Ita Ta Ta Ita Durua Heheni
“Idia ese lau idia durua bada herea.”—KOLOSE 4:11.
1, 2. Ena be Paulo ena turadia be dika idia davaria diba, to dahaka dainai dibura dekenai ia idia vadivadi henia?
DIBURA dekenai ia noho tauna ena turana ai oi lao totona, dika oi davaria diba—herevana ia be kerere ta ia karaia lasi. Reana dibura naria taudia idia laloa gau ta do oi karaia dainai emu kara ibounai idia itaia namonamo, taravatu utua karana ta oi karaia lasi totona. Unai dainai, emu turana ida oi herevahereva bona dibura dekenai ia oi vadivadi henia totona oi goada be gau badana.
2 To, lagani 1,900 bamona gunanai, aposetolo Paulo ena turadia haida be unai bamona idia karaia. Dibura dekenai Paulo idia vadivadi henia, idia hagoadaia bona lauma dalanai ia idia durua totona idia daradara lasi. Unai turana namodia be daidia? Bona edia goada, kamonai karana bona turana karana amo dahaka ita dibaia?—Aonega Herevadia 17:17.
“Idia Durua Bada Herea”
3, 4. (a) Paulo ena turana faiv be daidia, bona ia totona dahaka idia karaia? (b) Inai hereva “durua bada herea” ena anina be dahaka?
3 Lagani 60 C.E. bamona ai ia vara gauna mani ita laloa. Aposetolo Paulo be Roma ai dibura dekenai ia noho, badina idia samania koikoi idia gwau ia ese gavamani ena taravatu ia utua. (Kara 24:5; 25:11, 12) Paulo ese ia idia durua Keristani taudia faiv ia gwauraia: Tukiko, Paulo ena hereva ia gwauraia Asia tauna bona ia ida ‘Lohiabada ena hesiai gaukara ia karaia’; Onesimo, ‘varavara namona ta bona Paulo ena lalokau’ tauna Kolose amo; Arisitako, Makedonia tauna Tesalonika amo bona nega ta Paulo ida ‘dibura ruma lalonai ia noho’; Mareko, Paulo ena misinari turana Banaba ena kasin bona ena ladana idia atoa Evanelia Bukana ia torea tauna; bona Iusto, “Dirava ena Basileia totona” aposetolo Paulo ida ia gaukara tauna ta. Paulo ese idia faiv ia herevalaia, ia gwau: “Idia ese lau idia durua bada herea.”—Kolose 4:7-11.
4 Paulo ese ia idia badinaia turana namodia edia heduru ia gwauraia namo herea. Ia ese Greek herevana (pa·re·go·riʹa) ia gaukaralaia, idia hahanaia “idia durua bada herea,” bona Baibel lalonai inai siri sibona lalonai ia hedinarai. Unai hereva ena anina be momo bona nega momo muramura idia herevalaia neganai idia gaukaralaia.a Idia gaukaralaia daladia haida be ‘hisihisi hamaragia, hagoadaia, eiava heduru henia karadia.’ Paulo ia ura unai bamona heduru ia abia, bona unai tatau faiv ese idia henia.
Paulo “Idia Durua Bada Herea” Ena Badina
5. Ena be Paulo be aposetolo tauna ta, to dahaka ia ura abia, bona nega ta ta ai ita ibounai be dahaka ita ura abia?
5 Reana haida idia hoa, badina Paulo, aposetolo tauna ta, ia ura heduru ia abia. To, unai bamona ia vara. Momokani, Paulo ena abidadama ia goada, bona tauanina dalanai dika momo ia haheaukalaia, hegeregere ‘ia idia kwadia nega momo, nega momo kahirakahira ia mase,’ bona hisihisi ma haida danu. (2 Korinto 11:23-27) To, ia be taunimanima sibona, bona taunimanima ibounai be nega ta ta ai heduru idia abia bona haida ese edia heduru amo edia abidadama idia hagoadaia be namo. Iesu danu be unai bamona. Iena hanuaboi ginigabena lalonai, Getesemane dekenai aneru ta ia hedinarai “ia dekenai goada henia totona.”—Luka 22:43.
