‘Lauegu Souli E, Lohiabada Do Oi Hanamoa’

“VANEGAI hua lalodiai egu haroro gaukara lau hesikulaia bona lau moalelaia lasi,” Nancy be unai bamona ia hereva.a Lagani 10 lalodiai, ia be painia, nega ibounai sivarai namona ia harorolaia gaukarana, ia karaia. To, ma ia gwau: “Lau dekenai ia vara gauna dainai lau lalohisihisi. Basileia ena sivarai lau hahedinaraia lasi egu goada ibounai ida bona egu kudouna amo. Dahaka lau karaia be namo?”

Mani, Keith, Iehova ena Witness taudia edia kongregesen ta ena elda tauna ta ena sivarai ita laloa danu. Iena adavana ena hereva dekenai ia hoa. Adavana ia gwau: “Oi be reana gau idauna oi laloa. Hari oi henia gurigurina lalonai, oi ese aniani totona tanikiu herevana oi gwauraia, to inai be aniani negana lasi!” Keith ia gwau: “Lau itaia egu guriguri be egu kudouna amo lau gwauraia lasi.”

Oibe, oi ura lasi Iehova Dirava dekenai hanamoa herevadia oi gwauraia kava bona emu kudouna amo oi gwauraia lasi. To idau, oi ura idia be emu kudouna amo, tanikiu bada hemami dainai oi gwauraia. To, hemami be dabua bamona ita atoa bona ita kokia be namo lasi. Ta ena lalona momokani amo ia mai be namo. Ta ese tanikiu mamina be ena kudouna dekenai edena bamona ia abia diba? Salamo karoa 103 ese ita dekenai unai dala ia hahedinaraia.

Idaunega Israela besena ena King Davida ese Salamo 103 ia torea. Inai hereva amo ia hamatamaia: “Lauegu lauma [“souli,” NW ] e, Lohiabada do oi hanamoa. Lauegu lalona e, Lohiabada ena ladana helagana do oi hanamoa.” (Salamo 103:1) Buka ta ia gwau “Dirava dekenai unai hereva hanamoa, idia gaukaralaia neganai, hanaihanai ena anina be ia idia hanamoa, ia idia lalokau henia bada mai tanikiu danu.” Davida ena kudouna be lalokau bona tanikiu mamina amo ia honu dainai ia ura Iehova ia hanamoa, ia ese sibona ena souli​—⁠ia sibona​—⁠ia hagoadaia ‘Lohiabada do ia hanamoa.’ To, dahaka ese Davida ena kudouna lalonai unai bamona hemami namona ia tomadiho henia Diravana dekenai ia havaraia?

Davida ia hereva noho: “Iena [Iehova ena] hariharibada ibounai do oi laloaboio lasi.” (Salamo 103:2) Iehova tanikiu henia mamina be “iena hariharibada” karadia ita laloa dobu karana ida ia hesiriu. Edena hariharibada karadia Iehova ese ia karaia karadia unai, be Davida ese ia laloa? Iehova Dirava ese ia havaraia gaudia ita itaia, hegeregere hanuaboi namona ta ai hisiu momo herea oi itaia neganai, oiemu kudouna be tanikiu mamina ia abia diba Havaraia Tauna dekenai. Guba ena hisiu ese Davida ena kudouna idia hamarerea. (Salamo 8:​3, 4; 19:⁠1) To, Salamo karoa 103 ai, Davida ese Iehova ena kara ma ta ia laloatao.

Iehova ese ‘Emu Kara Dika Ibounai Ia Gwauatao’

Inai salamo lalonai, Davida ese Dirava ena lalokau bona hebogahisi karadia ia anelaia. Unai kara ginigunana bona badana ia gwauraia neganai, inai ane ia abia: ‘Iehova ese emu kara dika ibounai ia gwauatao noho.’ (Salamo 103:3) Davida ia laloaboio lasi ia be kara dika tauna. Davida be Bataseba ida ia heudahanai dainai peroveta tauna Natana ese ia hereva henia murinai, Davida ia gwau: “Lau ese oi sibona dekenai lau kara dika vadaeni. Lau be oiemu vairana dekenai kerere lau karaia.” (Salamo 51:⁠4) Mai lalo-hisihisi bada ida, Davida ia noinoi: “Dirava e, mani oi bogahisihisi lau dekenai. Oiemu lalokau badana dainai, bona oiemu bogahisihisi bada herea dainai, egu kara dika do oi kokia ore. Egu dika mani do oi huria ore, bona egu kerere dekena amo lau do oi hagoevaia.” (Salamo 51:​1, 2) Dirava ese ia gwauatao neganai, Davida be unai gwauatao karana ia laloa bada! Ia be goevadae lasi tauna dainai, iena mauri lalonai kara dika ma haida ia karaia, to nega ibounai ia helalo-kerehai, sisiba ia abia dae, bona ena kara ia hamaoromaoroa. Dirava ena hebogahisi karadia ia dekenai ia laloa neganai, unai ese Davida ia doria Iehova ia hanamoa totona.

