“Harihari Gaudia” Iehova Ena Mamoe Naria Totona
“Atai dekenai ia daekau lao neganai, abia mauri mai guia taudia momo ia danu ia abia lao. Bona harihari gaudia taunimanima dekenai ia henia.”—EFESO 4:8.
1. Keristani taihu ta ese ena kongregesen ena elda taudia be edena bamona ia gwauraidia?
“TANIKIU bada ai umui naria dainai. Mai emui momokani ida ai umui kiri henia, ai umui lalokau henia, bona ai umui hebogahisi henia. Nega ibounai ai umui kamonai henia, bona Baibel ena hereva amo ai umui hagoadaia. Lau guriguri, umui do lau laloa bada hanaihanai totona.” Keristani taihu ta ese iena kongregesen ena elda taudia dekenai unai hereva ia torea. Ia hedinarai goevagoeva, Keristani naria taudia edia lalokau karana ese iena kudouna idia hamarerea.—1 Petero 5:2, 3.
2, 3. (a) Isaia 32:1, 2 ena hereva hegeregerena, mai edia hebogahisi elda taudia ese Iehova ena mamoe serina be edena bamona idia naria? (b) Edena nega ai ita gwau diba elda tauna be harihari gauna ta bamona?
2 Elda taudia be Iehova ese ia henia iena mamoe idia naridia totona. (Luka 12:32; Ioane 10:16) Iehova ese ena mamoe ia lalokau henidia bada—oibe, idia ia lalokau henia bada momokani, unai dainai Iesu ena rara hereadaena amo ia hoidia. Unai dainai, ita hoa lasi Iehova ia moale, elda taudia be mai lalokau ida iena mamoe serina idia kara henia neganai. (Kara 20:28, 29) Mani oi itaia, unai elda taudia, eiava “lohia taudia,” be peroveta herevana ta ese inai bamona ia gwauraidia: “Idia ta ta ibounai be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.” (Isaia 32:1, 2) Oibe, idia ese iena mamoe serina do idia gimaia, hagoadaia, bona durua. Mai hebogahisi ida mamoe idia naridia elda taudia idia gaukara goada Dirava ese ia henidia gaukarana idia karaia totona.
3 Baibel ese unai bamona elda taudia ia gwauraidia “harihari gaudia.” (Efeso 4:8) Harihari gauna ta oi laloa neganai, oi laloa ia be ia abia tauna ia hamoalea gauna eiava ena dabu gauna ta. Elda tauna ese ena diba ia gaukaralaia mamoe ia durudia bona ia hamoaledia neganai, ita gwau diba ia be harihari gauna ta bamona. Edena dala ai unai ia karaia diba? Paulo ena hereva Efeso 4:7-16 dekenai ia noho gauna lalonai ita davaria haerena ese Iehova ena lalokau iena mamoe serina totona ia hahedinaraia.
“Harihari Gaudia”—Edeseni Amo
4. Salamo 68:18 ia guguru neganai, edena dala ai Iehova be ‘ororo ai ia daekau,’ bona unai “harihari gaudia” be daidia?
4 Paulo ese inai hereva “harihari gaudia” ia gaukaralaia neganai, ia be King Davida ena hereva ia gwauraia. Davida ese Iehova ia herevalaia, ia gwau: “Iena ororo badadia dekenai ia daekau lao, bona ia ese ia abia mauri tuari taudia momo ia hakaudia daekau. Dagedage taudia momo dekena amo harihari gaudia ia abia noho.” (Salamo 68:18) Israela taudia be lagani haida Gwauhamata Tanona idia noholaia murinai, Iehova be laulau dalana ai Siona Ororona ai ia “daekau” bona Ierusalema be Israela basileiana ena siti badana ai ia halaoa bona Davida be ena king. To unai “harihari gaudia” be daidia? Idia be unai tano idia abia neganai, tuari lalonai idia abidia mauri tatau. Unai igui taudia haida be gabeai palai dubuna dekenai Levi taudia edia gaukara idia durua.—Esera 8:20.
5. (a) Paulo ese edena bamona ia hahedinaraia Salamo 68:18 be Keristani kongregesen dekenai ia guguru? (b) Iesu be edena dala ai “atai dekenai ia daekau lao”?
