Iehova Ena Ura Idia Karaia

Tau Hereadaena ese Manau Karana Ia Karaia

IESU ia diba ena hora ginigabedia ena aposetolo taudia ida be mai anina bada. Nega sisina murinai, ia do idia dogoatao, bona ena abidadama do idia tohoa guna bamona lasi. Iesu ia diba hahenamo badadia do ia abia danu. Nega daudau lasi murinai Dirava ese ena idibana kahana dekenai do ia abia isi bona “ladana ta [do] ia henia, inai ladana ese ladana ibounai ia hereaia.”​—Filipi 2:9, 10.

Kahirakahira do ia mase dainai ia lalohisihisi bona Dirava ena gwauhamata ia ura dikadika ia abia. To unai gaudia ese ena lalona idia veria lasi, ena aposetolo taudia edia namo ia tahua lasi totona. “Ia lalokau henidia, ia lao bona dokona” be Ioane ese gabeai ena Evanelia lalonai ia torea. (Ioane 13:1) Bona Iesu be taunimanima goevadaena bamona ia do noho neganai, iena hora ginigabedia mai anina bada lalodiai, ia ese ena aposetolo taudia dekenai anina bada gauna ta ia hadibaia.

Manau Karana Ia Hadibaia

Aposetolo taudia be Iesu ida Ierusalema dekenai atai daiutuna ta ai idia noho, Pasova idia hahelagaia totona. Daika be bada idia hepapahuahulaia vadaeni bona Iesu be edia hereva ia kamonai. (Mataio 18:1; Mareko 9:33, 34) Iesu be idia ida unai gauna ia herevalaia vadaeni bona edia lalohadai ia hamaoromaoroa toho. (Luka 9:​46) To hari, Iesu ese dala idauna ai ena hereva edia anina ia hahedinaraia namonamo. Ia ese idia dekenai manau karana ia herevalaia sibona lasi, to kara ta amo ia haheitalaia danu.

Ioane ia gwau Iesu “ese aniani gabuna dekena amo ia toreisi, iena dabua badana ia kokia, taoele ta ia abia, ia kwatua, disi ta dekenai ranu ia bubua, vadaeni iena diba tahua taudia edia aena ia huria hamatamaia, bona taoele ia kwatua gauna dekena amo, edia aena ia dahua kaukau.”​—Ioane 13:4, 5.

Idaunegai Middle East ena siahu gabuna lalonai, nega momo dala dekenai kahu ia bada bona idia raka neganai silipasi idia atoa. Taga lasi tauna ena ruma idia vareai neganai, ruma biaguna ese ia hedavari henidia bona disi ta bona ranu ia henia edia aena idia huria totona. Taga bada rumadia dekenai, hesiai tauna ese aena huria gaukarana ia karaia.​—Gunalaia Taudia 19:21; 1 Samuela 25:40-​42.

Unai atai daiutuna dekenai, Iesu bona ena aposetolo taudia be ta ena vadivadi taudia lasi. Ruma biaguna ta ia noho lasi disi ia henidia totona, bona hesiai tauna ta ia noho lasi aena ia huria totona. Iesu be edia aena ia huria matamaia neganai, aposetolo taudia idia hemarai. Hari, idia bogaraginai ia hereadae Tauna ese anina maragi gaukarana ia karaia!

Petero ia ura lasi Iesu ese ena aena ia huria. To Iesu be Petero ia hamaoroa, ia gwau: “Bema oi lau huria lasi, oi be lau danu oi noho diba lasi.” Iesu ese aposetolo taudia ibounai edia aena ia huria ore murinai, ia gwau: “Umui dekenai lau karaia gauna ena anina be umui diba, a? Umui gwauraia lau be hadibaia tauna bona Lohiabada. Unai be umui hereva maoro, badina tauna be lau inai. Unai dainai, lau inai umui emui Lohiabada bona hadibaia tauna, to emui aena lau huria, umui danu ta ta emui aena do umui huria be namo. Badina be dala lau hedinaraia vadaeni umui dekenai, vadaeni umui ese danu lau karaia bamona do umui karaia.”​—Ioane 13:6-15.

Iesu ese aena huria kastom karana ta ia hamatamaia lasi. To, ia ese ena aposetolo taudia ia durua lalohadai matamatana idia abia dae totona​—namona be idia manau bona edia tadikaka totona anina maragi gaukarana karaia urana idia abia. Toana be, unai lalohadai idia abia dae. Lagani momo idia hanaia bona kopina utua karana ena hepapahuahu lalonai idia vara gaudia mani ita laloa. Ena be idia “hereva momo,” to idia noho taudia idia heai lasi bona mai edia hemataurai ida ma haida edia lalohadai idia kamonai. Danu, toana be unai hebou ia gunalaia tauna be hahediba tauna Iamesi​—aposetolo taudia ta lasi, ena be ita laloa diba idia noho dainai idia ta ese do ia gunalaia. Unai sivarai Kara bukana lalonai ese ia hahedinaraia aposetolo taudia ese manau karana idia dibaia namonamo.​—Kara 15:​6-​29.

Ita Dibaia Gaudia

Ena hahediba taudia edia aena ia huria karana amo, Iesu ese manau karana ia hadibaia namonamo. Momokani, namo lasi Keristani taudia idia laloa idia bada dainai nega ibounai taunimanima ese edia hesiai gaukara do idia karaia be namo, danu namo lasi idia ese ladana bada bona dagi bada idia tahua. To, namona be idia ese Iesu ia hahedinaraia dalana idia badinaia, “ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.” (Mataio 20:28) Oibe, namona be Iesu murinai idia raka taudia be taunimanima totona anina maragi gaukarana idia ura idia karaia.

Badina namona dainai Petero ia gwau: “Umui ibounai do umui laloa manau [“umui kwatua,” NW], vadaeni umui ta ta dekenai durua do umui henia. Badina be Buka Helaga ia gwau: ‘Dirava ese hekokoroku taudia edia dala ia koua, to manau taudia dekenai iena hariharibada ia henia.’ ” (1 Petero 5:5) Unai siri ai idia gaukaralaia Greek herevana ia gwau namona be lalo-manau ita kwatua, bona unai hereva be hereva ma ta amo ia mai, ena anina be “hesiai tauna ena apron.” Unai be dabua ta bamona, bona ia henunai ma dabua badana idia kwatua. Petero ese Iesu ena kara, taoele amo sibona ia kwatua bona ena aposetolo taudia edia aena ia huria karana, ia laloa, a? Unai ita hamomokania diba lasi. To, Iesu ena manau karana ese Petero ena kudouna ia hamarerea bada, bona Keriso murinai idia ura idia raka taudia ibounai edia kudouna ia hamarerea bada be namo.​—Kolose 3:​12-​14.