Mauri Sivaraina

Iehova be Egu Heau Mauri Gabuna Bona Goada Henia Tauna

MARCEL FILTEAU ESE IA GWAURAIA

“Bema ia oi adavaia, dibura gabuna dekenai do oi lao.” Unai be taunimanima edia hereva egu maoheni kekeni dekenai. Namona be edia hereva ena badina lau gwauraia hedinarai.

LAGANI 1927, lau vara laganina ai, Canada ena provinsi Quebec dekenai Katolik Dubu be ia goada. Lagani hani murinai, Cécile Dufour, ful-taim haroro gaukara ia karaia Iehova ena Witnes hahinena ta, be aiemai ruma Montreal dekenai ia vadivadi matamaia. Unai ia karaia dainai, aiemai dekena taudia be nega momo ia idia hagaria toho. Momokani, nega momo pulisi ese ia idia dogoatao bona idia dagedage henia, badina Baibel ena sivarai ia harorolaia. Unai dainai, nega daudau lasi murinai, ai lalo-parara Iesu ena hereva be momokani, ia gwau: “Lauegu ladana dainai bese ibounai ese umui do idia badu henia.”​—⁠Mataio 24:⁠9.

Unai neganai, taunimanima momo idia laloa Canada ena French ruma bese ta be ena Katolik tomadihona ia rakatania diba lasi. Ena be egu tamana bona sinana be bapatiso Witnes taudia ai idia lao lasi, to karaharaga idia itaia Katolik Dubu ena hahediba herevadia be Baibel ena hereva hegeregerena lasi. Unai dainai edia natudia 8 idia hagoadaia Witnes taudia edia buka bona magasin idia duahia totona, bona Baibel ena hereva momokani ai badinaia natudia idia durua.

Hekwarahi Negadiai Ai Gini Goada

Lagani 1942 ai, lau do sikuli noho neganai, Baibel stadilaia karana lau ura henia bada matamaia. Unai neganai, Canada lalonai, Iehova ena Witnes taudia idia taravatua, badina Keristani taudia ginigunadia edia haheitalai idia tohotohoa bona bese idauidau edia tuari lalodiai idia vareai lasi. (Isaia 2:4; Mataio 26:52) Tanobada ibounai tuarina idia karaia badabada neganai, egu kakana, Roland, be ia ura lasi tuari lalonai ia vareai dainai, dibura kamepa dekenai idia atoa.

Unai neganai, Tamagu be buka ta France gado ai ia henia lau dekenai. Unai buka be Germany Witnes taudia ese Adolph Hitler ena ami idia durua lasi dainai idia ania hisihisi idauidau ia herevalaia.a Lau ura lau be unai gari lasi taudia bamona, bona Iehova ena Witnes taudia edia hebou, tau ta ena ruma dekenai idia karaia heboudia, dekenai lau lao matamaia. Daudau lasi murinai lau idia boiria haroro gaukara lau karaia totona. Ena be lau diba reana pulisi ese lau do idia dogoatao bona dibura dekenai lau do idia atoa, to edia boiboi herevana lau abia dae.

Goada abia totona lau guriguri murinai, iduara ginigunana dekenai lau pidipidi. Hebogahisi hahinena ta ia mai, bona egu ladana lau henia murinai, 2 Timoteo 3:​16 ena hereva, “Buka Helaga ena hereva ibounai be Dirava ena Lauma ese ia havaraia,” be ia dekenai lau duahia.

Lau gwau: “Oi ura Baibel ena hereva ma haida oi dibaia, a?”

Hahine ia gwau: “Oibe.”

Unai dainai ia lau hamaoroa Baibel lau diba sisina, to Baibel ia diba namonamo turana ta do lau mailaia, bena pura ta murinai unai lau karaia. Unai nega ginigunana murinai, lau gari lasi, bona lau diba sibona eda goada amo unai haroro gaukara ita karaia lasi. Aposetolo Paulo ena hereva hegeregerena, Iehova ena heduru amo ita karaia. Oibe, gau badana be ita diba “inai siahu badana be Dirava sibona dekena amo, ai dekena amo ia mai lasi.”​—⁠2 Korinto 4:⁠7.

