Taunimanima Ita Durua Iehova Kahirakahira Idia Lao Totona

“Tamana dekenai do idia lao taudia ibounai edia dala ta be lasi, lau sibona.”​—IOANE 14:6.

1. Ia toreisi lou murinai Iesu ese dahaka hahegani ia henia ena hahediba taudia dekenai, bona Iehova ena Witness taudia ese unai hahegani idia badinaia dainai, dahaka ia vara?

IESU KERISO ese ena murinai idia raka taudia ia hagania ‘bese ibounai be diba tahua taudia do idia halaoa, bona Tamana, Natuna, bona Lauma Helaga ena ladanai do idia bapatiso henia idia dekenai.’ (Mataio 28:​19) Idia hanaia lagani 10 lalodiai, Iehova ena Witness taudia ese taunimanima milioni toi mai kahana idia durua, Dirava kahirakahira idia lao totona. Bena unai taudia be Dirava ena ura karaia totona edia mauri idia gwauhamatalaia bona bapatiso idia abia karana amo unai idia hahedinaraia. Ita moale bada, badina idia ita durua, Dirava kahirakahira idia lao totona!​—Iamesi 4:8.

2. Ena be taunimanima matamatadia momo ese bapatiso idia abia, to dahaka ia vara?

² Tano haida dekenai, ena be hahediba taudia matamatadia momo ese bapatiso idia abia, to Basileia harorolaia taudia edia namba ia bada daekau lasi. Momokani, ita diba haida idia mase, oibe, lagani ta ta ai 1 pesen bamona idia mase. To, idia hanaia lagani haida lalodiai, badina idauidau dainai momo idia moru. Dahaka dainai? Inai hereva bona hereva gabena lalonai, Iehova ese ia kahirakahira dekenai taunimanima ia veria lao dalana bona haida idia moru ena badina idauidau do ita herevalaia.

Iseda Haroro Gaukara Ena Badina

3. (a) Edena dala ai Iesu ena hahediba taudia idia abia hahegani be Apokalupo 14:6 ai ia hedinarai aneruna ia abia gaukarana ida ia hegeregere? (b) Basileia sivaraina idia laloa totona taunimanima edia lalona veria dalana namona be dahaka, to dahaka hekwakwanai ia noho?

³ Hari inai “dokona negana” lalonai, Iesu ena hahediba taudia ese idia abia hahegani be “Basileia ena Sivarai Namona” ena diba maorona do idia harorolaia. (Daniela 12:4; Mataio 24:14) Edia gaukara be aneru ta ena gaukara hegeregerena, “iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia” dekenai. (Apokalupo 14:6) Hari inai tanobada taudia ese gau momo herea idia laloa dainai, taunimanima edia lalona ita veria Dirava ena Basileia idia laloa totona bona Iehova kahirakahira idia lao totona ita durudia dalana namona be idia dekenai paradaiso tanobadana ai mauri hanaihanai ena helaro ita kikilaia. Ita lalo-parara unai be namo, to Paradaiso dekenai do idia vareai sibona dainai Dirava ena taunimanima idia bamoa taudia be mauri ia lao henia dalana ai idia raka goada lasi.​—Mataio 7:​13, 14.

4. Iesu bona guba ena ataiai ia roho lao aneruna edia hereva hegeregerena, iseda haroro gaukara ena badina be dahaka?

⁴ Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Guba ena ataiai ia roho lao aneruna ese “noho hanaihanai Sivarai Namona” ia harorolaia bona tanobada dekenai idia noho taudia dekenai ia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.” (Apokalupo 14:7) Unai dainai, sivarai namona ita harorolaia ena badina badana be Keriso Iesu amo taunimanima ita durua Iehova kahirakahira idia lao totona.

Iseda Kara Iehova Ena Gaukara Lalonai

5. Paulo bona Iesu be edena hereva amo idia hahedinaraia ita ese sibona eda gaukara lasi to Iehova ena gaukara ita karaia?

