Iboudiai be Hegeregere Lasi—Dirava Ena Ura, A?

Hereva tamona amo ita haere diba, Lasi. Mani ita itaia dahaka dainai.

DIRAVA ena ura be taunimanima iboudiai ese idia abia maurina bona moalena be hegeregere. Baibel lalonai Dirava ese taunimanima ia havaraia karana ena sivarai ia gwau: “Bona Dirava ma ia gwau, ‘Taunimanima ita karaia namo, iseda toana bona iseda laulau hegeregerena. Davara gwarume bona ataiai manudia bona boromakau, bona tano dekenai idia rau gaudia ibounai, ia ese do ia biagua.’ ” Bona tanobada gaudia ia havaraia ore neganai, “Dirava ese ia karaia vadaeni gaudia ibounai ia itaia, bona momokani idia be namo herea.”​—Genese 1:​26, 31.

Hari inai negai iboudiai be hegeregere lasi karana dekenai Dirava ia gwau diba ia “be namo herea,” a? Lasi, badina “Dirava be lalokau.” (1 Ioane 4:8) Baibel ese Dirava ia herevalaia neganai, ia gwau “iena vairana dekenai taunimanima ibounai be hegeregere” bona “iena gaukara be namo momokani. Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.” (Deuteronomi 10:17; 32:4; mani Iobu 34:19 itaia.) Bona aposetolo Petero ia gwau: “Hari lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”​—Kara 10:34, 35.

Dirava ena kara be lalokau, kota maoromaoro, kara momokani, bona kara maoromaoro, bona taunimanima be maka tamona ai ia kara henidia dainai, edena bamona ia ese taunimanima ia havaraia neganai idia abia moale dekenai edia maoro be hegeregere lasi? Iboudiai be hegeregere lasi tanobadana lalonai idia ia atoa bona ma haida dadaraia kava karadia ia koua lasi be ena kara amo ia idau momokani. Iena ura be idia ibounai be “ura-kwalimu lalonai idia vara bona idia abia hemataurai bona maoro be hegeregere.” To ita itaia goevagoeva hari unai ia vara lasi. Dahaka dainai?

Iboudiai be Hegeregere Lasi Ena Badina

Dirava ese taunimanima ia havaraia hegeregere, to ita gwau lasi unai ena anina be gau iboudiai dekenai idia hegeregere. Edia diba, edia ura gaudia, bona edia kara ai idia idau diba. Edia dagi bona edia siahu ai danu idia idau diba. Hegeregere, tau bona hahine be gau iboudiai dekenai idia hegeregere lasi, to Dirava ese hahine ia havaraia tau ena “durua tauna” ai ia lao totona. (Genese 2:​18) Ia hedinarai goevagoeva tama sina bona natudia edia siahu be idau. Ena be unai dala ai idia idau, to Dirava ese taunimanima iboudiai​—tatau, hahine, bona natudia​—⁠dekenai maoro ia henia moale idia abia totona. Idia iboudiai idia abia hemataurai be hegeregere bona Dirava vairanai idia hegeregere.

Unai hegeregerena Dirava ena lauma natudia, taunimanima ia do havaraia lasi neganai ia havaraia natudia unai, be gaukara bona maduna idauidau idia abia. (Genese 3:​24; 16:​7-​11; Isaia 6:​6; Iuda 9) To, Dirava ese ia henidia hetoana lalonai, idia iboudiai be Dirava ese mauri bona moale totona ia henia gaudia amo idia abia moalena be hegeregere. Unai amo edia mauri ese Dirava ena kara, iboudiai be maka tamona ai ia kara henia karana, ia hahedinaraia namo herea.