5 Efeso taudia dekenai ia torea revarevana lalonai, Paulo ia hahedinaraia salamo torea tauna ena hereva be Keristani kongregesen dekenai ia guguru badabada. Paulo ese Salamo 68:18 ena hereva be inai bamona ia gwauraia lou: “Dirava ese ita ta ta ibounai dekenai harihari gauna idauna ta ia henia. Ia henia be Keriso ena hariharibada ena bada hegeregerena. Buka Helaga lalonai ia torea hegeregerena, ia gwau: ‘Atai dekenai ia daekau lao neganai, abia mauri mai guia taudia momo ia danu ia abia lao. Bona harihari gaudia taunimanima dekenai ia henia.’ ” (Efeso 4:7, 8) Unuseniai Paulo ia gwau unai salamo ese Iesu, Dirava ena gwaukau tauna, ia herevalaia. Iesu be mai ena abidadama dainai ‘tanobada ia halusia.’ (Ioane 16:33) Dirava ese mase amo Iesu ia hatorea isi lou dainai, ia be mase bona Satani ia halusia danu. (Kara 2:24; Heberu 2:14) Lagani 33 C.E. ai, ia toreisi lou Iesu be “guba ena ataiai momokani dekenai ia lao”—Iehova ese guba dekenai ia havaraia gaudia ibounai ia hanaia. (Efeso 4:9, 10; Filipi 2:9-11) Tuari amo ia kwalimu tauna bamona, Iesu ese iena inai taudia amo “guia taudia” ia abia mauri. Edena dala ai?
6. Pentekoste 33 C.E. amo, ia daekau tauna Iesu, be edena dala ai Satani ena ruma amo kohu ia abia matamaia, bona unai “guia taudia” dekenai dahaka ia karaia?
6 Iesu be tanobada dekenai ia noho neganai, ia hahedinaraia iena siahu ese Satani ena siahu ia hanaia, badina ia ese demoni edia igui amo taunimanima ia ruhaia. Ia be hegeregere Iesu ese Satani ena ruma ia vareai, Satani ia kwatua, bena iena kohu ia abia. (Mataio 12:22-29) Ia toreisi lou bona ‘siahu ibounai guba bona tanobada dekenai’ ia abia murinai, Iesu ese ia abia diba kohuna ena bada mani oi laloa! (Mataio 28:18) Pentekoste 33 C.E. ai ia hamatamaia, ia daekau tauna Iesu, Dirava ena gwaukau tauna, be Satani ena ruma amo ‘guia taudia ia abia’—nega daudau lalonai kara dika bona mase bona Satani ena igui henunai idia noho taudia unai. Unai “guia taudia” idia ura Keriso ena hesiai taudia ai idia lao, ‘mai edia lalona ibounai Dirava ena ura idia karaia.’ (Efeso 6:6) Oibe, Iesu ese Satani ena igui amo ia ruhadia bona, Iehova ena kahana ai, “harihari gaudia” bamona ia henia kongregesen dekenai. Mani oi laloa, Satani ia badu dikadika badina Iesu ese iena vairana amo unai taudia ia abidia lao neganai, ia be gau ta ia karaia diba lasi!
7. (a) Kongregesen lalonai unai “harihari gaudia” be dahaka gaukara idia karaia? (b) Iehova ese elda gaukara idia karaia tatau ta ta dekenai edena dala namona ia kehoa?
7 Unai bamona “harihari gaudia” be hari kongregesen lalonai ita davari, a? Oibe, ita davaridia! Tanobada hegegemadai Dirava ena taunimanima edia kongregesen 87,000 bamona lalonai idia ita davaria, idia be elda gaukara idia karaia, ‘evanelia taudia, haroro taudia bona hadibaia taudia’ bamona idia gaukara goadagoada. (Efeso 4:11) Satani ia ura idia ese mamoe do idia hadikadia. To elda taudia be unai idia karaia totona Dirava ese Iesu amo kongregesen dekenai ia henidia lasi. Iehova ese unai tatau ia henia kongregesen idia naria totona, bona idia henunai ia atoa mamoe dainai, ia dekenai edia gaukara ibounai ena anina do idia gwauraia hedinarai. (Heberu 13:17) Bema oi be elda ta, Iehova ese oi dekenai dala namona ia kehoa, oiemu tadikaka dekenai do oi hamomokania oi be harihari gauna, eiava hahenamo ta. Unai oi karaia diba bema mai anina bada maduna hani oi huaia.
