Dirava Ia Hadibaia Gaudia Badinaia Goada
“Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”—AONEGA HEREVADIA 3:5, 6.
1. Taunimanima ese idia halasia dibana be edena dala idauidau ai ita abia diba, guna bamona lasi?
HARI tanobada hegegemadai, dina ta ta niuspepa 9,000 bamona idia halasia. Lagani iboudiai United States sibona dekenai, buka matamatadia 200,000 idia halasia. Haida idia gwau, March 1998 ai, Internet ena Web raudia be milioni 275. Idia gwau hua ta ta ai unai namba be rau milioni 20 amo ia bada daekau. Hari taunimanima ese gau iboudiai dekenai diba idia abia diba, guna bamona lasi. Ena be unai be mai ena namo haida, to unai diba be bada herea dainai hekwakwanai idia vara vadaeni.
2. Diba bada herea ita abia diba dainai edena hekwakwanai idia vara?
2 Taunimanima haida dekenai diba be drag bamona, hanaihanai diba matamata idia tahua noho bona mai anina bada gaudia idia rakatania. Ma haida be gau aukadia dekenai diba sisina idia abia bena idia laloa unai gauna dekenai idia be diba bada taudia. Idia lalo-parara momokani lasi dainai, unai diba hegeregerena mai anina bada gaudia idia abia hidi neganai idia sibona eiava ma haida dekenai dika idia havaraia. Bona diba koikoina eiava kererena ita abia ena dika be hanaihanai ia noho. Nega momo dala namona ta amo ita hamomokania diba lasi unai diba bada herea ia momokani bona ia namo.
3. Taunimanima edia aonega tahua karana dekenai Baibel ese edena sisiba haida ia henia?
3 Gunaguna amo, diba abia urana be taunimanima lalonai ia noho. Anina lasi dibana eiava ita ia hadikaia dibana tahua karana ai nega bada haorea ena dika be King Solomona ena negai idia lalo-pararalaia danu. Ia gwau: “Inai kara do oi naria namonamo. Buka momo idia torea noho, doko lasi, bona edia anina do oi tahua neganai, oi dekenai hesiku do ia havaraia.” (Hadibaia Tauna 12:12) Lagani handred momo murinai aposetolo Paulo be Timoteo ia tore henia, ia gwau: “Dirava ese oi dekenai ia henia [gauna] do oi naria namonamo. Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri. Inai bamona taudia edia diba be aonega koikoi sibona. Inai aonega koikoi ese haida ia koia vadaeni. Idia gwau, ‘Ai ese aonega ai davaria vadaeni.’ Unai dainai idia moru, badina edia abidadama Iesu dekenai idia rakatania dainai.” (1 Timoteo 6:20, 21) Oibe, hari inai negai Keristani taudia ese idia do idia hadikaia lalohadai idia dadaraia be namo.
4. Iehova bona ia hadibaia gaudia dekenai abidadama ita hahedinaraia dalana ta be dahaka?
4 Namona be Iehova ena taunimanima ese Aonega Herevadia 3:5, 6 ena hereva idia badinaia danu, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” Iehova ita abidadama henia ena anina ta be Dirava ena Hereva ida idia hegeregere lasi lalohadai ibounai ita dadaraia, herevana ita sibona eiava ma haida edia lalona amo idia vara. Lauma dalanai sibona ita gimaia totona, gau badana be iseda lalona ita hadibaia loulou, ita ia hadikaia dibana do ita itaia bena dadaraia totona. (Heberu 5:14) Unai bamona diba idia halasia daladia haida mani ita laloa.
Satani ese Ia Biagua Tanobadana
5. Ita idia hadikaia lalohadai idia halasia dalana ta be dahaka, bona daika ese ia havaraia?
5 Hari inai tanobada be ita idia hadikaia lalohadai amo ia honu. (1 Korinto 3:19) Iesu Keriso be ena hahediba taudia totona Dirava ia guriguri henia, ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria.” (Ioane 17:15) Iesu ia noinoi Dirava ese “Tau Dikana” amo ena hahediba taudia do ia gimaia neganai, ia hahedinaraia Satani be mai ena siahu tanobada dekenai. Ita laloa lasi ita be Keristani taudia dainai inai tanobada ena dika ese ita ia hadikaia diba lasi. Ioane ia gwau: “Ita diba danu, ita be Dirava ena natuna taudia, bona Satani ese tanobada taudia ibounai ia gunalaia noho.” (1 Ioane 5:19) Ita diba, inai dina gabedia edia dokona negana lalonai, Satani bona ena demoni ese taunimanima hadikaia dibana amo tanobada idia hahonua noho.
