‘Emu Hahemauri Oi Naria’ Noho mai Lalo-Goada Ida!

“Dirava ena hamauria do ita naria, mai laloa goada danu, inai kara ita atoa, iseda tuari kwara gauna aukana bamona.”​—⁠1 TESALONIKA 5:⁠8.

1. Edena dala ai ‘hahemauri naria’ karana ese ita ia durua, ita haheauka totona?

NEGA aukana lalonai ta ia haheauka diba bema ia diba hahemauri do ia abia. Sisima ia mutu neganai ia roho mauri tauna be dingi maragina dekenai ia haheauka diba, bema ia diba heduru do ia abia. Unai hegeregerena, lagani tausen momo lalonai, abidadama tatau bona hahine ese “Lohiabada ena hamauria kara” idia naria noho dainai, hisihisi lalonai idia haheauka diba, bona unai helaro dainai lalohisihisi idia davaria lasi. (Esodo 14:13; Salamo 3:8; Roma 5:5; 9:33) Aposetolo Paulo ia gwau ‘hahemauri naria’ karana be Keristani lauma dabua ena “tuari kwara gauna bamona.” (1 Tesalonika 5:8; Efeso 6:17) Oibe, Dirava ese ita do ia hamauria lalohadaina ita abia dae momokani karana ese iseda lalona ia gimaia, bena hisihisi, dagedage, bona hahetoho lalonai ita laloa namonamo diba.

2. Edena dala ai ‘hahemauri naria’ karana be tomadiho momokani ena kara badana ta?

² The International Standard Bible Encyclopedia ia gwau, “vaira negana namona naria karana be dirava koikoi tomadiho henia tanobadana ena kara lasi,” unai be Keristani taudia ginigunadia edia nega ai ia noho tanobadana. (Efeso 2:12; 1 Tesalonika 4:13) To, ‘hahemauri naria mai lalo-goada ida’ karana be tomadiho momokani ena kara badana ta. Edena dala ai? Dala ginigunana be, Iehova ena hesiai taudia edia hahemauri be Iena ladana ida ia hakapua. Salamo torea tauna Asapa ia guriguri: “Dirava e, mani ai do oi durua, ai do oi hamauria. Oiemu ladana ena hairaina dainai, ai do oi hamauria.” (Salamo 79:9; Esekiela 20:⁠9) Danu, Iehova ese ia gwauhamatalaia hahenamo ita abidadama henia be mai anina bada, ia ida hetura karana namona ita moalelaia totona. Paulo ese unai ia herevalaia, ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.” (Heberu 11:⁠6) Danu, Paulo ia gwau Iesu be tanobada dekenai ia mai ena badina badana ta be helalo-kerehai taudia do ia hamauria. Ia gwau: “Inai lau gwauraia hereva be momokani herea, bona taunimanima ese idia [abia] dae bona hamomokania be namo: Keriso Iesu be tanobada dekenai ia mai, be kara dika taudia hamauria totona.” (1 Timoteo 1:15) Bona aposetolo Petero ia gwau, hahemauri ‘ena badina korikori be eda abidadama.’ (1 Petero 1:⁠9) Ia hedinarai goevagoeva, hahemauri ita naria noho be maoro. To hahemauri be dahaka? Bona ita abia totona dahaka ita karaia be namo?

Hahemauri be Dahaka?

3. Edena dala ai Iehova ese ena idaunegai hesiai taudia ia hamauria?

³ Heberu Revarevadia lalonai, nega momo “hahemauri” ena anina be dagedage eiava dagedage ia havaraia mase amo hamauria karana. Hegeregere, Davida ese Iehova ia gwauraia “Hamauria Tauna” neganai, ia gwau: “Lohiabada be lauegu nadi badana, . . . lauegu heau mauri gabuna. Ia be lauegu Hamauria Tauna; Dagedage karadia dekena amo lau ia hamauria noho. Lohiabada, idia hanamoa Diravana, dekenai lau taitai, bona lau dekenai idia tuari taudia dekena amo, ia ese lau ia hamauria.” (2 Samuela 22:​2-4) Davida ia diba Iehova do ia kamonai bema iena kamonai hesiai taudia be heduru totona idia noinoi.​—⁠Salamo 31:​22, 23; 145:⁠19.

