Mauri Goevadaena—Lalohadai Kavakavana Lasi!
Tanobada goevadaena—unai ena anina oi dekenai be dahaka? Taunimanima ese idia noholaia gabuna ta mani oi laloa, ia lalonai taravatu utua karana be lasi, drag ania kava karana be lasi, hitolo be lasi, ogogami be lasi, bona hahemaoro kerere be lasi. Ibounai edia lalona bona tauanina ena mamina be ia goeva, bona unai dainai idia moale. Idia taitai bona lalohisihisi lasi badina be mase ia ore vadaeni. Unai bamona tanobada oi naria noho be namo, ani?
ENA be taunimanima momo ese saiens bona idia havaraia gaudia idia daradaralaia lasi, to idia abia dae lasi tanobada goevadaena, taunimanima ibounai ese maino bona moale do idia davaria gabuna, be taunimanima edia aonega o diba amo do ia vara. To, taunimanima idia ura gau idauidau idia hanamoa bona kerere idia hamaoromaoroa. Momokani, lalohadai kavakavadia ese ruma lasi taudia bona ogogami taudia ia durua diba lasi, bona tauanina dika taudia bona gorere taudia, edia hisihisi haorea heduruna idia ura taudia, ia durua lasi. Tanobada goevadaena be taunimanima edia kara amo do ia vara lasi. To, ena be hisihisi bona dagedage karadia be hari idia vara, oi abia dae diba do oi gwauraia tanobada goevadaena be kahirakahira momokani.
Mauri goevadaena oi laloa neganai, reana Iesu Keriso ena mauri oi laloa. To tanobada dekenai, Iesu sibona be tau goevadaena lasi. Paradaiso lalonai, Dirava ese ia sibona hegeregerena ia havaraia taudia Adamu bona Heva, be mauri goevadaena idia moalelaia danu. To, edia guba Tamana idia gwau-edeede henia dainai, unai mauri hereadaena be idia haboioa. (Genese 3:1-6) To, Havaraia Tauna be taunimanima edia lalona dekenai mauri hanaihanai urana ia henia. Hadibaia Tauna 3:11 (NW ) ese unai ia hamomokania, ia gwau: “[Dirava] ese gau iboudiai ia hahairaia vadaeni, ta ta ena nega ena nega ai. Ia ese nega hanaihanai edia lalona ai ia atoa, taunimanima ese Dirava momokanina be matamana ela bona dokona ia karaia gaukarana do idia davaria diba lasi totona.”
Ena be taunimanima idia goevadae lasi bona kara dika idia karaia, bona unai dainai edia ‘mauri be anina lasi’ eiava “dika ena igui” lalonai idia noho, to mani aposetolo Paulo ena hagoadaia herevadia oi laloa, ia gwau: “Dirava ese ia karaia gaudia be mai edia ura dikadika ida idia naria noho Dirava ena natudia do ia hahedinaraidia totona. Badina be ia karaia gaudia be anina lasi maurina lalonai ia atodia, sibodia edia ura dainai lasi to ia atodia tauna dainai, mai ena helaro ida. Unai helaro be ia karaia gaudia danu be kara dika ena igui amo do ia ruhadia bona Dirava ena natudia edia ura kwalimu hereadaena do idia abia.” (Roma 8:19-21, NW ) Baibel ese ia hahedinaraia goevagoeva, Dirava be Iesu Keriso ena amo taunimanima dekenai mauri goevadaena do ia henia lou.—Ioane 3:16; 17:3.
Unai vaira negana helarona ita abia sibona lasi, to lauma dalanai ita ibounai ita goada diba, bona hari inai negai, iseda goada ita hahedinaraia diba.
Oi Laloa Maoromaoro be Namo
Iesu Keriso be goevadae karana ia laloa bada, unai dainai taunimanima hutuma dekenai ia gwau: “Unai dainai umui be do umui maoromaoro momokani, umui emui Tamana guba dekenai ia noho ia maoromaoro momokani bamona.” (Mataio 5:48) Iesu ia laloa hari inai tanobada dikana lalonai, ita kara goevagoeva diba, a? Lasi. Namona be ita hekwarahi taunimanima ma haida dekenai hariharibada, hebogahisi, bona lalokau ita habadaia totona, to nega momo unai kara maoromaoro karaia totona ita kwalimu lasi. Iesu ena aposetolo tauna ta ia gwau: “Bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria ore momokani. To bema ita gwau ita be kara dika lasi, inai be ita gwau Dirava be koikoi tauna, bona unai dainai iena hereva be iseda kudouna dekenai ia noho lasi.”—1 Ioane 1:9, 10.
To, ita sibona ita laloa dalana bona ma haida ita kara henia dalana ita hanamoa diba, bona kara ta goadalaia karana ita dadaraia. Ita ese laloa maoromaoro dibaia dalana hereadaena be Dirava ena Hereva, Baibel, dekenai ita davaria diba, ani? Kara haida, hegeregere moale bona laloa namonamo karadia ita hahedinaraia neganai, ita ia durua iseda gaukara hebou taudia, iseda adavana, bona iseda tama sina eiava natudia ida do ita noho hebou namonamo. Aposetolo Paulo ese Keristani taudia ia hamaoroa, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale. Emui manau bona manada kara taunimanima ibounai edia vairanai do umui hedinaraia.”—Filipi 4:4, 5.