6, 7. (a) Roma ai, Paulo be daidia dekenai ia lalohisihisi, bona daidia ese ia idia hagoadaia? (b) Roma dekenai Paulo ena Keristani tadikaka ese dahaka gaukara idia karaia ia totona, bona unai amo ia “idia durua bada herea”?
6 Paulo danu idia hagoadaia be namo. Roma dekenai dibura tauna bamona ia ginidae neganai, sibona ena bese taudia ese ia idia welkam henia lasi. Unai Iuda taudia, kahirakahira idia ibounai, ese Basileia ena sivarai idia dadaraia. Iuda gunalaia taudia be dibura ruma dekenai Paulo idia vadivadi henia murinai, Kara bukana dekenai ia noho sivaraina ia gwau: “Haida be Paulo ena hereva idia abia dae, to haida idia ura lasi. Idia be mai edia laloa tamona lasi dainai, . . . idia toreisi, do idia rakatania lao totona.” (Kara 28:17, 24, 25) Iehova ena hebogahisi idia laloa bada lasi dainai, Paulo ia lalohisihisi bada! Iena hemami goadana unai gauna dekenai be lagani haida gunanai, Roma kongregesen dekenai ia torea revarevana lalonai ia hedinarai, ia gwau: “Egu lalohisihisi be bada herea, bona lau laloa momo noho, . . . Bema inai bamona dala ta ia noho, egu bese [Iuda taudia] do lau durudia totona, lau ura be Keriso lau noia, ia ese lau do ia negea, vadaeni lau boio momokani.” (Roma 9:2, 3) To, Roma dekenai tura korikoridia ia davaria, edia goada bona lalokau ese iena kudouna idia hagoadaia. Idia be iena lauma tadikaka momokanidia.
7 Edena dala ai unai tadikaka faiv ese ia idia durua bada herea? Paulo be dibura tauna dainai ia idia dadaraia lasi. To, mai edia ura bona lalokau ida Paulo totona gaukara haida idia karaia, ia idia hadiburaia dainai ia sibona ese unai gaukara ia karaia diba lasi. Hegeregere, idia be gwaukau taudia bamona Paulo ena revareva bona hadibaia herevadia be kongregesen idauidau dekenai idia abia lao; Roma bona gabu ma haida dekenai idia noho tadikaka edia noho namo sivaraidia amo Paulo idia hagoadaia. Toana be ia ura abia gaudia, keru negana ai do ia karaia dabua, lokua bukadia, bona toretore gaudia, idia mailaia. (Efeso 6:21, 22; 2 Timoteo 4:11-13) Unai bamona heduru karadia ibounai ese dibura dekenai ia noho aposetolo tauna ia hagoadaia, bena ia ese ma haida, kongregesen haida danu, ia “durua bada herea” diba.—Roma 1:11, 12.
Ma Haida Ita “Durua Bada Herea” Daladia
8. Paulo be mai manau ida ia gwau ‘heduru’ ia ura abia karana amo dahaka ita dibaia?
8 Paulo bona ia ida idia gaukara taudia faiv edia sivarai amo dahaka ita dibaia? Ita dibaia gauna ta mani ita laloa: Ma haida ese hekwakwanai idia davaria neganai, idia ita durua totona ita goada bona sibona eda ura ita dadaraia be namo. Danu, dika ita davaria neganai, namona be mai manau ida ita hahedinaraia ma haida edia heduru ita abia dae. Paulo ia gwau sibona lasi heduru ia ura abia, to mai lalo-namo ida durua idia henia taudia edia heduru ia abia dae bona idia ia hanamoa. Ia laloa lasi heduru ia abia dae be manoka ena toana eiava hemarai gauna ta, bona ita danu unai bamona ita laloa lasi be namo. Bema ita gwau heduru ita abia be anina lasi, unai be hegeregere ita gwau ita be taunimanima ibounai ita hereaia. Laloaboio lasi, Iesu ena haheitalai ese ia hahedinaraia goevadae tauna danu be nega haida heduru totona ia noinoi diba.—Heberu 5:7.
