hakaua oreana ia laloa namona be Keristani taudia dekenai ia hedinarai goevagoeva hakaua herevana do ia siaia, unai hepapahuahu idia hamaoromaoroa totona. Unai gaudia idia vara neganai, Sila ena ladana be Baibel lalonai ia hedinarai. Reana ia be unai hepapahuahu idia lalohadailaia taudia ta, bena ia idia abia hidi “aposetolo bona kwarana taudia” edia lalohadai be “Antioka, bona Suria bona Kilikia” tadikakadia dekenai ia abia lao totona. Antioka dekenai, Sila bona Iuda (Barasaba) be Banaba bona Paulo ida idia mailaia hadibaia herevana idia gwauraia. Toana be idia ese Ierusalema ena hebou dekenai idia vara gaudia, idia abia dae lalohadaina, bona revareva ena anina idia gwauraia hedinarai. Danu, “idia ese edia hereva goada dekena amo varavara idia hagoadaia.” Bena Antioka Keristani taudia idia “moale bada.”​—Kara 15:1-32.

Unai dala ai, Sila ese gaukara badana ia karaia unai mai anina bada hepapahuahuna idia hamaoromaoroa karana lalonai. To ena gaukara be auka. Idia diba lasi bema Antioka kongregesen taudia ese unai hadibaia herevana do idia abia dae eiava lasi. Unai dainai, Baibel herevalaia tauna ta ia gwau, “aposetolo taudia ese edia revareva dekenai idia torea gaudia edia anina idia hahedinaraia namonamo totona, aonega tauna mai ena hereva dalana namona idia abia hidi be gau badana.” Unai gaukara aukana totona Sila idia abia hidi dainai, ena kara haida ita dibaia diba. Idia diba momokani ia ese hakaua oreana taudia edia lalohadai do ia hahedinaraia namonamo. Danu, ia be naria tauna mai ena aonega bona kongregesen ia hadikaia gwauraia hepapahuahuna ia vara neganai, ia koua diba.

Paulo ida Ia Laolao

Unai gaukara murinai, Sila be Ierusalema dekenai ia giroa lao eiava lasi ita diba lasi. To, Banaba bona Paulo be Ioane Mareko dainai idia heai murinai, Paulo ese Antioka dekenai ia noho tauna Sila ia abia hidi, ena misinari laolao ginigunana lalonai ia vadivadi gabudia idia vadivadi lou totona.​—Kara 15:​36-​41.

Reana Sila ia abia hidi, badina be Idau Bese taudia haroro henia karana ia ura henia. Danu, ia be peroveta tauna ta bona hakaua oreana ia siaia tauna ta dainai, iena hereva be mai ena siahu hakaua oreana ena lalohadai be Suria bona Kilikia dekenai idia noho abidadama taudia dekenai idia hahedinaraia neganai. Unai ese anina namona ia havaraia. Kara bukana ia gwau: “Hanua ibounai idia raka hanaia neganai, aposetolo bona kwarana taudia Ierusalema dekenai edia leta ena sisiba idia henia, Keristani taudia dekenai. Idia hamaoroa, do idia kamonai henia noho. Vadaeni, ekalesia taudia edia abidadama ena goada ia bada daekau, bona dina ibounai edia hutuma be ia bada daekau lao.”​—Kara 16:4, 5.

Unai misinari taudia idia laolao lalonai, nega rua lauma helaga ese idia abia hidi dalana amo idia ia hakaua oho. (Kara 16:​6, 7) “Peroveta” herevadia, ita diba lasi herevadia unai, ese Timoteo idia herevalaia murinai, Timoteo ese Lusitera dekenai idia ia bamoa matamaia. (1 Timoteo 1:​18; 4:​14) Paulo, ia danu be mai ena peroveta siahuna, ese matahanai ia abia dainai unai laolao hebou taudia be bouti amo Makedonia, Europe dekenai, idia lao.​—Kara 16:​9, 10.

