Iehova Ia Ura Ita Karaia Gaudia be Metau Herea, A?
“Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou.”—MIKA 6:8.
1. Dahaka dainai haida be Iehova idia tomadiho henia lasi?
IEHOVA ia ura ena taunimanima ese gau haida do idia karaia. To Mika ena peroveta herevana amo ataiai ia noho herevana oi duahia murinai, reana oi laloa Dirava ena taravatu be metau lasi. To, momo ese ita ia Havaraia Tauna Badana idia tomadiho henia lasi, bona guna idia tomadiho henia taudia haida be ia idia rakatania vadaeni. Dahaka dainai? Badina idia laloa Dirava ia ura kara metaudia do ita badinaia. Momokani, ia be unai bamona, a? Eiava, ta ena lalohadai Iehova ena ura dekenai be ia maoro lasi? Idaunegai ia vara sivaraina ta ese unai gauna dekenai iseda lalo-parara ia habadaia.
2. Namana be daika, bona Iehova ena peroveta tauna ese ia hamaoroa dahaka do ia karaia?
2 Suria ena tuari biaguna badana Namana be lepera gorere ia davaria, to idia hadibaia Iehova ena peroveta tauna ta Israela dekenai ese ena gorere ia hanamoa diba. Vadaeni, Namana bona iena hesiai taudia be Israela dekenai idia lao bona Dirava ena peroveta tauna Elisaia ena ruma dekenai idia ginidae. Elisaia be ena ruma ia rakatania lasi ena dagi badana vadivadi tauna ia hedavari henia totona, to ena hesiai tauna ia siaia bona Namana ia hamaoroa: “Oi lao, Ioridane Sinavai lalonai do oi digu nega 7, vadaeni oiemu kopina be do ia namo lou, bona do oi goeva.”—2 King Taudia 5:10.
3. Dahaka dainai matamanai Namana ia ura lasi Iehova ese ia gwauraia gauna do ia karaia?
3 Bema Namana be Dirava ena peroveta tauna ese ia gwauraia gauna ia karaia, unai gorere dikana amo do ia namo. Unai dainai, ita gwau diba Iehova ia ura kara metauna do ia karaia, a? Lasi. To, Namana ia ura lasi Iehova ia gwauraia gauna do ia karaia. Mai badu ida ia gwau: “Damaseko sinavai Abana bona Parapara, ese Israela sinavai ibounai idia hereaia momokani, ani? Unai lauegu tano ena sinavai lalonai do lau digu lasi, a? Vadaeni unai neganai do lau goeva, a?” Vadaeni, mai ena badu ida Namana ia raka siri.—2 King Taudia 5:12.
4, 5. (a) Namana ena kamonai karana dainai dahaka hahenamo ia abia, bona ia abia neganai dahaka ia karaia? (b) Hari, dahaka do ita herevalaia?
4 Namana ena hekwakwanai korikorina be dahaka? Do ia karaia gauna be auka lasi dainai, unai be iena hekwakwanai ia havaraia gauna lasi. Namana ena hesiai taudia be mai aonega ida idia gwau: “Lohia e, peroveta tauna ese bema kara aukana oi dekenai ia gwauraia neganai, oi be do oi karaia, ani? Unai dainai inai oi dekenai ia gwauraia gauna, ‘Oi digu, bona do oi goeva’, be do oi karaia [be] namo.” (2 King Taudia 5:13) Hekwakwanai ia havaraia gauna be Namana ena lalohadai. Ia laloa ia abia be maoro hemataurai karana be Elisaia ese ia hahedinaraia lasi bona toana be ia laloa Elisaia ese ia hamaoroa gauna be anina namona ta do ia havaraia lasi bona mai hemarai karana ta. To, Namana be ena hesiai taudia edia sisiba herevana namona ia abia dae bona Ioridane Sinavai dekenai nega 7 ia digu. Mani ena moale oi laloa, “iena kopina be ia namo lou, mero maragina ena kopina hegeregere” neganai! Ena kudouna be tanikiu ena mamina amo ia honu. Unai sibona lasi, to Namana ia gwau unai nega amo, ia be dirava ma haida do ia tomadiho henia lasi to Iehova sibona do ia tomadiho henia.—2 King Taudia 5:14-17.
