Sisiba Ia Abia Dae Tauna Namona

“HUA ta Lalonai Zambia Ena Huala ese Taunimanima 30 Idia Ania.” Lagani haida gunanai Africa ena niuspepa ta ese unai ia ripotilaia. Animal edia mauri ia stadilaia tauna ta, unai huala ia abidia bona ia stadilaia tauna, ia gwau, “huala tamona be tatau 12 ese idia dogoatao diba.” Ena iuna bona aukina edia goada dainai, huala be gari ia havaraia diba animal ta!

Toana be Havaraia Tauna ese huala ia gwauraia “Leviatano,” bona unai “hekokoroku dagedage gaudia ibounai . . . edia king” ia gaukaralaia ena hesiai tauna Iobu dekenai mai anina bada gauna ia hadibaia totona. (Iobu 41:​1, 34) Unai be lagani 3,500 gunanai, Usu tanona dekenai ia vara, Arabia ena not kahana ai. Unai animal ia herevalaia neganai, Dirava ese Iobu ia hamaoroa: “Tau ta ese Leviatano do ia hanogaia lasi, do ia dagedage bada garina, bona tau ta, be [lau] vairanai do ia gini diba lasi.” (Iobu 41:10) Unai be momokani! Bema ita be huala dekenai ita gari, namona be ia havaraia Tauna do ita gwauraia dika garina ita gari bada! Iobu ese ena kara dika ia gwauraia hedinarai neganai ia hahedinaraia unai sisiba ia abia dae.​​—⁠Iobu 42:​1-6.

Iobu ena ladana idia gwauraia neganai, mai abidadama ida hahetoho ia haheaukalaia karana ita laloa lou. (Iamesi 5:​11) Satani ese Iobu ena abidadama ia do tohoa lasi neganai, Iehova ese Iobu ia lalo-namo henia. Dirava ena matana ai, unai nega ai ‘tau ta ese Iobu ia hereaia lasi, ia be kerere ta lasi, bona kara maoromaoro tauna. Ia ese Dirava dekenai ia gari, bona kara dika dekena amo ia siri momokani.’ (Iobu 1:⁠8) Namona be unai ese ita ia hagoadaia Iobu ena sivarai ita tahua totona, badina unai bamona ita karaia neganai ita do ia durua ita danu ese Dirava hamoalea dalana ita dibaia totona.

Ia Dekenai Dirava ida Hetura Karana be Gau Badana

Iobu be taga tauna. Golo sibona lasi, to ia be mai ena mamoe 7,000, kamelo 3,000, doniki 500, boromakau 1,000, bona ena hesiai taudia be momo herea. (Iobu 1:⁠3) To Iobu ese Iehova ia abidadama henia, taga lasi. Ia gwau: “Lau ese golo dekenai lau abidadama henia lasi, bona egu kohu momo dainai lau hekokoroku lasi. . . . Inai bamona lau karaia lasi momokani, badina unai be kara dika bada, ena davana be mase. Inai kara ese Siahu Ibounai Dirava ia hadikaia noho.” (Iobu 31:​24-​28) Iobu bamona, namona be eda hetura karana Iehova Dirava ida ita laloa bada, to tauanina gaudia ita laloa maragi.

Mai Maoromaoro ida Taunimanima Ia Kara Henidia

Iobu ese ena hesiai taudia be edena bamona ia kara henidia? Idia davaria ia be kara maoromaoro tauna bona idia hereva henia diba, unai be Iobu ena hereva amo ia hedinarai, ia gwau: “Bema nega ta egu hesiai tauna ta ese, lau dekenai ia maumau neganai, lau ese ia dekenai lau kamonai, bona kara namona ia dekenai lau karaia vadaeni. Bema inai bamona lau karaia lasi neganai, edena bamona Dirava ena vairanai do lau gini diba? Bema Dirava ese lau do ia kota henia neganai, ia dekenai edena bamona do lau hereva?” (Iobu 31:​13, 14) Iobu ese Iehova ena hebogahisi ia laloa bada bona mai ena hebogahisi ida ena hesiai taudia ia kara henia. Unai be haheitalai namona bona mai anina bada Keristani kongregesen idia naria taudia dekenai! Namona be idia danu idia kara maoromaoro, taunimanima edia toana idia laloa lasi, bona taunimanima ese idia hereva henia diba.

