Diabolo ese Ita Ia Hagorerea, A?

BEMA GAU IBOUNAI IDIA HEAU NAMONAMO, GORERE BE DO IA VARA LASI. Dirava ese ita ia karaia, do ita noho hanaihanai mai eda gorere lasi ida totona. To lauma aneruna ta, Satani, ese iseda tama sina ginigunadia, Adamu bona Heva, be kara dika dekenai ia hakaudia kerere neganai, taunimanima dekenai gorere, hisihisi, bona mase ia havaraia.—GENESE 3:​1-5, 17-​19; ROMA 5:​12.

UNAI ena anina be gorere ibounai be maoromaoro lauma edia kara dainai idia vara, a? Hereva gunana ese ia hahedinaraia bamona, momo be unai lalohadai idia abia. Kekeni maragina Owmadji ena tubuna hahinena be unai bamona ia laloa. To, Owmadji ese ia davaria kukuri ranu gorerena​—nega haida siahu gabudia ai natu maragidia ia hamasea gorerena​—be ita itaia lasi laumadia ese idia havaraia, a?

Satani Ena Gaukara

Baibel ese unai henanadai ia haerelaia goevagoeva. Ia hahedinaraia gauna ginigunana be iseda sene taudia edia lauma ese taunimanima idia hahisia diba lasi. Taunimanima idia mase neganai, idia “be gau ta idia diba lasi.” Idia be mai edia mase diba lasi laumana lasi. Idia be gara dekenai idia mahuta noho bamona, unuseniai “be kara ta lasi, laloa ta lasi, diba bona aonega ta lasi.” (Hadibaia Tauna 9:​5, 10) Mase taudia be dala lasi mauri taudia idia hagorerea totona!

To, Baibel ese ia hahedinaraia lauma dikadia be idia mauri noho. Guba dekenai gwau-edeede ia havaraia tauna ginigunana be lauma aneruna ta, ena ladana idia gwauraia Satani. Ma haida ese ia idia bamoa bona edia ladana be demoni. Satani bona demoni ese gorere idia havaraia diba, a? Guna unai bamona ia vara. Iesu ese hoa dalana amo gorere ia hanamoa karadia haida be demoni lulua karana. (Luka 9:​37-​43; 13:​10-​16) To, Iesu ese ia hanamoa goreredia momo be demoni ese idia havaraia lasi. (Mataio 12:15; 14:14; 19:⁠2) Hari inai negai danu, ita gwau diba gorere idia havaraia gaudia korikoridia idia noho, idia be lauma edia siahu amo idia vara lasi.

Meamea karadia be edena bamona? Aonega Herevadia 18:10 ese ita ia hadibaia, ia gwau: “[Iehova ena ladana] be kohoro goadana hegeregerena. Kara maoromaoro taudia be unuseni do idia heau vareai, bona do idia mauri noho.” Iamesi 4:7 ia gwau: “Satani do umui tuari henia, vadaeni umui dekena amo do ia heau boio.” Oibe, Dirava be ena hesiai taudia ia naridia, meamea bona ma gau haida edia siahu amo. Iesu ena hereva ta ena anina be unai: “Hereva momokani ese umui do ia ruhaia.”​—⁠Ioane 8:​32.

Reana haida do idia henanadai: ‘Iobu be edena bamona? Ia be lauma dikana ta ese ia hagorerea, a?’ Oibe, Baibel ia gwau Satani ese Iobu ena gorere ia havaraia. To Iobu dekenai ia vara gauna be idau momokani. Nega daudau lalonai, Dirava be Iobu ia gimaia demoni edia hisihisi karana amo. Bena Satani ese Iehova ia hamaoroa Iobu ia hahisia totona, bona henanadai badadia idia vara dainai, Iehova ese unai nega ai ia dekenai ia tomadiho tauna ia gimaia karana ia kokia sisina.