⁵ Aposetolo Paulo be ena horoa Keristani tadikaka dekenai ia tore henidia neganai, ia ese ‘taunimanima be Dirava ena turana ai idia lao gaukarana’ ia herevalaia bona ia gwau Dirava ese Iesu Keriso ena mauri davalaia boubouna amo taunimanima be ena turadia ai ia halaoa. Paulo ia gwau unai be hegeregere “Dirava ese aiemai uduna dekena amo umui dekenai ia noia noho” bona “Keriso ena ladana dainai umui ai noia, Dirava . . . danu do umui turana karaia.” Unai be kudouna hamarerea lalohadaina! Herevana ita be “Keriso ena hereva gwauraia hedinarai” horoa taudia eiava gwaukau taudia mai iseda tanobada helarona, to namona be ita laloaboio lasi inai gaukara be iseda gaukara lasi to Iehova ena gaukara. (2 Korinto 5:​18-​20) Momokani, Iehova sibona ese taunimanima ia veria bona Keriso dekenai idia mai taudia ia hadibaia. Iesu ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba, vadaeni dokona dina dekenai unai tauna do lau hatorea isi. Peroveta taudia ese inai bamona idia torea, idia gwau, ‘Idia ibounai Dirava ese do ia hadibaia.’ Egu Tamana dekenai idia kamonai henia, bona iena hadibaia hereva idia abia dae taudia ibounai be lau dekenai idia mai.”​—Ioane 6:44, 45.

⁶ Hari inai nega ena dokona lalonai, edena dala ai Iehova ese taunimanima ia veria bona idia dekenai “abidadama ena iduara” ia kehoa? (Kara 14:27; 2 Timoteo 3:1) Dala badana be ena Witness taudia ese hahemauri bona inai tanobada dikana ena oromana ena hahemaoro sivaraina idia harorolaia. (Isaia 43:12; 61:​1, 2) Unai tanobada ibounai haroro gaukarana ese bese iboudiai ia hamarerea sisina​—nega daudau lasi murinai hahemaoro karana ese idia do ia hamarerea bada. Nega tamona ai, Dirava ena matana ai “kohu namodia” bamona taudia be inai tanobada ena oromana amo ia veria bona ena tomadiho momokanina ena “Dubu Helaga” lalonai noho namona idia davaria noho. Unai amo Iehova ese ena peroveta herevana, Hagai ese ia torea herevana, ia hagugurua. Ia gwau: “Lau ese bese ibounai do lau hamarerea, vadaeni bese ibounai edia kohu namodia be iniseni do idia mailaia, bona inai dainai Dubu Helaga be hairai dekenai do ia honu.”​—Hagai 2:​6, 7; Apokalupo 7:​9, 15.

7. Edena dala ai Iehova ese taunimanima edia kudouna ia kehoa bona ia bona ena Natuna kahirakahira dekenai ia veridia lao?

⁷ Iehova ese Dirava gari henia taudia​—“bese ibounai edia kohu hereadaedia”​—edia kudouna ia kehoa, ena Witness taudia ese idia gwauraia gaudia idia “kamonai henia” totona. (Hagai 2:​7, Jewish Publication Society; Kara 16:14) Keristani taudia ginigunadia edia negai ia karaia hegeregerena, Iehova ese ena aneru ia gaukaralaidia ia dekenai idia taitai lalo-momokani taudia dekenai ena Witness taudia idia hakaua lao. (Kara 8:​26-​31) Dirava ese ena Natuna, Iesu Keriso, amo ia hegaegaelaia gaudia namodia be taunimanima ese idia dibaia neganai, Iehova ena lalokau ese ia kahirakahira idia ia veria. (1 Ioane 4:​9, 10) Oibe, Dirava ese Iena “lalokau-hebogahisina,” eiava “abidadama lalokauna” amo Ia bona ena Natuna kahirakahira dekenai taunimanima ia veridia lao.​—Ieremia 31:⁠3, futnout, NW.

Iehova ese Daidia Ia Veria?

8. Iehova ese edena bamona taudia ia veria?

⁸ Iehova ese ia bona iena Natuna dekenai Ia idia tahua taudia ia veria. (Kara 17:27) Unai taudia haida be Kerisendom lalonai, bona momokani, tanobada ibounai lalonai, idia karaia kara dika “dainai idia taitai noho, bona idia lalohisihisi noho taudia.” (Esekiela 9:⁠4) “Idia diba lauma gaudia idia tahua be namo.” (Mataio 5:⁠3, NW ) Momokani, idia be tanobada ena “manau” taudia, paradaiso tanobadana ai do idia noho ela bona hanaihanai taudia unai.​—⁠Sepanaia 2:​3.