Nega Korikori ai Idia “Durua”
8. Ita ibounai be nega ta ta ai edena dala ai idia durua be namo?
8 Paulo ia gwau, unai “harihari gaudia” idia noho ena badina ginigunana be “Dirava ena taudia ibounai do [idia] durua totona.” (Efeso 4:12) Greek gado herevana “durua” ese gau ta “hamaoromaoroa” karana ia herevalaia. Ita be goevadae lasi taudia dainai, nega ta ta ai ita ibounai be heduru ita abia be namo—iseda lalohadai eiava kara be Dirava ena lalohadai bona ura hegeregerena ita “hamaoromaoroa” totona. Unai ita karaia totona, Iehova be mai ena lalokau ida “harihari gaudia” ia henia ita do idia durua. Edena dala ai unai idia durua?
9. Elda tauna ese ia kerere mamoe ta be edena bamona ia durua diba?
9 Nega haida, reana elda tauna idia boiria, kerere ia karaia mamoe ta ia durua totona. Elda tauna ese edena bamona ia durua diba? Galatia 6:1 ia gwau: “Unai tau do umui hakaua lou, mai manau danu.” Unai hegeregerena, sisiba ia henia neganai, elda tauna ese kerere tauna be hereva aukadia amo do ia gwau henia lasi. Namona be sisiba herevana ese sisiba ia abia tauna ia hagoadaia, namo lasi ia “hagaria.” (2 Korinto 10:9; mani Iobu 33:7 itaia.) Kerere tauna be reana ia hemarai, unai dainai mai ena lalokau mamoe naria tauna ese iena hemami do ia hadikaia lasi. Matahakani bona sisiba aukana be lalokau dainai bona mai lalokau ida sisiba aukana idia henia neganai, kerere tauna ena lalohadai eiava ena kara ia hamaoromaoroa diba, bona unai amo ia goada lou diba.—2 Timoteo 4:2.
10. Haida durua gaukarana ai dahaka idia karaia?
10 Iehova be ita idia durua totona “harihari gaudia” ia henia neganai, ia ura idia ese lauma dalanai ita idia hagoadaia bona ia ura edia kara namo dainai ena taunimanima ese do idia tohotohodia diba. (1 Korinto 16:17, 18; Filipi 3:17) Haida durua gaukara be kara dika taudia hamaoromaoroa gaukarana sibona lasi, to idia gini goada noho taudia idia hagoadaia danu dala maorona idia badinaia noho totona.a Hari inai negai, daradoko idia havaraia hekwakwanai momo idia noho dainai, idia gini goada noho totona momo be hahegoada idia abia be namo. Haida be mai hebogahisi ida heduru idia abia be namo, edia lalohadai be Dirava ena lalohadai ida ia hegeregere totona. Hegeregere, abidadama Keristani taudia haida idia mamia idia be hegeregere lasi eiava anina lasi. Reana, unai bamona “lalo-metau taudia” idia mamia Iehova ese idia ia lalokau henia diba lasi bona ena be idia hekwarahi bada Dirava ena hesiai gaukara idia karaia namonamo totona, to do ia abia dae diba lasi. (1 Tesalonika 5:14, NW ) To unai bamona lalohadai be Dirava ese ia idia tomadiho henia taudia ia laloa dalana ida ia hegeregere lasi.
