Dahaka Dainai Gau Ibounai Ita Karaia Goevagoeva Toho Lasi be Namo?
Nega ibounai oi hekwarahi kara hereadaena ta oi karaia totona, a? Ia hedinarai goevagoeva, bema unai bamona oi kara, dala momo ai oi bona emu dekena taudia be hahenamo idauidau do umui abia. To, haida be edia gaukara idia habadaia bona gau ibounai idia karaia goevagoeva toho. Unai ena anina be dahaka?
UNAI hereva “gau ibounai karaia goevagoeva toho” (English gado ai, perfectionism) ena anina ta be “goevadae gaudia sibona idia hegeregere lalohadaina.” Reana unai bamona idia laloa taudia haida oi diba. Oi itaia idia ese ma haida dekenai tahua gauna metauna idia atoa dainai, lalohisihisi bona lalo-manoka idia havaraia. Laloa maoromaoro taudia momo idia lalo-parara gau ibounai karaia goevagoeva toho karana, mauri ena gau iboudiai lalonai oi davaria diba lasi gaudia tahua karana, be anina lasi. Unai ita dadaraia be namo. To, hekwakwanai gauna be inai, bema ita sibona ese gau ibounai ita karaia goevagoeva toho, unai ita itaia be auka, unai dainai ita dadaraia be mai ena hekwarahi.
Nelson be maduna badana ia huaia bona ia hanaia hekwakwanai be momo. Hanaihanai ripoti idauidau ia tahua, bona ia laloa kohu bada do idia karaia be gau badana. Momo idia laloa moni gaukara ena kara helulu dekenai ta ia kwalimu totona, gau ibounai ia karaia goevagoeva toho be mai anina bada. Ena be haida ese Nelson ena gaukara namona idia moalelaia bada, to gau ibounai ia karaia goevagoeva toho karana dainai, iena tauanina dekenai hekwakwanai momo ia davaria, hegeregere kwarana hisihisi bona lalo-metau. Oiemu kara be Nelson ena bamona, a?
Gau ibounai idia karaia goevagoeva toho karana ese matamata taudia ia hametaua danu. Rio de Janeiro dekenai, Rita be ia maragi negana amo sikuli ia laloa bada. Ena be ia ura lasi ladana bada tahua karana ia hahedinaraia, to maka namodia ia abia lasi neganai ia lalohisihisi bada. Rita ia gwau: “Lau maragi negana amo, edia nega be bada taudia ida sibona lau hahegeregerea, ena be egu nega be hegeregere lasi bona gau ibounai karaia guguru totona lau haragaharaga. Nega ta lau laloa lasi egu nega be hegeregere lau laga-ani totona, badina hanaihanai lau karaia be namo gaudia idia noho.”
Maria ia kekeni maragi neganai, ia penia laulauna be ma haida idia penia hegeregerena lasi neganai, mai badu ida ia taitai. Danu, miusiki gaudia ia karaia goevagoeva toho dainai, nega momo miusiki ia gadaralaia eiava ane ia abia neganai ia moale lasi, to ia lalo-hekwarahi. Ena be Brazil kekenina ma ta, Tânia, ia ura aonega ia hahedinaraia bona kara helulu karana ia dadaraia, to ia gwau sikuli bona ruma dekenai ia davaria diba lasi gaudia ia tahua toho. Ia laloa bema ena gaukara be goevadae lasi, taunimanima be ia idia ura henia bada lasi. Danu, nega momo Tânia be ma haida amo gau momo ia tahua, unai dainai ia lalo-metau bona lalohisihisi bada.
Ena be taunimanima be mai edia diba gau ta idia karaia totona, idia gaukara goadagoada, bona idia karaia gauna idia moalelaia be gau badadia, to bema idia davaria diba lasi gaudia idia tahua toho, hemami dikadia idia vara diba, hegeregere reana gaukara ta idia karaia namonamo diba lasi garina idia gari. Tama sina eiava ma haida be reana idia ura matamata taudia ese sikuli gaukara eiava spot gadara dekenai idia kara goevagoeva, to matamata taudia be hegeregere lasi unai idia hagugurua totona. Hegeregere, Ricardo ena sinana ena ura gaudia be momo, ia ura ena natuna be doketa ai do ia lao, piano do ia gadaralaia, bona gado ma haida do ia dibaia. Unai bamona kara idia habadaia neganai, oi itaia diba unai ese hekwakwanai eiava lalohisihisi ia havaraia, ani?
Dahaka Dainai Gau Ibounai Ita Karaia Goevagoeva Toho Lasi be Namo?
Gaukara karaia namo herea karana, gaukara namona ena maka hanaia karana, be ia bada daekau noho. Unai dainai moni gaukara gabudia dekenai taunimanima idia kara helulu. Ma danu, taunimanima momo idia ura lasi edia moni gaukara idia haboioa, unai dainai idia gaukara goadagoada toho. Moni gaukara idia karaia taudia haida be gadara helulu tauna bamona, gau momo ia dadaraia maka matamatana ia davaria totona. Bena, heau helulu badana ia kahirakahira neganai, ia treinini goadagoada, reana drag do ia gaukaralaia heduru ia abia totona bona—ia laloa—ia kwalimu diba. Taunimanima be gaukara namo sibona idia tahua lasi, to gau ibounai idia karaia goevagoeva toho karana ese taunimanima ia doria bena “moru garina idia gari dainai idia hekwarahi” eiava “ladana bada idia tahua noho.”—The Feeling Good Handbook.
Oibe, taunimanima haida idia laloa drama, miusiki, bona laulau karaia lalonai eiava spot gadara lalonai idia karaia gaudia ibounai do idia hanamoa diba. To, Dr. Robert S. Eliot, ia gwau: “Gau ibounai karaia goevagoeva toho karana ena anina ia vara momokani diba lasi.” Ma ia gwau: “Ia be lalona ena mamina dikana, sibona ena kara ena namo hamomokania urana, bona haida ese idia kirikirilaia garina amo ia vara.” Unai dainai, aonega King Solomona ena hereva be momokani, ia gwau: “Lau itaia, taunimanima ese hekwarahi bada idia karaia noho ena badina be inai: Idia ese edia badibadinai noho taudia idia mama henidia dainai. To inai danu be anina lasi, lai bema idia lulua kava hegeregerena.”—Hadibaia Tauna 4:4.
Bema gau ibounai oi karaia goevagoeva toho, dahaka oi karaia be namo? Oi hekwarahi goadagoada dainai, lalohisihisi bada oi davaria be momokani, a? Oi laloa ia namo bema ma haida amo gau momo oi tahua lasi bona nega ibounai oi karaharaga lasi, a? Goevadae ena anina be dahaka? Ena be gau ibounai oi karaia goevagoeva toho lasi, to oi ura emu diba ibounai oi gaukaralaia, ani? Bema goevadae lasi taudia ese Dirava ia henia dibana idia gaukaralaia bona ma haida edia namo havaraia gaudia idia davaria, taunimanima ese mauri goevadaena bona Dirava ese ia hakaua lalonai do idia karaia diba gaudia be mani oi laloa!
[Picture on page 4]
Tama sina eiava ma haida be reana idia ura matamata taudia ese gau ibounai idia karaia goevagoeva, to matamata taudia be hegeregere lasi unai idia hagugurua totona