Dahaka Dainai Kara Gageva Ia Bada?

‘Lalo-ani monina do umui abia dae lasi. Badina be inai bamona moni ese taunimanima edia matana ia kepulua, vadaeni kara maoromaoro do idia laloa lasi.’​—⁠Esodo 23:⁠8.

LAGANI 3,500 gunanai, Mose ena Taravatu ese lalo-ani monina gaukaralaia karana ia gwauraia dika. Unai nega amo lagani handred momo lalodiai, kara gageva koua taravatudia idia momo idia lao. To, taravatu haginia karana ia kwalimu lasi kara gageva koua totona. Dina iboudiai taunimanima milioni momo ese lalo-ani monina idia henia o idia abia, bona taunimanima bilioni momo be unai kara dainai dika idia davaria.

Kara gageva be gabu ibounai dekenai ia vara bona karaia daladia idia hedinarai namonamo lasi dainai taunimanima edia mauri dalana ia hadikaia gwauraia. Tano haida ai kahirakahira gau ta idia karaia lasi ela bona lalo-ani monina idia henia guna. Ta dekenai lalo-ani monina ia henia dainai ta be eksam dekenai ia kwalimu, draiva laiseni ia abia, kontraka ta ia abia, eiava kota ta ai ia kwalimu diba. Paris loea tauna ta, Arnaud Montebourg, ia gwau: “Kara gageva be hodahoda dikana bamona taunimanima edia lalohadai ia hadikaia.”

Lalo-ani monina gaukaralaia karana be bisinesi oreadia lalonai ia vara badabada. Kampani haida ese edia moni kahana toi amo kahana ta idia gaukaralaia gavamani taudia mai edia kara gageva edia lalo-ani monina idia henia totona. Britain ena magasin ladana The Economist ena hereva hegeregerena, lagani iboudiai tuari kohu hoihoilaia bisinesi lalonai idia gaukaralaia bilioni $25 amo 10 pesen be lalo-ani monina, edia gau hoia taudia edia lalona veria totona. Unai kara gageva ia bada daekau lalonai, ia amo idia vara dika idia bada daekau danu. Idia gwau lagani ginigabedia 10 lalonai, “tura” kapitalisim​—⁠idia diba taudia haida idia hanamoa bisinesi kara gagevadia​—⁠dainai tano momo edia moni dalana ia dika momokani.

Kara gageva bona ia havaraia moni ena hekwarahi bada ese ogogami taudia​—⁠nega momo lalo-ani monina idia henia diba lasi taudia​—⁠ia hahisia bada. The Economist ia hereva bamona, “kara gageva be hisihisi havaraia dalana ta sibona.” Unai bamona hisihisi ita hanaia diba, eiava kara gageva amo ita heau siri diba lasi, a? Unai henanadai ita haerelaia totona, namona be kara gageva idia havaraia gau badadia haida ita diba guna.

Dahaka ese Kara Gageva Ia Havaraia?

Dahaka dainai taunimanima idia kara momokani lasi to kara gageva idia abia hidi? Haida dekenai, reana kara gageva be dala haragana​—⁠eiava dala tamona​—⁠edia ura gauna idia abia totona. Nega haida, lalo-ani monina henia karana ese dala ia kehoa panisi idia abia lasi totona. Taunimanima momo ese idia itaia toana be politikol taudia, pulisi taudia, bona diadi taudia be kara gageva idia laloa lasi eiava idia karaia neganai, edia haheitalai idia tohotohoa sibona.

Kara gageva ia bada ia lao noho lalonai, taunimanima ese idia abia dae bena dokonai ia be edia mauri dalana ai ia lao. Edia moni gaukara ena davana ia maragi taudia idia laloa dala ma ta ia noho lasi. Idia ese lalo-ani monina idia tahua goadagoada bema idia ura mauri namona idia abia. Bona lalo-ani monina idia abia eiava dala gagevana ai namo ta idia abia totona lalo-ani monina idia henia taudia be panisi idia abia lasi neganai, taunimanima haida sibona be unai kara idia dadaraia. King Solomona ia gwau: “Kara dika ena davana be idia henia haraga lasi dainai, taunimanima ese, edia kudoudia dekenai kara dika idia ura henia bada noho.”​—⁠Hadibaia Tauna 8:⁠11.

Kara badadia rua ese kara gageva ena siahu idia habadaia: sibona ena ura atoa guna karana bona mataganigani. Sibona edia ura idia atoa guna dainai, kara gageva taudia ese edia kara gageva amo ma haida idia hahisia karana idia laloa lasi, bona lalo-ani monina gaukaralaia karana idia gwauraia namo badina unai amo namo idia davaria. Kohu bona moni momo idia haboua neganai, unai kara gageva taudia edia mataganigani ia bada ia lao. Solomona ia gwau, “Moni ia ura henia noho tauna ese moni do ia abia, to unai moni ena bada be hegeregere lasi ia dekenai, vadaeni ma haida ia tahua noho. Bona kohu momo ia ura henia noho tauna ese iena kohu do ia habadaia, to ena bada be hegeregere lasi ia dekenai.” (Hadibaia Tauna 5:10) Momokani, reana mataganigani karana ia namo moni abia totona, to ia be hanaihanai kara gageva bona taravatu utua karadia ia abia dae.

Namona be ita laloaboio lasi gauna badana ma ta be ita itaia diba lasi tanobada lohiana ena gaukara, Baibel ese ia gwauraia Satani Diabolo. (1 Ioane 5:19; Apokalupo 12:⁠9) Satani be mai ena goada ida kara gageva ia habadaia. Lalo-ani gauna badana be Satani ese Iesu dekenai ia henia toho gauna. ‘Tanobada ena basileia iboudiai be oi do lau henia bema oiemu kwarana oi atoa diho bona lau oi tomadiho henia.’​—⁠Mataio 4:​8, 9.

To, Iesu ia kara gageva diba lasi, bona ena murinai idia raka taudia ia hadibaia unai bamona do idia karaia totona. Hari inai negai kara gageva ita tuari henia totona Keriso ena hahediba herevadia be tulu namodia, a? Hereva gabena ese unai henanadai do ia herevalaia.