Keristani Kongregesen Heduru Bona Goada Abia Gabuna

POPI, ena mauri lagani be 20 bamona hahine ta, be ia moale lasi. Ruma bese lalonai lalohisihisi ia havaraia hekwakwanai ta ia vara badina ena tama sina danu ia herevahereva namonamo lasi.a Keristani elda tauna ta bona ena adavana dekenai iena lalohisihisi ia gwauraia hedinarai murinai, ia tore henidia ia gwau: “Nega umui atoa lau umui hereva henia dainai, umui lau tanikiu henia bada. Umui ese lau umui laloa bada karana lau laloa bada. Iehova lau tanikiu henia badina ia ese lau tabekau henia bona lau hereva henia diba taudia ia henia lau dekenai.”

Toula be vabu ta, ena tau be vanegai sibona ia mase bona ia be mai ena natuna rua. Ena lalona ia hisihisi bada bona moni dalanai hekwakwanai momo ia davaria, bona toana be unai hekwakwanai ia hanaia diba lasi. Kongregesen amo headava tau ta bona ena adavana be hanaihanai ia bona ena natudia idia vadivadi henia bona idia hagoadaia. Iena hekwakwanai ia hanaia murinai, idia dekenai kadi ta ia siaia, bona ia gwau: “Nega ibounai umui lau laloa boio lasi egu guriguri lalonai. Lau umui durua bona lau umui hagoadaia negadia ibounai lau laloatao.”

Nega haida oi mamia inai tanobada ena hekwarahi idauidau ese oi idia hametaua bada, a? (Mataio 11:28) ‘Nega dika oi davaria’ dainai oiemu mauri be lalohisihisi amo ia honu, a? (Hadibaia Tauna 9:11) Ma haida dekenai unai ia vara danu. To idia lalohisihisi taudia tausen momo ese idia davaria vadaeni hegeregerena, oi danu be mai anina bada heduru oi davaria diba Iehova ena Witness taudia edia Keristani kongregesen amo. Aposetolo taudia edia nega lalonai, aposetolo Paulo ia davaria Keristani tadikaka haida be ia “idia durua bada herea.” (Kolose 4:​10, 11) Oi dekenai unai bamona ia vara diba.

Hahegoada Bona Heduru

Keristani Greek Revarevadia lalonai, unai hereva “kongregesen” be Greek gado herevana ek·kle·siʹa amo idia hahanaia, ena anina be taunimanima edia orea ta be nega tamona idia hebou. Unai hereva ena anina ese lalo-tamona bona heduru heheni karadia ia hahedinaraia danu.

Keristani kongregesen ese Dirava ena Hereva lalonai idia noho hereva momokanidia ia badinaia bona Dirava ena Basileia ena sivarai namona ia harorolaia. (1 Timoteo 3:15; 1 Petero 2:⁠9) To, kongregesen ese ia lalonai idia noho taudia be lauma dalanai ia hagoadaia bona ia durua danu. Ta ese ia davaria ia lalonai, lalokau idia hahedinaraia, taunimanima idia laloa bada, bona heduru idia henia taudia idia noho. Idia ura dikadika hekwakwanai idia davaria taudia idia durua bona hagoadaia.​—⁠2 Korinto 7:​5-7.

Iehova idia tomadiho henia taudia be hanaihanai iena kongregesen lalonai noho namo idia davaria. Salamo torea tauna ia hahedinaraia Dirava ena hebou taudia huanai ia noho neganai ia be moale bona noho namo mamina ia abia. (Salamo 27:​4, 5; 55:14; 122:⁠1) Unai hegeregerena, hari Keristani kongregesen be ta ta idia durua bona hagoadaia heheni tadikaka bona taihu oreana.​—⁠Aonega Herevadia 13:20; Roma 1:​11, 12.