4. Keriso ia do vara lasi neganai idia noho Iehova ena hesiai taudia be dahaka idia naria mai lalo-goada ida?

⁴ Keriso ia do vara lasi neganai idia noho Iehova ena hesiai taudia danu be vaira negana ai do idia abia maurina idia naria. (Iobu 14:​13-15; Isaia 25:8; Daniela 12:13) Momokani, Heberu Revarevadia lalonai ita davaria hahemauri gwauhamata momo ese hahemauri karana badana idia perovetalaia​—⁠mauri hanaihanai dekenai ita ia hakaua hahemauri karana unai. (Isaia 49:​6, 8; Kara 13:47; 2 Korinto 6:⁠2) Iesu ena negai, Iuda taudia momo be mauri hanaihanai idia naria mai lalo-goada ida, to idia abia dae lasi Iesu be edia helaro ena anina ia hamomokania tauna badana. Iesu be ena negai idia noho tomadiho gunalaia taudia ia hamaoroa: “Umui ese Buka Helaga dekenai umui tahua, badina be umui laloa inai hereva lalonai mauri hanaihanai do umui davaria. To gauna be, inai hereva ese lau idia gwauraia noho!”​—⁠Ioane 5:⁠39.

5. Hahemauri ena anina be dahaka?

⁵ Dirava ese Iesu amo hahemauri ena anina ibounai ia hahedinaraia. Ena anina be kara dika ena siahu, tomadiho koikoi ena igui, Satani ese ia lohiaia tanobadana, taunimanima gari henia karana, bona mase gari henia karana amo, taunimanima ruhaia karana. (Ioane 17:16; Roma 8:2; Kolose 1:13; Apokalupo 18:​2, 4) Dirava ena kamonai hesiai taudia dekenai hahemauri ena anina be Dirava ese dagedage bona hisihisi amo idia ia hamauria sibona lasi, to dala ia kehoa mauri hanaihanai idia abia totona. (Ioane 6:40; 17:⁠3) Iesu ia gwau “orea maragi” taudia dekenai hahemauri ena anina be guba dekenai do idia toreisi lou, Keriso ida Basileia lalonai idia lohia totona. (Luka 12:32) Taunimanima oredia dekenai, hahemauri ena anina be guna Adamu bona Heva idia do kara dika lasi neganai, Eden ena uma gabu dekenai idia moalelaia mauri goevadaena bona hetura karana goevadaena Dirava ida do idia abia. (Kara 3:21; Efeso 1:10) Unai bamona paradaiso maurina be Dirava ena ura korikorina taunimanima totona. (Genese 1:28; Mareko 10:30) To, edena dala ai unai bamona mauri do idia abia diba?

Hahemauri Ena Badina​—⁠Mauri Davana

6, 7. Hahemauri do ita abia totona Iesu be dahaka ia karaia?

⁶ Hahemauri hanaihanai be Keriso ena mauri davalaia boubouna sibona amo ita abia diba. Dahaka dainai? Baibel ia gwau Adamu ia kara dika neganai, ia ese ia sibona bona gabeai ia havaraia natudia ibounai, ita danu, be kara dika dekenai ia “hoihoilaia”​—⁠unai dainai taunimanima ese helaro korikorina idia abia totona ta ese edia mauri davana do ia henia be gau badana. (Roma 5:​14, 15; 7:​14, NW ) Mose ena Taravatu henunai animal bouboulaia karadia idia hahedinaraia, Dirava ese taunimanima iboudiai totona mauri davana do ia henia. (Heberu 10:​1-10; 1 Ioane 2:⁠2) Iesu ia henia boubouna ese unai peroveta laulaudia ia hagugurua. Iesu ia do vara lasi neganai, Iehova ena aneru ia gwau: “Ia ese iena bese taudia edia kara dika dekena amo do ia hamauridia.”​—⁠Mataio 1:21; Heberu 2:⁠10.

⁷ Iesu be hoa dalanai, rami-hebou kekenina Maria amo ia vara, bona ia be Dirava ena Natuna dainai, Adamu amo mase ia abia hanai lasi. Unai badina dainai bona Dirava ia kamonai henia goevagoeva dainai, ena mauri be mai ena siahu, kara dika bona mase amo taunimanima ia hoia totona. (Ioane 8:36; 1 Korinto 15:22) Taunimanima iboudiai amo Iesu ia idau dainai, kara dika ena davana, mase, ia abia lasi. Tanobada dekenai ia mai ena badina be “iena mauri do ia atoa diho, taunimanima momo edia dika davana karaia totona.” (Mataio 20:28) Unai ia karaia murinai, hari ia toreisi lou bona lohia siahuna ia abia vadaeni tauna Iesu ese Dirava vairanai idia hegeregere taudia ibounai ia hamauria diba.​—⁠Apokalupo 12:⁠10.