Idia Dadabadia Bona Dibura Dekenai Idia Atodia

Filipi, “Makedonia ena hanua bada herea,” dekenai Sila be do ia laloaboio diba lasi gauna ia davaria. Paulo ese hesiai kekenina ta amo meamea laumana ia lulua murinai, kekeni ena biaguna taudia idia itaia edia moni abia dalana ia ore bona Sila bona Paulo be hanua ena lohia taudia vairanai idia abia lao. Vadaeni, idia ruaosi idia hahemaraia, taunimanima vairanai idia gwauraia dika, edia dabua idia kokia, bona hoihoi gabuna dekenai idia dadabadia.​—Kara 16:12, 16-​22.

Unai bamona dadabaia karana be dika herea, ta ena goada ia tohoa momokani, bona Paulo bona Sila idia dadabaia be taravatu utua karana danu. Dahaka dainai? Roma ena taravatu ia gwau Roma taudia idia dadabaia diba lasi. Paulo be Roma tauna, bona toana be Sila danu be Roma tauna. “Idia kwadia dikadika” murinai, Paulo bona Sila be dibura dekenai idia negea bona aena koua audia dekenai idia atoa. Gustav Stählin ia gwau, “unai be gau dikana . . . ia ese dibura tauna ena aena ia hapararaia daudau dainai, ia mahuta diba lasi.” Hanuaboi momokani lalonai, ena be hisihisi berodia momo herea be edia doruna dekenai idia noho, to “Paulo bona Sila idia guriguri noho bona ane dekenai Dirava idia hanamoa.”​—Kara 16:23-25.

Unai ese Sila ena kara ma haida ia hahedinaraia. Ia moale, badina Keriso ena ladana dainai hisihisi idia abia. (Mataio 5:​11, 12; 24:9) Unai kara tamona dainai, guna Antioka dekenai idia gaukara neganai, Sila bona ena bamodia ese kongregesen idia hagoadaia diba, bena edia Keristani tadikaka idia moale bada. Reana Paulo bona Sila edia moale ia bada ia lao, badina hoa dalana ai ia vara tano mareremarere dainai dibura idia rakatania diba, bona sibona ia hamasea gwauraia gima tauna bona ena ruma bese idia durua diba Dirava idia abidadama henia totona.​—Kara 16:​26-​34.

Ena be taunimanima ese idia dadabadia bona dibura dekenai idia atodia, to Paulo bona Sila idia gari lasi. Kota biagudia be hereva idia siaia, idia gwau Paulo bona Sila be dibura idia rakatania diba, to idia be mai hemarai ida hunia dalanai Filipi idia rakatania lasi, herevana kota biagudia idia laloa unai bamona do idia karaia. Idia gini goada bona hari unai hekokoroku gavamani taudia idia hahemaraia. Paulo ia gwau: “Kerere ta idia davaria lasi ai dekenai, to idia ese ai idia dadabaia kava taunimanima edia vairanai, bona ai be Roma ena basileia taudia. Dibura ruma lalonai ai idia negea, bona harihari idia ura ai ruaosi hunia bamona idia negea. Lasi momokani. Idia sibona idia mai namo, ai idia hakaua murimuri dekenai.” Kota biaguna taudia be do idia vara dika gaudia dainai idia gari, bona idia itaia unai ruaosi ese hanua idia rakatania totona idia noidia be namo.​—Kara 16:35-39.

Unai dalana amo, Paulo bona Sila ese siahu taudia idia hadibaia dahaka maoro idia abia idia be Roma taudia dainai, bona unai murinai idia ese kota biaguna taudia edia hereva idia badinaia​—to edia turadia dekenai bamahuta herevana idia gwauraia guna. Edia haroro laolaona ibounai lalonai idia karaia hegeregerena, Sila bona ena turana be tadikaka idia “hagoadaia” bena idia rakatania.​—Kara 16:40.