Unai murinai, haroro gaukara be vaia lau karaia gaukarana bona nega momo lau idia dogoatao bona dibura dekenai lau idia siaia danu. Unai dainai lau hoa lasi egu maoheni kekeni idia hamaoroa: “Bema ia oi adavaia, dibura gabuna dekenai do oi lao”! To, unai hahetoho idauidau be auka momokani lasi. Nega momo hanuaboi ta dibura dekenai ai mahuta murinai, Witnes tauna ta ia mai bona emai ruhaia davana ia henia.

Mai Anina Bada Gaudia Ai Abia Hidi

April 1943 ai, Iehova dekenai egu mauri lau gwauhamatalaia bona ranu bapatiso amo unai lau hamomokania. Bena August 1944 ai, Canada tano ena hetoana unai kahanai, Buffalo, New York, U.S.A. ai, egu hebouhebou badana ginigunana dekenai lau lao. Taunimanima 25,000 idia noho, bona ena program ese lauegu ura ia hagoadaia painia gaukara, o Iehova ena Witnes ful-taim hesiai gaukara, do lau karaia totona. May 1945 ai, Canada dekenai Iehova ena Witnes taudia edia gaukara taravatua karana ia ore, bona June dekenai painia gaukara lau matamaia.

To, egu haroro gaukara lau habadaia neganai, nega momo dibura dekenai lau idia atoa. Nega ta lau idia atoa dibura ena daiutu ta lalonai, bona Mike Miller, nega daudau vadaeni mai abidadama ida Iehova ia hesiai henia tauna, ia noho danu. Semenisi foloa dekenai ai helai bona ai kiki. Lauma gaudia ai herevalaia, bona unai ese lau ia hagoadaia bada. Unai murinai inai henanadai lau laloa, ‘Bema hekwakwanai maragina ta dainai ai badu heheni bona ai herevahereva lasi be edena bamona?’ Dibura dekenai unai lalokau tadikakana lau bamoa negana ese egu mauri lalonai gau hereadaena ta ia hadibaia​—⁠iseda tadikaka edia heduru ita abia be gau badana, unai dainai namona be edia kerere ita gwauatao bona ita hebogahisi heheni. Bema unai ita karaia lasi, ia be aposetolo Paulo ia gwauraia hegeregerena: “Bema umui ta ta umui hadikaia bona heatu henia neganai, do umui naria namonamo, umui sibona do umui haorea garina.”​—⁠Galatia 5:​15.

September 1945 ai, Watch Tower Society ena brens opesi, o ai gwauraia Betele, Toronto, Canada dekenai, lau idia boiria mai. Lauma gaudia idia laloa momo dainai egu abidadama ia hagoadaia bada. Lagani ta murinai, Betele ena uma bona animal naria gabuna dekenai gaukara lau abia, brens opesi ena not kahana amo ena daudau be kilomita 40. Anne Wolynec ida strawberries ai gogodia neganai, lau itaia ia be kekeni mai hairaina, to danu lau itaia Iehova ia lalokau henia bona Iena gaukara ia ura henia bada. Ai tura heheni bena January 1947 dekenai ai headava.

Lagani rua mai kahana lalonai, painia gaukara ai karaia London, Ontario dekenai, bena unai murinai Cape Breton Island dekenai, bona unuseniai idia ai durua kongregesen ta hamatamaia totona. Bena, lagani 1949 ai, Watchtower Bible School of Gilead ena klas namba 14 dekenai ai idia boiria, unuseniai ai idia hadibaia misinari gaukara do ai karaia totona.

Misinari Gaukara Quebec Dekenai

Gilead sikuli idia haorea vadaeni Canada taudia ma haida be Quebec lalonai haroro gaukara idia hamatamaia totona idia siaidia lao vadaeni. Lagani 1950 ai, ai bona Gilead klas namba 14 amo idia mai tadikaka 25 ese unai taudia ai bamoa matamaia. Misinari gaukara ia bada ia lao dainai, Roman Katolik Dubu ena hakaua taudia ese dagedage idia habadaia bona idia hasiahua taunimanima hutuma ese ai idia hadikaia toho.