Edena Dala ai Ita Hegeregere Hahemauri Ita Abia Totona?

8, 9. (a) Matamata lohia tauna ta mai ena kohu bada be hahemauri totona ia henanadai neganai, Iesu ena haere be dahaka? (b) Edena dala ai Iesu ese ia vara gauna ia gaukaralaia ena hahediba taudia ia hadibaia totona?

⁸ Nega ta, Israela matamata lohia tauna ta mai ena kohu bada be Iesu ia nanadaia: “Dahaka lau karaia, . . . mauri hanaihanai abia totona?” (Mareko 10:17) Ena henanadai ese unai negai Iuda taudia edia lalohadai ia hahedinaraia​—⁠idia laloa Dirava ese kara namodia haida ia tahua bona bema unai kara momo ita karaia, Dirava ese ita do ia hamauria. To unai bamona tomadiho karana be ta ese sibona ena ura gauna abia totona do ia karaia diba. Unai bamona karadia ese hahemauri ena helaro korikorina idia havaraia lasi, badina goevadae lasi taudia ese Dirava ena taravatu idia badinaia maoromaoro diba lasi.

⁹ Iesu be unai tau ena henanadai ia haerelaia neganai, ia gwau Dirava ena taravatu ia badinaia be namo. Karaharaga unai matamata lohia tauna ia gwau ia maragi negana amo unai ia karaia vadaeni. Ena haere dainai Iesu ese ia lalokau henia. Iesu ese ia hamaoroa: “Gau tamona dekenai oi hegeregere lasi, oi lao, oiemu kohu oi hoia, ogogami taudia dekenai oi henia, gabeai kohu namona do oi davaria guba dekenai, bona oi mai, lauegu murinai oi raka.” To, unai tau matamata be mai lalohisihisi ida ia lao, “badina ia be kohu momo tauna.” Unai murinai Iesu ese ena hahediba taudia ia hadibaia, inai tanobada ena kohu ura henia bada karana ese hahemauri abia dalana do ia koua. Ma ia gwau, ta be sibona ena hekwarahi amo hahemauri ia abia diba lasi. To Iesu ese idia ia hagoadaia, ia gwau: “Taunimanima idia karaia diba lasi, to Dirava be ia [karaia] diba, badina be Dirava ese gau ibounai ia karaia diba.” (Mareko 10:​18-27; Luka 18:​18-23) Edena dala ai hahemauri do ita abia?

10. Hahemauri abia totona dahaka ita karaia be gau badana?

¹⁰ Hahemauri be Dirava ia henia harihari gauna, to ita abia kava lasi. (Roma 6:23) Unai harihari gauna abia totona taravatu haida idia noho bona idia badinaia taudia sibona be do idia hegeregere. Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” Bona aposetolo Ioane ia gwau: “Dirava ena Natuna ia abidadama henia tauna ese mauri hanaihanai do ia abia, to iena Natuna ia kamonai henia lasi tauna be mauri do ia itaia lasi.” (Ioane 3:​16, 36) Ia hedinarai goevagoeva, Dirava ia ura hahemauri hanaihanai idia naria taudia ibounai ese abidadama bona kamonai karana idia hahedinaraia. Namona be idia ta ta ese edia lalona idia hadaia, mauri davana idia abia dae bona Iesu ena aena gabudia dekenai idia raka totona.

11. Edena dala ai goevadae lasi tauna ese Iehova ena lalo-namo ia abia diba?

¹¹ Ita be goevadae lasi dainai, kamonai karana ita hahedinaraia be auka bona kamonai karana ita hahedinaraia goevagoeva diba lasi. Unai dainai Iehova ese mauri ena davana ia henia iseda kara dika koua totona. To, gau badana be ita hekwarahi noho, Dirava ena dala ita badinaia totona. Iesu ese unai matamata lohia tauna mai ena kohu bada ia hamaoroa bamona, Dirava ena taravatu ita badinaia be gau badana. Unai ita karaia neganai Dirava ena lalo-namo sibona lasi, to moale bada do ita abia danu, badina “iena taravatu be metau lasi”; ita idia “hanamoa.” (1 Ioane 5:3; Aonega Herevadia 3:​1, 8) To, mai lalo-goada ida hahemauri ita naria noho be auka.

