Dibura Ruma Naria Tauna be Dirava Ia Dibaia

Filipi ai, igui hesiai kekeni ta be demoni ese ia biagua. Bona demoni ese ia gaukaralaia vaira nega ia gwauraia totona, bona kekeni ena biaguna ese unai dala ai moni momo ia abia. Paulo bona Sila be Filipi dekenai idia mai neganai, unai kekeni be dina momo lalonai idia ia badinaia. Unai kekeni ia boiboi: “Inai tatau be Ataiai Momokani Dirava ena hesiai taudia.” Bena, Paulo ese demoni ia hamaoroa: ‘Iesu Keriso ena ladanai oi lau oda henia, inai kekeni amo oi raka-lasi!’ Demoni ese kekeni ia rakatania.

Kekeni ena biagudia idia itaia edia moni abia dalana ia ore neganai, idia badu dikadika. Paulo bona Sila be majistret dekenai idia abia lao, idia gwau: ‘Inai tatau be taravatu idia utua bona siti taudia ibounai idia habadua noho!’ Majistret taudia ese oda idia henia Paulo bona Sila idia dadabaia bona dibura ruma ai do idia atoa. Dibura ruma naria tauna ese dibura ruma ena lalona momokani daiutuna lalonai ia atodia bona edia aena be au metaudia rua huanai ia lokaia.

Dibura taudia ma haida idia kamonai Paulo bona Sila be Iehova hanamoa anedia idia abia noho. Bena hanuaboi momokani ai, tano marere badana ia vara. Bona maoromaoro iduara idia kehoa bona dibura taudia edia seini bona au metaudia idia makohi. Gadi tauna ia heau vareai haraga bona ia itaia iduara be idia kehoa. Ia laloa dibura taudia ibounai idia heau boio vadaeni, unai dainai ena tuari kaia ia abia bona sibona ia ura alaia.

Unai nega ai, Paulo ia boiboi: ‘Oi sibona oi alaia lasi, ai ibounai ai noho!’ Ia heau vareai, bona Paulo bona Sila vairanai ia tui diho. Idia ia nanadaia: “Dahaka lau karaia be namo hahemauri lau abia totona?” Idia gwau: ‘Oi bona emu ruma bese be Iesu umui abidadama henia be namo.’ Bena Paulo bona Sila ese Iehova ena hereva idia hadibaia, bona dibura naria tauna bona famili ibounai idia bapatiso.