9. Edena dala ai Iehova ia diba bema taunimanima be “mauri hanaihanai abia totona” idia hegeregere eiava lasi, bona edena dala ai idia ia veria?

⁹ Iehova be ta ena kudouna ai idia noho gaudia ia diba. King Davida ese ena natuna Solomona ia hamaoroa, ia gwau: “Dirava ese iseda [kudouna] ibounai bona iseda ura ibounai ia diba. Bema oi ese Lohiabada oi tahua, ia ese oi do ia abia dae.” (1 Sivarai 28:⁠9) Tau ta ena kudouna bona ena lauma, eiava ena lalohadai mai siahuna, amo Iehova ia diba bema unai tauna be Dirava ese ia hegaegaelaia kara dika gwauatao dalana bona Dirava ena kara maoromaoro tanobadana lalonai mauri hanaihanai helarona, do ia abia dae eiava lasi. (2 Petero 3:​13) Ena Witness taudia ese Iena Hereva idia harorolaia bona idia hadibaia karana amo, Iehova ese ia bona ena Natuna dekenai “mauri hanaihanai abia totona” idia hegeregere taudia ia veria, bona idia be ‘abidadama taudia ai idia lao.’​—⁠Kara 13:⁠48.

¹⁰ Iehova ese haida ia veria bona haida ia veria lasi dainai, ita laloa diba ia ese hahemauri eiava panisi do idia abia taudia ta ta ia gwauraia hidi vadaeni, a? Lasi momokani! Dirava ese taunimanima ia veria eiava lasi be idia sibona edia ura hegeregerena. Ia ese edia ura-kwalimu ia matauraia. Hari inai negai Iehova ese tanobada taudia vairanai dala ta ia atoa, idia abia hidi totona. Lagani 3,000 mai kahana gunanai, unai dala be Israela taudia vairanai ia atoa, idia abia hidi totona. Unai nega ai, Mose ia gwau: “Hari dina dekenai, namo bona dika, mauri bona mase, be umui emui vairana dekenai lau atoa. . . . Hari dina, guba bona tanobada dekenai lau boiboi noho, idia ese umui do idia uitnesi henia. Badina lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho. Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo. Unai neganai ia be emui mauri ena badina, bona ia ese mauri lagani momo herea umui dekenai do ia henia.”​—⁠Deuteronomi 30:​15-​20.

11. Israela taudia be edena dala ai mauri idia abia hidi?

¹¹ Mani oi itaia Israela taudia ese mauri idia abia hidi totona ‘Iehova do idia lalokau henia, iena hereva do idia kamonai henia, bona ia do idia badinaia namonamo.’ Mose be unai hereva ia gwauraia neganai, Israela taudia ese Gwauhamata Tanona idia do abia lasi. Idia be Moaba ena Palaka Gabuna ai idia noho, Ioridane Sinavai do idia hanaia bona Kanana idia vareai totona idia hegaegae. Ita hoa lasi idia ese unai “tano badana,” kahirakahira do idia abia “aniani namodia gabuna,” idia laloa, to edia ura do ia guguru dalana be Iehova do idia lalokau henia, iena hereva do idia kamonai henia, bona ia do idia badinaia noho. (Esodo 3:⁠8) Mose ese unai ia hahedinaraia goevagoeva, badina ia gwau: “Lohiabada emui Dirava ena oda, hari dina umui dekenai lau henia gaudia do umui kamonai henia. Bema unai bamona umui karaia, bona bema Lohiabada umui lalokau henia, iena dala do umui raka, bona iena taravatu ibounai do umui badinaia, umui be do umui mauri. Bona Lohiabada ese umui do ia hagoadaia, vadaeni emui bese do ia habadaia. Oibe, Lohiabada ese umui do ia hanamoa, do umui raka vareai bona abia tanona lalonai.”​—⁠Deuteronomi 30:⁠16.

