Lalo-Maino be Edeseniai Oi Davaria Diba?
Iseda negai bona Thoreau, hereva ginigunana lalonai ai gwauraia tauna, ena negai gau momo be idia idau. Idau gauna badana ta be, hari inai negai lalo-maino abia daladia idia sisibalaia herevadia be momo herea. Taunimanima edia lalona bona kara idia stadilaia doketa taudia bona sibona oi durua bukadia idia torea taudia—niuspepa torea taudia danu—ese edia lalohadai idia gwauraia. Edia sisiba be reana nega sisina lalonai heduru do ia henia; to nega daudau lalonai ia noho heduru abia totona, heduru bada ita abia be namo. Unai be hereva ginigunana lalonai ai gwauraia taudia ese idia davaria.
ANTÔNIO, Marcos, Gerson, Vania, bona Marcelo edia mauri dalana bona edia hekwakwanai be idauidau. To idia dekenai gau toi be hegeregere. Gau ginigunana be, guna ‘idia be Dirava lasi taudia, bona mauri hanaihanai idia diba lasi.’ (Efeso 2:12) Gau iharuana be, idia ura lalo-maino idia abia. Bona gau ihatoina be, idia ibounai ese idia ura abia lalo-maino be Iehova ena Witnes taudia ida Baibel stadi karana idia abia dae neganai idia davaria. Edia stadi karana idia habadaia neganai, idia lalo-parara Dirava ese idia ia laloa. Oibe, Paulo ena hereva iena negai idia noho Atena taudia dekenai be momokani, ia gwau “Dirava be daudau lasi ita ta ta dekenai.” (Kara 17:27) Unai hereva be mai eda lalona ibounai ida ita abia dae be gau badana, lalo-maino ita abia totona.
Maino be Lasi Ena Badina be Dahaka?
Baibel ese tanobada dekenai maino be lasi ena badina rua ia hahedinaraia—herevana lalo-maino eiava taunimanima edia huanai ia noho mainona. Ginigunana be Ieremia 10:23 ese ia hahedinaraia: “Taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” Taunimanima dekenai aonega bona vaira negana itaia diba karana ia noho lasi dainai sibodia idia lohiaia diba lasi, bona mai anina bada heduru korikorina be Dirava sibona amo ia mai. Dirava ena hakaua herevadia idia tahua lasi taudia ese nega daudau ia noho mainona do idia abia lasi. Dahaka dainai maino be lasi ena badina iharuana be aposetolo Ioane ena hereva lalonai ita itaia diba, ia gwau: “Satani ese tanobada taudia ibounai ia gunalaia noho.” (1 Ioane 5:19) Dirava ena hakaua herevadia be lasi neganai, nega ibounai taunimanima edia hekwarahi maino abia totona be ita itaia diba lasi to ia noho momokani laumana—mai ena siahu bada—“Satani” ese ia hadikaia.
Unai badina rua—taunimanima momo ese Dirava ena hakaua herevadia idia tahua lasi bona Satani be tanobada ai ia gaukara goadagoada—dainai tanobada besena ibounai be idia lalohisihisi. Aposetolo Paulo ese unai ia gwauraia goevagoeva, ia gwau: “Dirava ese ia karaia gaudia iboudiai be idia taitai hebou noho bona idia hisihisi hebou noho ema bona hari.” (Roma 8:22, NW ) Daika ese unai hereva ia hakoikoia diba? Taga bona ogogami besedia dekenai, ruma bese edia hekwakwanai, taravatu utua karana, hahemaoro maoromaoro lasi karadia, taunimanima idia hepapahuahu karadia, moni ena hekwakwanai, iduhu bona bese inai henia karadia, siahu taudia edia dagedage karana, gorere, bona ma gau momo, ese taunimanima edia lalo-maino idia hadikaia.
Lalo-Maino Oi Davaria Gabuna
Antônio, Marcos, Gerson, Vania, bona Marcelo ese Dirava ena Hereva, Baibel, idia stadilaia neganai, edia mauri idia haidaua gaudia idia diba. Idia diba gauna ta be, tanobada maurina be nega ta ai do ia idau. Unai be dokonai gau ibounai do idia namo ena lalohadai kava sibona lasi. Ia be abidadama korikorina, idia diba momokani Dirava be mai ena ura taunimanima totona bona hari danu hahenamo ita abia diba bema ena ura ita karaia. Baibel amo idia dibaia gaudia be edia mauri lalonai idia badinaia, bona edia mauri ia namo. Idia ese guna idia laloa diba lasi moale bona maino idia davaria.
Hari Antônio be noho dalana maumauraia karadia bona gaukara taudia edia dagedage karadia lalonai ia vareai lasi. Ia diba unai dala amo ia vara namo be mai edia hetoa bona nega sisina sibona lalonai do ia noho. Unai gaukara taudia naria tauna gunana ese Dirava ena Basileia ena sivarai ia dibaia. Unai Basileia be taunimanima milioni momo ese Lohiabada ena Guriguri (eiava Aiemai Tamana) idia gwauraia neganai idia gurigurilaia bona Dirava idia hamaoroa: “Oiemu Basileia do ia mai.” (Mataio 6:10a) Antônio ia diba Dirava ena Basileia be guba gavamani korikorina bona ia ese taunimanima dekenai maino korikorina do ia mailaia.
