Iehova Bona Ena Hereva Oi Abidadama Henidia
“Oiemu ladana idia diba taudia ese, oi do idia abidadama henia.”—SALAMO 9:10.
DIRAVA ese ita ia boiria, ia bona ena Hereva, Baibel, do ita abidadama henia totona, to hari inai negai reana toana be unai ese ita do ia durua momokani lasi. To, nega daudau herea lalonai momo ese idia hamomokania vadaeni Dirava ena aonega ese taunimanima ia durudia. Tau bona hahine ia karaia Diravana be headava bona bese hamatamaia Diravana, bona dahaka dahaka ita abia be namo be ia diba goevagoeva, ma ta be unai ia diba goevagoeva lasi. Taunimanima idia abia be namo gaudia be idia idau lasi; unai hegeregerena, unai gau abia daladia be idia idau lasi. Baibel ena aonega sisibana, ena be lagani handred momo idia lao vadaeni idia torea, to ia be do hakaua herevana hereadaena, iseda mauri lalonai do ita kwalimu bona iseda hekwakwanai do ita hanaidia totona ita ia hakaua herevana. Bema unai sisiba ita badinaia, moale bada ita davaria—hari ita noholaia tanobadana mai ena diba momo lalonai danu!
2 Iehova abidadama henia bona Baibel ena hakaua herevadia badinaia karadia ese dina dina iboudiai taunimanima idia durua. Iehova ena Witness taudia milioni momo tanobada hegegemadai, Baibel ena sisiba idia abia dae bona idia badinaia taudia, edia mauri ese unai idia hamomokania. Idia davaria, Dirava bona ena Hereva abidadama henidia karana amo namo idia abia. (Salamo 9:9, 10) Dirava ena hahegani badinadia karana ese taunimanima namodia ai ia halaodia; idia goeva, idia kara maoromaoro, idia gaukara goada, taunimanima edia mauri bona edia kohu idia matauraia, bona edia sikele hegeregerena idia aniani bona idia inuinu. Bona ruma bese lalonai lalokau korikorina idia hahedinaraia bona edia natudia idia hadibaia namonamo. Taunimanima idia abia dae, idia haheauka, idia hebogahisi, dika idia gwauatao, bona ma kara momo idia karaia. Idia kahirakahira iboudiai be inai kara edia anina dikana amo idia siri: badu, ma ta inai henia karana, ala-ala, mama, gari, lahedo, hekokoroku, hereva koikoi, ta ena ladana hadikaia karana, lebulebu, bona sihari kava. (Salamo 32:10) Dirava ia gwauhamata iena taravatu idia badinadia taudia ese namo do idia davaria, to unai sibona lasi. Iesu ia gwau Keristani dalana ia badinaia tauna be “hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, bona tano. Momokani taunimanima ese unai tau do idia hisihisi henia, to gabeai, vaira neganai, mauri hanaihanai do ia abia.”—Mareko 10:29, 30.
Tanobada Ena Aonega Oi Abidadama Henia Lasi
3 Goevadae lasi taudia edia hekwakwanai ta be Dirava ena ura idia laloa maragi eiava idia laloaboio. Idia abia haraga lalohadaina be inai: Edia aonega eiava tanobada ena aonega taudia edia ese Dirava ena aonega ia hereaia, badina ia be hari inai nega gauna. Dirava ena hesiai taudia be tanobada taudia bogaragidiai idia noho dainai, unai lalohadai idia abia be haraga. Unai dainai, iseda Tamana guba ai ese ita ia boiria mai ena lalokau ida, iena sisiba do ita kamonai henia, bona ita ia hadibaia danu, ia gwau: “Egu natuna e, egu hadibaia hereva, be do oi laloaboio lasi. Egu oda hereva, be oiemu kudouna lalonai do oi dogoatao noho. Egu hadibaia hereva ese, oiemu mauri dinadia do idia halataia, bona noho namona momokani, oi dekenai do idia henia. Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia. Oi sibona do oi laloa lasi oi be mai emu aonega, to Lohiabada dekenai do oi gari henia, bona kara dika dekena amo do oi raka siri.”—Aonega Herevadia 3:1, 2, 5-7.