Makedonia amo Babulonia Dekenai

Ena be idia dekenai ia vara gauna be dika momokani, to idia manoka lasi. Paulo, Sila, bona edia bamodia be misinari gabudia matamatadia dekenai idia lao. Tesalonika dekenai hekwakwanai idia davaria lou. Paulo be Sabati dinadia toi ai ia haroro bona taunimanima ese ena hereva idia abia dae dainai, idia mama dagedage taudia ese taunimanima dikadia idia haboua, bona unai dainai misinari taudia ese hanuaboi lalonai unai hanua idia rakatania bona Berea dekenai idia lao. Paulo bona ena bamodia ese unai hanua dekenai idia karaia gaudia be dagedage taudia ese idia kamonai neganai, Tesalonika amo idia mai. Unai dainai, Paulo be Berea ia rakatania, to Sila bona Timoteo idia noho, kamonai matamata taudia edia grup maragina idia naria totona. (Kara 17:​1-​15) Sila bona Timoteo be Korinto dekenai Paulo idia davaria lou, bona idia ese sivarai namona bona reana harihari gauna danu idia mailaia Makedonia ena abidadama tadikakadia amo. Unai heduru ia abia dainai, ia ogogami aposetolo tauna ese nega kwadogi lalonai ia karaia moni gaukarana ia hadokoa diba, bona mai goada ida ful-taim haroro gaukarana ia karaia lou. (Kara 18:​1-5; 2 Korinto 11:9) Korinto dekenai, Sila bona Timoteo idia gwauraia haroro taudia bona Paulo ena bamodia. Unai ese ia hahedinaraia goevagoeva unai hanua dekenai danu idia gaukara goadagoada.​—2 Korinto 1:​19.

Tesalonika taudia dekenai idia torea revarevadia lalonai​—idia ruaosi be unai negana lalonai Korinto dekenai idia torea​—be inai hereva “ai” idia gaukaralaia dainai, momo idia abia dae Sila bona Timoteo ese Paulo idia durua. To, inai lalohadai, Sila ese toretore gaukarana ia karaia, ena badina badana be Petero ena hereva ta ena revareva lalonai. Petero ia gwau ena revareva ginigunana be ‘Sila ena imana dekena amo idia dekenai ia torea. Sila be iseda Keristani varavara tauna korikori.’ (1 Petero 5:​12, 13) Reana unai ena anina be Sila ese unai revareva ia mailaia. To Petero ena revareva rua edia torea dalana be idauidau dainai, reana Sila ia gaukaralaia ena revareva ginigunana ia torea totona, to iharuana torea totona ia gaukaralaia lasi. Unai dainai, Sila ia diba gaudia bona ena tiokratik gaukarana ma ta be seketere gaukarana.

Ena Haheitalai Ita Tohotohoa be Namo

Bema Sila ia karaia gaudia ita laloa, ita itaia ia be gaukara momo ia karaia. Hari inai negai misinari taudia bona sekit bona distrik naria taudia dekenai ia be haheitalai namona. Sibona ena ura ia tahua lasi, to gabu daudaudia dekenai ia lao bona ia sibona ese davana ia henia, kohu eiava ladana bada ia abia totona lasi, to ma haida ia durua totona. Ia ura ena aonega hereva namodia amo, ia hegaegae namonamo bona dala namona ai ia gwauraia herevadia amo, bona ena haroro goadagoada karana amo, idia do ia hagoadaia. Herevana Iehova ena orea lalonai oiemu gaukara be dahaka, bema oi hekwarahi lalohadai namona oi dogoatao noho totona​—hekwakwanai oi davaria neganai danu​—oi danu ese oiemu abidadama tamona taudia oi hagoadaia diba.

[Map on page 29]

(For fully formatted text, see publication)

Paulo Ena Misinari Laolaona Iharuana

Davara Badana

Antioka

Derebe

Lusitera

Ikonio

Troa

Filipi

Amepipoli

Tesalonika

Berea

Atena

Korinto

Efeso

Ierusalema

Kaisarea

[Credit Line]

Mountain High Maps® Copyright © 1997 Digital Wisdom, Inc.