Ita danu be mai eda kara dika, ani? (Roma 5:12) Aposetolo Paulo danu ia gwau: “Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho. Lau madi o! Lau be dika momokani inai! Lauegu tauanina ese lau ia hamasea noho, be daika ese lau do ia hamauria?” (Roma 7:​22-24) Iehova ita tanikiu henia bada diba, badina iseda kara dika ia lalodia noho lasi! Ita helalo-kerehai bona ia amo gwauatao karana ita tahua neganai, mai ena ura ida iseda kara dika ia lalodia boio.

Davida be sibona ia hadibaia lou: “[Iehova] ese egu gorere ibounai dekena amo lau ia hamauria noho.” (Salamo 103:⁠3) Hamauria ena anina be goada lou, unai dainai gwauatao karana sibona be hegeregere lasi. Ena anina be “gorere” do ia kokia​—⁠iseda kerere ese ia havaraia gau dikadia unai. Do ia havaraia tanobada matamatana lalonai, Iehova be kara dika ese tauanina dekenai ia havaraia gaudia, hegeregere gorere bona mase, do ia haorea momokani. (Isaia 25:8; Apokalupo 21:​1-4) To, hari danu, Dirava be lauma dalanai iseda gorere ia hanamoa noho. Haida dekenai, unai ena anina be kerere ta idia karaia dainai edia lalona ena mamina ia dika bona edia hetura karana Dirava ida ia namo lasi. Iehova ese unai dala ai ita ta ta dekenai ia karaia gauna ita “laloaboio lasi” be gau badana.

Ia ese Lau “Ia Hamauria Noho”

Davida be inai bamona ane ia abia: “Lauegu mauri be mase ena guri dekena amo, [Iehova] ese ia hamauria noho.” (Salamo 103:⁠4) “Mase ena guri” be taunimanima ibounai edia mase gurina​—⁠Sheol eiava Hade. Ia be Israela ena king ai ia do lao lasi neganai, Davida be kahirakahira ia mase. Hegeregere, Israela ena King Saulo be Davida ia inai henia dikadika bona nega ta ta ai ia ura ia alaia mase. (1 Samuela 18:​9-29; 19:10; 23:​6-29) Filistia taudia danu idia ura Davida idia hamasea. (1 Samuela 21:​10-15) To nega ibounai, Iehova ese “mase ena guri dekena amo” ia hamauria. Davida ese Iehova ena hariharibada karadia ia lalodia tao neganai tanikiu bada mamina ia abia!

Oi be edena bamona? Lalo-metau negadia eiava emu lalokau tauna ta ia mase negana ai, Iehova ese oi ia durua, a? Eiava oi ese iseda nega ai iena abidadama Witness taudia be kahirakahira idia mase neganai ia hamauridia edia sivarai oi kamonai, a? Reana oi ese inai magasin lalonai iena hahemauri karadia edia sivarai oi duahia bona emu kudouna idia hamarerea. Namona be nega oi atoa Dirava momokanina ena hariharibada karadia oi laloa bada totona, ani? Bona, toreisi lou helarona dainai ita ibounai ese Iehova ita tanikiu henia be namo.​—⁠Ioane 5:​28, 29; Kara 24:⁠15.

Iehova be ita dekenai mauri, bona mauri moalelaia gaudia bona hanamoa gaudia ia henia. Salamo torea tauna ia gwau Dirava be “lalokau bona bogahisihisi oi dekenai ia henia noho.” (Salamo 103:⁠4) Hekwakwanai ita davaria neganai, Iehova be ita ia rakatania lasi, to iena tanobada oreana amo bona kongregesen ena abia hidi elda taudia, o mamoe naria taudia amo heduru ia henia. Unai heduru ese ita ia hagoadaia ita ia tohoa gauna ita haheaukalaia bona ita sibona matauraia karana ita haboioa lasi totona. Keristani mamoe naria taudia be mamoe idia laloa bada. Idia ese gorere bona lalo-metau taudia idia hagoadaia bona idia hekwarahi idia moru taudia idia hagoadaia totona. (Isaia 32:​1, 2; 1 Petero 5:​2, 3; Iuda 22, 23) Iehova ena lauma ese unai mamoe naria taudia ia doria iena mamoe taudia idia hebogahisi bona lalokau henidia totona. Iena “lalokau bona bogahisihisi” be korona bamona iseda kwarana ia hahairaia bona ita dekenai hemataurai ia henia! Iehova bona iena ladana helagana do ita hanamoa bona iena hariharibada karadia ita laloaboio lasi.