6. Edena dala ai moale karadia idauidau ese ta ena lalohadai maorona ia hamasea diba?
6 Danu, ita diba unai taunimanima hadikaia dibana ena kahana haida edia toana be idia namo bamona. (2 Korinto 11:14) Hegeregere, moale karadia idauidau, televisen gadara, muvini piksa, miusiki, bona idia halasia toretoredia, mani oi laloa. Momo idia abia dae nega momo moale karadia ese kara dika, hegeregere sihari kava, dagedage, bona drag ania kava karadia, idia habadaia. Taunimanima ese nega ginigunana moale karana dika hereana ta idia itaia neganai, reana idia hoa bada. To idia itaia loulou dainai, edia lalohadai maorona ia hamasea. Ita idia hadikaia diba lalohadai idia habadaia moale karadia ita dadaraia vaitani be gau badana.—Salamo 119:37.
7. Edena bamona aonega herevadia taunimanima amo be iseda abidadama Baibel dekenai idia hadikaia diba?
7 Dika ia havaraia dibana idia halasia dalana ma ta mani oi laloa—saiens taudia bona diba bada taudia haida ese Baibel hakoikoia totona lalohadai momo idia halasia. (Iamesi 3:15 itaia.) Unai bamona lalohadai be taunimanima momo ese idia duahia magasin bona buka lalodiai idia hedinarai, bona taunimanima edia abidadama Baibel dekenai idia hadikaia. Haida idia moale bema edia lalohadai idauidau amo Dirava ena Hereva ena siahu idia hamaragia. Paulo ena hereva amo ia hedinarai goevagoeva, unai bamona dika ia havaraia diba gauna be aposetolo edia negai ia noho danu, ia gwau: “Naria namonamo: sedira ta ia noho, ia ese taunimanima edia sene herevadia hegeregerena lalohadai bona anina lasi koikoi herevadia amo iena vamu bamona umui do ia abia lao, tanobada ena diba matamaia gaudia hegeregerena, Keriso ena dala hegeregerena lasi.”—Kolose 2:8, NW.
Hereva Momokani Ena Inai Taudia
8, 9. Hari inai negai hereva momokani negea karana be edena bamona ia hedinarai?
8 Hereva momokani negea taudia be lauma dalanai ita idia hadikaia diba danu. Aposetolo Paulo ia peroveta, ia gwau sibona Keristani taudia idia gwauraia taudia huanai hereva momokani negea karana do ia vara. (Kara 20:29, 30; 2 Tesalonika 2:3) Aposetolo taudia idia mase murinai ena hereva ia guguru, bona unai hereva momokani negea karana badana amo Kerisendom ia vara. Hari inai negai, Dirava ena taunimanima huanai hereva momokani negea karana be bada lasi. To, haida ese ita idia rakatania, bona idia haida idia ura koikoi herevadia bona hereva gageva amo Iehova ena Witnes taudia edia ladana idia hadikaia. Idia haida be ma orea idauidau ida idia gaukara, tomadiho goevana do idia koua totona. Unai idia karaia neganai, hereva momokani negea tauna ginigunana, Satani, ena kahana ai idia hanaia lao.
9 Hereva momokani negea taudia haida ese diba halasia daladia idauidau, Internet danu, idia gaukaralaia momo, Iehova ena Witnes taudia hadikaia hereva koikoidia idia halasia totona. Unai dainai, lalo-momokani taudia ese ita abia dae herevadia dekenai diba idia tahua neganai, reana hereva momokani negea taudia ese idia halasia herevadia idia davaria. Witnes taudia haida danu be idia diba lasi bena idia ia hadikaia dibana idia duahia. Danu, nega haida hereva momokani negea taudia be televisen eiava reidio program haida lalonai idia hedinarai. Unai ia vara neganai aonega dalana be dahaka?
