Keristani Ahuna Goadana Dainai Lau Tanikiu Bada

GWEN GOOCH ESE IA SIVARAILAIA

Sikuli dekenai inai hereva ida guriguri anena ta lau abia, ‘Iehova Badana be mai ena hairai ida terona ai ia helai.’ Nega momo lau laloa, ‘Unai Iehova be daika?’

EGU TUBUDIA be Dirava idia gari henia taudia. Lagani 1900 ia matamaia lalonai, idia ese Bible Student taudia idia bamoa, guna Iehova ena Witness taudia be unai ladana idia gaukaralaia. Egu tamana be bisinesi dekenai ia kwalimu to ena tama sina ese idia hahedinaraia Keristani ahuna ai natudia toi dekenai ia henia guna lasi.

Tamagu ese lau, egu taihuna, Douglas, bona egu tadina, Anne dekenai buklet ladadia His Works bona Who Is God? ia henia negana sibona ai, lau dibaia Iehova be Dirava momokanina ena ladana. (Salamo 83:18) Lau moale dikadika! To dahaka ese Tamagu ena ura ia veria lou?

Lagani 1938 ai, tanobada besedia be tuari totona idia hegaegae neganai, Tamagu ia lalo-parara taunimanima edia goada ia hanaia gauna ta sibona ese tanobada ena hekwakwanai ia do haorea diba. Tubugu hahine ese buka ladana Enemies, Iehova ena Witness taudia ese idia halasia bukana, ia henia. Ia duahia amo ia davaria, taunimanima edia inai tauna korikorina be Satani Diabolo bona Dirava ena Basileia sibona ese tanobada dekenai maino ia havaraia diba.a​—⁠Daniela 2:44; 2 Korinto 4:⁠4.

Tuari be kahirakahira ia vara neganai, emai famili be Iehova ena Witness taudia edia Kingdom Hall, Wood Green, North London dekenai, hebou ai lao matamaia. June 1939 ai, kahirakahira ia noho Alexandra Palace dekenai ai lao, pablik tok ladana “Gavamani bona Maino” ai kamonai totona. Joseph F. Rutherford, unai neganai ia be Watch Tower Society ena presiden, ese unai hereva ia henia. Rutherford ena hereva be New York City ena Madison Square Garden ai ia henia bona reidio amo London bona siti badadia ma haida dekenai idia halasia. Ena hereva ai kamonai goevagoeva diba dainai, New York dekenai hutuma ese hebou idia hadikaia toho neganai, ai helai rumana lalonai egu kwarana lau giroa bona lau itaia badina lau laloa unai ruma lalonai ia vara noho!

Tamagu Ena Ura Baibel Ena Hereva Momokani Totona

Tamagu ia gwau Saturday adorahi iboudiai emai famili ibounai be Baibel stadi do ai karaia hebou. Ai ese Baibel ena hereva ta, Sunday ai do idia stadilaia Gima Kohorona lalonai ai stadilaia. Unai stadi ena namo haheitalaia totona, unai nega amo ema bona hari The Watchtower, May 1, 1939 gauna, ese Iosua be Ai hanuana ia koua hagege ena sivarai ia herevalaia gauna be egu lalona dekenai lau do laloatao goevagoeva. Unai sivarai lau hoalaia bada dainai, lau sibona egu Baibel lalonai ia herevalaia gabudia ibounai lau sekea. Unai bamona tahua karana lau moalelaia bada​—⁠bona hari danu lau moalelaia.

Ai dibaia gaudia be ma haida dekenai ai harorolaia karana amo Baibel ena hahediba herevadia be egu kudouna lalonai lau atoa diho. Dina ta Tamagu ese rekoda bona Baibel ena hereva rekodi ta, Baibel stadi lalonai ai gaukaralaia buklet ta, bona hahine buruka ta ena adres ia henia lau dekenai. Lau ia noia unai hahine do lau vadivadi henia.

Lau nanadaia: “Dahaka do lau hereva, bona dahaka do lau karaia?”

Tamagu ia gwau: “Gaudia ibounai idia noho unai. Rekodi oi gadaralaia, henanadai oi duahia, ruma tauna oi noia haere ia duahia, bena Baibel siri oi duahia.”

Ia hereva bamona lau karaia, bona unai dala amo Baibel stadi karaia dalana lau dibaia. Unai dala ai haroro gaukara lalonai Baibel siri lau gaukaralaidia dainai, lau lalo-pararalaidia namonamo.