Laloa Maoromaoro Karana Ena Namo
Oi tahua gaudia ibounai oi laloa maoromaoro bona sibona hahisia bona hadikaia karana, gau ibounai karaia goevagoeva toho karana, oi dadaraia neganai, oi bona ma haida be namo bada do umui davaria. Do oi karaia diba gaudia oi dibaia totona, oi ura karaia gaudia oi laloa lalonai tahua gaudia maorodia bona laloa maoromaoro karana be mai anina bada. Oi laloatao, Dirava ese ita ia havaraia inai tanobada ita noholaia bona gaukara namona ita karaia totona, unai gaukara amo ita bona ma haida ese namo bada do ita davaria.—Genese 2:7-9.
Bema oi davaria diba lasi gaudia oi tahua, guriguri amo Iehova oi noia be namo, ani? Dirava ena lalo-namo oi abia neganai, oi dekenai namo do ia havaraia. Iehova be iseda kara bona goevadae lasi maurina ia diba, unai dainai ita karaia diba lasi gaudia be ita amo ia tahua lasi bona ia ita hamoalea be auka lasi. Salamo torea tauna ese ita ia hamaoroa, ia gwau: “Tamana taudia be edia natuna dekenai idia bogahisihisi noho. Inai bamona danu Lohiabada ese, ia dekenai idia gari taudia ia bogahisihisi henidia noho. Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:13, 14) Dirava ese taunimanima be unai bamona ia hebogahisi henia dainai ita moale bada diba! Ena be iseda manoka gaudia ia diba, to iena matana ai ita be dava bada gaudia bona ia lalokau henia natudia bamona.
Namo lasi gau ibounai ita karaia goevagoeva toho, to lauma dalanai diba bona laloa maoromaoro karana ita habadaia be aonega karana momokani! Danu, ita diba momokani taunimanima ta be Iehova ena ura, Dirava ena Basileia henunai taunimanima be goevadae taudia ai ia halaoa urana, ia koua diba lasi. To, taunimanima idia goevadae ena anina be dahaka?
Mauri Goevadaena ese Gau Ibounai Karaia Goevagoeva Toho Karana Ia Hereaia
Ita gwau lasi goevadae ena anina be gau ibounai ita karaia goevagoeva toho. Dirava ena Basileia henunai tanobada paradaisona ena hahenamo do idia abia taudia be ma haida idia hametaua bona sibona edia kara maoromaoro idia heagilaia taudia lasi. Hisihisi badana amo ita roho mauri totona, mai eda kudouna ibounai ida mauri davalaia boubouna ita laloa bada, aposetolo Ioane ese ia herevalaia hutuma bada taudia bese idauidau amo bamona, idia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.” (Apokalupo 7:9, 10, 14) Ia mai kahirakahira noho hisihisi badana amo do idia roho mauri taudia ibounai do idia moale badina mai ena ura ida Keriso be idia bona ia idia abidadama henia taudia ibounai dainai ia mase. Mai lalokau ida ena mauri ia bouboulaia karana ese dala ia kehoa taunimanima be edia kara kerere bona manoka amo ia hamauridia totona.—Ioane 3:16; Roma 8:21, 22.
Mauri goevadaena be edena bamona? Taunimanima huanai kara helulu bona sibona laloa bada karana do idia vara lasi, to lalokau bona hebogahisi karana ese edia mauri do ia hanamoa, bena lalo-hekwarahi bona sibona laloa maragi karadia do idia ore. To, mauri goevadaena do idia hesikulaia lasi. Dirava ena Hereva ese Paradaiso ena gau iboudiai ia kikilaia lasi, to do ita abia mauri ia herevalaia, ia gwau: “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi. Au edia mauri dinadia be momo hegeregerena, lauegu bese taudia edia mauri dinadia be unai bamona. Bona lauegu abia hidi taudia ese, edia imana gaukara dekenai idia karaia gaudia do idia moalelaia. Do idia hekwarahi kava lasi, bona edia natudia ese dika do idia davaria lasi.”—Isaia 65:21-23.
Basileia ese edena bamona moale karadia, sitoa rumadia, taunimanima ese do idia havaraia gaudia, eiava loaloa gaudia do oi laloa momo lasi be namo, to inai hereva ia guguru negana oi laloa be namo, ia gwau: “Uda sisia bona mamoe natuna be do idia aniani hebou, laiona ese rei kakoro do idia ania, boromakau edia kara bamona. Bona gaigai ese taunimanima bona mauri gaudia do idia hamasea lou lasi. Lauegu ororo helagana, Siona dekenai, be dika o dika havaraia gauna ta do ia noho lasi.” (Isaia 65:25) Oibe, mauri goevadaena be hari inai nega maurina amo do ia idau momokani! Bema do oi hegeregere unai nega dekenai oi noho totona, mai badina dainai oi laloa diba oiemu lalokau guba Tamana ese oi bona emu ruma bese taudia do ia laloa bada. “Oiemu moale be Lohiabada dekena amo do oi tahua, vadaeni ia ese, oi ura henia gaudia oi dekenai do ia henia.”—Salamo 37:4.
Mauri goevadaena be lalohadai kavakavana lasi. Iehova ena lalokau palanina taunimanima totona be do ia vara momokani. Oi bona emu ruma bese taudia be umui goevadae diba bona Dirava ena tanobada matamatana lalonai do idia noho hanaihanai taudia huanai umui noho diba. Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”—Salamo 37:29.
[Picture on page 6]
Ita sibona bona haida ita laloa karana ita hanamoa diba, bona gau ibounai karaia goevagoeva toho karana bona gau maragimaragi iboudiai laloa bada karana ita dadaraia diba
[Picture on page 7]
Paradaiso dekenai maino bona kara maoromaoro oi moalelaia maurina oi laloa be namo, ani?