4 Taunimanima ese tanobada ena aonega be gabu idauidau ai idia abia badabada diba. Sikuli idauidau be momo herea, bona “buka momo idia torea noho, doko lasi.” (Hadibaia Tauna 12:12) Hari idia gwauhamata, kompiuta amo taunimanima ese gau idauidau momo herea do idia dibaia diba. To, ena be tanobada taudia ese unai diba ibounai idia abia diba, to ia ese ia ha-aonegadia lasi bona edia hekwakwanai ia kokidia lasi. Lasi, to dina dina iboudiai tanobada be ia dika ia lao. Unai dainai Baibel ese ita ia hamaoroa, “tanobada ena aonega be kavakava, Dirava ena vairana dekenai.”—1 Korinto 3:19, 20.
5 Inai dina gabedia edia dokona kahana lalonai, koikoi tauna badana, Satani Diabolo, ena kara ita hoalaia lasi; ia ese hereva koikoidia momo ia halasia taunimanima edia abidadama hadikaia totona, do idia abia dae lasi Baibel ena hereva be momokani. Baibel ena kerere davaria totona idia stadilaia taudia ese buka momo herea idia printaia, idia amo Baibel ena hereva idia hakoikoia toho bona idia gwau Baibel abidadama henia karana be kerere. Paulo ese ena Keristani bamona ta ia sisiba henia, ia gwau: “Timoteo e, Dirava ese oi dekenai ia henia dagi do oi naria namonamo. Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri. Inai bamona taudia edia diba be aonega koikoi sibona. Inai aonega koikoi ese haida ia koia vadaeni. Idia gwau, ‘Ai ese aonega ai davaria vadaeni.’ Unai dainai idia moru, badina edia abidadama Iesu dekenai idia rakatania dainai.” (1 Timoteo 6:20, 21) Baibel be ma ia gwau: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.”—Kolose 2:8.
Daradara Oi Koua Toho
6 Diabolo ena kara hehunina ma ta be taunimanima edia lalona ai daradara ia hadoa. Ia gima noho, bena bema ia itaia ta ena abidadama ia manoka ia lao sisina, unai ia gaukaralaia do ia hakererea totona. Bema ta ia daradara, namona be ia laloa unai daradara ia havaraia tauna be Heva ia hereva henia tauna; ia gwau: “Momokani, uma gabu ena au huahua ta ania lasi taravatu Dirava ese ia atoa o lasi?” Hedibagani Tauna ese daradara be Heva ena lalona ai ia hadoa, unai murinai hereva koikoina ta ia hamaoroa, bena ia abia dae. (Genese 3:1, 4, 5) Daradara ese Heva ena abidadama ia hadikaia. Unai dika amo do ita siri totona, namona be ita gima noho. Bema Iehova, o ena Hereva, o ena orea oi daradaralaia sisina matamaia, unai daradara ia do bada ia lao lasi bona emu abidadama ia do hadikaia lasi neganai, haorea dalana oi tahua haraga be namo.—1 Korinto 10:12 itaia.
7 Dahaka oi karaia diba? Haere be, Iehova bona ena Hereva oi abidadama henidia. “Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai, Dirava ese do ia badu henia lasi. To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao, doria mai, ia be gini gabuna lasi.” (Iamesi 1:5, 6; 2 Petero 3:17, 18) Unai dainai, Iehova oi guriguri henia goadagoada guna. (Salamo 62:8) Bena karaharaga, kongregesen naria taudia mai edia lalokau edia heduru oi noia. (Kara 20:28; Iamesi 5:14, 15; Iuda 22) Oi do idia durua emu daradara ia havaraia gauna do oi davaria totona; reana gauna be hekokoroku eiava lalohadai kererena ta.
8 Hereva momokani negea taudia edia lalohadai eiava tanobada ena aonega kavakavadia herevadia oi kamonai eiava oi duahia dainai daradara dikadia idia havaraia, a? Baibel ena aonega sisibana be inai: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi. Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri, badina be unai kara ese taunimanima Dirava dekena amo ia luludia oho. Oibe, hereva unai bamona be toto dikana bamona, ia be ia bada lao noho.” (2 Timoteo 2:15-17) Hereva momokani idia negea taudia momo ese unai dala kererena idia badinaia matamaia dalana be inai: Idia maumau badina be idia laloa Iehova ena orea taudia ese idia kara henidia dalana be maoro lasi. (Iuda 16) Gabeai, hahediba herevadia idia gwauraia kerere. Bema oi ese Keristani kongregesen lalonai idia gaukara daladia oi maumauraia bona oi moalelaia lasi, namona be unai bamona lalohadaidia be emu lalona amo oi kokia haraga, doketa ese toto dikana ena bodaga ia kokia haraga hegeregerena. (Kolose 3:13, 14) Unai bamona daradaradia idia hatubua gaudia oi kokia.—Mareko 9:43.