9, 10. Dahaka namo ia vara diba bema ta be ma haida edia heduru ia abia dae, bona ruma bese bona kongregesen taudia ma haida dekenai unai ena anina be dahaka?
9 Bema gaukara idia hakaua taudia idia abia dae gaukara ibounai idia karaia diba lasi bona ma haida edia heduru idia abia be namo, anina namona ia vara diba. (Iamesi 3:2) Unai idia karaia dainai, gaukara idia hakaua taudia bona edia hakaua henunai idia noho taudia idia hetura bona herevahereva namonamo diba. Mai ura ida heduru idia abia dae taudia edia manau karana be haheitalai namona dika idia davaria taudia ma haida dekenai. Ia hahedinaraia gaukara idia hakaua taudia be taunimanima sibona bona idia dekenai ita lao diba.—Hadibaia Tauna 7:20.
10 Hegeregere, natudia ese hekwakwanai bona lalona veria gaudia idia davaria neganai, reana tama sina edia heduru idia abia dae be auka lasi, badina idia diba edia tama sina idia maragi neganai unai bamona hekwakwanai idia davaria danu. (Kolose 3:21) Unai amo natuna bona tama sina idia herevahereva diba. Baibel amo hekwakwanai hanaia daladia idia henia diba bona idia abia dae be auka lasi. (Efeso 6:4) Unai hegeregerena, bema kongregesen taudia idia diba elda taudia danu be hekwakwanai idia davaria, gari bona daradara idia mamia, elda taudia edia heduru do idia abia dae haraga. (Roma 12:3; 1 Petero 5:3) Bona, idia herevahereva namonamo, Baibel ena sisiba idia herevalaia, bena ta ta edia abidadama idia hagoadaia diba. Laloaboio lasi, hari inai negai iseda tadikaka bona taihu ese heduru idia abia be gau badana, guna bamona lasi.—2 Timoteo 3:1.
11. Dahaka dainai hari inai negai momo ese ‘heduru’ idia abia be namo?
11 Herevana edeseni ita noho, ita be edena bamona taudia, eiava iseda mauri laganidia be hida, ita ibounai be nega haida lalo-hekwarahi ita davaria. Hari inai tanobada be unai bamona. (Apokalupo 12:12) Unai bamona tauanina eiava hemami idia hadikaia gaudia ese iseda abidadama ena goada idia tohoa. Hahetoho be gaukara gabunai, sikuli, ruma bese lalonai, eiava kongregesen ai idia vara diba. Gorere badana eiava guna ia vara dika ta ese lalo-hekwarahi ia havaraia diba. Bema adavana, elda ta, eiava turana ta ese hereva bona kara namodia amo ita idia hagoadaia—unai ese hemami namona ia havaraia diba! Muramura amo hisihisi oi koua bamona! Unai dainai, bema oi itaia emu tadikaka ta be unai bamona, ia oi durua. Eiava, bema hekwakwanai badana ta dainai oi lalo-metau, lauma dalanai idia goada taudia amo heduru oi tahua.—Iamesi 5:14, 15.
Kongregesen Ia Durua Diba Daladia
12. Kongregesen taudia ta ta be dahaka idia karaia diba edia tadikaka idia hagoadaia totona?
12 Kongregesen taudia ibounai, matamata taudia danu, ese ma haida idia durua diba. Gau ta, hanaihanai hebou bona haroro gaukara dekenai oi lao karana ese ma haida edia abidadama ia hagoadaia bada. (Heberu 10:24, 25) Hesiai gaukara helagana oi goadalaia karana ese ia hamomokania Iehova oi badinaia noho bona ia hahedinaraia lauma dalanai oi noga noho, herevana hekwakwanai oi haheaukalaia noho. (Efeso 6:18) Emu goada karana ese ma haida ia durua diba.—Iamesi 2:18.