Kongregesen taudia idia hadibaia ‘taunimanima ibounai dekenai kara namodia do idia karaia, to Keriso ena abidadama henia taudia do idia durua bada herea be namo.’ (Galatia 6:10) Baibel amo idia abia hahediba ese idia ia doria edia tadikaka idia lalokau henidia bona ta ta idia ura henia mai hebogahisi danu. (Roma 12:10; 1 Petero 3:⁠8) Keristani tadikaka bona taihu kongregesen lalonai be edia kudouna amo hebogahisi, maino, bona lalokau karadia idia hahedinaraia. (Efeso 4:⁠3) Idia be tomadiho ena toana sibona idia hahedinaraia lasi, to edia kara amo idia hahedinaraia taunimanima idia lalokau henidia momokani.​—⁠Iamesi 1:⁠27.

Unai dainai, lalohisihisi taudia idia davaria, kongregesen be ruma bese ta mai ena hebogahisi bamona. (Mareko 10:​29, 30) Idia noho hebou bona lalokau idia hahedinaraia oreana lalonai idia noho ese idia ia hagoadaia. (Salamo 133:​1-3) Kongregesen amo, “hesiai tauna mai ena kamonai, bona mai ena kara maoromaoro” ese “aniani neganai” lauma aniani ia henia.​—⁠Mataio 24:⁠45.

Lalokau Elda Taudia Edia Heduru

Keristani kongregesen taudia ese ia lalonai mamoe naria taudia mai edia lalokau, mai edia lalo-parara, bona manada idia davaria diba. Idia ese lauma dalanai hahegoada bona heduru idia henia. Unai bamona mamoe naria taudia be ‘lai koua gabuna hegeregere do idia lao, bona guba bada ia toa neganai hunia gabudia namodia hegeregere ai do idia lao.’ (Isaia 32:​1, 2) Lauma helaga ese ia abia hidi elda taudia ese Dirava ena mamoe bamona taudia idia naria, gorere bona lalo-metau taudia idia durua, bona idia hekwarahi kerere taudia idia hagoadaia totona.​—⁠Salamo 100:3; 1 Petero 5:​2, 3.

Oibe, kongregesen ena elda oreana be keristani tadikaka ese idia davaria kwara gorere eiava gorere ma haida idia hanamoa doketa taudia lasi. Inai tanobada oromana lalonai, gorere taudia be ‘doketa tauna idia tahua’ be namo. (Luka 5:31) To, mamoe naria taudia ese lauma dalanai idia dabu taudia idia durua diba. (Iamesi 5:​14, 15) Bema mai dalana, elda taudia ese heduru ma haida idia henia diba.​—⁠Iamesi 2:​15, 16.

Daika ese unai lalokau karana ia havaraia? Iehova Dirava sibona! Peroveta tauna Esekiela ia hahedinaraia Iehova be inai bamona ia hereva: “Lau sibona ese egu mamoe do lau tahua, bona idia do lau naria. . . . Sedira idia be gabu dikadia dekenai, bona dibura gabudia dekenai danu, to lau ese idia do lau hamauria. . . . Lau sibona be mamoe naria tauna do lau lao, bona lau ese edia laga-ani gabuna ta do lau davaria.” Dirava be idia goada lasi bona idia manoka mamoe ia laloa danu.​—⁠Esekiela 34:​11, 12, 15, 16.

Heduru Korikorina Nega Korikorina Ai

Keristani kongregesen lalonai heduru korikorina ia noho momokani, a? Oibe, bona henunai idia noho haheitalai be kongregesen ese ia henia heduru idauidau ia hahedinaraia.

◆ Lalokau tauna ta ia mase. Anna ena tau be nega daudau ia gorere murinai ia mase. Anna ia gwau: “Unai nega murinai lau be Keristani tadikaka amo lalokau bada lau mamia. Egu Keristani tadikaka ese hanaihanai idia gwauraia hebogahisi bona heduru herevadia, bona edia kudouna ibounai ida lau idia rosia dainai lau daradoko lasi, bona Iehova lau tanikiu henia. Edia lalokau ese lau ia durua bada, lau ia hagoadaia bada, bona lau ia naria.” Reana oi danu emu lalokau tauna ta ia mase bona unai bamona lalohisihisi oi mamia. Unai bamona negadia ai, kongregesen taudia ese hagoadaia bona heduru idia henia diba.

