“Harihari Gaudia” Oi Laloa Bada
“Idia [gaukara goada] taudia, be mai mataurai danu do umui kamonai henidia. Edia gaukara dainai do umui lalokau henidia bona mataurai henidia.”—1 TESALONIKA 5:12, 13.
1. Kara 20:35 ena hereva hegeregerena, henia karana ena siahu ese dahaka ia havaraia? Haheitalai gwauraia.
“HENIA kara ena moale be bada, abia kara ena moale be maragi.” (Kara 20:35) Iesu ena hereva be oi dekenai ia vara momokani negana ta oi laloatao, a? Reana oi ese emu lalokau tauna ta dekenai harihari gauna ta oi henia. Oi abia hidi namonamo, badina oi ura emu lalokau tauna ese do ia ura henia bada. Emu lalokau tauna ena vairana toana ese ia hahedinaraia ia moale bada—bona unai ese emu kudouna ia hamoalea! Bema mai lalohadai maorona ida harihari gauna ta ita henia, unai be lalokau hahedinaraia karana, bona lalokau hahedinaraia karana be mai ena siahu ita dekenai moale ia havaraia totona.
2, 3. (a) Dahaka dainai ita gwau diba ta ena moale ese Iehova ena moale ia hanaia lasi, bona “harihari gaudia” ia henia karana ese ena kudouna be edena bamona ia hamoalea diba? (b) Ita ura lasi dahaka ita karaia Dirava ena harihari gauna dekenai?
2 Vadaeni, daika ena moale ese Iehova, “harihari gaudia namodia momokani ibounai” ia henia tauna, ena moale ia hanaia diba? (Iamesi 1:17; 1 Timoteo 1:11) Ia henia harihari gaudia ibounai be lalokau dainai ia henia. (1 Ioane 4:8) Unai be momokani Dirava ese Keriso amo kongregesen dekenai ia henia “harihari gaudia” dekenai. (Efeso 4:8) Dirava ese mamoe serina idia naria totona elda taudia ia henia karana ese ena lalokau bada ena taunimanima totona ia hahedinaraia. Unai taudia idia abia hidi namonamo—gau badana be edia kara be Baibel ena taravatu ida do ia hegeregere. (1 Timoteo 3:1-7; Tito 1:5-9) Idia diba idia be “mai hebogahisi ida” mamoe do idia naridia be gau badana, bena mamoe ese unai bamona mamoe naria taudia dainai do idia tanikiu bada. (Kara 20:29, NW; Salamo 100:3) Iehova ia itaia iena mamoe edia kudouna be unai bamona tanikiu karana amo idia honu neganai, iena kudouna ia moale bada!—Aonega Herevadia 27:11.
3 Ita ura lasi Dirava amo ia mai harihari gauna ena namo ita hamaragia; to ita ura bada iena harihari gaudia ita laloa bada. Unai dainai, henanadai rua idia vara: Elda taudia ese edia maduna kongregesen lalonai be edena bamona idia laloa be namo? Bona mamoe be edena dala ai idia hahedinaraia diba unai “harihari gaudia” idia laloa bada?
‘Ai be Umui Danu Ai Gaukara Hebou Taudia’
4, 5. (a) Paulo ese kongregesen be dahaka ida ia hahegeregerea, bona dahaka dainai unai be haheitalai namona? (b) Paulo ese ia gwauraia haheitalai ese ita ta ta ita laloa bona kara henia dalana dekenai dahaka ia hahedinaraia?
4 Iehova ese kongregesen lalonai “harihari gaudia” dekenai siahu sisina ia henia. Momokani, elda taudia idia ura lasi edia siahu idia gaukaralaia kerere, to idia be goevadae lasi taudia dainai, idia diba unai ia vara diba. Vadaeni, mamoe oredia huanai idia sibodia be edena bamona idia laloa be namo? Aposetolo Paulo ese ia gwauraia haheitalaina mani oi laloa. “Harihari gaudia” idia noho ena badina ia kikilaia murinai, Paulo ia gwau: “Keriso ena mauri dala lalonai do ita tubu daekau momokani, bona Keriso be iseda orea ena kwarana. Keriso be kwarana dainai, tauanina ena kahana ibounai be ia dainai idia noho hebou bona idia gaukara hebou, bona kara ibounai be laloa tamona dekena amo idia karaia. Ta ta edia gaukara, edia gaukara korikori idia karaia noho. Unai dala dekenai tauanina be lalokau dekena amo ia tubu daekau noho.” (Efeso 4:15, 16) Paulo ese kongregesen, unai be elda taudia bona ma haida, be taunimanima ena tauanina ida ia hahegeregerea. Dahaka dainai unai be haheitalai namona?