10. Hereva momokani negea taudia edia lalohadai dekenai edena aonega karana ita karaia?
10 Aposetolo Ioane ese Keristani taudia ia hamaoroa hereva momokani negea taudia be edia ruma dekenai do idia abia dae lasi. Ia gwau: “Bema tau ta umui dekenai ia mai, bona inai Keriso ena hadibaia hereva ia gwauraia lasi neganai, emui ruma dekenai do umui abia dae lasi. Bona hanamoa hereva do umui henia lasi. Badina be unai tau do ia hanamoa tauna ese unai tau ena kara dika do ia durua.” (2 Ioane 10, 11) Unai dagedage taudia ita dadaraia vaitani neganai, edia lalohadai gagevadia amo sibona ita gimaia. Hari inai negai diba halasia gaudia idauidau amo hereva momokani negea taudia edia lalohadai ita kamonai karana be ita do ia hadikaia, iseda ruma dekenai unai taudia ita abia dae karana ese ita do ia hadikaia hegeregerena. Namo lasi diba abia urana ese ita ia veria bena unai bamona dika ia havaraia karana do ita karaia!—Aonega Herevadia 22:3.
Kongregesen Lalonai
11, 12. (a) Keristani kongregesen ginigunana lalonai idia hadikadia diba lalohadai be edena dala ai idia mai? (b) Edena dala ai Keristani taudia haida ese Dirava ia hadibaia gaudia idia badinaia goada lasi?
11 Ita idia hadikaia diba lalohadai idia mai dalana ma ta mani oi laloa. Gwauhamata Keristani tauna ta, ena be ia ura lasi hereva koikoi ia hadibaia, to reana ena hereva ia laloa namonamo lasi karana dekenai ia manada vadaeni. (Aonega Herevadia 12:18) Ita be goevadae lasi dainai, nega ta ta iseda hereva amo kerere ita karaia. (Aonega Herevadia 10:19; Iamesi 3:8) Aposetolo Paulo ena negai, kongregesen lalonai haida ese edia malana idia biagua lasi bona hereva haida dainai idia heai. (1 Timoteo 2:8) Ma haida be sibona edia lalohadai idia hekokorokulaia bona Paulo ena dagi danu idia henanadailaia. (2 Korinto 10:10-12) Unai bamona lalohadai ese heai idia havaraia.
12 Nega haida unai heai dainai “idia hepapahuahu kava,” bona kongregesen ena maino idia hadikaia. (1 Timoteo 6:5; Galatia 5:15) Paulo ese unai heai idia havaraia taudia ia herevalaia, ia gwau: “Bema tau ta ese inai hereva momokani ia rakatania, bona hereva idauna, Iesu ena hereva hegeregere lasi do ia hadibaia neganai, do ita diba unai tau be hekokoroku tauna. Ia be gau ta ia diba lasi. Ia ese hepapahuahu bona heai sibona ia ura henia kava. To unai dekena amo idia vara gaudia be inai: Mama, heai, hereva dika, laloa dikadia.”—1 Timoteo 6:3, 4.
13. Aposetolo edia negai Keristani taudia momo edia kara be edena bamona?
13 Ita moale diba, badina aposetolo edia negai Keristani taudia momo be kamonai taudia bona Dirava ena Basileia ena sivarai namona harorolaia gaukarana idia goadalaia. Idia gaukara goada ‘tamana bona sinana lasi maragidia bona vabu idia naria bona tanobada ena kara mirodia amo idia gini siri’ totona, hereva haida heailaia karana dekenai edia nega idia haorea kava lasi. (Iamesi 1:27) Idia ese Keristani kongregesen lalonai hebamo dikana idia dadaraia danu, lauma dalanai sibona idia gimaia totona.—1 Korinto 15:33; 2 Timoteo 2:20, 21.
14. Bema ita naria namonamo lasi, edena dala ai iseda herevahereva karana amo ita ia hadikaia diba heai do ia vara diba?
14 Unai hegeregerena, paragraf 11 ese ia herevalaia gaudia be hari inai negai Iehova ena Witnes taudia edia kongregesen lalonai idia vara momo lasi. To, namona be ita lalo-parara unai bamona heai kava idia vara diba. Momokani, Baibel ena sivarai eiava tanobada matamatana gaudia, idia do hedinarai lasi gaudia, ita herevalaia be vaia iseda kara. Bona sibona eda ura gaudia, hegeregere dabua bona tauanina ena toana eiava moale karadia be ma haida ida ita herevalaia be kerere lasi. To, bema sibona eda lalohadai ita dogoatao auka bona ma haida ese idia abia dae lasi neganai ita badu, reana kongregesen be gau maragidia dainai do ia parara. Reana ita herevalaia gau maragidia be ita idia hadikaia herevadia ai do idia lao.