9 Iehova bona ena orea oi badinaia namonamo. Petero ena kara oi tohotohoa; ia gwau: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.” (Ioane 6:52, 60, 66-68) Stadi sediual namona oi karaia, Iehova ena Hereva do oi stadilaia totona, bena emu abidadama do ia goada noho, kesi badana bamona, bona “Satani ena diba bona peva, lahi gaudia, be do [ia] habodoa diba.” (Efeso 6:16) Keristani hesiai gaukarana oi goadalaia, bona Basileia sivaraina oi harorolaia mai emu lalokau ida. Dina dina iboudiai, Iehova ese oi ia hanamoa dalana oi laloa dobu bona oi tanikiu henia. Hereva momokani oi diba dainai oi tanikiu henia. Unai kara iboudiai bema oi karaia loulou, unai ese oi do ia durua, do oi moale, do oi haheauka, bona do oi daradara lasi totona.—Salamo 40:4; Filipi 3:15, 16; Heberu 6:10-12.
Headava Lalonai Iehova Ena Sisiba Badinaia
10 Iehova ese dala ia karaia tau bona hahine be headava lalonai do idia noho hebou, tanobada hahonua totona sibona lasi, to edia moale habadaia totona danu. To, kara dika bona goevadae lasi maurina ese hekwakwanai badadia be headava lalonai idia havaraia. Keristani taudia danu ese unai hekwakwanai idia davaria, badina be idia danu idia goevadae lasi bona hari inai nega ena hekwarahi idia davaria dainai. To, Iehova bona ena Hereva idia abidadama henidia hegeregerena, edia headava lalonai bona edia natudia naria karana ai idia kwalimu. Tanobada ena kara idauidau be mai edia gabu lasi Keristani headavana lalonai. Dirava ena Hereva ena sisiba be inai: “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia henia momokani.”—Heberu 13:4.
11 Edia headava lalonai Baibel ena sisiba idia badinaia taudia idia lalokau heheni, edia maduna idia huaia, bona idia noho namonamo. Tau bona hahine ruaosi ese kwara dagina taravatuna idia lalo-pararalaia bona idia matauraia. Hekwakwanai idia vara negadiai, nega momo unai be idia ta eiava idia ruaosi ese Baibel ena sisiba idia badinaia momokani lasi dainai. Ia noho daudau hekwakwanaina kokia totona, gau badana be tau bona hahine ruaosi ese unai hekwakwanai ena anina korikorina idia laloa mai edia momokani ida bona unai hekwakwanai idia havaraia gaudia idia kokia toho, ia dainai idia vara gaudia lasi. Bema vanegai idia herevalaia negadiai idia lalo-tamonalaia lasi, reana elda tauna mai ena lalokau ena heduru idia noia diba.
12 Unai hekwakwanai ena badina be dahaka—edia herevahereva dalana ia dika a, o ta ese ma ta ena lalona ena mamina ia laloa lasi a, o ta ese kwara dagina ia matauraia lasi a, o ta ese ma ta ena lalohadai ia tahua lasi, a? Eiava moni gaukaralaia dalana, moale karadia, hebamo, hahine ese moni gaukarana ia karaia be namo eiava lasi, o edeseniai umui noho be namo, a? Herevana hekwakwanai be dahaka, to taravatu amo eiava hakaua herevadia amo Baibel ese sisiba namona ia henia. (Mataio 19:4, 5, 9; 1 Korinto 7:1-40; Efeso 5:21-23, 28-33; 6:1-4; Kolose 3:18-21; Tito 2:4, 5; 1 Petero 3:1-7) Tau bona hahine be sibodia edia namo idia tahua lasi to edia headava lalonai lalokau bada idia hahedinaraia neganai, moale bada idia davaria. Namona be ruaosi idia ura bada edia kara do idia haidaua bona Iehova ese ia gwauraia dalana do idia badinaia. “Oiemu hadibaia tauna ena hereva do oi kamonai henia, vadaeni do oi kwalimu. Lohiabada do oi abidadama henia, vadaeni do oi moale.”—Aonega Herevadia 16:20.