11. Idia laloa idia be anina lasi taudia durua totona, elda taudia be dahaka idia karaia diba?
11 Elda taudia e, dahaka umui karaia diba unai bamona taudia umui durua totona? Mai hebogahisi ida Baibel siri haida, Iehova be iena hesiai taudia ta ta ia lalokau henia idia hamomokania siridia, be idia dekenai umui hahedinaraia bona umui hamaorodia unai Baibel siri be mai edia anina idia dekenai danu. (Luka 12:6, 7, 24) Umui durudia bona do idia lalo-parara Iehova ese idia ia “veria mai” iena hesiai gaukara idia karaia totona, unai dainai idia ia laloa bada. (Ioane 6:44) Umui hamaorodia idia sibona ese unai bamona hemami idia abia lasi—Iehova ena abidadama hesiai taudia momo be unai bamona idia laloa danu. Nega ta peroveta tauna Elia ia lalo-metau bada bona ia ura do ia mase. (1 King Taudia 19:1-4) Aposetolo edia nega ai horoa Keristani taudia haida idia mamia edia ‘kudouna ese idia kota henia’ bamona. (1 Ioane 3:20) Ita diba Baibel negadia ai idia noho abidadama taudia “be taunimanima sibona, ita bamona” ese ita ia hagoadaia. (Iamesi 5:17) Lalohisihisi taudia ida Gima Kohorona bona Awake! magasin lalonai idia noho hagoadaia herevadia umui kikilaia diba. Unai bamona taudia be mai lalokau ida umui hagoadaia lou karana be Dirava, “harihari gaudia” bamona umui ia halaoa Diravana, ese do ia laloaboio lasi.—Heberu 6:10.
Mamoe Serina ‘Haginia Goada’
12. “Keriso ena tauanina do ia gini goada” ena anina be dahaka, bona mamoe serina ia gini goada totona dahaka be mai anina bada?
12 Unai “harihari gaudia” idia noho ena badina iharuana be “Keriso ena tauanina do ia gini goada totona.” (Efeso 4:12) Paulo be laulau dalanai ia hereva. “Gini goada” ese ruma haginia karana ia hahedinaraia, bona “Keriso ena tauanina” be taunimanima—Keristani kongregesen ena horoa taudia—ia herevalaia. (1 Korinto 12:27; Efeso 5:23, 29, 30) Elda taudia ese edia tadikaka idia durudia lauma dalanai do idia goada totona be mai anina bada. Edia gaukara badana be mamoe serina do ‘idia hagoadaia’ idia ura lasi idia hadikaia. (2 Korinto 10:8) Mamoe serina hagoadaia dalana badana be lalokau, badina “lalokau ese goada ia havaraia.”—1 Korinto 8:1.
13. Ma ta ena hemami laloa karana ena anina be dahaka, bona dahaka dainai elda taudia ese unai kara idia hahedinaraia be mai anina bada?
13 Lalokau ena kara ta be ta ena hemami laloa karana, unai ese elda taudia ia durua mamoe serina idia haginia goada totona. Ta ena hemami laloa anina be ta dekenai ia vara gauna oi laloa bada—edia lalohadai bona hemami, edia goada oi laloa. (1 Petero 3:8) Dahaka dainai elda taudia ese unai kara idia hahedinaraia be mai anina bada? Badina Iehova—“harihari gaudia” ia henia tauna—be ta ena hemami ia laloa Diravana. Iena hesiai taudia be hisihisi idia davaria neganai, ia hebogahisi henidia. (Esodo 3:7; Isaia 63:9) Edia goada ena hetoana ia laloa. (Salamo 103:14) Vadaeni, elda taudia ese ta ena hemami idia laloa karana be edena bamona idia hahedinaraia diba?
14. Elda taudia be edena dala ai ma haida edia hemami idia laloa bada karana idia hahedinaraia diba?
14 Ena lalona ia manoka tauna be idia dekenai ia lao neganai, idia kamonai, bona ena hemami idia laloa bada. Idia hekwarahi edia tadikaka edia mauri, edia kara, bona noho dalana idia lalo-pararalaia totona. Bena lalo-parara bona hebogahisi mamoe naria taudia ese Baibel amo hahegoada sisiba idia henia neganai, mamoe ese do idia abidia dae haraga. (Aonega Herevadia 16:23) Ma ta ena hemami laloa karana ese elda taudia do ia doria ma haida edia goada ia hegeregere lasi dainai idia vara hemami idia laloa totona. Hegeregere, reana hesiai gaukara idia laloa bada Keristani taudia haida edia mamina ia dika, badina idia buruka eiava gorere dainai Dirava ena hesiai gaukara idia karaia badabada diba lasi. Haida be edia haroro gaukara hanamoa totona heduru idia abia be gau badana. (Heberu 5:12; 6:1) Ta ena hemami laloa karana ese elda taudia do ia doria ma haida hagoadaia totona “hagoadaia herevadia” do idia tahua. (Hadibaia Tauna 12:10) Iehova ena mamoe be goada bona heduru idia abia neganai, edia lalokau Dirava totona ese idia do ia doria, iena hesiai gaukara lalonai do idia gaukara goada totona!