5 Idaunegai ema bona hari, Iehova ia ura taunimanima ese hahegani idauidau idia badinaia. Oi ai noia idia haida oi laloa totona. Unai oi karaia neganai, oi sibona oi nanadaia, bema Iehova ia ura unai gaudia oi karaia, oi be edena bamona do oi kara. Gabeai, hari inai negai Iehova ena ura ita dekenai be dahaka, do ita tahua.
Iehova Ia Ura Gauna—Idaunegai
6. Dirava ese tau bona hahine ginigunadia ia hamaoroa dahaka do idia karaia, bona bema oi be unai hereva oi abia dahaka do oi karaia?
6 Iehova ese tau bona hahine ginigunadia, Adamu bona Heva, ia hamaorodia natudia do idia havaraia, tanobada do idia naria, bona animal do idia biagudia. Danu, Iehova ese unai tau bona ena hahine dekenai uma badana mai hairaina ia henia idia noholaia totona. (Genese 1:27, 28; 2:9-15) To taravatu ta ia atoa. Ia ura idia ese Eden umana lalonai, huahua idia havaraia audia momo huanai, au ta ena huahua do idia ania lasi. (Genese 2:16, 17) Unai be taravatu metauna lasi, ani? Bema oi diba emu tauanina do ia goada bona mauri hanaihanai do oi abia diba, mai moale ida unai gaukara do oi karaia, ani? Bema uma lalonai hedibagani tauna ta ia hedinarai, oi ese ena hereva koikoi do oi dadaraia, ani? Bona oi abia dae Iehova be mai ena maoro unai auka lasi taravatuna ia atoa totona, ani?—Genese 3:1-5.
7. (a) Noa be dahaka gaukara ia abia, bona edena bamona dagedage karadia ia davaria? (b) Iehova ese Noa ia henia gaukarana be edena bamona oi laloa?
7 Gabeai, Iehova ese Noa ia hamaoroa tanobada ibounai dekenai ia vara abatana amo do idia roho mauri totona, lagatoi ta do ia haginia. Lagatoi be bada herea dainai, edia gaukara be ia auka sisina bona reana idia gaukara neganai, taunimanima ese idia kirikirilaidia bona idia dagedage henidia. To, Noa ese ena ruma bese, bona animal momo danu, ia hamauridia diba be hahenamo badana ta! (Genese 6:1-8, 14-16; Heberu 11:7; 2 Petero 2:5) Bema oi ese unai bamona gaukara oi abia, do oi gaukara goadagoada oi karaia ore totona, a? Eiava do oi laloa Iehova be gaukara metauna ia henia oi dekenai?
8. Dirava ese Aberahamo ia hamaoroa dahaka do ia karaia, bona unai kara ibounai ese dahaka ia haheitalaia?
8 Dirava ese Aberahamo ia hamaoroa kara auka hereana ta do ia karaia, ia gwau: “Oiemu natuna oi abia, oi sibona oiemu natuna korikori, Isako, oi lalokau henia merona. Moraia tano dekenai do umui lao. Unuseni . . . mero be lahi boubou gauna do oi halaoa.” (Genese 22:2) Unai ese Aberahamo ena abidadama Dirava ese Isako do ia hamauria lou karana dekenai ia tohoa, badina Iehova ia gwauhamata vadaeni, natudia ia do havaraia lasi Isako be gabeai natudia do ia havaraia. Aberahamo ese Isako ia bouboulaia gwauraia neganai, Dirava ese unai tau matamatana ia hamauria. Unai kara ese Dirava be taunimanima dainai sibona ena Natuna do ia bouboulaia bona gabeai do ia hatorea isi lou karana ia haheitalaia.—Genese 17:19; 22:9-18; Ioane 3:16; Kara 2:23, 24, 29-32; Heberu 11:17-19.