12. Iseda haroro bona hadibaia gaukarana totona Israela taudia edia kara amo dahaka ita diba be namo?

¹² Unai ibounai ese hari nega dokona ai ita karaia haroro bona hadibaia gaukarana totona gau haida ia hadibaia, ani? Ita ese do ia mai Paradaiso tanobadana ita laloa bona iseda haroro gaukara lalonai ita herevalaia. To ita eiava ita durua hahediba taudia ese unai gwauhamata ena guguru negana do ita itaia lasi, bema sibona eda ura gaudia abia totona Dirava ita hesiai henia. Israela taudia bamona, ita bona ita hadibaia taudia ese ‘Iehova ita lalokau henia, ena hereva ita kamonai henia, bona ia ita badinaia’ dalana ita dibaia be gau badana. Bema iseda haroro gaukara ita karaia noho lalonai unai do ita laloatao, ita be Dirava ida ita gaukara, ia kahirakahira taunimanima ita veria totona.

Dirava ida Ita Gaukara Hebou

13, 14. (a) Korinto Ginigunana 3:​5-9 ena hereva hegeregerena, edena dala ai ita be Dirava ida gaukara hebou taudia ai ita lao? (b) Basileia harorolaia taudia edia namba ia bada ia lao neganai daika ita hanamoa be namo, bona dahaka dainai?

¹³ Paulo ese Dirava ida gaukara hebou karana ia hahedinaraia totona uma gaukara ia herevalaia. Ia gwau: “Mani umui laloa. Apolo be daika? Bona Paulo be daika? Ai be Dirava ena hesiai taudia sibona. Lohiabada ese gaukara ta lau dekenai ia henia, vadaeni lau karaia. Bona ia ese gaukara ta Apolo dekenai ia henia, vadaeni ia karaia. Bona aiemai gaukara dekena amo umui be Dirava dekenai umui abidadama henia. Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua. Hadoa tauna bona dairia tauna edia gaukara be herevana, badina Dirava sibona ese hadoa gauna ia hatubua. Hadoa tauna bona dairia tauna ruaosi be hegeregere. Dirava ese ta ta edia gaukara davana do ia henia, edia hekwarahi hegeregerena. Badina ai ruaosi be Dirava [ida] ena gaukara ai karaia hebou noho. Umui be Dirava ena uma gabu.”​—⁠1 Korinto 3:​5-9.

¹⁴ Ita be Dirava ida ita gaukara hebou dainai, namona be mai eda kamonai ida taunimanima edia kudouna lalonai “Basileia ena sivarai” ita hadoa, bona idia ura kamonai neganai, ita hegaegaelaia namonamo lou henia bona Baibel stadi amo unai ura ita dairia. Bema unai tano, edia kudouna, be namo, Iehova ese ena gaukara ia karaia bona Baibel ena hereva momokani ia hatubua bena huahua ia havaraia uma gabu namona ai ia lao. (Mataio 13:​19, 23) Ia ese unai tauna be ia bona iena Natuna kahirakahira dekenai ia veridia lao. Unai dainai, Basileia harorolaia taudia edia namba ia bada ia lao neganai, unai be Iehova ese taunimanima edia kudouna ai ia karaia gaukarana dainai ia vara. Ia ese hereva momokani ena uhena ia hatubua bona unai bamona taudia be ia bona iena Natuna kahirakahira ia veridia.

Do Ia Noho Daudau Gauna Haginia Gaukarana

15. Ma haida ita durua edia abidadama idia habadaia totona Paulo ese edena haheitalai ia gaukaralaia?

¹⁵ Ena be haroro taudia edia namba ia bada ia lao dainai ita moale, to danu mai iseda kudouna ibounai ida ita ura taunimanima ese Iehova do idia lalokau henia noho, ena hereva do idia kamonai henia noho, bona ia do idia badinaia noho. Haida edia lalokau ia keru bona idia moru neganai ita lalohisihisi. Unai ita koua totona gau ta ita karaia diba, a? Haheitalai ma ta amo, Paulo ese ia hahedinaraia edena bamona ma haida ita durua diba, edia abidadama idia habadaia totona. Ia gwau: “Badina be Dirava ese du korikori ia atoa vadaeni, Iesu Keriso be unai. Bona tau ta ese du idauna ta do ia atoa hegeregere lasi. Unai ruma ena du latanai haida ese golo, o siliva, o nadi namo herea, o au, o kurukuru, o biri dekena amo ruma do idia haginia. To . . . lahi ese tau ibounai edia gaukara do ia hedinaraia. Lahi ese ta ta edia gaukara do ia tohoa, vadaeni ibounai edia gaukara be do ita diba, namo o dika.”​—⁠1 Korinto 3:​11-13.