To, Dirava ese hetoa haida ia atoa. Satani dekenai gwaumaoro ia henia Iobu ia hahisia totona, bona nega sisina lalonai Satani ese Iobu ia hagorerea diba, to do ia hamasea lasi. (Iobu 2:​5, 6) Gabeai, Iobu ena hisihisi ia ore bona Iehova ese iena gini goada karana dainai ia hanamoa bada. (Iobu 42:​10-​17) Iobu ena gini goada karana amo ia hamomokania hakaua herevadia be idaunegai Baibel lalonai idia torea bona taunimanima ibounai be unai idia diba. Unai bamona hahetoho ma ta ia vara lou be anina lasi.

Satani be Edena Bamona Ia Gaukara?

Kahirakahira gorere ibounai idia vara dalana dekenai Satani ena kara badana tamona be ia ese taunimanima ginigunadia ruaosi ia tohodia, bena idia kara dika. Ia bona ena demoni be gorere ta ta iboudiai idia havaraia lasi. To, Satani ia hekwarahi bada iseda lalona do ia veria bena aonega lasi dalana do ita abia hidi bona iseda abidadama ita negea, vadaeni unai amo reana gorere do ita davaria. Ia be meamea, ala-ala, eiava gorere amo Adamu bona Heva ia hadikaia lasi. Ia ese Heva ena lalona ia veria Dirava do ia gwau-edeede henia totona, bona Adamu ese hahine ena gwau-edeede karana ia badinaia. Gorere bona mase be unai kara ena anina dikadia haida.​—Roma 5:​19.

Moaba ena lohia tauna ese abidadama lasi peroveta tauna Balama ia boiria Israela besena do ia hadikaia totona, badina Israela be Moaba ena tano hetoana dekenai kamepa idia haginia. Balama ese Israela besena ia hadikadia toho, to Iehova ese unai bese ia gimaia dainai ia kwalimu lasi. Bena Moaba taudia ese heudahanai bona sihari kava karana amo Israela taudia edia lalona idia ania. Unai kara amo idia kwalimu, bona Israela taudia be Iehova ena naria karana idia haboioa.​—⁠Numera 22:​5, 6, 12, 35; 24:10; 25:​1-9; Apokalupo 2:​14.

Unai idaunegai ia vara karana amo sisiba badana ta ita abia. Dirava be ia idia tomadiho henia abidadama taudia ia gimaia lauma dikadia ese maoromaoro idia hadikadia lasi totona. To, Satani be ia hekwarahi ta ta edia abidadama karana ia hamorua totona. Reana edia lalona do ia ania matabodaga karana ia karaia totona. Eiava, leona ta bamona, idia ia hagaria bena kara ta do idia karaia, unai amo Iehova ena naria karana amo do idia siri. (1 Petero 5:⁠8) Unai dainai, Paulo ese Satani ia gwauraia “mase ia biagua tauna.”​—⁠Heberu 2:​14.​

Owmadji ena tubuna hahinena ese Hawa ena lalona ia veria toho henari gaudia bona koroa gaudia do ia gaukaralaia gorere koua totona. Bema Hawa ese unai hereva ia badinaia, dahaka ia vara diba? Ia ese Iehova Dirava abidadama henia karana do ia hahedinaraia lasi, bona Iehova ese ia gimaia karana dekenai do ia daradara.​—⁠Esodo 20:5; Mataio 4:​10; 1 Korinto 10:21.

Satani ese Iobu ena lalona ia veria toho danu. Ena ruma bese, ena kohu, bona ena tauanina ia hadikaia. Iobu ena adavana ese sisiba dikana ia henia danu, ia gwau: “Dirava ena ladana do oi hadikaia, vadaeni oi mase!” (Iobu 2:⁠9) Bena iena ‘turadia’ toi ese ia idia vadivadi henia neganai, mai edia koikoi ida ena lalona idia ania toho bena do ia abia dae sibona ena kara dika dainai gorere ia davaria. (Iobu 19:​1-3) Satani ese Iobu ena noho dikana ia gaukaralaia ena lalona ia hamanokaia totona bona Iehova ena kara maoromaoro ia abidadama henia karana ia hadikaia toho. To, Iobu ese iena helaro ena badina tamona, Iehova, dekenai ia tabekau.​—Salamo 55:22 itaia.