5 Taunimanima ena tauanina be mai ena kahana idauidau to kwarana be tamona. To, tauanina ena kahana ibounai—masolo, hemami varovaro, bona rara varovaro—be mai anina bada. Kahana ta ta be mai anina bada bona tauanina ibounai idia hagoadaia bona idia hahairaia. Unai hegeregerena, kongregesen be mai ena memba taudia idauidau, to idia ta ta—herevana idia be matamata eiava buruka, tauanina be goada eiava goada lasi—ese kongregesen be lauma dalanai idia hagoadaia bona idia hahairaia. (1 Korinto 12:14-26) Namo lasi ta ia laloa ia be anina lasi. Ma danu, namo lasi ta ia laloa ia be haida ia hereaia, badina ita ibounai—mamoe naria taudia bona mamoe danu—be tauanina ena kahana, bona kwarana tamona sibona ia noho, unai be Keriso. Paulo ese unai dala ai ita ta ta ita lalokau heheni, ita heduru heheni bona ita hemataurai heheni karana ena laulau namona ia hahedinaraia. Elda taudia be unai idia diba ese ia durudia, kongregesen lalonai idia huaia maduna idia laloa namonamo totona.
6 Unai “harihari gaudia” idia ura lasi edia tadikaka edia mauri eiava abidadama karana idia biaguna. Ena be Paulo be aposetolo dagina ena siahu ia abia, to mai manau ida Korinto taudia ia hamaorodia, ia gwau: “Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.” (2 Korinto 1:24) Paulo ia ura lasi ena tadikaka edia abidadama bona mauri dalana ia biagua. Momokani, ia itaia unai ia karaia be anina lasi, badina ia diba idia be mai edia abidadama tatau bona hahine bona Iehova ena orea lalonai idia noho, badina idia ura kara maoromaoro idia badinaia. Unai dainai, Paulo be ia sibona bona ena loaloa hebou turana Timoteo ia herevalaia, bona ena hereva ena anina be inai: ‘Aiemai gaukara be umui danu do ai gaukara, mai moale ida Dirava ena hesiai gaukara umui karaia totona.’ (2 Korinto 1:1) Unai be manau karana momokani!
7. Mai edia manau elda taudia ese edia maduna kongregesen lalonai be edena bamona idia laloa, bona edia gaukara hebou taudia be edena bamona idia abidadama henidia?
7 Hari inai negai, “harihari gaudia” be unai gaukara tamona idia karaia. Idia be ‘iseda moale idia havaraia totona, ita danu idia gaukara hebou taudia.’ Mai edia manau elda taudia idia diba Dirava ena hesiai gaukara lalonai haida edia gaukara ena bada be idia ese do idia gwauraia hidi lasi. Idia diba ena be haida idia hagoadaia edia haroro gaukara idia habadaia eiava idia hanamoa totona, to Dirava ena hesiai gaukara be edia kudouna amo idia ura karaia be namo. (2 Korinto 9:7 itaia.) Idia diba bema edia gaukara hebou taudia be idia moale, idia karaia diba gaukarana ibounai do idia karaia. Unai dainai edia kudouna amo idia ura edia tadikaka do idia durua mai edia moale ida Iehova ena hesiai gaukara do idia karaia.—Salamo 100:2, NW.
Ibounai Oi Durua mai Moale ida Iehova Ena Hesiai Gaukara Idia Karaia
8. Edena dala haida ai elda taudia ese edia tadikaka idia durudia mai moale ida Iehova ena hesiai gaukara idia karaia totona?