9. Badina be dahaka ita gwau diba Iehova be kara metauna ia gwauraia lasi Aberahamo dekenai?
9 Reana haida do idia laloa Iehova Dirava be kara metauna ia gwauraia Aberahamo dekenai. To, ia be unai bamona ia karaia, a? Oi laloa ita ia Havaraia Tauna, mase taudia ia hatorea isi lou diba Diravana, ia ura ia ita kamonai henia ena be reana unai dainai do ita mase, be lalokau lasi karana, a? Iesu Keriso bona ena murinai idia raka taudia ginigunadia be unai bamona idia laloa lasi. Dirava ena ura idia karaia guguru totona idia gini hegaegae bero do idia abia, eiava do idia mase danu. (Ioane 10:11, 17, 18; Kara 5:40-42; 21:13) Bema unai bamona hekwakwanai ta oi davaria, do oi ura idia bamona oi kara, a? Iehova ia ura guna iena bese ai idia lao taudia ese do idia karaia gaudia haida, mani ita laloa.
Iehova Ena Taravatu Israela Dekenai
10. Daidia idia gwauhamata Iehova ia gwauraia gaudia ibounai do idia karaia, bona dahaka ia henidia?
10 Aberahamo ena bese, ena natuna Isako bona tubuna Iakobo, eiava Israela, amo idia vara taudia be Israela besena ai idia lao. Iehova ese Israela taudia be Aigupito ena igui hesiai amo ia ruhaia. (Genese 32:28; 46:1-3; 2 Samuela 7:23, 24) Nega sisina murinai, gwauhamata idia karaia Dirava ese ia gwauraia gaudia ibounai do idia karaia. Idia gwau: “Ai be Lohiabada ena hereva ibounai do ai karaia.” (Esodo 19:8) Israela taudia idia ura Iehova ese idia do ia lohiaia dainai, ia ese unai bese dekenai taravatu 600 mai kahana, Taravatu Ten, danu ia henidia. Gabeai, Dirava ena taravatu idauidau, Mose amo ia henia gaudia unai, idia gwauraia Taravatu.—Esera 7:6; Luka 10:25-27; Ioane 1:17.
11. Taravatu ena badina ta be dahaka, bona edena taravatu haida ese unai idia hagugurua?
11 Taravatu ena badina ta be Israela taudia ia naria mahuta hebou karadia, bisinesi karadia, bona natuna naria daladia dekenai. (Esodo 20:14; Levitiko 18:6-18, 22-24; 19:35, 36; Deuteronomi 6:6-9) Taravatu lalonai edena bamona edia bese taudia ta ta bona edia animal danu do idia kara henia taravatudia idia noho. (Levitiko 19:18; Deuteronomi 22:4, 10) Tomadiho totona lagani ta ta ai idia karaia aria bona hebouhebou edia taravatu ese lauma dalanai taunimanima idia durua.—Levitiko 23:1-43; Deuteronomi 31:10-13.
12. Taravatu ena badina badana be dahaka?
12 Aposetolo Paulo be Taravatu ena badina badana ia gwauraia, ia gwau: “Dirava ia ura kara dika ena anina korikori taunimanima dekenai ia hedinaraia. Unai dainai gwauhamata ia henia murinai, Dirava ese Taravatu ma ia atoa. Bona inai Taravatu do ia noho ela bona Keriso, Aberahamo ena natuna do ia ginidae.” (Galatia 3:19) Taravatu ese Israela taudia ia hadibaia loulou idia be goevadae lasi taudia. Unai dainai, boubou gauna goevadaena idia abia be namo edia kara dika ia kokia momokani totona. (Heberu 10:1-4) Unai dainai Taravatu ese Israela taudia ia durua Iesu, Mesia, o Keriso unai, idia abia dae totona. Paulo ia gwau: “Taravatu be iseda naria tauna bamona, ia mai bona Keriso ia ginidae. To Keriso ia ginidae neganai, abidadama dekena amo Dirava ena vairanai do ita maoromaoro diba.”—Galatia 3:24.
Iehova Ena Taravatu Ia Metau, A?
13. (a) Goevadae lasi taudia ese Taravatu be edena bamona idia laloa, bona dahaka dainai? (b) Taravatu be momokani ia metau, a?