Rouyn, aiemai misinari gaukara gabuna ginigunana, dekenai ai ginidae bena dina rua murinai, pulisi ese Anne idia dogoatao bona pulisi motuka ena murina kahana ai idia atoa. Unai be gau matamata ia dekenai, badina ena noho gabuna be hanua maragina Manitoba provinsi, Canada dekenai, bona nega momo pulisi ia itaia lasi. Gari mamina ia abia bona inai hereva ia laloatao, “Bema ia oi adavaia, dibura gabuna dekenai do oi lao.” To, dibura dekenai idia do lao lasi neganai lau idia davaria danu bona lau idia atoa edia motuka dekenai, Anne danu. Ia gwau: “Lau moale bada herea oi lau itaia dainai!” To, ena hemami ia biagua bona ia gwau, “Inai ia vara aposetolo taudia dekenai danu, Iesu ena sivarai idia harorolaia dainai.” (Kara 4:​1-3; 5:​17, 18) Unai dina dekenai ruhaia davana idia abia dainai ai idia ruhaia.

Lagani ta bamona murinai, aiemai gabu matamata, Montreal, dekenai ruma-ta-ruma-ta gaukarana ai karaia neganai, dala dekenai regerege bada lau kamonai bona lau itaia taunimanima hutuma idia badu bona nadi idia negea. Anne bona ia bamoa taihuna ta durua totona lau lao neganai, pulisi idia ginidae. Nadi idia negea taudia idia dogoatao lasi, to Anne bona ia bamoa taihuna idia dogoatao! Dibura dekenai, Anne ese unai Witnes hahine matamatana ia hamaoroa Iesu ena hereva be idia dekenai ia guguru, ia gwau: “Lauegu ladana dainai taunimanima ibounai ese do idia badu henia umui dekenai.”​—⁠Mataio 10:⁠22.

Nega ta, Quebec dekenai, Iehova ena Witnes taudia idia samania dainai, samani hereva 1,700 totona kota negana idia naria. Nega momo, idia gwau aiemai buka bona magasin ese gavamani idia hadikaia toho eiava idia gwau aiemai buka bona magasin ai hariharilaia ena be laiseni pepana ai abia lasi. Unai dainai, Watch Tower Society ena Legal Department ese Quebec ena gavamani idia samania kota dekenai. Lagani momo lalodiai nega momo kota dekenai idia lao murinai, Iehova ese ai ia durua bona Canada ena Kota Badana dekenai nega rua ai kwalimu. December 1950 ai, kota ia gwau aiemai buka bona magasin ese gavamani idia hadikaia toho lasi, bona October 1953 ai, kota idia gwau Baibel bukadia bona magasin ai hariharilaia diba ena be laiseni pepana ai dogoatao lasi. Unai amo ai itaia namonamo Iehova be “heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.”​—⁠Salamo 46:⁠1.

Hoa gauna be lagani 1945 ai, lau painia matamaia neganai, Quebec lalonai idia noho Witnes taudia edia namba be 356, to hari edia namba be 24,000 ia hanaia! Baibel ena peroveta hereva hegeregerena ia vara, ia gwau: “Tuari gauna ta ese oi do ia hadikaia diba lasi. Bona oi idia samania gwauraia taudia, be oi ese idia edia hereva ibounai do oi koua diba.”​—⁠Isaia 54:⁠17.

Aiemai Gaukara France Dekenai

September 1959 ai, Anne bona lau idia boiria Paris, France ena Betele dekenai, unuseniai printa gaukarana do lau naria totona. Guna amo ela bona January 1960, ai ginidae negana, kampani ta ese edia printa gaukarana ia karaia. Unai neganai France dekenai Gima Kohorona idia taravatua dainai, hua ta ta ai rau 64 buklet bamona unai magasin ai printaia. Unai buklet ena ladana be Iehova Ena Witnes Taudia Edia Nius, bona hua ta ai kongregesen do idia stadilaia herevadia be ia lalonai idia noho. Lagani 1960 ia lao 1967 ai, France dekenai haroro gaukara idia karaia taudia edia namba be 15,439 amo ia bada daekau 26,250 dekenai.