8 Elda taudia e, emui tadikaka be mai edia moale ida hesiai gaukara idia karaia totona, edena bamona umui durudia diba? Emu haheitalai amo oi hagoadadia diba. (1 Petero 5:3) Haroro gaukara lalonai mai moale bona ura bada ida oi gaukara, unai ese ma haida do ia hagoadaia emu haheitalai idia tohotohoa totona. Mai edia goada ibounai ida hesiai gaukara idia karaia taudia oi hanamodia. (Efeso 4:29) Mai momokani bona lalo-namo ida hanamoa herevadia oi gwauraia karana ese ma haida idia durua bena do idia mamia idia be gaukara namona idia karaia bona idia be mai anina bada. Unai ese mamoe ia hagoadadia bena idia ura Dirava ena hesiai gaukara do idia karaia namonamo. Ta be ma ta ida oi hahegeregerea lasi. (Galatia 6:4) Unai bamona hahegeregerea karana ese edia gaukara idia hanamoa totona ma haida ia hagoadaia lasi, to edia lalona do ia hamanokaia. Bona danu, Iehova ena mamoe ta ta be taunimanima idauidau—edia noho daladia bona diba be idauidau. Paulo bamona, oi hahedinaraia emu tadikaka oi abidadama henidia. Lalokau be “nega ibounai iena abidadama ia goada noho,” unai dainai kara namona be, do ita abia dae iseda tadikaka be Dirava idia lalokau henia bona idia ura ia idia hamoalea. (1 Korinto 13:7) Ma haida ‘oi matauraidia’ neganai, edia kara namodia do idia hahedinaraia. (Roma 12:10) Namona be oi diba momokani, mamoe oi hagoadadia bona oi durudia neganai, idia momo be edia goada bona diba ibounai ida Dirava ena hesiai gaukara do idia karaia, bona iena gaukara lalonai moale do idia davaria.—Mataio 11:28-30.
9. Idia gaukara hebou elda taudia be mai moale ida idia gaukara totona, idia ta ta ese elda taudia ma haida be edena bamona idia laloa be namo?
9 Bema mai manau ida oi laloa oi be ma haida ida ‘oi gaukara hebou tauna ta’ sibona, unai ese oi do ia durua mai moale ida emu gaukara oi karaia totona, bona idia ida oi gaukara hebou elda taudia edia diba do oi laloa bada. Elda taudia ta ta be mai edia aonega bona diba bona idia gaukaralaia diba kongregesen durua totona. (1 Petero 4:10) Reana ta be hadibaia tauna namona. Reana ma ta be gaukara ia haheaua namonamo tauna. Bona reana ma ta be mai ena lalokau bona hebogahisi karadia dainai momo idia ura ia idia hereva henia. Momokani, elda tamona ese unai harihari gaudia ibounai ia abia lasi. Vadaeni, bema elda ta be harihari gauna ta ia abia—hegeregere, hadibaia karana ia diba namonamo—ia be elda ma ta ia hereaia, a? Lasi vaitani! (1 Korinto 4:7) Danu, elda ta ena diba dainai oi mama be namo lasi, eiava ma ta ena diba dainai haida ese idia hanamoa neganai, namo lasi oi laloa oi be hegeregere lasi. Namona be oi laloatao, oi danu be mai emu diba bona Iehova ese unai ia itaia. Bona ia ese oi ia durua diba unai gaudia oi hanamoa bona oi gaukaralaia emu tadikaka oi durua totona.—Filipi 4:13.
‘Umui Kamonai Bona Idia Henunai Umui Noho’
10. Dahaka dainai ita hahedinaraia “harihari gaudia” ita laloa bada be kara namona?
10 Harihari gauna ta ita abia neganai, gau badana be ita hahedinaraia unai gauna ita laloa bada. Kolose 3:15 ia gwau: “Do umui tanikiu henia.” Vadaeni, “harihari gaudia,” Iehova ese ita ia henia mai dava bada harihari gaudia, be edena bamona? Oibe, ita be Iehova, Harihari Gaudia Henia Tauna, ita tanikiu henia be namo. To, unai “harihari gaudia” ta ta be edena bamona? Edena bamona ita hahedinaraia diba idia ita laloa bada?