13 Ena be Taravatu be ia “helaga, maoro bona namo,” momo idia laloa ia metau. (Roma 7:12) Ia be Taravatu goevadaena dainai, Israela taudia ese ena dala hereadia idia badinaia diba lasi. (Salamo 19:7) Unai dainai aposetolo Petero ia gwau “iseda sene taudia bona ita danu ita huaia be hegeregere lasi.” (Kara 15:10) Momokani, Taravatu be ia metau lasi, bona taunimanima ese idia badinaia neganai namo idia davaria.
14. Edena haheitalai haida ese idia hahedinaraia Taravatu ese namo bada ia havaraia Israela taudia dekenai?
14 Hegeregere, Taravatu henunai, henaoa tauna be dibura dekenai idia atoa lasi to ia gaukara goada ia henaoa gauna be nega rua eiava sisina momo ai ia habadaia bona henia lou totona. Ena kohu idia henaoa tauna ese gau ta ia haboioa lasi, bona gaukara goadagoada taudia be dibura rumadia haheaua dalana durua karana amo idia hametaua lasi. (Esodo 22:1, 3, 4, 7) Gorere idia havaraia diba anianidia be taravatu. Bema idia nadua namonamo lasi neganai, boroma amo trichinosis gorerena idia abia diba, bona rabiti amo tularemia gorerena idia abia diba. (Levitiko 11:4-12) Unai hegeregerena, Taravatu ese mase tauanidia dogoatao karana ia taravatua bona unai ese taunimanima ia naria. Bema tau ta be mase tauanina ta ia dogoatao, do ia digu bona ena dabua ia huridia be namo. (Levitiko 11:31-36; Numera 19:11-22) Tano lalonai kukuri do idia koua, taunimanima be jems amo idia naria totona, vanegai laganidia sibona ai saiens taudia ese idia davaria jems idia noho.—Deuteronomi 23:13.
15. Dahaka be ia metau Israela taudia dekenai?
15 Taravatu be taunimanima dekenai metau bada ia atoa lasi. To idia sibodia ese Taravatu idia gwauraia hedinarai dagina idia abia taudia be unai bamona ita gwauraidia diba lasi. Idia karaia taravatu be A Dictionary of the Bible, James Hastings ese ia haboua gauna lalonai ia gwauraia neganai, ia gwau: “Baibel ena hahegani iboudiai dekenai taravatu maragimaragidia momo idia atoa kau. . . . Idia laloa gaudia ibounai dekenai Taravatu idia atoa, bona hebogahisi lasi ida taunimanima ese idia karaia kara iboudiai idia biagua auka. . . . Edia lalona ena mamina idia koua; Dirava ena hereva ena siahu be idia koua bamona bona taravatu momo herea badinaia karadia amo idia hunia.”
16. Iesu be dahaka ia gwau tomadiho gunalaia taudia edia taravatu bona sene herevadia metaudia dekenai?
16 Iesu Keriso ese taravatu momo idia atoa tomadiho gunalaia taudia ia gwau henia, ia gwau: “Idia ese huaia gaudia mai metau danu idia kwatua, taunimanima edia latanai idia atoa, to edia imana kwakikwakina sibona dekena amo durua sisina idia henia lasi.” (Mataio 23:2, 4) Ia hahedinaraia taunimanima ese idia karaia taravatu bona sene herevadia metaudia, hagoevaia karadia momo danu, ese “Dirava ena hereva [idia] hadikaia.” (Mareko 7:1-13; Mataio 23:13, 24-26) To, Iesu be tanobada dekenai ia do mai lasi neganai danu, tomadiho hadibaia taudia Israela dekenai ese Iehova ena ura gaudia idia gwauraia kerere.
