Duahia Taudia Edia Henanadai

Iehova ena Witness taudia edia lalohadai vouti karana dekenai be dahaka?

Baibel lalonai idia hedinarai goevagoeva hakaua herevadia ese Dirava ena hesiai taudia ia durua unai idia laloa namonamo totona. To, taravatu be lasi vouti karana dekenai. Hegeregere, bema kampani ta ena dairekta taudia ese edia orea lalonai idia ura gau idauidau idia abia hidi totona idia vouti, unai be kerere lasi. Nega momo Iehova ena Witness taudia edia kongregesen ese edia hebou negadia eiava kongregesen ena moni idia gaukaralaia daladia abia hidi totona edia imana idia abia isi karana amo idia vouti.

To, politikol eleksen lalodiai vouti karana be edena bamona? Momokani, demokratik tanodia haida lalonai, vouti dinana dekenai unai tano taudia 50 pesen bamona be idia lao lasi vouti totona. Iehova ena Witness taudia ese ma haida edia maoro vouti karana dekenai idia koua lasi; eiava politikol eleksen hadikaia herevadia idia halasia lasi. Unai bamona eleksen lalodiai idia abia hidi siahu taudia idia matauraia bona idia danu idia gaukara hebou. (Roma 13:​1-7) Iehova ena Witness taudia ta ta be Baibel amo edia lalona idia hadibaia hegeregerena bona edia maduna Dirava bona Gavamani dekenai idia lalo-pararalaia hegeregerena do idia abia hidi eleksen lalonai ia vareai tauna ta totona do idia vouti eiava lasi. (Mataio 22:21; 1 Petero 3:​16) Idia ta ta ese unai idia abia hidi totona, Witness taudia ese gau haida idia laloa guna.

Gau namba 1 be, Iesu ese ena murinai idia raka taudia be inai bamona ia gwauraidia: “Idia be tanobada ena lasi, lau hegeregerena, lau be tanobada ena lasi.” (Ioane 17:14) Iehova ena Witness taudia ese unai hakaua herevana idia laloa bada. Idia be “tanobada ena lasi” dainai, tanobada ena politikol karadia lalonai idia vareai lasi.​—Ioane 18:36.

Gau namba 2 be, aposetolo Paulo ese sibona ia gwauraia “gwaukau tauna,” ia be iena nega taudia dekenai Iesu ia gwauraia hedinarai. (Efeso 6:​20, NW; 2 Korinto 5:​20, NW) Iehova ena Witness taudia idia abia dae, hari Iesu Keriso be Dirava ena guba Basileiana ena King, bona idia be gwaukau taudia bamona, unai sivarai be bese idauidau dekenai idia gwauraia hedinarai be namo. (Mataio 24:14; Apokalupo 11:15) Gau badana be gwaukau taudia be politikol gaudia idauidau amo idia gini siri bona idia siaidia tanodia edia kara idauidau lalonai idia vareai lasi. Idia be Dirava ena guba Basileiana ena gwaukau taudia dainai, Iehova ena Witness taudia idia mamia idia be mai edia maduna idia noholaia tanona ena politikol karadia amo idia gini siri totona.

Do idia laloa gauna namba 3 be, ta be vouti amo idia abia hidi bena gaukara ta ia abia neganai, ia dekenai edia vouti idia henia taudia be mai edia maduna unai tauna ena kara dekenai. (1 Timoteo 5:​22, The New English Bible itaia.) Namona be Keristani taudia do idia laloa namonamo bema unai maduna do idia ura huaia eiava lasi.

Gau namba 4 be, Iehova ena Witness taudia ese edia Keristani lalo-tamona idia laloa bada. (Kolose 3:​14) Tomadiho be politikol gaudia lalonai ia vareai neganai, nega momo ena orea taudia idia parara. Iesu Keriso idia tohotohoa dainai, Iehova ena Witness taudia ese politikol karadia amo idia gini siri bona edia Keristani lalo-tamona idia naria.​—⁠Mataio 12:25; Ioane 6:​15; 18:​36, 37.

Gau namba 5 bona ginigabena be, politikol karadia amo idia gini siri dainai, Iehova ena Witness taudia ese politikol ena dala idauidau idia badinaia taudia ibounai dekenai Basileia ena mai anina bada sivaraina idia gwauraia diba.​—⁠Heberu 10:⁠35.