◆ Gorere. Arthur be loaloa naria tadikaka ta Poland amo, bona hanaihanai Central Asia ena kongregesen ia vadivadi henidia lauma dalanai idia ia hagoadaia totona. Iena vadivadi negana ta ai, ia gorere dikadika bona ia goada ia lao noho neganai hekwakwanai badadia haida idia vara. Mai tanikiu bada mamina danu, Arthur ia gwau: “Lau ura [Kazakhstan ena siti ta] dekenai idia noho tadikaka bona taihu ese lau idia naria dalana umui dekenai lau kikilaia. Tadikaka bona taihu, idia momo be lau diba lasi taudia​—⁠bona kamonai taudia danu​—⁠be moni, aniani, bona muramura idia mailaia. . . . Bona mai moale bada danu unai idia karaia.

“Inai revareva mai ena moni lau davaria neganai, egu hemami mani oi laloa: ‘Tadikaka e, egu lalokau lau siaia oi dekenai. Sinagu ese lau dekenai moni ia henia ice cream totona, to oi dekenai lau siaia emu muramura hoia totona. Mani oi namo haraga. Iehova ia ura nega daudau lalonai ita do ia gaukaralaia. Bena hahediba sivarai namodia ma haida ai dekenai do oi gwauraia. Vova.’ ” Oibe, unai sivarai lalonai ia hedinarai bamona, kongregesen lalonai matamata bona buruka taudia ese gorere negadia ai hahegoada idia henia diba.​—⁠Filipi 2:​25-29.

◆ Lalo-Metau. Teri ia ura dikadika painia gaukara, eiava nega ibounai Basileia ena sivarai namona ia harorolaia gaukarana ia karaia. To hekwakwanai haida dainai, painia gaukara ia rakatania. Ia gwau: “Egu mamina ia dika badina painia gaukara dekenai lau vareai to lagani tamona lau abia lasi.” Teri be lalohadai kererena ia abia, ia laloa iena gaukara ena bada hegeregerena ai Iehova ese ia do ia lalo-namo henia. (Mareko 12:​41-44 itaia.) Ia lalo-metau dainai, ia ura sibona ia noho. To kongregesen amo hahegoada karana ta ia mai.

Teri ia gwau: “Lo painia taihu ta ese lau ia durua bona egu hemami lau gwauraia hedinarai neganai ia kamonai. Iena ruma lau rakatania neganai, egu mamina be hegeregere metau gauna ta be lau amo ia kokia bamona. Unai nega amo, unai painia taihu bona ena tau, kongregesen ena elda tauna ta, ese lau dekenai mai anina bada heduru idia henia. Dina ta ta ai lau idia rini henia, idia ura diba lau namo eiava. . . . Nega haida lau idia abia dae edia ruma bese ena stadi lalonai, bona unai amo lau diba ruma bese idia lalo-tamona be mai anina bada.”

Hari inai negai momo​—⁠bapatiso Keristani taudia danu​—⁠idia lalo-metau, idia daradoko, bona sibona idia noho dainai idia lalohisihisi. Dirava ena kongregesen lalonai ma haida edia namo idia tahua karana mai lalokauna ia noho dainai ita tanikiu bada be namo!​—⁠1 Tesalonika 5:⁠14.

◆ Dika bona aksiden. Mani oi sibona oi atoa inai ruma bese ese idia davaria hekwakwanai lalonai. Ruma bese taudia hani edia ruma be lahi ese ia gabua neganai, edia kohu ibounai idia gabua ore. Daudau lasi murinai kara ta ia vara. Inai bamona idia gwauraia, “emai mauri ibounai lalonai do ai laloa hahegoada karana ta ia vara bona unai ese ai dekenai ia hamomokania Iehova ena taunimanima huanai lalokau korikorina ia noho.” Idia gwau: “Lahi murinai karaharaga emai Keristani tadikaka bona taihu idia rini bona heduru bona hebogahisi herevadia momo herea ai abia. Telefon ia rini hanaihanai. Iboudiai edia hebogahisi bona lalokau karadia ese emai kudouna idia hamarerea bona ai moale bada dainai ai tai.”

Daudau lasi murinai, kongregesen elda taudia ese tadikaka idia haboua orea badana ta ai, bona dina haida lalonai, unai ruma bese totona ruma matamatana ta idia haginia. Dekena hahinena ta ia gwau: “Oi itaia be namo! Taunimanima idauidau be unuseniai idia gaukara​—⁠tatau, hahine, kopi korema taudia, bona Hispanic taudia!” Tadikaka bamona lalokau heheni karana ia hedinarai goevagoeva.​—⁠Ioane 13:⁠35.

