Duahia Taudia Idia Henanadai
Iehova Ena Witnes Taudia Idia Abia Dae, Dirava ese Idia Sibodia Do Ia Hamauria, A?
Iehova ena Witnes taudia idia laloa idia be tomadiho momokani idia davaria vadaeni. Bema unai bamona idia laloa lasi, tomadiho oreana ma ta dekenai idia lao diba. Tomadiho idauidau dekenai idia lao taudia edia lalohadai hegeregerena, Iehova ena Witnes taudia idia ura Dirava ese idia do ia hamauria. To, idia gwau lasi daidia be mauri do idia abia, idia diba unai be edia maduna lasi. Oibe, Dirava sibona be Hahemaoro Tauna. Ia ese abia hidi do ia karaia.—Isaia 33:22.
Baibel ia hahedinaraia, idia ura mauri idia abia taudia ese hahemauri sibona idia ura henia lasi, to Hamauria Tauna ida idia gaukara hebou danu. Haheitalai ta be inai: Bema haoda tauna ta be gadobada ai ena dingi ia mutu noho, bona ia gaukara goadagoada dingi ia mutu lasi totona. Do ia mase o do ia mauri? Bema heduru ia abia dae do ia mauri, to bema heduru ia dadaraia do ia mase. Reana, hekokoroku dainai ia ese hamauria tauna ena heduru do ia dadaraia diba. Eiava, mai manau ida hamauria tauna ena heduru ia abia dae, bona dika do ia davaria lasi.
Unai hegeregerena, taunimanima ese edia Hamauria Tauna, Iehova Dirava, ida idia gaukara hebou neganai, hahemauri do idia davaria. Hahemauri be Dirava ena harihari gauna, to taunimanima ibounai ese do idia abia lasi. Dirava ena Natuna, Iesu, ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.”—Mataio 7:21.
Iehova ena Witnes taudia idia abia dae, Iesu ena mauri davalaia boubouna bona ena hadibaia hereva idia badinaia namonamo taudia sibodia, be Dirava ese do ia hamauridia. (Kara 4:10-12) Hahemauri abia totona, ita karaia diba mai anina bada gaudia toi be Baibel ese ia hahedinaraia. Mani ita laloa:
(1) Iesu ese ena turadia ia hamaoroa: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Iesu sibona ena mauri be ma haida totona ia henia karana amo ia hahedinaraia, lalokau be mai anina bada. Oibe, hahemauri ita abia totona, gau badana be ma haida do ita lalokau henidia.
(2) Iesu be guriguri amo ena Tamana dekenai ia gwau: “Oiemu ladana danu lau hadibaia vadaeni idia dekenai.” (Ioane 17:26) Iesu be Dirava ena ladana, Iehova, ia laloa bada. Iesu ia guriguri ena Tamana ena ladana do idia “hahelagaia.” (Mataio 6:9) Dirava ena ladana hahelagaia karana ena anina be, unai ladana ita diba, ita matauraia bona hahelagaia. Iesu hegeregerena, hahemauri idia tahua taudia ese Dirava ena ladana idia gaukaralaia be gau badana. Danu, Dirava ena ladana bona ena kara be ma haida dekenai do idia hadibaia. (Mataio 28:19, 20) Oibe, Dirava ena ladana dekenai idia boiboi taudia sibodia ese hahemauri do idia abia.—Roma 10:13.
(3) Iesu be Pontio Pilato dekenai ia gwau: “Lauegu Basileia be inai tanobada gauna lasi.” (Ioane 18:36) Hari, taunimanima haida sibona ese Dirava ena Basileia o gavamani—Iesu be unai gavamani ena King—idia abidadama henia. Idia momo be taunimanima edia orea idauidau idia abidadama henia. To, hahemauri do idia abia taudia be Dirava ena Basileia idia badinaia, bona unai Basileia ese abidadama taudia ibounai do ia hamauria dalana be ma haida dekenai idia hadibaia.—Mataio 4:17.
Iesu ena hahediba taudia be hahemauri abia totona do idia karaia gaudia haida idia dibaia murinai, idia gwau: “Mauri be daika do ia davaria diba?” Iesu ia haere: “Taunimanima ese do idia karaia diba lasi gaudia, be Dirava ese do ia karaia diba.” (Luka 18:18-30) Iehova ena Witnes taudia idia gaukara goada unai gaudia idia badinaia totona, badina idia ura Dirava ese idia do ia hamauria. Unai sibona lasi, to ma haida idia durua danu hahemauri do idia abia totona.