Gabeai, misinari taudia momo idia siaia lao gabu ma haida dekenai, haida be France gado idia gaukaralaia gabudia Africa dekenai idia siaia bona ma haida be Quebec dekenai idia giroa. Anne ia gorere bona operesen ta ia abia be namo dainai, Quebec dekenai ai giroa lao. Lagani toi lalodiai doketa ena heduru ia abia bena Anne ia goada lou. Unai murinai sekit naria gaukara lau karaia, pura ta ta ai kongregesen idauna lau vadivadi henia, lauma dalanai idia lau hagoadaia totona.

Misinari Gaukara Africa Dekenai

Lagani haida murinai, lagani 1981 ai, ai moale badina gaukara matamata ai abia, misinari gaukara do ai karaia Zaire, o hari idia gwauraia Democratic Republic of Congo dekenai. Taunimanima idia ogogami, bona metau momo dainai hisihisi idia abia. Ai ginidae negana ai, Witnes taudia 25,753 idia noho, to edia namba ia bada ia lao ela bona hari 113,000 idia hanaia, bona lagani 1999 ai, Keriso ena mase ena Memorial hebouna dekenai idia lao taudia edia namba be 446,362!

Lagani 1984 ai, gavamani amo tano ai abia, brens opesi matamatana haginia totona, ena bada be hectare 200. Bena, December 1985 ai, siti badana, Kinshasa, dekenai intenesenel hebouhebouna ai karaia, bona tanobada ena kahana idauidau amo idia mai taudia edia namba be 32,000. Unai murinai, tomadiho gunalaia taudia idia havaraia dagedage karadia ese aiemai gaukara Zaire dekenai ia hadikaia. March 12, 1986 ai, maduna idia abia tadikakadia ese revareva idia abia, ia gwau Zaire ena Iehova ena Witnes taudia edia orea be idia taravatua vadaeni. Aiemai gaukara ibounai ia taravatua pepana be Zaire ena presiden, hari ia mase vadaeni tauna Mobutu Sese Seko ese ia sainia.

Unai ia vara haraga dainai, Baibel ena sisiba ai gaukaralaia: “Aonega tauna ese dika ia itaia noho, bona unai dika dekena amo ia raka siri.” (Aonega Herevadia 22:⁠3) Dala ai davaria bona pepa, ink, filimi, printa gaudia, bona kemikol ai abia tano ma ta amo, Kinshasa dekenai aiemai magasin ai printaia totona. Haria dalana danu ai sibona ai karaia. Gabeai, ai gaukara hebou dainai, aiemai haria dalana ena namo ese gavamani ena pos opesi haria dalana ena namo ia hereaia!

Witnes taudia tausen momo idia dogoatao, bona idia momo idia hahisia dikadika. To, kahirakahira idia iboudiai ese unai kara dikana idia haheaukalaia bona edia abidadama idia rakatania lasi. Lau idia dogoatao danu bona dibura dekenai tadikaka idia haheaukalaia gaudia dikadia lau itaia. Nega momo, dala idauidau ai idia gaukara hehuni pulisi taudia bona siahu taudia ese ai idia hametaua, to Iehova ese aiemai roho mauri dalana ia karaia loulou.​—⁠2 Korinto 4:⁠8.

Ai ese magasin bona buka edia maua 3,000 be bisinesi tauna ta ena kohu atoa rumana dekenai ai hunia vadaeni. To gabeai ena gaukara tauna ta ese idia gaukara hehuni pulisi taudia ia hamaoroa, bona unai bisinesi tauna idia dogoatao. Dibura dekenai idia lao neganai, egu motuka idia itaia. Unai bisinesi tauna ese idia ia hamaoroa lau ese ia amo gwaumaoro lau abia unai maua be iena kohu atoa rumana dekenai lau atoa totona. Pulisi ese lau idia koua bona lau idia henanadai henia, bona idia gwau lau be gavamani ese ia taravatua buka bona magasin lau atoa unai tauna ena kohu atoa rumana dekenai.