Unai ruma bese dekenai Keristani tadikaka ese dabua, aniani, bona moni danu idia henia. Edia tamana ia gwau: “Unai nega be Kerisimasi negana, taunimanima ibounai be ta ta dekenai harihari gaudia idia henia negana unai, to mai momokani ida ai gwauraia diba, ma ta ese hariharibada karana korikorina ena mamina ia abia lasi, ai ese ai mamia bamona.” Bona idia gwau: “Ia vara lahina be metairametaira ai laloaboio noho, to tura namodia bona hebogahisi karadia be mai moale ida ai laloa momo. Tanobada dekenai inai tadikaka bamona ruma bese namo hereana ia havaraia dainai, iseda lalokau guba Tamana, Iehova, ai tanikiu henia bada bona ai be unai ruma bese lalonai ai noho dainai ai tanikiu henia bada!”

Momokani, dika ibounai lalonai unai bamona heduru do ia vara lasi, bona dika idia davaria taudia be idia laloa lasi unai bamona heduru do idia abia. To ataiai sivarai be kongregesen ese ia henia diba heduruna ia hahedinaraia.

Ataiai amo Ia Mai Aonegana

Momo ese Keristani kongregesen lalonai heduru bona goada abia dalana ma ta idia davaria. Unai be dahaka? “Hesiai tauna mai ena kamonai, bona mai ena kara maoromaoro” ese idia halasia buka bona magasin. Unai gaudia amo Gima Kohorona bona Awake! be heduru bada gaudia. Unai magasin ese sisiba maorodia bona aonega karadia idia hadibaia totona, nega iboudiai Dirava ena aonega, Baibel lalonai ia noho gauna sibona idia gaukaralaia. (Salamo 119:105) Baibel idia tahua guna bena diba bada taudia edia hereva idia tahua namonamo danu. Idia tahua gaudia haida be lalo-metau, hadikaia karadia murinai heduru abia karana, mauri lalonai idia vara hekwakwanai bona moni hekwakwanai, matamata taudia ese idia davaria hekwakwanai badadia, bona ogogami tanodia lalonai idia vara hekwakwanai. Mai anina bada gauna be, unai magasin ese idia hahedinaraia Dirava ese ia gwauraia mauri dalana be dala hereadaena.​—⁠Isaia 30:​20, 21.

Lagani ta ta ai, Watch Tower Society be tanikiu herevana idia gwauraia revarevadia tausen momo ia abia. Hegeregere, sibona hamasea karana ia herevalaia Awake! dainai, Russia dekenai matamata tauna ta be inai ia torea: “Hanaihanai lau lalo-metau dainai, . . . nega momo lau ese sibona hamasea karana lau laloa. Unai hereva ese egu abidadama ia hagoadaia Iehova ese lau do ia durua egu hekwakwanai lau hanaia totona. Ia ura do lau mauri noho. Unai hereva amo iena heduru ia henia dainai ia lau tanikiu henia.”

Bema inai tanobada lalonai idia vara hanaihanai hekwakwanai aukadia oi hanaia diba lasi, oi diba momokani Keristani kongregesen be dika amo oi hunia gabuna namona. Bema inai lalokau lasi tano kaukauna bamona tanobadana ese emu goada ia haorea, goada ia henia lou gabuna oi davaria diba Iehova ena orea lalonai. Unai bamona heduru oi abia murinai, reana oi be inai Keristani hahinena hegeregerena do oi hereva, ena adavana ena gorere ia haheaukalaia murinai, ia gwau: “Ai idia lalokau henia bona durua dainai, egu mamina be inai hekwakwanai lalonai Iehova ese iena imana lalonai ai ia huaia. Lau be Iehova ena orea namo hereana lalonai lau noho dainai lau moale bada!”

[Footnotes]

[Picture on page 26]

Gorere taudia, edia lalokau tauna ta ia mase taudia, bona ma haida dekenai heduru bona goada ita henia diba