Tuari Laganidia Edia Hetoho

Lagani 1939 ai, Tanobada Ibounai Tuarina Iharuana ia vara, bena murina lagani ai, bapatiso amo egu gwauhamata Iehova dekenai lau hahedinaraia. Egu mauri lagani be 13 sibona. Unai nega ai egu lalona lau hadaia painia pablisa ai do lau lao totona, ful-taim hesiai gaukara taudia edia ladana unai. Lagani 1941 ai, sikuli lau rakatania bona Leicester hebouhebou dekenai Douglas lau bamoa ful-taim haroro gaukara lalonai.

Murina lagani ai, Tamagu be dibura dekenai idia atoa badina tuari amo ia gini siri dainai. Unai tuari ena nega dikadia lalonai, ai natudia be emai sinana ai durua hebou, emai ruma ai naria totona. Bena, Tamagu be dibura amo idia ruhaia murinai, Douglas idia boiria tuari lalonai ia vareai totona. Niuspepa ta ese inai hereva kwarana badana ia halasia, “Natuna Mero be Tamana Bamona Dibura Ia Abia Hidi Ena Badina.” Dala ia kehoa bona haroro hereva namona ai henia, Keristani taudia momokanidia be taunimanima ma haida alaia karana lalonai idia vareai lasi ena badina ai gwauraia hedinarai neganai.​—⁠Ioane 13:35; 1 Ioane 3:​10-12.

Unai tuari lagani lalodiai, ful-taim hesiai gaukara idia karaia Witness taudia momo ese ai idia vadivadi henia hanaihanai, bona edia hagoadaia hereva Baibel amo ese ai idia durua bada. Unai abidadama Keristani tadikaka rua be John Barr bona Albert Schroeder, hari idia be Iehova ena Witness taudia edia Hakaua Oreana ena memba taudia. Emai tama sina be heabidae taudia momokani, bona ai idia hadibaia unai bamona do ai karaia.​—⁠Heberu 13:⁠2.

Hegaegae Haere Henia Totona

Painia gaukara lau hamatamaia murinai, ruma-ta-ruma-ta gaukara lalonai Hilda lau davaria. Mai badu danu ia gwau: “Egu adavana be ia tuari noho oi bamona taudia dainai! Badina be dahaka oi be tuari durua gaukarana ta oi karaia lasi?”

Lau nanadaia: “Lau karaia gaukarana oi diba, a? Oi diba dahaka dainai lau mai oi dekenai, a?”

Ia haere: “Namona be oi vareai mai bona lau oi hamaoroa.”

Lau hadibaia ai be kara dika, nega momo Dirava ena ladana ai idia karaia kara dika dainai, hisihisi idia davaria taunimanima dekenai helaro momokani ai mailaia. Hilda be mai ena ura danu ia kamonai, bona ia be egu Baibel stadi, hanaihanai lau karaia stadi ginigunana ai ia lao. Lagani 55 mai kahana idia hanaia lalonai ia be Witness goadana ta.

Tuari ena dokona ai, painia gaukara karaia gabuna matamatana Dorchester dekenai lau idia siaia, ia be taoni ta England ena sautwest kahana dekenai. Unai be nega ginigunana egu famili taudia lau rakatania bona gabu idauna ai lau noho. Emai kongregesen maragina be aniani rumana ta dekenai ai hebou, ia be lagani 1500 murinai idia haginia rumana ta ladana “The Old Tea House.” Emai hebou ta ta totona teibolo bona sea ai atoa namonamo. Ia be lau manadalaia Kingdom Hall amo ia idau vaitani. To herevana, lauma aniani tamona bona Keristani tadikaka bona taihu edia lalokau hebamo idia noho.

Unuseniai lau noho neganai, egu tama sina be Tunbridge Wells, London amo saut kahana dekenai idia lao bona unuseniai idia noho. Lau, Tamagu, bona Anne ai painia hebou totona egu famili taudia dekenai lau giroa lou. Daudau lasi murinai, emai kongregesen be Witness taudia 12 amo ia bada daekau ia lao 70, unai dainai emai famili idia noia Brighton, saut kone ena kahana dekenai ai lao, unuseniai Basileia harorolaia taudia be momo lasi. Momo be mai edia ura ida emai painia famili idia bamoa haroro gaukara lalonai, bona Iehova ese emai gaukara ia hanamoa. Unai kongregesen tamona be daudau lasi murinai kongregesen toi ai ia lao!