Lalo-Tamona Idia Habadaia Tataudia
15. “Abidadama do ia tamona” ena anina be dahaka?
15 “Harihari gaudia” idia noho ena badina ihatoina be idia ese ita idia durua “ita ibounai iseda abidadama do ia tamona, bona iseda diba Dirava ena Natuna dekenai danu be tamona.” (Efeso 4:13) Unai hereva “abidadama do ia tamona” ese lalo-tamona ia herevalaia, idia abidadama henia gaudia sibona lasi to abidadama taudia danu ia herevalaia. Dirava ese “harihari gaudia” ita dekenai ia henia ena badina ma ta be inai—iena taunimanima huanai lalo-tamona idia habadaia totona. Edena dala ai unai idia karaia?
16. Dahaka dainai elda taudia huanai lalo-tamona ia noho be mai anina bada?
16 Gau ginigunana be, elda taudia huanai lalo-tamona ia noho be namo. Bema mamoe naria taudia idia parara, reana mamoe idia naria namonamo lasi. Reana anina lasi hebou latadia idia karaia bona anina bada lasi gaudia idia hepapahuahulaia dainai, mai anina bada nega idia haorea kava. Unai nega idia gaukaralaia diba mamoe naria gaukarana idia karaia totona. (1 Timoteo 2:8) Elda taudia edia lalohadai be idauidau dainai, reana idia herevalaia gaudia ibounai do idia abia dae haraga lasi. Ena be idia lalo-tamona to idia herevahereva namonamo lalonai edia lalohadai idauna be dala maorona ai idia gwauraia hedinarai diba. Elda taudia be ta ena hereva idia hahemaoro henia haraga lasi, to mai hemataurai ida ta ta edia hereva idia kamonai henia, bona unai amo edia lalo-tamona idia gimaia. Bona bema elda oreana ese ia abia hidi herevana be Baibel ena hakaua hereva ta ia utua lasi, namona be idia ta ta ese unai hereva idia badinaia bona idia durua. Sibodia edia lalohadai idia dogoatao auka lasi karana ese ia hahedinaraia idia be ‘Dirava amo ia mai aonega, mai ena maino, bona laloa manada’ ese ia hakaudia.—Iamesi 3:17, 18.
17. Kongregesen lalonai elda taudia ese lalo-tamona be edena bamona idia habadaia diba?
17 Elda taudia idia ura kongregesen lalonai lalo-tamona idia habadaia danu. Bema kongregesen hapararaia karadia—hegeregere ta ia hahisia udu mauri, haida edia kara ena badina gwauraia dika, eiava heiriheiri havaraia karadia—ese maino idia hadikaia, idia be mai edia ura ida heduru sisiba idia henia. (Filipi 2:2, 3) Hegeregere, reana elda taudia be haida idia diba, unai taudia be ma haida edia kara idia gwauraia dika momo eiava haida dekenai idia vara gaudia lalonai idia vareai kava, eiava idia tahua momo. (1 Timoteo 5:13; 1 Petero 4:15) Elda taudia ese unai bamona taudia do idia durua bena do idia itaia, unai kara be Dirava ese ita dekenai ia hadibaia karana, “ta ta sibona ena metau, ena metau do idia huaia” karana unai, ida ia hegeregere lasi. (Galatia 6:5, 7; 1 Tesalonika 4:9-12) Baibel ena siri amo, do idia hahedinaraia Iehova be gau momo ia rakatania ita sibona iseda lalona hegeregerena ai ita abia hidi totona, bona ita ta be ma haida ese idia abia hidi karana ita hahemaoro henia be maoro lasi. (Mataio 7:1, 2; Iamesi 4:10-12) Lalo-tamona ai do ita gaukara hebou totona, kongregesen lalonai abidadama bona hemataurai karana ia noho be gau badana. “Harihari gaudia” ese nega korikorina ai Baibel ena sisiba idia henia karana amo, ita idia durua iseda maino bona lalo-tamona karana ita gimaia totona.—Roma 14:19.
