Duahia Taudia Edia Henanadai
Evanelia bukadia toi ese Iesu latanai dava bada dehorona bubua karana idia maumauraia herevana idia gwauraia. Aposetolo taudia momo idia maumau, eiava Iuda sibona ia maumau?
Mataio, Mareko, bona Ioane ese edia Evanelia bukadia dekenai unai sivarai idia gwauraia. Toana be Iuda ese maumau karana ia gunalaia, bona aposetolo taudia ma haida be iena hereva idia abia dae. Unai sivarai ese ia hahedinaraia dahaka dainai Evanelia bukadia hani ita abia be moale gauna. Torea taudia ta ta idia torea gaudia be momokani, to idia ibounai edia sivarai ena kahana maragidia be tamona sibona lasi. Edia sivarai ita hahegeregerea neganai, idia vara gaudia edia kahana idauidau ita lalo-pararalaia goevagoeva diba.
Mataio 26:6-13 ena sivarai ese gabu—lepera tauna, Simona, ena ruma Betania dekenai—ia herevalaia, to Iesu ena kwarana dekenai mai bonana namona dehoro ia bubua hahinena ena ladana ia gwauraia lasi. Mataio ia gwau: “Iesu ena diba tahua taudia ese idia itaia, idia badu” bona idia maumau, idia gwau bema unai dehoro idia hoihoilaia moni do idia henia diba ogogami taudia dekenai.
Mareko ena sivarai ese unai gaudia momo ia kikilaia danu. To ma ia gwau hahine ese kavabu ia makohia. Kavabu lalonai bonana namo herea dehorona ia noho, “davana bada gauna,” reana India amo idia abia gauna. Maumau karana ia herevalaia neganai, Mareko ena sivarai ia gwau “noho taudia haida idia badu” bona “hahine dekenai idia badu sisina.” (Mareko 14:3-9) Unai dainai unai buka rua idia hahedinaraia aposetolo tauna tamona sibona lasi to haida idia maumau. To edena dala ai ia matamaia?
Ioane, ena matana amo unai ia itaia tauna, ese mai anina bada gaudia ma haida ia herevalaia. Hahine ena ladana ia gwauraia—ia be Maria, Mareta ena tadina bona Lasaro ena taihuna. Ioane ese iena kara ma ta ia herevalaia danu, bona sivarai ma haida ia hakoikoia lasi to ia durua: “Iesu ena aena ruaosi dekenai ia bubua, vadaeni iena huina dekena amo ia dahua kaukau.” Sivarai iboudiai ita hatamonaia neganai, ita itaia diba Maria ese unai dehoro, Ioane ia hamomokania ia be “davana bada gauna,” be Iesu ena kwarana bona ena aena dekenai ia bubua. Ioane be Iesu ena turana momokanina bona bema ta ese Iena ladana ia hadikaia gwauraia, Ioane do ia badu. Ita duahia, ia gwau: “To Iuda Iskariote, diba tahua tauna ta, Iesu ena mase dala do ia karaia tauna, ia gwau, ‘Badina dahaka inai dehoro be ia hoia lasi? 300 kina do ia abia, ogogami taudia dekenai do idia harihari henia.’ ”—Ioane 12:2-8.
Momokani, Iuda be Iesu ena “diba tahua tauna ta,” to Ioane ena badu oi mamia diba, ia badu badina unai bamona tauna be Iesu ena mase dalana ia hegaegaelaia. Gado hahanaia tauna Dr. C. Howard Matheny ese Ioane 12:4 ia herevalaia, ia gwau: “Unai hereva ‘do ia’ [eiava, “ia karaia gwauraia”] bona inai hereva ‘mase dala ia karaia noho’ [“eiava ena mase dala ia karaia gwauraia”] ese kara ta ia karaia noho ena toana ia hahedinaraia. Unai ese ia hahedinaraia Iesu ena mase dalana be Iuda ese kara haraga ia karaia lasi, to dina momo lalodiai ia laloa bona palania.” Ioane ese inai ia itaia danu: Iuda ia maumau ena badina be “ogogami taudia dekenai ia bogahisihisi lasi, badina ia be henaoa tauna, ia be moni ena maua ia naria, bona idia udaia moni be ia ese ia henaoa.”
Unai dainai toana be henaohenao tauna Iuda ese unai maumau karana ia matamaia badina bema unai dava bada dehorona idia hoihoilaia neganai ena moni ma haida do ia henaoa diba ia dogoatao moni mauana amo. Iuda ese unai maumau ia hamatamaia murinai, reana aposetolo taudia ma haida idia laloa ia hereva maoro dainai idia abia dae bona idia maumau danu. To, Iuda be unai maumau hamatamaia tauna.