Namona be Badu ese Oi Ia Hahekwakwanaia Lasi

“OI laga-ani sisina!” “Emu lalona oi biagua!” “Oi hereva lasi!” Unai bamona hereva oi laloatao, a? Reana emu lalona ai oi gwauraidia loulou emu badu oi koua totona. Taunimanima haida be, badu karana koua totona, idia lao gabu ma ta dekenai idia raka loaloa. Unai be dala haida badu karana oi biagua bona ma haida oi tura henidia noho totona.

Vanegai lagani lalodiai, diba bada taudia edia sisiba badu karana biagua eiava koua karana dekenai be idauidau dainai momo idia daradara. Hegeregere, psychologists taudia haida idia gwau namona be emu badu karana oi hahedinaraia “bema unai ese oiemu hemami ia hanamoa.” Ma haida idia gwau badu hanaihanai karana ese “eregabe neganai ta do ia hamasea haraga, to ma gau haida hegeregere, kuku ania karana, rara ia bada daekau, tauanina ena cholesterol ia bada, ese ta unai bamona do ia hamasea haraga lasi.” Dirava ena Hereva ese ia hahedinaraia goevagoeva ia gwau: “Do oi badu lasi, do oi dagedage lasi. Do oi laloa hekwarahi o laloa badu lasi, badina unai bamona laloa ese kara dika ia havaraia noho.” (Salamo 37:8) Dahaka dainai Baibel be unai bamona sisiba ia henia maoromaoro?

Hemami biagua lasi karana ese kara dika ia havaraia. Unai ia vara taunimanima ginigunadia dekenai. Edia sivarai ita duahia, ia gwau: “Kaino be ia badu maragi lasi, bona badu dainai ena vairana ia metau.” Unai dainai dahaka ia karaia? Iena badu ese ena lalona ia hahonua dainai, Iehova ena kara namo sisibana ia badinaia lasi. Badu biagua namonamo lasi karana dainai Kaino ese kara dika badana ia karaia​—ena tadina ia alaia mase.​—Genese 4:​3-8.

Saulo, Israela taudia edia king ginigunana, be Davida idia hanamoa bada karana ia kamonaia neganai, ia danu be unai bamona ia badu dikadika. Hahine “edia moale lalonai idia ese inai ane idia abia: ‘Saulo ese iena 1000, 1000 ia alaia ore, to Davida ese iena 10,000, 10,000 ia alaia vadaeni.’ Vadaeni Saulo ia badu maragi lasi, unai hereva dekenai ia badu.” Badu karana ese Saulo ena lalohadai ia biagua momokani, unai dainai Davida hamasea daladia haida ia karaia. Ena be Davida ese dala ia karaia Saulo ia tura henia totona, to Saulo ia ura lasi idia maino bona hetura lou. Unai dainai, ia ese Iehova ena lalo-namo ia haboioa momokani.​—1 Samuela 18:​6-​11; 19:​9, 10; 24:​1-​21; Aonega Herevadia 6:​34, 35.

Momokani, bema ta ese ena badu karana ia biagua namonamo lasi, iena hereva bona kara amo ia badu henia taudia ibounai dekenai hisihisi do ia havaraia. (Aonega Herevadia 29:22) Kaino bona Saulo idia badu badina be idia mama bona lalohisihisi dikadika. To momokani, badina idauidau dainai, badu karadia idia vara diba. Maumau herevadia, gwau dika, lalo-parara lasi dainai, eiava kara kereredia ese badu idia havaraia diba.

Kaino bona Saulo ese gau badana ta idia hahedinaraia lasi. Kaino ese ena boubou gauna ia henia, to abidadama karana be ia hahedinaraia lasi. (Heberu 11:⁠4) Saulo be Iehova ena hahegani ia badinaia lasi bona sibona ena maoro ia hahedinarai toho dainai, Dirava ena lalo-namo bona lauma ena heduru ia haboioa. Ia hedinarai goevagoeva, unai tatau rua ese edia hetura karana Iehova ida be idia hadikaia.