Mamoe Serina Idia Gimaia
18, 19. (a) “Harihari gaudia” ese daidia amo ita idia gimaia? (b) Elda taudia ese dahaka dika ma ta amo mamoe serina idia gimaia, bona dahaka idia karaia mamoe idia gimaia totona?
18 Iehova ese “harihari gaudia” ia henia ena badina ihahanina be ‘koikoi taudia edia hadibaia hereva ese ita idia hakaua kerere, lai bamona ita ia doria lao doria mai’ karana amo ita idia gimaia. (Efeso 4:14) Haida idia gwau Greek gado herevana korikorina idia hahanaia “koikoi” ena anina be “laki gadara dekenai koikoi diba momo karana.” Unai kara be hereva momokani idia negea taudia edia kara bamona, ani? Keristani taudia momokanidia ese edia abidadama idia rakatania totona, aonega hepapahuahu herevadia amo Baibel ena hereva idia mogea. Elda taudia be unai “uda sisia dikadia” dainai do idia gima be namo!—Kara 20:29, 30.
19 Iehova ena mamoe be dika ma haida amo idia gimadia danu be gau badana. Idaunegai mamoe naria tauna Davida be animal dikadia amo mai gari lasi ida tamana ena mamoe serina ia gimaia. (1 Samuela 17:34-36) Hari inai negai danu, reana nega haida mamoe edia namo idia tahua Keristani naria taudia be mai gari lasi ida idia kara be namo, Iehova ena mamoe, bona ia lalonai idia noho goada momokani lasi taudia, be dika bona hisihisi idia havaraia taudia amo idia gimaia totona. Elda taudia ese karaharaga sibodia edia ura dikadia karaia totona ma haida idia koia bona edia lalona idia veria taudia be kongregesen amo idia kokia.b—1 Korinto 5:9-13; mani Salamo 101:7 itaia.
20. “Harihari gaudia” ese ita idia naria lalonai, dahaka dainai ita noho namo diba?
20 Unai “harihari gaudia” dainai ita tanikiu bada be namo! Mai hebogahisi ida ita idia durua, mai lalokau ida ita idia haginia goada, mai edia ura ida iseda lalo-tamona idia habadaia, bona mai gari lasi ida ita idia gimaia, oibe, mai lalokau ida ita idia naria dainai ita noho namo diba. To unai “harihari gaudia” ese kongregesen lalonai idia huaia maduna be edena bamona idia laloa be namo? Bona edena dala ai ita hahedinaraia diba idia ita laloa bada? Unai henanadai be hereva gabena ese do ia herevalaia.
[Footnotes]
a Greek Septuagint Baibel lalonai, unai hereva tamona idia hahanaia “durua” be Salamo 17[16]:5 lalonai idia gaukaralaia. Unai siri lalonai, abidadama tauna Davida ia guriguri Iehova ena dala amo do ia raka siri lasi.
b Haheitalai haida Gima Kohorona, May 1, 1980 ena rau 23-4 ai, “Duahia Taudia Edia Henanadai,” bona January 1, 1997 ena rau 26-9 ai, “Dika Do Ita Negea Momokani be Namo” mani oi itaia.
Oi Laloatao, A?
◻ “Harihari gaudia” be daidia, bona dahaka dainai Dirava ese Keriso amo idia ia henia kongregesen dekenai?
◻ Elda taudia be mamoe serina idia durua totona, edia maduna be edena bamona idia hagugurua?
◻ Edia tadikaka idia haginia goada totona elda taudia be dahaka idia karaia diba?
◻ Elda taudia ese kongregesen ena lalo-tamona be edena bamona idia habadaia diba?
[Picture on page 10]
Ma ta ena hemami laloa bada karana ese elda taudia ia durua daradoko taudia idia hagoadaia totona
[Picture on page 10]
Elda taudia idia lalo-tamona karana ese kongregesen lalonai lalo -tamona ia habadaia