Salamo torea tauna Davida be sibona ia sisiba henia noho, bona inai ane ia abia: “Lauegu mauri be gau namodia dekena amo ia ubua noho. Unai dainai egu eregabe be ia matamata lou, ugava manu ena goada bamona.” (Salamo 103:⁠5) Iehova ese ita dekenai ia henia maurina lalonai ita noho namo bona ita moale. Oibe, hereva momokani ita dibaia be dava bada gaudia iboudiai ia hereaia bona ia be moale bada ena badina! Bona Iehova ese ita ia henia gaukarana, haroro gaukara bona hahediba taudia halaoa gaukarana unai, ese ita ia hamoalea bada. Kamonai tauna ta ita davaria bona ia ura Dirava momokanina ia dibaia bena ita durua Iehova ia diba bona ia hanamoa be moale gauna! To herevana, iseda teritori dekenai idia noho taudia idia kamonai eiava lasi, Iehova ena ladana ita hahelagaia bona iena lohia siahuna ena maoro ita hamomokania gaukarana ita karaia be hahenamo badana.

Dirava ena Basileia harorolaia gaukarana ita karaia noho lalonai, daika be ia hesiku lasi bona ia manoka lasi? To Iehova ese iena hesiai taudia ia hagoadaia noho, ‘ugava’ mai edia goada bada hanina bamona ia halaodia bona ataiai momokani dekenai idia roho lao diba. Dina ta ta ai mai abidadama ida ita haroro totona, iseda lalokau guba Tamana ese “goada” ia henia dainai ita moale bada be namo!​—⁠Isaia 40:​29-31.

Haheitalai ta be inai: Clara be mai ena ful-taim moni gaukara bona danu hua ibounai lalonai haroro gaukara dekenai hora 50 ia haorea. Ia gwau: “Nega haida lau hesiku, to ma ta ida palani lau karaia vadaeni dainai, lau sibona lau doria lau haroro totona. To lau lao neganai, hanaihanai goada lau abia.” Reana, oi danu be haroro gaukara lalonai Dirava ena heduru dainai unai goada mamina oi abia vadaeni. Mani unai ese oi ia doria, bena inai salamo ena hamatamaia kahana lalonai Davida ese ia gwauraia herevana oi gwauraia danu: “Lauegu lauma [“souli,” NW ] e, Lohiabada do oi hanamoa. Lauegu lalona e, Lohiabada ena ladana helagana do oi hanamoa.”

Iehova ese Iena Taunimanima Ia Ruhadia

Salamo torea tauna ese inai ane ia abia danu: “Dagedage taudia ese idia hadikaia taudia, be Dirava ese ia durudia noho, bona mai kara maoromaoro bona laloa maoromaoro danu, ia ese edia kota do ia karaia. Lohiabada ese iena dala Mose dekenai ia hadibaia, bona iena kara danu, be Lohiabada ese Israela taudia dekenai ia hedinaraia.” (Salamo 103:​6, 7) Davida be Mose ena nega ai Aigupito taudia ese Israela taudia idia “hadikaia” negana ia laloa. Iehova ese idia do ia ruhaia daladia be Mose dekenai ia hadibaia ia laloa namonamo neganai, unai ese Davida ena kudouna dekenai tanikiu mamina ia havaraia.

Dirava ese Israela taudia totona ia karaia gaudia ita laloa neganai, ita be unai bamona tanikiu mamina ita abia danu. To namona be ita ese hari inai nega lalonai Iehova ena hesiai taudia edia sivarai, Jehovah’s Witnesses​—⁠Proclaimers of God’s Kingdom bukana ena karoa 29 bona 30 lalonai do ita lalodia namonamo danu. Unai buka bona Watch Tower Society ese ia halasia buka bona magasin haida lalonai idia noho sivarai amo, ita itaia edena dala ai Iehova ese iena taunimanima hari inai negai ia durudia bona idia ese dibura, dagedage, gaukara idia taravatua, bona dibura gabu aukadia idia haheaukalaia. Tuari idia vara tanodia Burundi, Liberia, Rwanda, bona guna idia gwauraia Yugoslavia tanodia ai hahetoho idia vara. Dagedage ia vara neganai, Iehova ena imana ese iena abidadama hesiai taudia ia naria. Iseda Dirava badana, Iehova, ena hariharibada karadia ita lalodia neganai, Davida be Iehova ese Aigupito amo Israela taudia ia ruhadia karana ia laloa namonamo bona unai amo ia abia mamina, ita abia diba danu.