Reana ita gorere neganai, ita lalo-metau danu. Unai bamona kara ia vara neganai, Satani be karaharaga ita do ia tohoa iseda abidadama hadikaia karana ta ita karaia totona. Unai dainai, gau badana be ita diba ita abia hisihisidia be hehuni gauna ta ena siahu amo ia vara lasi, to ena badina be ita be goevadae lasi taudia dainai. Oi laloatao, abidadama tauna Isako ena matana idia kepulu, bena lagani haida murinai ia mase. (Genese 27:⁠1) Unai gauna be lauma dikadia ese idia havaraia lasi to ia buruka momokani dainai. Rahela be ena natuna ia havaraia lalonai ia mase, bona unai be Satani ese ia havaraia lasi, to tauanina be ia manoka dainai ia mase. (Genese 35:​17-​19) Danu, abidadama taudia ibounai be buruka dainai idia mase​—idia be meamea herevadia eiava karadia amo idia mase lasi, to idia be goevadae lasi dainai idia mase.

Bema ita laloa lauma dikadia ese iseda gorere ibounai idia havaraia, unai be tarapu ta. Unai lalohadai ese lauma gari henia kava karana do ia havaraia diba. Unai dainai, bema ita gorere neganai, reana demoni edia amo do ita siri lasi, to idia do ita hamoalea toho. Bema Satani ese ita ia hagaria dainai babalau karana ita tahua, unai be Dirava momokanina Iehova dadaraia karana. (2 Korinto 6:​15) Dirava ena inai tauna ita gari henia kava be namo lasi, to namona be mai hemataurai ida Iehova gari henia karana ese ita ia naria be namo.​—⁠Apokalupo 14:⁠7.

Kekeni maragina Owmadji be mai ena naria tauna namo hereana, lauma dikadia amo do ia gimaia totona. Paulo ia hereva bamona, Dirava ia laloa Owmadji be “helaga,” badina ia be mai ena abidadama sinana, bona iena sinana be Dirava dekenai ia guriguri diba, iena lauma helaga amo ena natuna kekeni ia naria totona. (1 Korinto 7:​14) Hawa be diba maoromaoro ia abia dainai, henari gaudia dikadia dekenai ia tabekau lasi, to Owmadji durua dalana maorona ia tahua.

Gorere Havaraia Gaudia

Taunimanima momo be lauma idia abia dae lasi. Idia gorere neganai, doketa dekenai idia lao​—bema ena davana idia karaia diba. Momokani, nega haida gorere tauna be doketa ena heduru ia abia to unai ese ia hanamoa lasi. Doketa be hoa karadia idia karaia diba lasi. To lalohadai idaudia idia abia taudia momo be edia gorere ia bada herea murinai, doketa idia tahua. Babalau ena heduru idia tahua guna, bona namo idia davaria lasi neganai, doketa ena heduru idia tahua matamaia. Momo idia mase kava.

Haida edia diba ia maragi dainai idia mase haraga. Idia ese gorere ena toana idia dibaia lasi bona gorere koua dalana idia tahua lasi. Diba ese ta ia durua hisihisi idauidau davaria dalana ia koua totona. Namona be ita laloatao, duahiduahi idia diba sina ese gorere amo edia natudia haida sibona idia haboioa, to duahiduahi idia diba lasi sina ese edia natudia momo idia haboioa. Oibe, diba abia lasi karana be mase ia havaraia diba.

Naria namonamo lasi karana be gorere ia havaraia gauna ma ta. Hegeregere, momo idia gorere badina edia aniani latanai manumanu idia helai murinai idia ania eiava badina be aniani idia hegaegaelaia taudia ese edia imana idia huria guna lasi. Malaria gorerena ia vara tanodia dekenai, tainamu lalonai mahuta lasi karana be gorere ia havaraia diba danu.a Gorere hanamoa karana ita laloa neganai, inai hereva be momokani, “gorere koua ena davana be maragi, to gorere hanamoa ena davana be bada.”