Iobu ese ena ruma bese taudia sibona ia laloa bada lasi. Ma haida ia laloa karana ia hahedinaraia, ia gwau: “Ogogami tauna ese lau dekenai ia noinoi neganai, lau be nega ta lau durua lasi, a? O vabu ta ia ogogami neganai, lau ese gau ta lau henia lasi, a? . . . Bema nega ta tamana sinana lasi maragidia lau koia, badina lau diba edia kota lalonai lau be do lau kwalimu, unai bamona lau karaia neganai, namona be egu imana ruaosi idia hamakohia, bona egu imana be, egu pagana dekena amo do idia darea bona kokia.” (Iobu 31:​16-​22) Namona be ita ese dika idia haheaukalaia taudia eda kongregesen ai be unai bamona ita lalodia danu.

Mai ena manau ida taunimanima ia laloa dainai, Iobu ese ia diba lasi taudia ia abia dae. Unai dainai, ia gwau diba: “Lau ese laolao taudia egu ruma dekenai lau boiria, idia be dala badinai idia mahuta lasi.” (Iobu 31:32) Unai be haheitalai namona hari inai negai Dirava ena hesiai taudia dekenai! Baibel ena hereva momokani idia kamonai matamata taudia be Kingdom Hall dekenai idia mai neganai, iseda heabidae karana ese do ia durudia lauma dalanai do idia tubu totona. Momokani, loaloa naria taudia bona Keristani taudia ma haida ese iseda lalokau heabidae karana idia abia danu be namo.​​—⁠1 Petero 4:9; 3 Ioane 5-8.

Iobu ese ena inai taudia dekenai lalohadai maorona ia abia danu. Iena inai tauna ese dika ia davaria neganai ia moale lasi. (Iobu 31:​29, 30) To, ia ura unai bamona taudia ia kara namo henia, ena hagoadaia taudia koikoidia toi totona ia ura guriguri neganai unai ia hedinarai goevagoeva.​​—⁠Iobu 16:2; 42:​8, 9; mani Mataio 5:​43-​48 itaia.

Ia Heudahanai Lasi

Iobu ese ena adavana ia badinaia, ena kudouna ia naria hahine ma ta ura henia urana ia tubu garina. Iobu ia gwau: “Lauegu matana dekenai taravatu lau atoa vadaeni, nega ta kekeni do lau itaia noho lasi, matabodaga kara totona. Bema egu badibadinai ia noho tauna, ena adavana lau ura henia dikadika, bona lau ese hunia dekenai, lau abia totona, iena iduara badinai lau naria, unai neganai namona be egu adavana ese, idau tauna ena aniani do ia nadua, bona idau tauna ena geda dekenai do idia mahuta. Badina be unai bamona kerere be metau herea. Unai be kara dika momokani, ena davana be mase namo.”​—⁠Iobu 31:​1, 9-11.

Iobu ese ena kudouna ia naria matabodaga uradia ese idia hadikaia garina. Kara maorona ia badinaia. Unai dainai ita hoa lasi Iehova ese unai abidadama tauna, mai ena ura ida lebulebu karadia ia dadaraia tauna, dekenai ia moale bada!​—⁠Mataio 5:​27-30.

Ena Ruma Bese Edia Lauma Dalana Ia Laloa Bada

Nega haida, Iobu ena natuna memerodia ese aria idia karaia bona ena natuna memero bona kekeni ibounai be unai aria dekenai idia lao. Unai aria dinadia idia ore murinai, Iobu be ia laloa momo dika ena natudia ese dala haida ai Iehova idia kara dika henia. Unai dainai Iobu ese kara ta ia karaia, unai Baibel sivaraina ia gwau: “Unai bamona aria idia ore murinai, Iobu ese nega ibounai dabai ia toreisi, Lohiabada dekenai boubou ia henia, iena natuna ibounai edia miro kara do ia hagoevaia totona. Inai bamona ia karaia nega ibounai, badina be inai bamona ia laloa, ‘Sedira lauegu natuna be idia kara dika, sedira Lohiabada ena ladana idia hadikaia kava.’ ” (Iobu 1:​4, 5) Unai ese Iobu ena ruma bese taudia ia durua idia itaia ia laloa bada gauna be Iehova idia gari henia mai hemataurai ida bona Iena dala ai idia raka!