Memero Kekeni e, Dirava Ena Hereva Umui Kamonai Henia
13 Keristani memerodia bona kekenidia be tanobada dikana ai idia noho dainai, mai edia abidadama goadana ida idia tubu daekau be auka. Badina ta be, “Satani ese tanobada taudia ibounai ia gunalaia noho.” (1 Ioane 5:19) Ia be iseda inai tauna dika rohorohona; gau dikana ena toana ia senisia diba, gau namona ena toana ai ia halaoa diba, unai amo memero kekeni ia hakereredia toho. Sibodia edia namo bona edia ura tahua karana, kara dika bona dagedage karadia ura henia karana, bona moale karadia tahua lalo-dika karana—iboudiai be lalohadai dalana mai siahuna amo idia vara; unai dala be Baibel ese ia gwauraia “lauma,” ia gwau: “Inai lauma dika ese Dirava idia kamonai henia lasi taudia edia lalona dekenai harihari ia gaukara noho.” (Efeso 2:1-3) Satani ese unai “lauma” o lalohadai be sikuli bukadia ai, miusiki momo ai, gadara ai, bona moale karadia idaudia ai ia havaraia mai ena aonega dikana ida. Namona be tama sina idia gima noho, unai bamona lalohadaidia do idia koua bona edia natudia idia durua, Iehova bona ena Hereva do idia abidadama henidia totona.
14 Tama ta hegeregerena, Paulo ese ena bamona, tauhau Timoteo, ia sisiba henia, ia gwau: “Uhau edia lebulebu karadia do oi rakatania, bona inai kara do oi badinaia: Kara maoromaoro, abidadama, lalokau, bona maino. Mai edia laloa goevagoeva, bona Lohiabada ena durua idia noia noho taudia, idia danu do oi turana karaia.” (2 Timoteo 2:22) Uhau edia ura karadia haida be dika lasi, to idia “rakatania” be namo, ena anina be do idia naria namonamo, namo lasi unai gau do idia tahudia bada bena edia nega be hegeregere lasi, Dirava ena ura do idia tahua. Ena be tauanina hagoadaia karana, spot gadara, miusiki, moale karadia, gaukara idaudia, bona laolao, be reana idia dika lasi, to bema unai gau umui tahudia bada, umui idia tarapua diba. Inai kara umui rakatanidia vaitani be namo: Herevahereva kava, loaloa kava, seks laloa mai ura dikana ida karana, noho kava mai lalo-hesiku ida karana, bona emui tamana bona sinana ese umui idia lalo-pararalaia lasi karana maumauraia karana.
15 Memero kekeni be ruma lalonai dika idia davaria diba. Bema lebulebu karadia eiava dagedage karadia be TV program ai eiava vidio ai idia raraia, unai ese kara dikadia ura henidia urana be edia lalona ai ia hadoa diba. (Iamesi 1:14, 15) Baibel ia gwau: “Lohiabada ese kara dika idia ura henia lasi taudia, ia lalokau henidia noho.” (Salamo 97:10; 115:11) Bema ta ese mauri daladia rua ai nega tamona ia raka toho, Iehova be unai ia diba. (Aonega Herevadia 15:3) Keristani memerodia bona kekenidia e, emui daiutu edia kohu mani umui itaia namonamo. Lebulebu taudia mai edia ladana bada spot gadara ai eiava miusiki o ben ai edia laulau be haba ai umui hahedinaraia a, eiava lalohadai namodia do idia havaraia gaudia umui hahedinaraia? (Salamo 101:3) Emui dabua edia toana be edena bamona—idia be inai tanobada ena sitaelo idau hereadia idia hahedinaraia gaudia eiava hemataurai idia hahedinaraia gaudia? Bema gau dikana o kara dikana mamia toho urana umui hagugurua, Diabolo ese dala hehunidia ai umui ia tarapua diba. Baibel ena aonega sisibana be inai: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.”—1 Petero 5:8.
16 Baibel ia gwau namona be kara dika taudia umui bamodia lasi. (1 Korinto 15:33) Namona be Iehova garina idia gari taudia sibodia umui bamoa. Emui uru taudia edia lalo-ani umui dadaraia. (Salamo 56:11; Aonega Herevadia 29:25) Emui tamana bona sinana, Dirava garina idia gari taudia, umui kamonai henidia. (Aonega Herevadia 6:20-22; Efeso 6:1-3) Hahekau herevadia bona hahegoada herevadia be elda taudia dekenai umui tahua. (Isaia 32:1, 2) Lauma gaudia umui laloa bona umui tahua be namo. Dala umui tahua, lauma dalana ai do umui goada umui lao bona kongregesen ena gaukara idauidau do umui karaia totona. Ima gaukaradia umui dibaia. Mai emui abidadama goadana ida do umui tubu daekau be namo, unai amo do umui hamomokania umui be mai ladana namona—do umui hegeregere Iehova ena tanobada matamatana lalonai do umui noho! Iseda Tamana guba ai bona emui tamana bona sinana ese umui do idia moalelaia, bona emui kara ese emui Keristani varavara do ia hagoadaia. Unai be mai anina bada!—Aonega Herevadia 4:1, 2, 7, 8.