11. (a) Edena dala ai “harihari gaudia” ita laloa bada karana ita hahedinaraia diba? (b) “Kamonai” bona “henunai noho” herevadia edia anina be dahaka?
11 Ita hahedinaraia unai “harihari gaudia” ita laloa bada bema Baibel amo idia henia sisiba bona idia abia hidi gaudia do ita badinaia haraga. Baibel ese ita ia sisiba henia: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” (Heberu 13:17) Mani oi itaia, namona be gunalaia taudia ita “kamonai” henidia sibona lasi to idia ‘henunai do ita noho’ danu. Greek gado herevana idia hahanaia “henunai noho” ena anina korikorina be “ta ena lalohadai oi badinaia.” Baibel ia diba bada tauna ta, R. C. H. Lenski be inai hereva “kamonai” bona “henunai noho” ia herevalaia neganai, ia gwau: “Bema ta idia hamaoroa dahaka do ia karaia be namo, bona ena lalona idia veria bona ia abia dae unai kara be maoro bona namo do ia havaraia, bena ia karaia neganai, ia be kamonai karana ia hahedinaraia; . . . ia sibona ena lalohadai be ia idau neganai, ma haida edia lalohadai badinaia karana ia hahedinaraia.” Bema gunalaia taudia idia abia hidi gaudia ita lalo-pararalaia bona ita abia dae, reana ita kamonai henia haraga. To, bema idia abia hidi gauna ta ena badina ita lalo-pararalaia lasi be edena bamona?
12. Ena be idia abia hidi gauna ta ena badinai ita lalo-pararalaia lasi, dahaka dainai idia henunai ita noho, eiava edia lalohadai ita badinaia be namo?
12 Unai ia vara neganai, namona be idia henunai do ita noho, eiava edia lalohadai ita badinaia. Badina be dahaka? Badina ta be, ita abia dae momokani inai lauma dalanai idia lo tatau be iseda namo idia laloa bada. Bona danu, idia diba goevagoeva Iehova ese idia henunai ia atoa mamoe serina dainai ia dekenai edia gaukara ena anina do idia gwauraia hedinarai. (Iamesi 3:1) Ma danu, namona be ita laloatao idia abia hidi gauna ena badina, idia hedinarai lasi gaudia, ita diba lasi.—Aonega Herevadia 18:13.
13. Elda taudia ese ta idia hahemaoro henia neganai, dahaka ese ita do ia durua idia henunai ita noho totona?
13 Ta idia hahemaoro henia neganai, idia henunai ita noho, a? Momokani, reana unai be auka, bema idia abia hidi murimuri ai do idia atoa tauna be iseda lalokau tauna ta—iseda varavara eiava tura namona ta. Unai ia vara neganai danu, namona be unai “harihari gaudia” edia hahemaoro herevana do ita badinaia. Idia be mai edia dala unai hekwakwanai idia laloa namonamo to ita be lasi, bona idia vara gaudia idia diba namonamo, to reana ita be ita diba lasi. Unai tadikaka be nega momo unai bamona hahemaoro karadia idia lalo-hekwarahilaia; ‘Iehova ena hahemaoro gaukara’ idia karaia be maduna badana ta. (2 Sivarai 19:6) Dala idia tahua hebogahisi idia hahedinaraia totona, badina idia diba ‘Iehova be kara dika ia gwauatao noho.’ (Salamo 86:5) To idia ese kongregesen ena goeva idia naria be namo, bona Baibel ena hakaua herevana be idia helalo-kerehai lasi kara dika taudia do idia atoa murimuri dekenai. (1 Korinto 5:11-13) Nega momo, kara dika tauna ese unai hahemaoro herevana ia abia dae. Reana unai matahakani ese do ia durua ia laloa maoromaoro totona. Bema ita, iena lalokau taudia, be elda taudia henunai ita noho bona unai hahemaoro herevana ita badinaia, iseda kara amo reana ia ita durua unai matahakani amo namo ia davaria totona.—Heberu 12:11.
‘Do Umui Matauraidia’
14, 15. (a) Tesalonika Ginigunana 5:12, 13 ena hereva hegeregerena, dahaka dainai elda taudia ita lalodia be namo? (b) Dahaka dainai ita gwau diba elda taudia be ita huanai idia “gaukara goada taudia”?