Hari inai nega ai, Keristani ruma bese kwaradia ese edia ruma bese be Dirava ena Hereva, Baibel, amo idia hadibadia be namo. (1 Timoteo 5:⁠8) Bona ruma bese taudia totona ita guriguri be maoro.​—⁠Roma 12:⁠12.

Hahetoho Neganai mai Abidadama Danu Ia Haheauka

Baibel idia duahia taudia momo ese Iobu dekenai idia vara hahetoho dikadia idia diba. Satani Diabolo ia gwau hahetoho negadia ai Iobu ese Dirava do ia gwauraia dika. Iehova ese ena hereva ia koua lasi, bona maoromaoro Satani ese dika bada herea Iobu dekenai ia havaraia. Ena animal ibounai ia haboioa. Unai ena dika ia hereaia gauna be, ena natuna ibounai idia mase. Daudau lasi murinai, Satani ese Iobu ena kwarana amo ela bona ena aena dekenai iohururu dikana amo ia hahisia.​—⁠Iobu, karoa 1 bona 2.

Bena dahaka ia vara? Ena adavana ese ia hamaoroa Dirava ia gwauraia dika neganai, Iobu ia gwau: “Oiemu hereva be kavakava. Bema Dirava ese gau namona ia henia neganai, ita abia dae mai moale danu, ani? Bema dika ia henia neganai do ita maumauraia, a?” Bena Baibel ia gwau: “Iobu be hisihisi bada ia abia, to ia ese Dirava ena ladana ia hadikaia lasi momokani.” (Iobu 2:10) Oibe, Iobu be mai abidadama danu ia haheauka dainai ia hahedinaraia Diabolo be koikoi tauna. Namona be ita danu hahetoho ita davaria negadiai do ita haheauka bona ita hahedinaraia Dirava ita hesiai henia ita lalokau henia dainai.​—⁠Mataio 22:​36-38.

Mai Manau ida Sisiba Ia Abia Dae

Ena be dala momo ai Iobu be haheitalai namona, to ia be goevadae lasi. Ia sibona ia gwau: “Taunimanima be miro, bona goeva lasi. Goevagoeva gauna ta, be taunimanima dekena amo do ia vara diba, a?” (Iobu 14:4; Roma 5:12) Unai dainai Dirava ese Iobu ia gwauraia kerere lasi be maoro, badina Dirava ese iena goevadae lasi bona kara dika hesiai taudia dekenai ia ura gaudia ibounai be Iobu ese ia karaia. Unai be ita ia hagoadaia gauna badana!

Iobu ese ena hahetoho ia haheaukalaia, to unai ese ena kerere ta ia hahedinaraia. Ia dekenai idia vara dika ibounai idia kamonai neganai, idia gwau Iobu do idia durua taudia toi be ia dekenai idia lao. (Iobu 2:​11-13) Idia gwau Iehova ese Iobu ia panisia badina kara dika badadia ia karaia. Ita lalo-parara, unai hereva koikoi dainai Iobu ia lalo-hisihisi, bona mai ena goada ida ia hamomokania toho iena kara be maoromaoro. To sibona ena maoro ia gwauraia toho neganai ia laloa namonamo lasi. Oibe, iena hereva amo Iobu ia hahedinaraia iena kara maoromaoro ese Dirava ena kara maoromaoro ia hanaia!​—⁠Iobu 35:​2, 3.