Davida ena lalohadai be idia edia amo ia idau momokani, herevana Saulo ese ia dekenai ia karaia karadia ia badulaia be maoro. Davida ese ena kara ia naria namonamo. Dahaka dainai? Ia gwau: “King hadikaia totona Lohiabada ese maoro ia henia lasi lau dekenai, badina ia be Lohiabada ese ia abia hidi tauna.” Davida be iena hetura karana Iehova ida ia laloa bada, bona unai ese ia durua bada Saulo ia hamasea lasi totona. Mai manau danu gau ibounai be Iehova ena imana dekenai ia rakatania.​—⁠1 Samuela 24:​6, 15.

Momokani, badu biagua namonamo lasi karana amo dika bada ia vara diba. Aposetolo Paulo ia gwau: “Bema umui badu neganai, kara dika do umui karaia lasi.” (Efeso 4:​26) Badu mai ena badina maorona be mai ena nega, to badu momo karana ese ita do ia hahekwakwanaia diba. Unai dainai, momokani, ita hekwarahi badu karana ita biagua namonamo totona. Edena dala amo unai ita karaia diba?

Gau bada hereana be Iehova tura henia karana ita hagoadaia. Ia ese oi ia hagoadaia emu kudouna bona lalona ai idia noho gaudia be ia dekenai oi hahedinaraia totona. Oiemu lalohisihisi bona lalo-hekwarahi gaudia be oi hamaorolaia, bona oi noia oi dekenai lalo-maino ia henia totona. (Aonega Herevadia 14:30) Namona be oi laloatao “Lohiabada ese, kara maoromaoro taudia ia naridia noho, bona edia guriguri ia kamonai henia noho.”​—⁠1 Petero 3:​12.

Guriguri karana ese oi ia hamaoromaoroa bona naria diba. Edena dala amo? Unai kara ese oi do ia hagoadaia ma haida oi kara namo henidia totona. Namona be Iehova ese oi ia kara henia dalana oi laloatao. Baibel ia gwau, Iehova be “iseda kara dika ena bada hegeregerena davana ia henia lasi.” (Salamo 103:10) “Satani ese ita dekena amo kwalimu do ia abia garina,” dika gwauatao karana be mai anina bada. (2 Korinto 2:​10, 11) Danu, guriguri karana ese emu kudouna do ia kehoa lauma helaga ena hahekau oi abia totona, bena emu mauri dalana do ia haidaua momokani. Iehova be mai ena moale ida ‘taunimanima edia diba ia hanaia momokani mainona’ ia henia, unai amo badu karana goadana amo oi ia veria oho diba.​—⁠Filipi 4:⁠7.

To guriguri be Baibel tahua hanaihanai karana ida ita karaia hebou be namo, unai amo ‘Lohiabada ena ura gaudia sibona do ita tahua.’ (Efeso 5:​17; Iamesi 3:​17) Bema oi hekwarahi badu karana oi biagua namonamo totona, namona be Iehova ena lalohadai unai kara dekenai oi tahua goadagoada. Badu biagua karana idia herevalaia siridia haida oi duahia bona laloa.

Paulo ese inai hadibaia herevana ia gwauraia: “Taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:​10) Haida oi kara namo henia daladia oi laloa bona oi karaia. Unai bamona kara namodia ese hebogahisi bona abidadama heheni karadia do idia habadaia bona unai ese lalo-parara namonamo lasi karadia amo ia vara badu karana do ia haorea.

Salamo torea tauna ia gwau: “Oiemu gwauhamata hegeregere, lau do oi naria, vadaeni kara dika dekenai do lau moru lasi. Oi durua lau, vadaeni dika ese lau do ia halusia lasi. Lohiabada e, oiemu taravatu idia ura henia noho taudia ese, maino namo herea idia abia noho, bona gau ta ese do ia hamorudia diba lasi.” (Salamo 119:​133, 165) Unai be do ia vara momokani oi dekenai.

[Box/Picture on page 9]

BADU BIAGUA DALADIA

□ Iehova guriguri henia. —⁠Salamo 145:⁠18.

□ Dina ibounai Buka Helaga tahua. —Salamo 119:​133, 165.

□ Mai anina bada karadia goadalaia.​—⁠Galatia 6:​9, 10.