¹⁶ Paulo ia gwauraia uma gabu haheitalaina lalonai uhe ia tubu, badina ta ese ia hadoa namonamo, ia dairia hanaihanai, bona Dirava ese unai gaukara ia hanamoa dainai. Aposetolo tauna ena haheitalai ma ta ese ia hahedinaraia Keristani haroro tauna ia haginia ruma be do ia noho daudau eiava lasi karana dekenai ia be mai ena maduna. Ia be du korikorina latanai ia haginia bona kohu namodia ia gaukaralaia, a? Paulo ia gwau: “Ruma idia haginia taudia ta ta, namona be edia gaukara dalana idia naria namonamo.” (1 Korinto 3:​10) Tau ta dekenai Paradaiso ai mauri hanaihanai ia abia helarona ita herevalaia bona ena lalona ita veria murinai, Baibel ena hadibaia herevadia badadia sibona ita hadibaia, bena dahaka ia karaia be namo mauri hanaihanai ia abia totona ita hadibaia goadagoada, a? ‘Bema oi ura Paradaiso lalonai do oi mauri ela bona hanaihanai, namona be oi stadi, hebou dekenai oi lao, bona haroro gaukara oi karaia.’ Unai sibona ita hadibaia, a? Bema unai bamona ita karaia, ita ese unai tauna ena abidadama be du goadana latanai ita haginia lasi, bona ita haginia gauna be reana hahetoho ena lahi lalonai do ia moru, eiava nega sisina murinai do ia manoka. Bema Iehova kahirakahira taunimanima ita veria totona idia ita hadibaia, lagani haida lalonai ia idia hesiai henia bena Paradaiso lalonai mauri do idia abia, unai be “au, o kurukuru, o biri” amo ruma ita haginia bamona.

Edia Lalokau Dirava Bona Keriso Dekenai Ita Habadaia

17, 18. (a) Ta ena abidadama do ia goada noho totona dahaka be gau badana? (b) Edena dala ai tau ta ita durua diba Keriso be ena kudouna lalonai ia noho totona?

¹⁷ Ta ena abidadama do ia goada noho totona, Iesu Keriso amo Iehova Dirava tura henia karana latanai ia gini be gau badana. Ita be goevadae lasi taudia dainai, Dirava ena Natuna sibona amo, Dirava ida maino ai ita noho diba. (Roma 5:​10) Mani oi laloatao Iesu ia gwau: “Tamana dekenai do idia lao taudia ibounai edia dala ta be lasi, lau sibona.” Ita ese ma haida ita durua bena edia abidadama ia goada ia lao totona, “tau ta ese du idauna ta do ia atoa hegeregere lasi.” Unai ena anina be dahaka?​—⁠Ioane 14:6; 1 Korinto 3:​11.

¹⁸ Haginia gaukara be Keriso latanai ita karaia totona, namona be iseda hadibaia karana amo Baibel stiuden tauna ese Iesu ia lalokau henia bada, badina ia diba goevagoeva Iesu be Mauri Hoia Lou Tauna, kongregesen ena Kwarana, Hahelaga Tauna Badana mai ena lalokau, bona ia lohia noho King. (Daniela 7:​13, 14; Mataio 20:28; Kolose 1:​18-​20; Heberu 4:​14-​16) Ena anina be Iesu idia abia dae momokani, bena ia be edia kudouna lalonai ia noho bamona. Namona be idia totona ita guriguri, Paulo ese Efeso Keristani taudia totona ia guriguri hegeregerena. Ia gwau: “Tamana ena vairanai lau tui diho. . . . Dirava lau noia, umui ese umui abidadama henia dainai, Keriso be umui emui kudouna lalonai do ia noho. Lau noia danu lalokau ese umui emui kudouna do ia hahonua, vadaeni do umui gini goada, ramu ese au badana ia dogoatao, ia gini goada bamona.”​—⁠Efeso 3:​14-17.