Ita Abia Gauna Ita Naria Namonamo
15. “Lauma dikadia edia hadibaia hereva” ese edena bamona lauma dalanai ita idia hadikaia diba, bona Buka Helaga ena sisiba be dahaka?
15 Aposetolo Paulo ese sisiba ia henia, ia gwau: “Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.” (1 Timoteo 4:1) Oibe, ita idia hadikaia diba lalohadai be dika badana ta. Unai dainai ita lalo-parara dahaka dainai Paulo ese ena lalokau turana Timoteo ia hagoadaia: “Timoteo e, Dirava ese oi dekenai ia henia [gauna] do oi naria namonamo. Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri. Inai bamona taudia edia diba be aonega koikoi sibona. Inai aonega koikoi ese haida ia koia vadaeni. Idia gwau, ‘Ai ese aonega ai davaria vadaeni.’ Unai dainai idia moru, badina edia abidadama Iesu dekenai idia rakatania dainai.”—1 Timoteo 6:20, 21.
16, 17. Dirava ese ita dekenai dahaka ia henia, bona edena bamona ita gimaia be namo?
16 Unai lalokau sisiba amo edena dala ai namo ita abia? Timoteo ese gau ta ia abia—davana bada gauna ta, do ia naria bona gimaia totona. Unai gauna be dahaka? Paulo ia gwau: “Hereva momokani, oi dekenai lau hadibaia gaudia do oi badinaia noho, bona idia edia murinai do oi raka. Keriso Iesu danu ita hakapua tamona dainai, ita be iena abidadama bona lalokau lalonai ita noho. . . . Dirava ese oi dekenai ia henia gauna do oi dogoatao noho, Lauma Helaga ena siahu dekena amo. Inai Lauma Helaga be iseda lalona dekenai ia noho.” (2 Timoteo 1:13, 14) Oibe, Timoteo ese ia abia gauna ta be “hereva momokani,” Dirava badinaia karana hegeregerena idia hadibaia herevana unai. (1 Timoteo 6:3) Hari inai negai Keristani taudia ese edia lalona idia hadaia unai hereva hegeregerena edia abidadama bona idia abia hereva momokani do idia gimaia.
17 Unai ita abia gauna ita gimaia karadia haida be Baibel stadi dalana namona bona guriguri hanaihanai karana ita dibaia, bona “taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea.” (Galatia 6:10; Roma 12:11-17) Paulo be ma ia gwau: “Kara maoromaoro, Dirava badinaia kara, abidadama, lalokau, haheauka, laloa manau, inai gaudia do oi tahua be namo. . . . mai oiemu goada ibounai danu abidadama ena heau helulu do oi heaulaia, bona kwalimu ahuna, mauri hanaihanai do oi davaria. Badina be inai bamona mauri totona Dirava ese oi ia boiria. Bona inai boiboi oi hamomokania vadaeni, taudia momo edia vairanai oiemu abidadama oi gwauraia hedinarai neganai.” (1 Timoteo 6:11, 12) Paulo ia gaukaralaia herevana inai, “mai oiemu goada ibounai danu abidadama ena heau helulu namona do oi heaulaia” bona “do oi davaria,” ese idia hahedinaraia goevagoeva lauma dalanai ita idia hadikaia diba gaudia ita dadaraia totona eda lalona ita hadaia bona ita gaukara goadagoada be gau badana.
Laloa Kehoa be mai Anina Bada
18. Edena dala ai taunimanima ese idia halasia dibana ita laloa maoromaoro diba?
18 Momokani, abidadama ena heau helulu namona ita heaulaia neganai, laloa kehoa be mai anina bada. (Aonega Herevadia 2:11; Filipi 1:9) Hegeregere, namo lasi ita laloa taunimanima ese idia halasia diba idauidau ibounai be dika. (Filipi 4:5; Iamesi 3:17) Taunimanima edia lalohadai iboudiai ese Dirava ena Hereva idia utua lasi. Iesu ese ia hahedinaraia gorere taudia be dogeta tauna—tanobada ena diba tauna ta—dekenai idia lao be namo. (Luka 5:31) Ena be Iesu ena negai dogeta taudia edia diba be bada lasi, to ia abia dae edia amo heduru sisina idia abia. Hari inai negai Keristani taudia be taunimanima ese idia halasia diba idauidau idia laloa maoromaoro, to lauma dalanai idia do idia hadikaia lalohadai ibounai idia dadaraia.