“Abidadama Lalonai Do Umui Gini Goada Noho”

12. Edena dala ai hahemauri ena helaro ese Keristani tauna ia hagoadaia, matabodaga karadia ia dadaraia totona?

¹² Hahediba tauna Iuda ia ura Keristani taudia ginigunadia dekenai “[ia bona idia edia] hamauria ena hereva” ia torea. To, unai nega taudia edia kara dika bada dainai, gau badana be iena tadikaka ia hagoadaia “abidadama lalonai do [idia] gini goada noho.” Oibe, ta ese hahemauri ia abia totona nega namona sibona lalonai Keristani abidadama korikorina ia dogoatao bona kamonai karana ia hahedinaraia be hegeregere lasi. Gau badana be Iehova ita badinaia goadagoada bona unai ese ita ia durua hahetoho bona matabodaga karadia do ita dadaraia totona. To, matabodaga karadia, siahu taudia matauraia lasi karana, kongregesen hapararaia karadia, bona daradara ese aposetolo taudia edia negai ia noho kongregesen be lauma dalanai idia hadikaia. Unai kara idia dadaraidia totona, Iuda ese ena Keristani tadikaka ia hagoadaia edia tahua gauna idia laloa namonamo noho totona, ia gwau: “Lauegu lalokau taudia e, emui abidadama helagana ena latanai emui mauri do umui haginia goada. Lauma Helaga ena siahu dekena amo do umui guriguri noho. Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.” (Iuda 3, 4, 8, 19-21) Idia goeva noho totona idia hekwarahi neganai, hahemauri ena helaro ese idia ia hagoadaia diba.

13. Edena dala ai ita hahedinaraia diba Dirava ena hariharibada ita negea kava lasi?

¹³ Iehova Dirava ia ura do ia hamauria taudia ese kara maoromaoro idia badinaia goadagoada. (1 Korinto 6:​9, 10) To, Dirava ena kara maoromaoro taravatu ita badinaia neganai, namo lasi ma haida edia kara dainai idia ita hahemaoro henia. Ita ese taunimanima edia vaira negana ita abia hidi lasi. To, Dirava ese do ia abia hidi, Paulo ese Atena dekenai idia noho Greek taudia ia hamaoroa bamona, ia gwau: “Dirava ese dina ta ia abia hidi vadaeni, unai dina dekenai iena abia hidi Tauna ese tanobada ibounai do ia kota henia mai maoromaoro danu.” Unai tauna be Iesu Keriso. (Kara 17:31; Ioane 5:22) Bema Iesu ia henia mauri davana ita abia dae momokani, hahemaoro dinana dainai do ita gari kava lasi. (Heberu 10:​38, 39) Gau badana be ‘Dirava ena hariharibada [mauri davana dainai ia ida maino ai ita noho diba] ita negea kava’ lasi, unai ia vara diba bema sibona ita biagua lasi bena lalohadai bona kara kerere ese ita ia veria. (2 Korinto 6:⁠1) Danu, ma haida be hahemauri idia abia totona ita durua neganai, ita hahedinaraia danu, ita ese Dirava ena hebogahisi ita negea kava lasi. Edena dala ai idia ita durua diba?

Hahemauri Helarona Ita Harorolaia

14, 15. Iesu ese daidia dekenai hahemauri ena sivarai namona harorolaia gaukarana ia henia?

¹⁴ Paulo ese peroveta tauna Ioela ena hereva ia gwauraia neganai, ia gwau: “Dirava ena ladana idia noinoi henia taudia ibounai, be mauri do idia davaria.” Bena ma ia gwau: “To idia abidadama henia lasi taudia be edena bamona Lohiabada do idia noinoi henia diba? Bona iena Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai?” Siri haida murinai, Paulo ia gwau abidadama be ia vara kava lasi; to, abidadama be idia “kamonaia” gauna amo ia vara, unai be, “Keriso ena hereva.”​—⁠Roma 10:​13, 14, 17; Ioela 2:⁠32.