Idia lau nanadaia: “Buka ta ia noho, a?”

Idia gwau: “Oibe, ta ia noho.”

Lau gwau: “Lau itaia diba, a?”

Kopi ta idia henia lau dekenai, bona rau 2 dekenai inai hereva lau hahedinaraia idia dekenai: “Watch Tower Bible & Tract Society ese United States of America dekenai ia printaia.”

Idia lau hamaoroa: “Unai be America taudia edia kohu bona Zaire taudia edia kohu lasi. Umui emui gavamani ese Iehova ena Witnes taudia edia orea Zaire dekenai idia taravatua to United States dekenai ia noho Watch Tower Bible & Tract Society idia taravatua lasi. Unai dainai namona be dahaka do umui karaia unai buka bona magasin dekenai do umui laloa namonamo guna.”

Lau idia dogoatao lasi badina kota amo oda idia abia lasi. Unai hanuaboi ai, taraka rua ai taria unai kohu atoa rumana dekenai bona buka bona magasin ibounai ai kokia. Kerukeru pulisi idia lao unai gabu dekenai, to idia badu dikadika gau ta ia noho lasi dainai. Unai neganai lau idia tahua, badina kota ese oda ia henia lau idia dogoatao totona. Lau idia davaria, bona idia be motuka lasi dainai lauegu motuka lalonai dibura dekenai sibona lau taria lao! Witnes ma ta ese lau ia bamoa bena egu motuka ia abia lao, pulisi do idia abia garina.

Hora 8 lalodiai lau idia henanadai henia, bena idia laloa edia tano amo lau do idia lulua. To revareva ena kopi ta lau hahedinaraia idia dekenai, unai revareva be gavamani amo bona ia gwau idia taravatua vadaeni Zaire ena Iehova ena Witnes taudia edia orea ena kohu do lau hoihoilaia diba. Unai dainai Betele dekenai lau gaukara noho diba.

Lagani hani lalodiai, ena be taravatu ia noho to Zaire dekenai lau gaukara noho dainai, egu mauri ia hadokoa diba gorerena, egu bogana lalonai toto amo rara ia diho gorerena, lau abia. Tadikaka idia laloa namona be South Africa dekenai lau lao doketa itaia totona, bona unuseniai brens taudia ese lau idia naria namonamo bona egu goada lau abia lou. Lagani 8 Zaire dekenai ai gaukara, bona unai nega do ai laloaboio diba lasi bona ai moalelaia bada. Bena lagani 1989 dekenai ai lao South Africa ena brens dekenai. Lagani 1998 ai, emai tano dekenai ai giroa lao bona Canada Betele dekenai ai gaukara lou.

Ai Moale Hesiai Gaukara Ai Karaia Diba

Lagani 54 lalodiai ful-taim hesiai gaukara lau karaia diba dainai, lau moale bada herea badina egu matamata negana ena goada lau gaukaralaia diba Iehova ena dava bada hesiai gaukarana dekenai. Ena be Anne ese hekwakwanai momo ia haheaukalaia, to ia maumau lasi bona aiemai gaukara idauidau iboudiai ia durua. Ai gaukara hebou, bona ai ese taunimanima momo ai durua Iehova idia diba totona, bona idia haida be hari ful-taim hesiai gaukara idia karaia. Edia natudia haida bona edia tubudia haida danu ese iseda Dirava badana, Iehova, idia hesiai henia dainai ai ia hamoalea bada!

Lau diba momokani Iehova ia henia gaukara bona hahenamo edia namo ese inai tanobada ia henia diba gaudia edia namo idia hereaia. Momokani, hahetoho momo ai haheaukalaia, to idia ibounai ese aiemai abidadama Iehova dekenai idia hagoadaia. Dirava ia hamomokania ia be kohoro goadana, heau mauri gabuna, bona hekwakwanai idia vara negana ai ia durua haraga tauna.

[Footnote]

[Pictures on page 26]

Lagani 1947 ai, ai painia hebou; hari Anne ida

[Picture on page 29]

Zaire dekenai ai davaria taudia ese Baibel ena hereva momokani idia ura henia