To madi, lauma aneruna ta be Dirava ena kara ia moalelaia lasi. Dirava ese ia dekenai ia henia gauna ia moalelaia lasi, ia ura sibona ia abia isi, ia ura dagi badana ia abia. Iehova be Havaraia Tauna dainai ia ese lohia siahuna ia dogoatao be maoro, to unai aneru ese ena ura dikana ia laloa noho dainai, Iehova ena lohia siahuna ia hepapahuahulaia. Unai Dirava ena gwau-edeede lauma natuna ese gabeai taunimanima ia veridia, Dirava ese idia dekenai ia henia lasi gaudia idia ura abia totona. (Genese 3:​1-6; mani Isaia 14:​12-​14 itaia.) Unai dainai, taunimanima ese mauri bona moale abia totona Iehova ese ia henia gaudia be hegeregere lasi. Unai gwau-edeede aneruna, Apokalupo 20:2 ese ia gwauraia “ ‘Diabolo’ bona ‘Satani,’ ” dainai taunimanima iboudiai be hegeregere lasi.

Mauri Do Ia Idau, A?

Hereva tamona amo ita haere diba, Oibe!

To daika ese mauri do ia haidaua diba? Lohia taudia, idia momo edia ura be namo, be lagani handred momo lalonai idia hekwarahi unai idia karaia totona. Idia kwalimu lasi dainai, taunimanima momo idia laloa iboudiai be do idia hegeregere lasi ela bona hanaihanai. To, Dirava ena lalohadai be Isaia 55:​10, 11 ai ia noho, ia gwau: “Lauegu hereva be sinou bona medu bamona. Guba dekena amo idia diho mai, tanobada idia hapariparia totona. Idia ese uiti bona koni idia hatubua daekau. Ma uhe idia havaraia noho, hadohado totona, bona taunimanima do idia ania totona danu. Inai bamona danu, lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”

Ita ia hagoadaia gauna be, ita diba Iehova Dirava ese ia gwauhamata ena ura ginigunana taunimanima iboudiai ese mauri bona moale do idia abia totona be do ia hagugurua! Iehova be hereva momokani Diravana dainai, ia ese maduna ia abia dae ia gwauhamatalaia gaudia do ia hagugurua. Ita moale diba, badina ia be mai ena ura bona mai ena siahu unai do ia karaia totona. Edena dala ai unai do ia karaia?

Unai dala be Basileia, Iesu Keriso ese ena murinai idia raka taudia dekenai ia hadibaia gurigurina ese ia herevalaia Basileiana unai. Unai guriguri ia gwau: “Aiemai Tamana e, guba dekenai oi noho, . . . Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:​9, 10) Oibe, Dirava ena Basileia be Iehova ese do ia gaukaralaia, ia amo “[hari idia noho] basileia ibounai do ia hamakohia, bona haorea momokani, bona ia sibona do ia noho ela bona hanaihanai.”​—⁠Daniela 2:​44.

Unai guba Basileiana henunai, taunimanima edia bese matamatana do ia vara. Aposetolo Ioane ese Baibel ena buka ginigabena, Apokalupo, lalonai unai ia herevalaia, ia gwau: “Guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni.” (Apokalupo 21:⁠1) Iboudiai be hegeregere lasi dainai idia vara dika idauidau​—⁠ogogami, gorere, diba idia abia lasi, ma haida dadaraia kava karadia, bona taunimanima idia hahisidia gaudia ibounai​—⁠be do idia ore.a

Lagani handred mai kahana lalonai, Iehova ena Witness taudia ese taunimanima edia lalona idia veria, unai Basileia idia laloa totona. (Mataio 24:14) Idia printaia gaudia bona Baibel stadi karana amo taunimanima idia durua, Baibel lalonai idia noho Dirava ena ura gaudia idia dibaia totona. To, tanobada hegegemadai idia karaia hadibaia gaukarana ese vaira negana ai iboudiai be hegeregere bona moale idia abia diba ena helaro sibona ia henia lasi, to ia ese hari inai negai namo ia havaraia danu, badina iboudiai be hegeregere lasi dainai idia vara dika idauidau ia hamaragia. Unai ia vara dalana mani ita itaia.

[Footnote]

[Blurb on page 5]

Dirava ena ura be taunimanima iboudiai ese idia abia maurina bona moalena be hegeregere