14 Ita hahedinaraia unai “harihari gaudia” ita laloa bada dalana ma ta be, idia ita matauraia. Paulo be Tesalonika kongregesen taudia ia tore henia neganai, ia sisiba henidia ia gwau: “Idia [gaukara goada] taudia be mai mataurai danu do umui kamonai henidia. Edia gaukara dainai do umui lalokau henidia bona mataurai henidia.” (1 Tesalonika 5:12, 13) “Idia gaukara goada”—unai hereva ese ita totona sibona idia henia elda taudia ia gwauraia namonamo, ani? Nega sisina lalonai, mani unai tadikaka namodia ese idia huaia maduna metauna ita laloa.
15 Idia momo be mai edia ruma bese taudia bona moni gaukara idia karaia edia ruma bese idia naridia totona. (1 Timoteo 5:8) Bema elda tauna be mai ena natudia, namona be ena nega bona heduru do ia henia ena natudia dekenai. Reana edia sikuli gaukara dekenai do ia durua, bona danu, moale karadia haida do ia palanilaia matamata taudia ese edia goada idia gaukaralaia totona. (Hadibaia Tauna 3:1, 4) Mai anina bada gauna be, iena ruma bese be lauma dalanai ia naria, ruma bese ena Baibel stadi ia karaia hanaihanai, haroro gaukara lalonai idia danu ia gaukara, bona Keristani heboudia dekenai ia abidia lao. (Deuteronomi 6:4-7; Efeso 6:4) Namona be ita laloaboio lasi elda taudia be ita ese ita huaia maduna idia huaia bona maduna ma haida idia huaia danu. Unai maduna haida be: hebou ena hereva idia hegaegaelaia, mamoe naria gaukara idia karaia, kongregesen ena namo lauma dalanai idia naria bona, nega haida, hahemaoro gaukara idia karaia. Haida be sekit hebouheboudia, distrik hebouheboudia, Kingdom Hall haginia gaukara, bona Hospital Liaison Committee gaukara idia karaia danu. Momokani, unai tadikaka be idia “gaukara goada” noho!
16 Edena dala ai ita hahedinaraia diba idia ita matauraia? Baibel ena aonega herevana ta ia gwau: “Nega korikori dekenai, hereva namona ta ia gwauraia, be namo bada!” (Aonega Herevadia 15:23; 25:11) Mai momokani ida ita gwauraia hanamoa bona hagoadaia herevadia amo ita hahedinaraia idia karaia goadagoada gaukarana ita laloa bada. Bona danu, namo lasi gau maragimaragi ibounai dainai idia dekenai ita lao. To, namona be ita gari lasi, to heduru ita abia totona, idia dekenai ita lao. Nega haida reana ‘iseda kudouna be ia hisihisi’ bada bona “hadibaia gaukara namona” idia karaia taudia amo Baibel ena heduru, hahekau, eiava sisiba ita abia be namo. (Salamo 55:4; 1 Timoteo 3:2) Danu, namona be do ita laloatao elda tauna ese ita dekenai ia henia diba negana be mai hetoana, badina iena ruma bese bona kongregesen taudia ma haida edia dabu gaudia ia dadaraia diba lasi. Unai gaukara goadagoada tadikaka ita ‘hebogahisi henidia’ neganai, anina lasi gaudia dekenai edia nega do ita haorea kava lasi. (1 Petero 3:8) To, namona be ita dekenai idia henia diba nega bona heduru ita laloa bada be namo.—Filipi 4:5.
17, 18. Elda taudia edia adavadia momo be dahaka gau haida idia reaia, bona edena dala ai ita hahedinaraia diba unai mai abidadama taihudia ita laloa bada?
17 Elda taudia edia adavadia be edena bamona? Idia danu ita matauraia be namo, ani? Oibe, badina idia ese edia adavadia be kongregesen ena gaukara totona idia henia. Unai idia karaia dainai, nega momo idia ese gau haida idia reaia. Nega haida, elda taudia be hanuaboi ai kongregesen gaukara idia karaia, to bema unai gaukara be lasi, unai nega be edia ruma bese ida idia noho diba. Kongregesen momo lalonai, edia adavadia be Iehova ena mamoe idia naria gaukarana idia karaia diba totona, mai edia abidadama Keristani hahinedia be mai edia ura ida gau haida idia reaia.—2 Korinto 12:15 itaia.