Ai Idia Boiria

Lagani 1950 ena siahu negana ai, emai ruma bese be New York ena Yankee Steidiam dekenai idia abia Theocracy’s Increase Intenesenel Hebouhebouna dekenai idia lao Britain taudia 850 ida ai lao. Tano idaudia amo unai hebouhebou dekenai idia lao taudia be aplikeisini idia abia Watchtower Bible School of Gilead, South Lansing, New York kahirakahira dekenai do idia lao totona. Lau, Douglas bona Anne be idia bogaraginai! Lau laloatao lau hahonua aplikeisini be maua lalonai lau udaia neganai, lau laloa, ‘Vadaeni hari lau karaia momokani inai! Egu mauri be edena dala ai do ia lao?’ To egu ura be: “Lau be inai, do lau lao! Lau do oi siaia!” (Isaia 6:⁠8) Lau idia boiria hebouhebou murinai do lau noho bona Gilead ena sikuli klas namba 16 dekenai do lau lao, Douglas bona Anne ida neganai, lau moale bada herea. Ai ibounai ai diba misinari taudia bamona tanobada ena kahana idauna dekenai ai idia siaia diba.

Emai famili ida hebouhebou ai moalelaia hebou murinai, emai tama sina​—⁠sibodia​—⁠be England dekenai do idia giroa lou negana ia ginidae. Mauritania sisima dekenai idia guia lao neganai, ai toi be ai bamahuta henidia. Ai idia rakatania be hebogahisi bada negana!

Misinari Gaukara Gabuna

Gilead ena klas namba 16 ena stiuden taudia 120 be tanobada ena kahana ibounai amo idia mai, Nazi dibura kamepa dekenai hisihisi idia abia taudia haida danu idia mai. Emai klas be Spain gado idia hadibaia dainai, ai laloa Spain gado idia gaukaralaia tanona ta South America dekenai ai do idia siaia. Sikuli ai haorea dinana dekenai ai davaria Douglas be Japan dekenai do ia lao, bona lau bona Anne be Syria dekenai do ai lao neganai, emai hoa mani oi laloa. Unai dainai ai kekeni taudia be Arabia gado ai dibaia, bona emai gaukara gabuna idia haidaua Lebanon dekenai neganai, ai dibaia noho. Emai visa ai naria noho lalonai, George Shakashiri ese pura ta ta lalonai nega rua Arabia gado ia hadibaia ai dekenai, ia be Watch Tower Society ena Arabia gado Gima Kohorona idia printaia gaukarana ia hegaegaelaia tauna.

Baibel ese ia herevalaia tanona, emai klas dekenai ai dibaia gabuna dekenai do ai lao be ai moalelaia bada! Keith bona Joyce Chew, Edna Stackhouse, Olive Turner, Doreen Warburton, bona Doris Wood ida unuseniai ai lao. Ai be misinari famili mai moalena ai ai lao! Unai tano tadikaka ta ese emai misinari rumana dekenai ia mai, bona ai ia durua emai gado ai hanamoa totona. Dina ta ta ai Arabia gado ai dibaia neganai, haroro herevana ta ai dibaia, bona gabeai ai lao haroro gaukara lalonai ai gaukaralaia.

Tripoli dekenai lagani ginigunadia ima ai noho, unai gabu be mai ena kongregesen. Lau, Joyce, Edna, Olive, Doreen, Doris, bona Anne, be Witness tadikaka edia adavadia bona natudia kekeni ai durua hebou dekenai idia haere bona haroro gaukara dekenai idia mai totona. Ema bona unai negai, edia tano ena kastom idia badinaia dainai, Keristani tadikaka bona taihu be hebou dekenai idia helai hebou lasi, bona unai Keristani taihu be ruma-ta-ruma-ta haroro gaukara lalonai nega momo idia vareai lasi. Emai haroro gaukara lalonai ai ura idia ese ai do idia durua gado ena kahana dekenai, bona ai hagoadadia idia danu do idia haroro.

Gabeai, lau bona Anne idia siaia Sidon ena siti gunana dekenai Witness orea maragina ai durua totona. Daudau lasi murinai, ai idia noia Lebanon ena taoni badana, Beirut, dekenai do ai giroa lou. Unuseniai Armenia gado idia gaukaralaia taudia huanai Baibel ena hereva momokani ena uhe idia hadoa, unai dainai edia gado ai dibaia idia ai durua totona.

Gaukara Gabuna Ia Idau

England lau do rakatania lasi neganai, Wilfred Gooch lau hedavari henia. Ia be lalo-goada, bona hebogahisi tadikakana ta guna London Betele dekenai ia gaukara. Wilf be Gilead klas namba 15 dekenai ia lao tauna ta, idia be lagani 1950 ai, Yankee Steidiam ena hebouhebou dekenai edia sikuli hadokoa pepana idia abia. Iena misinari gaukara gabuna be Watch Tower Society ena brens opesi Nigeria dekenai, bona nega sisina daudau lalonai revareva ai torea heheni. Lagani 1955 ai, London dekenai “Triumphant Kingdom” hebouhebouna dekenai ai lao, bona daudau lasi murinai ai maoheni. Murina laganina ai, Ghana dekenai ai headava, bona lau be Wilf lau bamoa ena misinari gaukara gabuna Lagos, Nigeria dekenai.