¹⁵ Daidia ese tanobada besedia dekenai “Keriso ena hereva” do idia harorolaia? Iesu ese ena hahediba taudia dekenai unai gaukara ia henia​—⁠idia be unai “hereva” idia dibaia vadaeni taudia. (Mataio 24:14; 28:​19, 20; Ioane 17:20) Basileia harorolaia bona hahediba taudia halaoa gaukarana ita karaia neganai, ita be aposetolo Paulo ese ia herevalaia gauna ita karaia, ia ese Isaia ena hereva ia gwauraia, ia gwau: “Sivarai Namona ena moale idia mailaia taudia edia aena, be namo herea momokani.” Ena be momo ese ita harorolaia sivarai namona idia abia dae lasi, to Iehova vairanai iseda aena idia “namo herea momokani.”​—⁠Roma 10:15; Isaia 52:⁠7.

16, 17. Iseda haroro gaukara ese ia hagugurua gaudia rua be dahaka?

¹⁶ Unai gaukara ita karaia ese mai anina bada gaudia rua ia hagugurua. Gau ginigunana be, sivarai namona ita harorolaia, Dirava ena ladana ita hanamoa totona, bena hahemauri idia ura taudia do idia diba edeseniai do idia lao be namo. Paulo ia lalo-parara unai gaukara ena anina ta be unai. Ia gwau: “Lohiabada ese ai dekenai ia hamaoroa vadaeni, ia gwau: ‘Lau ese umui lau atoa, idau bese taudia edia diari do umui lao, bona egu mauri abia ena dala tanobada taudia ibounai dekenai.’ ” Vadaeni, ita be Keriso ena hahediba taudia dainai, ita ta ta ese hahemauri sivaraina be taunimanima dekenai ita harorolaia be gau badana.​—⁠Kara 13:47; Isaia 49:⁠6.

¹⁷ Gau iharuana be, sivarai namona harorolaia gaukarana ese Dirava ena hahemaoro maoromaoro karana ena badina ia haginia. Iesu ese unai hahemaoro karana ia herevalaia, ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai be iena vairana dekenai do idia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona.” Ena be unai hahemaoro bona hapararaia gaukarana be ‘Taunimanima ena Natuna ia mai’ neganai do ia vara, to haroro gaukara ese hari inai negai taunimanima dekenai dala ia kehoa Keriso ena lauma tadikaka idia dibaia bona durua karadia idia karaia totona, unai amo sibona edia hahemauri hanaihanai dalana idia kehoa.​—⁠Mataio 25:​31-46.

“Umui Naria Noho”

18. Edena dala ai ‘mai lalo-goada ida hahemauri ita naria’ noho diba?

¹⁸ Haroro gaukara ita karaia goadagoada karana ese ita ia durua, mai lalo-goada ida iseda hahemauri ita naria noho totona. Paulo ia gwau: “Ai ura bada umui ta ta ese unai bamona do umui karaia goadagoada noho, ela bona emui mauri dokona. Badina be unai neganai, umui naria noho davana namona, mauri hanaihanai, do umui abia momokani.” (Heberu 6:11) Unai dainai, namona be ita ta ta ese “hahemauri do ita naria, mai laloa goada danu, inai kara ita atoa, iseda tuari kwara gauna aukana bamona,” bona unai amo ita laloatao “Dirava ia ura lasi ita dekenai do ia badu, to iena ura be hamauria do ita abia, iseda Lohiabada Iesu Keriso dekena amo.” (1 Tesalonika 5:​8, 9) Namona be Petero ena hagoadaia herevana ita laloa danu, ia gwau: “Do umui laloa namonamo, bona do umui naria namonamo. Do umui noho hegaegae, bona Iesu Keriso do ia hedinarai neganai do umui abia hanamoa, be do umui naria noho.” (1 Petero 1:13) Unai idia karaia taudia ibounai be ‘idia naria hahemauri’ do idia abia momokani!

19. Hereva gabena lalonai dahaka do ita laloa?

¹⁹ Unai ita naria noho lalonai, ia do noho negana be edena bamona ita laloa be namo? Edena dala ai unai nega ita gaukaralaia be namo, ita sibona bona ma haida ita hamauria totona? Hereva gabena lalonai unai henanadai do ita laloa.

Anina Oi Gwauraia Diba, A?

• Dahaka dainai ‘mai lalo-goada ida hahemauri ita naria’ noho be gau badana?

• Hahemauri ena anina be dahaka?

• Harihari gauna, hahemauri, ita abia totona dahaka ita karaia be namo?

• Iseda haroro gaukara ese dahaka ia hagugurua Dirava ena ura hegeregerena?

[Pictures on page 10]

Hahemauri ena anina be dika amo ita roho mauri sibona lasi