Mauri dalana dikana dainai milioni momo idia gorere bona idia mase haraga. Kekero, matabodaga karadia, drag gaukaralaia kerere, bona kuku ania karana ese momo edia mauri ia hadikaia vadaeni. Bema ta be unai kara dikadia ia karaia bena ia gorere, unai ena badina be tau ta ese meamea karana ta ia karaia dainai eiava lauma ese ia hagorerea, a? Lasi. Unai be ia sibona ena kerere dainai gorere ia abia. Lauma samanidia karana ese ia hahedinaraia ta be sibona ena mauri dalana dikana ena anina ia gorea.

Oibe, gau haida be vaia ita koua diba lasi. Hegeregere, gorere havaraia jems haida eiava hodahoda mirona do ita abia diba. Unai be Owmadji dekenai ia vara. Ena sinana ia diba lasi dahaka ese unai kukuri ranu gorerena ia havaraia. Iena natuna, natu haida bamona lasi, be gorere idia abia momo lasi, badina iena ruma bona gabu ia hagoevaia bona danu nega ibounai aniani ia hegaegaelaia neganai iena imana ia huria guna. To, nega ta ta ai natu iboudiai be gorere idia abia. Gorere havaraia gaudia idauidau 25 ese kukuri ranu gorerena idia havaraia diba. To ta ia diba lasi edena ese Owmadji ena gorere ia havaraia.

Gorere Hanamoa Gauna

Gorere be Dirava ena amo ia mai lasi. Dika amo “Dirava ese tau ta do ia dibagania lasi.” (Iamesi 1:​13) Bema Iehova ia tomadiho henia tauna ta ia gorere, ia ese lauma dalanai do ia naria noho. “Bona unai tau, ogogami taudia ia laloa tauna, ia gorere neganai, be Lohiabada ese do ia durua. Lohiabada ese unai tau ena gorere, be do ia hanamoa lou momokani.” (Salamo 41:⁠3) Oibe, Dirava be mai ena hebogahisi. Ia ura lasi ita do ia hahisia, to ia ura bada ita do ia durua.

Momokani, Iehova be mai ena gorere hanamoa gauna​—Iesu ena mase bona toreisi lou. Iesu ena boubou karana dainai, kudou maoro taudia be edia kara dika amo ia hoidia lou bona unai amo mauri goevana do ia henidia bona tanobada paradaisona dekenai do idia mauri hanaihanai. (Mataio 5:5; Ioane 3:​16) Iesu ena hoa karadia amo ia hahedinaraia, Dirava ena Basileia ese gorere do ia hanamoa momokani. Danu, Dirava ese Satani bona ena demoni do ia kokidia. (Roma 16:20) Momokani, Iehova be gau namodia momo herea ia karaia hegaegae ia idia abidadama henia taudia totona. Gau badana be ita manau bona haheauka noho be namo.

Unai nega ita naria noho lalonai, Iehova be Baibel bona tanobada hegegemadai ia idia tomadiho henia tadikaka oreana amo aonega korikori bona lauma gaudia ia henia. Ia ese ita ia hadibaia gorere idia havaraia kara dikadia ita dadaraia totona. Bona ita dekenai tura namodia ia henia, hekwakwanai negadiai ita idia durua totona.

Mani Iobu oi laloa lou. Bema Iobu ese babalau taudia edia heduru ia tahua, unai be dika momokani! Unai amo Dirava ena naria karana ia haboioa diba, bona gabeai ia abia hahenamo idauidau do ia haboioa danu. Dirava ese Iobu ia laloaboio lasi, bona ita do ia laloaboio lasi. Diba tahua tauna Iamesi ia gwau: “Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua.” (Iamesi 5:​11) Bema ita hesiku lasi, Dirava ena nega korikori ai, hahenamo namodia do ita abia.

Owmadji dekenai dahaka ia vara? Ena sinana be Gima Kohorona magasin danu idia halasia magasin, Awake!, ena heduru herevana kukuri ranu gorerena hanamoa karana dekenai ia laloatao.b Ia ese unai heduru herevana ia badinaia bona muramura ia karaia Owmadji ese ia inua totona. Hari, unai kekeni maragina be ia namo bona ia gorere lasi.

[Footnotes]

[Pictures on page 7]

Iehova ese gorere do ia haorea momokani dalana ta ia karaia