13. Dahaka dainai haida idia haroro lasi, bona dahaka ita karaia diba idia ita durua totona?
13 Nega haida, mauri ena lalo-hekwarahi eiava hekwakwanai ma haida dainai, haida ese haroro gaukara idia karaia goadagoada lasi eiava idia haroro lasi. (Mareko 4:18, 19) Reana idia haroro lasi pablisa be kongregesen hebou dekenai ita itaia lasi. To, reana edia kudouna dekenai Dirava idia do lalokau henia noho. Edia abidadama hagoadaia totona dahaka ita karaia diba? Elda taudia ese idia vadivadi henidia neganai, hebogahisi dalanai heduru idia henia diba. (Kara 20:35) Reana kongregesen taudia ma haida edia heduru idia noia danu. Mai lalokau ida idia karaia vadivadi be reana muramura maorona, abidadama manoka taudia hagoadaia totona.
14, 15. Ma haida durua karana dekenai, Paulo be dahaka sisiba ia henia? Unai sisiba ia badinaia kongregesen ta ena haheitalai oi gwauraia.
14 Baibel ese ita ia hagoadaia, “lalo-metau taudia umui gado namo henidia bona umui hagoadaia, manoka taudia umui durua.” (1 Tesalonika 5:14, NW ) Reana unai “lalo-metau taudia” idia davaria edia goada ia ore noho bona idia davaria hekwakwanai idia hanaia diba lasi bema heduru idia abia lasi. Oi ese idia do oi durua diba, a? Inai hereva “manoka taudia umui durua” idia gwauraia daladia ma haida be manoka taudia “dogoatao auka” eiava “tabekau goada.” Iehova ese ena mamoe ibounai ia laloa bona ia lalokau henia. Ia laloa lasi idia be anina maragi gaudia, bona ia ura lasi ta ia hure oho. Oi ese kongregesen oi durua diba lauma dalana idia manoka taudia idia “dogoatao auka” noho totona ela bona idia goada lou, a?—Heberu 2:1.
15 Elda ta ese lagani 6 lalonai idia haroro lasi headava tau bona hahine ia vadivadi henia. Unai elda tauna ia gwau: “Kongregesen taudia ibounai ese idia dekenai idia hahedinaraia hebogahisi bona lalokau ese edia lalona ia hagoadaia dainai, mamoe orea lalonai idia giroa lou.” Guna ia haroro lasi taihuna ta be kongregesen taudia edia vadivadi karana be edena bamona ia laloa? Hari ia gwau: “Haroro gaukara ai hamatamaia totona ai ia durua gauna ta be ai idia vadivadi tadikaka bona idia bamoa taihudia ese nega ta ai idia maumauraia lasi. To, idia lalo-parara bona Baibel amo ai idia hagoadaia.”
16. Daika be hanaihanai ia noho hegaegae heduru idia ura henia taudia ia durua totona?
16 Oibe, Keristani tauna korikorina ia moale bada bema ma haida ia durua diba. Bona iseda mauri ia idau ia lao lalonai, reana ita ese iseda tadikaka edia heduru do ita abia diba. To namona be ita lalo-parara, nega haida heduru ita ura henia neganai, reana heduru taudia do idia noho lasi. To, goada ia henia Tauna ta be hanaihanai ia noho hegaegae mai ena ura ida heduru ia henia totona—Iehova Dirava unai.—Salamo 27:10.
Iehova—Goada Abia Gabuna Badana
17, 18. Edena dala haida ai Iehova ese ena Natuna, Iesu Keriso, ia durua?