Iehova ese kara dika ena metau amo mai lalokau ida ita ia ruhaia dalana mani oi laloa. Ia ese “Keriso ena rarana” ia henia “iseda lalona do ia hagoevaia anina lasi boubou karadia dekena amo.” (Heberu 9:14) Iseda kara dika amo ita helalo-kerehai bona Keriso ena rara dainai gwauatao ita tahua neganai, Dirava ese iseda kara dika be ita amo daudau ai ia atoa​—⁠‘dina ia daekau kahana, bona dina ia diho kahana edia daudau’ hegeregerena​—⁠bona ita ia lalo-namo henia lou. Bona Iehova ese Keristani heboudia, hahegoada hebamo, kongregesen elda taudia, bona “hesiai tauna mai ena kamonai, bona mai ena kara maoromaoro” ese idia halasia Baibel idia herevalaia buka bona magasin amo ita ia naria. (Mataio 24:45) Iehova ena hariharibada karadia ese ita idia durua, iseda hebamo karana ia ida ia hagoadaia totona, ani? Davida ia gwau: “Lohiabada be mai ena bogahisihisi, bona mai ena hariharibada. Ia ese iena badu ia hakerua noho. . . . Iseda kara dika ena bada hegeregerena davana ia henia lasi. Ita ese kara dika momo ita karaia vadaeni, bona Dirava ese kerere davana bada herea ia henia diba, to unai bamona ia karaia lasi.” (Salamo 103:​8-14) Iehova ena naria karana mai lalokauna ese ita ia doria ia ita abia isi bona iena ladana ita hanamoa totona.

‘Iehova ese Ia Karaia Gaudia Ibounai e, Ia Umui Hanamoa’

Taunimanima edia “mauri” dinadia be Iehova, ia mase diba lasi bona “Noho Hanaihanai Dirava,” ida ita hahegeregerea neganai, idia be kwadogi momokani​—⁠“rei bamona.” To Davida be mai tanikiu bada hemami danu ia guriguri: “Lohiabada idia gari henia taudia, be Lohiabada ese do ia bogahisihisi henidia hanaihanai, bona ia dekenai idia gari taudia edia natudia bona tubudia, be Lohiabada ese do ia hanamodia momokani. Bona bema Lohiabada ena gwauhamata taravatuna, be idia badinaia bona matauraia, bona iena taravatu ibounai bema idia kamonai henia, mai edia momokani danu, ia ese idia do ia gwauraia maoromaoro taudia.” (Genese 21:​33; Salamo 103:​15-18) Iehova ese ia idia gari henia taudia ia laloaboio lasi. Iena nega korikori ai, mauri hanaihanai do ia henidia.​—⁠Ioane 3:16; 17:⁠3.

Davida ese Iehova ena lohia siahuna ia laloa bada dainai inai bamona ia hereva, ia gwau: “Lohiabada be guba ena King momokani, bona ia be taunimanima, aneru, bona gau ibounai edia biaguna.” (Salamo 103:19) Ena be nega sisina lalonai Iehova ena lohia siahuna be Israela besena amo ia hahedinaraia, to momokani iena terona be guba ai ia noho. Ia be gau ibounai ia Havaraia Tauna dainai, Iehova be Lohia Tauna Badana bona iena palani hegeregerena guba bona tanobada dekenai iena ura do ia karaia.

Davida ese guba anerudia ia hagoadaia danu. Inai ane ia abia: “Lohiabada ena aneru ibounai e, umui be mai emui goada badana. Umui ese Lohiabada ena hereva umui badinaia noho, bona emui taiana umui kehoa noho Lohiabada ena hereva dekenai. Lohiabada ena ladana do umui hanamoa bada. Lohiabada ena hesiai taudia, guba dekenai umui noho, bona Lohiabada ena ura umui karaia noho. Umui ese Lohiabada ena ladana do umui abia isi. Lohiabada ese ia karaia gaudia ibounai, ia ese ia biagua gabu ibounai dekenai umui noho, Lohiabada ena ladana do umui hanamoa bada. Egu lauma [“souli,” NW ] e, Lohiabada do oi hanamoa bada!” (Salamo 103:​20-22) Iehova ena lalokau bona hebogahisi karadia ita laloa lou karana ese ita danu idia doria ia ita hanamoa totona, ani? Oibe! Bona ita diba ita ese Dirava ita hanamoa neganai, kara maoromaoro anerudia edia boiboi regena badana ese iseda gadona ena regena do ia koua lasi. Namona be iseda guba Tamana ita hanamoa mai iseda kudouna ibounai ida, nega ibounai ia do ita gwauraia namo. Oibe, Davida ena hereva do ita abia dae momokani, ia gwau, “Lauegu lauma [“souli,” NW ] e, Lohiabada do oi hanamoa.”

[Footnote]

[Picture on page 23]

Davida ese Iehova ena lalokau bona hebogahisi karadia ia laloa dobu. Unai oi karaia, a?