Iehova Ia Ura Gauna Korikorina
17. Dahaka dainai Iehova be abidadama lasi Israela taudia ese idia gabua boubou gaudia ia moalelaia lasi?
17 Peroveta tauna Isaia amo, Iehova ia gwau: “Emui mamoe umui gabua, bona emui boromakau edia digara, umui gabua gaudia lau abia, be ia davana vadaeni lau dekenai. Lau be boromakau, bona mamoe, bona nanigosi edia rarana dekenai lau hesiku vadaeni.” (Isaia 1:10, 11) Dahaka dainai Iehova ese Taravatu lalonai ia gwauraia boubou gaudia dekenai ia moale lasi? (Levitiko 1:1–4:35) Badina Israela taudia ese ia idia matauraia lasi. Unai dainai ia sisiba henidia, ia gwau: “Umui sibona do umui huria, do umui goeva totona. Inai umui karaia noho kara dika be do umui hadokoa. Io, inai emui kerere do umui hadokoa, bona kara namo karaia dalana do umui tahua. Kota maoromaorona do umui tahua, bona mai dagedage danu taunimanima idia hisihisi henidia taudia, edia kara do umui koua. Mai edia tamana lasi natuna maragidia do umui durua, bona vabu danu do umui gimaia, haida ese do idia hadikaia lasi.” (Isaia 1:16, 17) Unai ese ita ia durua, Iehova ia ura ena hesiai taudia idia karaia gauna ita lalo-pararalaia totona, a?
18. Iehova ena ura gauna korikorina Israela taudia dekenai be dahaka?
18 Iesu ese Dirava ia ura henia gauna korikorina ia hahedinaraia. Unai ia hahedinaraia inai henanadai idia henia neganai: “Taravatu dekenai, edena hereva be ia bada herea momokani?” Iesu ia haere: “ ‘Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana. Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ Inai hereva ruaosi be taravatu bona peroveta taudia edia hereva ibounai edia anina idia haboua.” (Mataio 22:36-40; Levitiko 19:18; Deuteronomi 6:4-6) Peroveta tauna Mose ese unai hereva tamona ia gwauraia danu, ia gwau: “Israela taudia e, kamonai namonamo! Lohiabada, iseda Dirava ena oda hereva umui dekenai, do umui kamonai henia. Gauna be inai: Lohiabada emui Dirava do umui gari henia, bona iena dala ibounai do umui raka. Lohiabada emui Dirava do umui lalokau henia, bona iena hesiai gaukara do umui karaia, mai emui lalona ibounai, bona mai emui lauma ibounai. Ma Lohiabada ena oda bona ena Taravatu ibounai, lau ese umui hanamoa totona hari dina lau gwauraia gaudia, do umui badinaia.”—Deuteronomi 10:12, 13; 15:7, 8.
19. Israela taudia be edena dala ai idia ura helaga toana idia hahedinaraia, to Iehova be idia dekenai dahaka ia hereva?
19 Ena be idia kara dika, Israela taudia idia ura helaga toana idia hahedinaraia. Ena be Taravatu ia gwau lagani ta ta ai Kara Dika Ena Davana Karaia Dinana sibona ai aniani do idia ania lasi, to idia ese nega momo unai idia karaia. (Levitiko 16:30, 31) To Iehova ese ia badu henidia, ia gwau: “Aniani ania lasi taravatu, lau ese lau ura henia gauna, be inai bamona: Dagedage ena seini ibounai do umui kokia, bona kota maoromaoro lasi kara ese ia guia taudia do umui ruhaia. Hitolo taudia dekenai emui aniani do umui henia, bona ogogami taudia, edia ruma be lasi taudia, be emui ruma dekenai do umui hakaua vareai. Bona mai edia dabua lasi taudia dekenai dabua do umui henia. Bona bema emui varavara taudia be durua idia ura neganai, idia dekena amo do umui hunia lasi.”—Isaia 58:3-7.
20. Dahaka dainai Iesu ese tomadiho gunalaia taudia koikoidia ia gwau henia?
20 Sibodia edia maoromaoro idia laloa Israela taudia bona tomadiho gunalaia taudia koikoidia edia hekwakwanai be tamona. Iesu ese unai tomadiho gunalaia taudia dekenai, ia gwau: “Aniani edia ava maragimaragi ibounai dekenai umui haria be kahana 10 umui karaia, kahana ta be boubou gauna dekenai umui halaoa. To taravatu ena hereva badadia, kota henia, bona bogahisihisi, bona abidadama, umui negea. Bema umui badinaia, bona kara namodia haida danu bema umui badinaia be ia namo.” (Mataio 23:23; Levitiko 27:30) Iesu ena hereva ese ita idia durua Iehova ena ura korikorina ita dekenai ita lalo-pararalaia totona.