19. Iseda Baibel stiuden taudia edia kudouna lalonai Keriso lalokau henia karana ita havaraia dainai dahaka ia vara be namo, to dahaka ita hadibaia be gau badana?

¹⁹ Bema iseda haginia dalana amo stiuden taudia edia kudouna lalonai Keriso lalokau henia karana ita havaraia, unai amo Iehova Dirava do idia lalokau henia danu. Iesu ena lalokau, hemami, bona hebogahisi ese Iehova ena kara idia hahedinaraia goevagoeva. (Mataio 11:​28-30; Mareko 6:​30-​34; Ioane 15:​13, 14; Kolose 1:​15; Heberu 1:⁠3) Unai dainai, taunimanima ese Iesu idia diba bona idia lalokau henia neganai, idia ese Iehova idia diba bona idia lalokau henia matamaia.a (1 Ioane 4:​14, 16, 19) Gau badana be Baibel stiuden taudia ita hadibaia Keriso ese taunimanima totona ia karaia gaudia ibounai be Iehova ena ura dainai ia karaia bona Ia ita tanikiu henia, ita hanamoa, bona ita tomadiho henia be namo, badina ia be “ita ia hamauria” Diravana.​—⁠Salamo 68:​19, 20; Isaia 12:​2-5; Ioane 3:​16; 5:​19.

20. (a) Edena dala ai taunimanima ita durua diba, Dirava bona iena Natuna kahirakahira dekenai idia lao totona? (b) Hereva gabena lalonai dahaka do ita herevalaia?

²⁰ Ita be Dirava ida ita gaukara hebou dainai, namona be taunimanima ita durua edia kudouna lalonai Iehova bona ena Natuna lalokau henia bona abidadama henia karana do idia habadaia, bona idia kahirakahira dekenai do idia lao. Unai dala ai do idia abia dae Iehova be ia noho momokani. (Ioane 7:​28) Keriso amo, idia ese hetura karana namona Dirava ida idia karaia diba, bona ia do idia lalokau henia bona do idia badinaia. Mai edia lalokau ida idia karaia hesiai gaukarana do ia doko negana idia gwauraia lasi, bona idia abia dae momokani Iehova ena gwauhamata namodia be ia abia hidi negana ai do idia guguru. (Lalohisihisi ena Ane 3:​24-​26; Heberu 11:⁠6) To, ma haida edia abidadama, helaro, bona lalokau idia hagoadaia totona ita durua neganai, namona be sibona eda abidadama ita hagoadaia danu, bena ia be bouti goadana bamona lai badadia ia haheaukalaia diba. Unai be hereva gabena lalonai do ita herevalaia.

[Footnotes]

Riviu

◻ Nega momo Basileia sivaraina idia laloa totona edena dala ai taunimanima edia lalona ita veria, to edena hekwakwanai ia noho?

◻ Iehova ese ia bona iena Natuna dekenai, edena bamona taudia ia veria?

◻ Israela taudia be Gwauhamata Tanona idia vareai totona dahaka idia karaia be gau badana, bona unai ese dahaka ia hadibaia ita dekenai?

◻ Iehova bona iena Natuna kahirakahira idia lao totona taunimanima ita durua gaukarana lalonai, iseda maduna be dahaka?

6. Edena dala ai Iehova ese bese iboudiai ia hamarerea noho, bona nega tamona ai, daidia be ena “Dubu Helaga” lalonai noho namona idia davaria noho?

10. Dahaka ese ia hahedinaraia Iehova ese haida ia veria bona haida ia veria lasi karana be hahemauri eiava panisi do idia abia taudia ta ta ia gwauraia hidi karana lasi?

16. (a) Edena dala ai Paulo ena haheitalai rua edia anina be idau? (b) Edena dala ai ita karaia haginia gaukarana be reana do ia namo lasi bona lahi ese ia hadikaia diba?

[Picture on page 10]

Ena be taunimanima dekenai Paradaiso ai mauri hanaihanai idia abia helarona ita hahedinaraia, to ita tahua gauna badana be Iehova kahirakahira dekenai idia ita veria lao

[Pictures on page 13]

Iseda lou henia gaukarana ese namo do ia havaraia bema ita hegaegae namonamo