Dirava ese Iobu ia lalokau henia dainai, Ia ese tau matamata ta ia gaukaralaia Iobu ena kerere ia hahedinaraia totona. Unai sivarai ia gwau: “To Elihu . . . ia badu. Ia ese Iobu ia badu henia, badina be ia sibona maoromaoro ia gwauraia, to ia ese Dirava be maoromaoro ia gwauraia lasi.” Elihu ia itaia: “Iobu ia gwau: ‘Lau be kerere lasi, to Dirava ese kota maorona lau dekenai ia henia lasi.’ ” (Iobu 32:2; 34:⁠5) To, Elihu ese unai “hagoadaia taudia” toi ia bamoa lasi, mai kerere danu idia gwau Dirava ese Iobu ena kerere dainai ia panisia. To, Elihu be Iobu ena abidadama karana ia abia dae bona ia sisiba henia: “Do oi naria noho mai laloa goada, badina oiemu hereva gauna, be iena vairanai ia noho, do ia laloa.” Oibe, Iobu ese Iehova ia naria noho be namo, to sibona ena maoro ia hahedinaraia toho dainai ia hereva kava be namo lasi. Elihu ese Iobu ia hagoadaia, ia gwau: “Ia be mai kara maoromaoro bona momokani danu, taunimanima ia kara henidia noho, bona mai maoromaoro danu, ia ese taunimanima ia kota henidia noho.”​—⁠Iobu 35:14; 37:⁠23.

Iobu ese ena laloa dalana ia hamaoromaoroa be namo. Unai dainai, Iehova ese taunimanima edia maragi bona Dirava ena bada be Iobu dekenai ia hadibaia. Iehova ese tanobada, davara, guba ena hisiu, animal, bona ia havaraia gaudia namodia ma haida be Iobu dekenai ia hahedinaraia. Bena dokonai, Dirava ese Leviatano​—⁠huala​—⁠ia herevalaia. Iobu ese mai manau danu sisiba ia abia dae, bona unai dainai danu ia be haheitalai namona.

Ena be Iehova ena hesiai gaukara lalonai gaukara namona ita karaia, to ita kerere diba. Bema ita karaia kererena be bada, Iehova ese dala ta amo ita do ia sisiba henia. (Aonega Herevadia 3:11, 12) Reana iseda lalona ena mamina ia gwadaia sirina ta be eda lalona ai ia hedinarai. Reana Gima Kohorona eiava Watch Tower Society ese ia halasia gauna ma ta ese iseda kerere ia hahedinaraia. Eiava reana iseda Keristani tadikaka ta ese mai manau ida do ia hahedinaraia ita ese Baibel ena hakaua herevana ta ita badinaia lasi. Unai bamona sisiba be edena bamona do ita laloa? Iobu ese ena kerere ia lalo-hisihisilaia, ia gwau: “Lau be lau hemarai, bona harihari tano kahu, bona lahi kahu danu dekenai, lauegu lalona lau giroa momokani inai.”​—⁠Iobu 42:⁠6.

Iehova ese Ia Hanamoa

Iehova ese Iobu ia hanamoa, ia ese ena hesiai tauna ena mauri lagani be lagani 140 amo ia halataia. Unai nega lalonai, ia abia gaudia ese ia haboioa gaudia idia hanaia momokani. Bona ena be gabeai Iobu ia mase, to do ia toreisi lou momokani Dirava ena tanobada matamatana ai.​—⁠Iobu 42:​12-17; Esekiela 14:14; Ioane 5:​28, 29; 2 Petero 3:⁠13.

Ita danu ese Dirava ena lalo-namo bona ena hahenamo ita abia diba bema mai abidadama ida ita hesiai henia bona Baibel amo idia mai sisiba ibounai ita abia dae. Unai dainai, ita ese Dirava ena nega matamatana ai do ita mauri ena helaro korikorina do ita abia diba. To mai anina bada gauna be, ita ese Dirava do ita hanamoa. Iseda abidadama karadia dainai hahenamo do ita abia bona idia hahedinaraia iena taunimanima ese idia hesiai henia sibona hanamoa totona lasi, to mai kudou ibounai ida ia idia lalokau henia dainai. Ita moale bada badina Iehova ena lalona ita hamoalea, abidadama tauna Iobu, mai manau ida sisiba ia abia dae tauna, hegeregerena!​—⁠Aonega Herevadia 27:⁠11.

[Pictures on page 26]

Iobu ese mai lalokau ida tama bona sina lasi natudia, vabu, bona ma haida ia laloa

[Pictures on page 28]

Iobu be hahenamo bada ia abia mai manau ida sisiba ia abia dae dainai