Unai ataiai idia noho Baibel ena hakaua herevadia dainai, tano momo lalonai Iehova ena Witness taudia be sibona edia lalona idia hadaia politikol eleksen dekenai do idia vouti lasi, bona edia tano ena taravatu ese unai ura-kwalimu karana ia abia isi. To, bema tano ena taravatu ia gwau iboudiai do idia vouti be namo, be edena bamona? Bema unai bamona ia vara, Witness taudia ta ta be mai edia maduna edia lalona ena mamina bona Baibel ena hereva hegeregerena do idia abia hidi dahaka idia karaia. Bema ta ia laloa vouti rumana dekenai ia lao be namo, unai be ia sibona ese do ia abia hidi. Dahaka do ia karaia unai vouti rumana dekenai be ena Havaraia Tauna vairanai ia karaia gauna.

The Watchtower, November 15, 1950 gauna, be rau 445 bona 446 ai, ia gwau: “Bema Kaisara ese taravatu ia atoa ena hanua taudia do idia vouti . . . [Witness taudia] idia lao diba vouti gabuna dekenai bona vouti rumana dekenai idia vareai diba. Unai gabu dekenai edia maka o edia lalohadai unai gauna dekenai do idia torea. Vouti taudia be edia ura hegeregerena do idia kara. Unuseniai, Dirava vairanai iena witness taudia be do idia kara ena hahegani bona edia abidadama hegeregerena. Dahaka do idia karaia edia vouti pepana dekenai be ai ese ai hadibadia lasi, ia be emai maduna lasi.”

To, dahaka do ia vara bema Keristani hahinena ena abidadama lasi adavana ese ia doria vouti gabuna dekenai ia lao totona? Keristani taudia be gavamani ena siahu taudia henunai idia noho hegeregerena, namona be ia be ena adavana ena siahu henunai ia noho. (Efeso 5:​22; 1 Petero 2:​13-​17) Bema ia ese ena adavana ena hereva ia kamonai henia bona vouti rumana dekenai ia lao, unai be ia sibona ese ia abia hidi hegeregerena. Ta ese ia idia gwauraia dika lasi be namo.​—⁠Roma 14:⁠4 itaia.

To, dahaka do ia vara bema tano ta ese taravatu ia atoa lasi iboudiai idia vouti totona, to taunimanima ese vouti rumana dekenai ia lao lasi tauna idia badu henia​—⁠reana tauanina dalanai do idia dagedage henia? Eiava, dahaka do ia vara bema taravatu be lasi vouti totona, to ta be vouti rumana dekenai ia lao lasi dainai, dala ta ai idia hahemaoro henia? Unai bona unai bamona negadiai, namona be Keristani tauna be sibona do ia abia hidi dahaka do ia karaia. “Ibounai ta ta sibona ena metau, ena metau do idia huaia.”​—⁠Galatia 6:⁠5.

Reana taunimanima haida do idia lalo-hekwarahi bema idia itaia edia tano ai eleksen idia karaia neganai Iehova ena Witness taudia haida idia lao vouti rumana dekenai bona haida idia lao lasi. Reana do idia gwau: ‘Iehova ena Witness Taudia be dala tamona idia badinaia lasi.’ To, namona be taunimanima idia lalo-parara, unai bamona gaudia idia vara neganai, Keristani taudia ta ta ese ena lalona ena mamina hegeregerena, Iehova vairanai do ia abia hidi.​—⁠Roma 14:⁠12.

Nega idauidau lalonai, herevana Iehova ena Witness taudia ta ta be dahaka abia hidi ia karaia, to idia ese edia Keristani gini siri karana idia naria bona taunimanima dekenai idia haroro diba dalana idia hadikaia lasi totona. Gau ibounai lalonai, idia ese Iehova dekenai idia tabekau, goada, aonega, bona heduru do ia henidia edia abidadama idia hadikaia lasi totona. Unai dala ai idia hahedinaraia idia ese salamo torea tauna ena hereva idia abia dae, ia gwau: “Oi be egu Nadi Badana bona egu kohoro dainai, oi ese lau do oi hakaua, bona gimaia, oiemu gwauhamata hegeregerena.”​—⁠Salamo 31:⁠3.