18 Edena dala amo ita hahedinaraia diba unai mai abidadama Keristani taihudia ita laloa bada? Anina lasi gaudia dainai edia adavadia edia nega ita haorea kava lasi karana amo. Bona danu, idia ita laloa idia hahedinaraia hereva kwadogidia edia siahu ita laloaboio lasi. Aonega Herevadia 16:24 ia gwau: “Hereva namodia mai bogahisihisi danu, be hani bamona, edia mamina be namo, lauma dekenai, bona tauanina dekenai danu.” Mani ekspiriens ta ita laloa. Keristani hebou ta murinai, headava tauna ta mai ena adavana ese elda ta idia lao henia bona idia nanadaia bema ia danu edia natuna mero matamatana do idia herevalaia diba. Elda tauna be idia ida ia herevahereva neganai, ena adavana be mai manau ida ia naria. Unai murinai, mero sinana ese elda tauna ena adavana ia hamaoroa, ia gwau: “Lau ura oi lau tanikiu henia, badina oiemu adavana ese nega ia henia egu ruma bese ia durua totona.” Unai lalona hanamoa hereva kwadogidia ese elda tauna ena adavana ena kudouna ia hamarerea momokani.
19. (a) Elda oreana be mai abidadama ida dahaka gaukara idia hagugurua noho? (b) Namona be ita ibounai iseda lalona ita hadaia dahaka ita karaia totona?
19 Elda taudia idia noho mamoe serina idia naria totona be Iehova ena “harihari gaudia namodia” ta. (Iamesi 1:17) Lasi, unai tatau be goevadae taudia lasi; ita ibounai bamona, idia be kerere idia karaia danu. (1 King Taudia 8:46) To, tanobada hegegemadai kongregesen lalodiai idia noho mai abidadama elda taudia edia orea be Iehova ese ia henidia gaukarana—mamoe serina idia durua, idia haginia goada, edia lalo-tamona idia habadaia, bona idia gimaia gaukarana—idia karaia guguru noho. Namona be elda taudia ta ta be ena lalona do ia hadaia mai lalokau ida Iehova ena mamoe serina do ia naria noho, unai amo do ia hamomokania ia be harihari gauna ta, eiava hahenamo ta ena tadikaka dekenai. Bona namona be ita ibounai ese iseda lalona ita hadaia unai “harihari gaudia” ita kamonai henidia, bona idia henunai ita noho, bona edia gaukara goada dainai ita matauraidia, unai amo ita hahedinaraia idia ita laloa bada. Iehova ese unai lalokau taudia ia henia dainai ita tanikiu henia bada be namo. Unai taudia be ena mamoe dekenai inai bamona idia hereva: ‘Aiemai gaukara be umui ai durua mai moale ida Dirava ena hesiai gaukara umui karaia totona’!
Edena Bamona Do Oi Haere?
◻ Dahaka dainai kongregesen be tauanina ida ita hahegeregerea be maoro?
◻ Elda taudia ese edia tadikaka be edena bamona idia durudia diba, mai moale ida Iehova ena hesiai gaukara idia karaia totona?
◻ Badina be dahaka ita ese gunalaia taudia ita kamonai henia sibona lasi to idia henunai ita noho danu be namo?
◻ Edena dala ai ita hahedinaraia diba ita be elda taudia ita lalodia?
6. Ena be Paulo be aposetolo dagina ena siahu ia abia, to edena bamona ia ese manau ia hahedinaraia?
16. Elda taudia ita matauraia daladia haida mani oi gwauraia.
[Picture on page 16]
Elda taudia e, mai edia goada ibounai ida hesiai gaukara idia karaia taudia umui hanamodia
[Picture on page 17]
Haroro gaukara ai edia gaukara goadagoada karana amo elda taudia ese ruma bese taudia bona ma haida idia durua diba mai moale ida edia hesiai gaukara idia karaia totona
[Picture on page 18]
Idia gaukara goadagoada elda taudia ita lalodia bada!