21. Peroveta tauna Mika ese Iehova ia ura ita karaia bona ia ura lasi ita karaia gauna be edena bamona ia gwauraia?
21 Iehova ia ura ita karaia bona ia ura lasi ita karaia gauna hahedinaraia totona, Dirava ena peroveta tauna Mika ia henanadai: “Lau ese Lohiabada, guba ena Dirava lau tomadiho henia neganai, dahaka do lau mailaia? Sedira boromakau ena natudia namo herea momokani do lau mailaia, gabua bouboudia Lohiabada dekenai do lau henia, a? Bema mamoe momo herea, duahia diba lasi, bona olive dehoro ena sinavai momo herea, danu lau mailaia neganai, do ia moale? Lauegu natuna vara guna Lohiabada dekenai do lau mailaia, egu kara dika davana karaia totona, a? Lasi momokani! Lohiabada ese kara namo dalana ita ia hamaoroa vadaeni. Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou.”—Mika 6:6-8.
22. Iehova ia ura Taravatu henunai idia noho taudia be dahaka idia karaia?
22 Vadaeni, Iehova ia ura Taravatu henunai idia noho taudia be dahaka idia karaia? Oibe, gau badana be idia ese Iehova Dirava do idia lalokau henia. To, aposetolo Paulo ia gwau: “Taravatu ibounai be hereva tamona lalonai idia noho. Hereva be inai: ‘Oiemu badibadinai ia noho tauna do oi lalokau henia, oi sibona oi lalokau henia bamona.’ ” (Galatia 5:14) Unai hegeregerena, Paulo ese Roma Keristani taudia ia hamaoroa, ia gwau: “Ta ta dekenai do umui lalokau henia noho, badina be lalokau henia tauna ese Mose ena taravatu ibounai ia badinaia momokani vadaeni. . . . Unai dainai bema ita lalokau henia, be Taravatu ibounai ita badinaia inai.”—Roma 13:8-10.
Ia be Metau Lasi
23, 24. (a) Dahaka dainai namona be ita laloa Iehova ia ura ita karaia gaudia be idia metau lasi? (b) Hereva gabena ai dahaka do ita herevalaia?
23 Ita moale bada badina Iehova be lalokau, ma haida ia laloa, bona hebogahisi Diravana, ani? Ia sibona ia havaraia Natuna tamona, Iesu Keriso, be tanobada dekenai ia mai Dirava ena lalokau ena bada ia hahedinaraia goevagoeva totona—taunimanima ia hadibaia momokani idia be mai anina bada Iehova dekenai. Dirava ena lalokau ia hahedinaraia totona, Iesu ese manu maragidia ia herevalaia, ia gwau: “Dirava ese idia ta ia laloaboio lasi.” Hereva dokonai ia gwau: “Unai dainai, do umui gari lasi, umui ese manu maragidia momo edia davana umui hanaia.” (Luka 12:6, 7) Momokani, namona be inai bamona ita laloa, unai bamona lalokau Diravana ese herevana dahaka ia ura ita karaia ia be metau lasi ita dekenai!
24 To, Iehova ia ura dahaka ita karaia hari? Bona dahaka dainai haida idia laloa Dirava ia ura kara metaudia ita badinaia? Unai henanadai edia haere ita tahua neganai, do ita itaia dahaka dainai Iehova ia ura ita karaia gaudia ita karaia be hahenamo badana ta.
Oi Haere Diba, A?
◻ Dahaka dainai haida be Iehova idia tomadiho henia lasi?
◻ Lagani momo idia hanaia lalonai Iehova ena hahegani be edena bamona idia idau?
◻ Taravatu ese dahaka gaudia ia hagugurua?
◻ Dahaka dainai Iehova ia ura ita karaia gaudia be idia metau lasi?
[Picture on page 18]
Taunimanima ese idia karaia taravatudia, hegeregere hagoevaia karadia momo, ese tomadiho karana idia hametaua