19, 20. (a) Elda taudia ese aonega dalanai idia hereva lasi taudia idia durua neganai, laloa kehoa be edena bamona idia hahedinaraia? (b) Kongregesen ese hadibaia hereva koikoi idia badinaia noho taudia be edena bamona ia kara henia?
19 Elda taudia ese aonega dalanai idia hereva lasi taudia idia durua neganai, laloa kehoa be mai anina bada danu. (2 Timoteo 2:7) Nega haida, reana kongregesen taudia ese gau maragidia bona edia lalohadai idia heailaia. Kongregesen ena lalo-tamona idia gimaia totona, elda taudia ese unai bamona hekwakwanai idia hamaoromaoroa haraga be namo. To danu, idia laloa lasi edia tadikaka edia kara ibounai be lalohadai kererena dainai idia karaia bona hereva momokani negea taudia bamona idia kara henidia haraga lasi.
20 Paulo ese heduru do idia henia dalana ia herevalaia namo herea. Ia gwau: “Lauegu varavara taudia e, bema Keristani tauna ta ia kerere neganai, umui Lauma Helaga umui kamonai henia taudia ese unai tau do umui hakaua lou, mai manau danu.” (Galatia 6:1) Iuda ese idia daradara Keristani taudia ia herevalaia neganai, ia gwau: “Abidadama goada lasi taudia be do umui durua, mai bogahisihisi danu. Haida be lahi dekena amo karaharaga do umui veria mauri.” (Iuda 22, 23) Momokani, bema elda taudia ese ta idia durua loulou murinai hadibaia hereva koikoi ia badinaia noho, kongregesen gimaia totona kara ta idia karaia be gau badana.—1 Timoteo 1:20; Tito 3:10, 11.
Gau Namodia amo Iseda Lalona Ita Hahonua
21, 22. Dahaka ita abia hidi namonamo be namo, bona dahaka gaudia ita laloa be namo?
21 Keristani kongregesen ese ‘toto dikana bamona idia bada idia lao’ herevadia, ita idia hadikaia diba herevadia, idia dadaraia vaitani. (2 Timoteo 2:16, 17; Tito 3:9) Unai ibounai idia dadaraia, herevana unai bamona hereva be ita idia hakaua kerere diba “aonega” herevadia, hereva momokani negea taudia edia hereva, eiava kongregesen lalonai naria namonamo lasi dalanai idia gwauraia herevadia. Ena be gau matamatadia ita ura diba be namo, to hanaihanai diba matamata abia urana bema ita biagua lasi, reana ita idia hadikaia lalohadai do ita abia dae danu. Ita be Satani ena koikoi daladia ita diba. (2 Korinto 2:11) Ita diba ia hekwarahi bada iseda lalona ia veria totona bena Dirava hesiai henia gaukarana do ita goadalaia lasi.
22 Ita be hesiai taudia namodia dainai, namona be Dirava ia hadibaia gaudia ita badinaia goada. (1 Timoteo 4:6) Namona be iseda nega ita gaukaralaia namonamo bona ita abia dibana be ita abia hidi namonamo. Unai neganai, Satani ese ia havaraia herevadia ese ita do idia hamorua haraga lasi. Oibe, namona be “kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, bona taunimanima namodia matauraia karadia” ita laloa noho. Bema unai bamona gaudia amo iseda lalona bona kudouna ita hahonua, maino ia henia Diravana be ita ida do ia noho.—Filipi 4:8, 9.
Dahaka Ita Dibaia?
• Edena dala ai taunimanima edia aonega ese lauma dalanai ita ia hadikaia diba?
• Hereva momokani negea taudia edia hadikaia herevadia amo ita sibona be edena bamona ita gimaia diba?
• Kongregesen lalonai edena bamona hereva ita dadaraia be namo?
• Hari inai negai idia halasia diba bada herea dainai laloa maoromaoro karana be edena bamona ita hahedinaraia?
[Picture on page 9]
Taunimanima momo ese idia duahia magasin bona buka momo be ita Keristani taudia ita badinaia lalohadai hegeregerena lasi
[Picture on page 10]
Keristani taudia ese edia lalohadai idia herevalaia diba to edia lalohadai idia dogoatao auka lasi