17 Dirava ena lauma ese salamo torea tauna ia hasiahua bena inai hereva ia torea: “Bema tau ta ese kara maoromaoro ia karaia neganai, Lohiabada ese gau namona ta unai tau dekena amo do ia koua lasi. Siahu Ibounai Diravana e, oi dekenai idia abidadama taudia ibounai, be do idia moale bada noho.” (Salamo 84:11, 12) Oibe, Iehova bona ena Hereva, Baibel, idia abidadama henidia taudia ese moale bona kwalimu do idia davaria, lalohisihisi bona lusi lasi.—2 Timoteo 3:14, 16, 17.
Emu Haere be Dahaka?
◻ Badina be dahaka Keristani taudia ese “inai tanobada ena aonega” idia abidadama henia be namo lasi?
◻ Bema ta ese gau haida ia daradaralaia, dahaka ia karaia be namo?
◻ Iehova ena dala badinaia karana ese headava lalonai kwalimu bona moale be edena bamona ia havaraia?
◻ Baibel ese matamata taudia edena bamona ia durua, ‘uhau edia lebulebu karadia do idia rakatania’ totona?
[Study Questions]
1. Badina be dahaka hari inai negai Iehova bona ena Hereva ita abidadama henidia diba?
2. (a) Dirava ena hahegani badinadia karana ese Iehova ena orea taudia edia mauri lalonai dahaka anina namona ia havaraia? (b) Iehova ia gwauhamata, ia idia kamonai henia bona ena Hereva idia badinaia taudia ese dahaka danu do idia davaria?
3. Keristani taudia ese Iehova bona ena Hereva idia abidadama henidia noho lalonai, nega haida dahaka hekwakwanai idia davaridia?
4. “Tanobada ena aonega” be edena gabu idauidau ai idia abia diba, bona badina be dahaka ia be “kavakava, Dirava ena vairana dekenai”?
5. Baibel ese “tanobada ena aonega” be edena bamona ia sisibalaia?
6. Daradara be eda lalona ai do idia tubu lasi totona, badina be dahaka ita gima noho be namo?
7. Daradara kokidia totona, dahaka oi karaia diba?
8. Nega momo, hereva momokani negea lalohadaina be edena bamona ia matamaia, bona koua dalana be dahaka?
9. Bema tiokratik karadia ita karaia loulou, unai ese ita be edena bamona do ia durua, iseda abidadama do ia goada noho totona?
10. Badina be dahaka Keristani headava taudia ese Iehova ena hakaua herevadia idia tahua be gau badana?
11. Headava ena hekwakwanai kokidia totona, namona be tau bona hahine ruaosi ese dahaka idia lalo-pararalaia?
12. (a) Headava momo lalonai idia vara hekwakwanaidia, Baibel ese ia sisibalaia gaudia, be dahaka dahaka? (b) Badina be dahaka tau bona hahine ruaosi ese Iehova ena dala idia badinaia be namo?
13. Keristani memerodia bona kekenidia be idia tubu daekau lalonai, badina be dahaka Iehova bona ena Hereva idia abidadama henia bada be auka?
14. Edena dala amo matamata taudia ese ‘uhau edia lebulebu karadia idia rakatania’ diba?
15. Ruma lalonai dahaka gau ese memero kekeni idia hakereredia diba, bena mauri daladia rua ai nega tamona idia raka toho?
16. Baibel ena sisiba ese mero ta be edena bamona ia durua diba, bena mai anina taudia iboudiai ese do idia moalelaia?
17. Iehova bona ena Hereva idia abidadama henidia taudia ese dahaka hahenamo idia davaridia?
[Picture on page 23]
Keristani taudia ese Iehova bona ena Hereva idia abia dae, to “inai tanobada ena aonega” idia dadaraia, ia be kavakava dainai
[Picture on page 25]
Iehova bona ena Hereva idia abidadama henidia ruma besedia idia kwalimu bona idia moale