Lebanon dekenai Anne lau rakatania murinai, ia be Keristani tadikaka namona ta ia adavaia, ia be Jerusalem dekenai hereva momokani ia abia. Egu tama sina be aiemai headava dekenai idia mai diba lasi, badina lau, Douglas, bona Anne be tanobada ena kahana idauidau dekenai ai headava. To, idia diba ai be mai moale ida emai Dirava, Iehova, ai hesiai henia noho dainai, idia moale.

Emai Gaukara Nigeria Dekenai

Lagos ena brens opesi dekenai, egu gaukara be brens famili taudia 8 edia daiutu do lau hagoevaia bona edia aniani lau hegaegaelaia bona edia dabua lau huria. Toana be lau be adavana sibona lau abia lasi to famili lau abia danu!

Lau bona Wilf be Yoruba gado dekenai Baibel ena hereva harorolaia dalana ai dibaia, bona ai gaukaralaia dainai hahenamo ai davaria. Guna ai haroro henia stiuden matamata ta ena natuna mero ta bona kekeni ta be hari Nigeria Betele badana ai idia gaukara, ena famili taudia be 400.

Lagani 1963 ai, Wilf idia boiria Brooklyn, New York dekenai, hua 10 kosi idauna ta ia karaia totona. Unai ia haorea murinai, ia hoa badina idia siaia lao England dekenai. Lau be Nigeria dekenai lau noho bona dina 14 sibona lau idia henia bena London dekenai Wilf do lau hedavari henia. Mai lalo-hisihisi ida lau lao, badina mai moale ida Nigeria dekenai ai gaukara. Lagani 14 tano idaudia dekenai ai gaukara dainai, England ena mauri dalana ai manadalaia lou totona nega sisina daudau lalonai ai hekwarahi. To, emai buruka tama sina kahirakahira ai noho lou bona idia ai naria diba dainai ai moale.

Emai Helaro ese Ai Ia Hagoadaia

Lagani 1980 amo, hahenamo lau davaria, badina Wilf be soun naria tauna bamona tano momo ia vadivadi henia neganai, ia lau bamoa. Nigeria dekenai do ai giroa lao negadia lau laloa bada. Gabeai ai lao Scandinavia, West Indies, bona Middle East​—⁠Lebanon dekenai danu ai lao. Ia be moale gauna idauna, guna gaudia lau laloa lou neganai bona idia uhau neganai lau diba taudia be Keristani elda taudia ai idia lao lau itaia neganai.

Madi, lagani 1992 ena siahu negana ia matamaia negana ai, egu adavana lalokauna ia mase. Iena mauri lagani be 69 sibona. Ia vara haraga dainai lau lalo-hisihisi bada. Egu headava lagani iboudiai be 35, unai dainai nega sisina daudau lalonai egu mauri matamatana manadalaia totona lau hekwarahi. To tanobada hegegemadai egu Keristani famili amo heduru bona lalokau lau abia. Lau davaria moale gaudia momo lau lalodia diba danu.

Egu tama sina be haheitalai namona idia hahedinaraia Keristani gini goada karana dekenai. Sinagu be lagani 1981 ai ia mase bona Tamagu be lagani 1986 ai ia mase. Douglas bona Anne be mai abidadama ida Iehova idia hesiai henia noho. Douglas bona ena adavana, Kam, be London dekenai idia noho, Tamagu idia naria murinai idia noho ema bona hari. Anne bona ena famili be United States dekenai. Ai ibounai be Dirava ese ita ia henia helarona bona emai ahuna ai laloa bada. Gabeai, idia mauri noho taudia be edia toreisi lou lalokau taudia ida, Iehova ena tanobada famili bamona ena hesiai gaukara idia karaia hebou negana ‘ai naria noho.’​—⁠Lalohisihisi Ena Ane 3:⁠24, NW.

[Footnote]

[Pictures on page 23]

Laurina amo ia lao idibana kahana:

Enfield Kingdom Hall dekenai, ena mauri lagani be 13 neganai, Gwen ese Baibel stadi karaia dalana ia hahedinaraia noho

Misinari famili Tripoli, Lebanon dekenai, lagani 1951 ai

Gwen bona ena adavana Wilf ida