17 Iesu be satauro dekenai idia kokoa neganai, ia boiboi: “Egu Tamana e, egu lauma be oiemu imana dekenai lau atoa inai.” (Luka 23:46) Bena ia mase. Hora haida gunanai, ia idia dogoatao bona ena tura korikoridia ese ia idia rakatania bona gari dainai idia heau. (Mataio 26:56) Iesu be goada Gabuna tamona—iena guba Tamana unai—danu idia rakatania. To, ena abidadama Iehova dekenai be mai anina. Iesu ese iena Tamana ia badinaia dainai, Iehova ese Iesu ia durua noho.—Salamo 18:25; Heberu 7:26.
18 Iesu ena tanobada hesiai gaukarana ibounai lalonai, ia abidadama noho totona Iehova ese ena Natuna dekenai goada ia henia ela bona ia mase. Hegeregere, Iesu ena bapatiso murinai, iena hesiai gaukarana ia matamaia negana unai, ia ese ena Tamana ena gadona ia kamonai, Ia gwau ia lalo-namo henia bona Iena lalokau Iesu dekenai ia hamomokania. Iesu be heduru ia ura henia neganai, Iehova ese aneru ia siaidia, ia idia hagoadaia totona. Iesu ena tanobada maurina ena dokonai hahetoho badana ia davaria neganai, Iehova ese ena noinoi ia kamonai henia. Momokani ita laloa diba unai ibounai ese Iesu ia durua bada.—Mareko 1:11, 13; Luka 22:43.
19, 20. Edena bamona ita diba momokani heduru ita ura abia neganai, Iehova ese ita do ia durua?
19 Iehova ia ura ia be iseda goada abia Gabuna badana ai ita halaoa danu. (2 Sivarai 16:9) Heduru ita ura abia neganai, goada bona siahu bada herea abia Gabuna ese ita ia durua bada herea diba. (Isaia 40:26) Tuari, ogogami, gorere, mase, eiava ita sibona eda kara dika dainai reana ita lalo-hekwarahi bada. Mauri ena lalo-hekwarahi gaudia edia bada be ‘tuari henia taudia goadadia’ bamona neganai, Iehova be iseda goada bona siahu abia gabuna ai ia lao diba. (Salamo 18:17; Esodo 15:2) Ia ese ita dekenai heduru gauna goadana ia henia—iena lauma helaga unai. Iena lauma helaga amo, Iehova ese ‘hesiku tauna ia hagoadaia’ diba, bena do ia hegeregere ‘hanina dekena amo ia roho daekau, ugava bamona.’—Isaia 40:29, 31.
20 Dirava ena lauma be unives ibounai dekenai ia noho siahu hereadaena. Paulo ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.” Oibe, iseda lalokau guba Tamana ese ita dekenai “siahu badana” ia henia diba, hekwakwanai badadia ita haheaukalaia diba totona, ela bona kahirakahira do ia mai gwauhamata Paradaisona lalonai ‘gau ibounai do ia karaia matamata.’—Filipi 4:13, NW; 2 Korinto 4:7; Apokalupo 21:4, 5.
[Footnote]
a W. E. Vine ena buka Vine’s Complete Expository Dictionary of Old and New Testament Words ia gwau: “Inai hereva [pa·re·go·riʹa] amo idia abia herevana ena anina be hisihisi ia hamaragia muramuradia.”
Oi Laloatao, A?
• Roma dekenai tadikaka ese edena dala ai Paulo “idia durua bada herea”?
• Edena dala haida ai kongregesen lalonai ma haida ita “durua bada herea” diba?
• Edena dala ai Iehova be iseda goada abia Gabuna badana?
[Picture on page 24]
Tadikaka ese Paulo idia durua, idia hagoadaia, bona ena ura gaudia idia karaia, unai amo ia “idia durua bada herea”
[Picture on page 27]
Elda taudia ese mamoe oreana durua gaukarana idia hakaua