Marcos ese Baibel ena aonega sisibana headava dekenai ia dibaia bona ena mauri lalonai ia badinaia. Unai dainai, unai politikol tauna gunana be hari ena adavana ida idia noho hebou. Ia danu ese kahirakahira do ia mai vaira negana ia naria noho, unai negai Dirava ena Basileia ese inai mataganigani bona sibona laloa tanobada oromana ena gabunai tanobada oromana namona do ia haginia. Hari Lohiabada ena Guriguri ena hereva ta ia lalo-pararalaia namonamo, ia gwau: “Oiemu ura gauna tanobada dekenai do ai karaia, guba dekenai idia karaia bamona.” (Mataio 6:10b) Dirava ena ura be tanobada ai idia karaia neganai, taunimanima ese guna idia itaia lasi mauri namona be do idia itaia.
Gerson be edena bamona? Hari ia be ia loaloa kava bona henaohenao tauna lasi. Hari unai dala ai ia tubu natuna ena mauri be mai anina badina ia ese ena goada ia gaukaralaia ma haida ia durua idia ese lalo-maino idia abia totona. Unai ekspiriens ese idia hahedinaraia bamona, Baibel stadilaia bona ena hereva badinaia karana ese taunimanima ta ena mauri ia haidaua diba bona mauri namona ia davaria diba.
Lalo-Maino Tanobada Dikana Lalonai
Histori ibounai lalonai Dirava ena ura ia karaia tauna badana be Iesu Keriso, bona taunimanima be Iehova ena Witnes taudia ida Baibel idia stadilaia neganai, iena sivarai momo idia dibaia diba. Ia vara hanuaboina ai, aneru ese Dirava hanamoa totona ane idia abia: “Ataiai momokani guba dekenai Dirava do ita hanamoa, bona tanobada dekenai be maino, Dirava idia hamoalea taudia ese inai maino do idia abia.” (Luka 2:14) Iesu ia bada neganai, taunimanima edia mauri hanamoa daladia ia laloa bada. Edia hemami ia lalo-pararalaia bona hisihisi bona gorere taudia dekenai hebogahisi bada ia hahedinaraia. Bona, aneru edia hereva hegeregerena, ia ese lalo-maino be manau taudia dekenai ia mailaia. Iena hesiai gaukara ena dokonai, ena hahediba taudia dekenai ia gwau: “Maino umui dekenai lau rakatania, lauegu maino lau henia umui dekenai. Tanobada ese ia henia maino bamona lasi, be lau ese lau henia umui dekenai. Umui laloa hekwarahi lasi, bona umui gari lasi.”—Ioane 14:27.
Iesu be hebogahisi karana ia hahedinaraia tauna sibona lasi. Ia sibona be mamoe naria tauna ta danu ia hahegeregerea, bona ia murinai mai manau danu idia raka taudia be mamoe danu ia hahegeregerea, ia gwau: “Lau mai vadaeni, mauri do idia abia, mauri mai anina momokani danu, do idia abia totona. Lau be mamoe naria tauna namona inai. Mamoe naria tauna namona ese iena mauri ia atoa diho mamoe totona.” (Ioane 10:10, 11) Oibe, hari inai negai idia noho gunalaia taudia, sibodia edia namo idia tahua guna bona idia laloa bada taudia, amo Iesu be idau, ia ese ena mauri be ena mamoe totona ia henia.
Iesu ia karaia gauna amo edena bamona namo ita davaria diba? Momo be inai hereva idia diba: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Iesu ita abidadama henia totona, gau ginigunana be, ia bona ena Tamana, Iehova, ita diba. Dirava bona Iesu ita diba neganai, Iehova Dirava ida hetura karana namona ita abia diba bona unai ese ita do ia durua lalo-maino ita abia totona.
Iesu ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka. Mauri hanaihanai danu lau henia idia dekenai, idia be do idia mase lasi, lasi bona lasi momokani. Bona tau ta ese lauegu imana dekena amo idia do ia kokia lasi.” (Ioane 10:27, 28) Unai be hagoadaia hereva namodia momokani! Oibe, kahirakahira lagani 2000 gunanai Iesu ese unai hereva ia gwauraia, to hari edia siahu be guna hegeregerena. Laloaboio lasi, Iesu Keriso be ia do mauri bona gaukara noho, hari ia be Dirava ena guba Basileia dekenai ia lohia noho King. Lagani momo gunanai tanobada ai ia raka negana hegeregerena, ia ese lalo-maino idia ura abia manau taudia ia do laloa noho. Danu, ia be do ena mamoe edia Mamoe Naria Tauna. Bema ena murinai ita raka, ita do ia durua lalo-maino ita abia totona, unai dainai mai lalo-goada ida ita abia dae vaira neganai maino momokanina do ita itaia—anina be dagedage, tuari, bona taravatu utua karadia danu do idia ore.
Hahenamo korikoridia idia mai dalana be, ita diba bona abia dae Iehova ese Iesu amo ita do ia durua. Maduna metauna ia abia bona ia laloa Dirava ese ia laloaboio kekeni matamata, Vania, oi laloatao, a? Hari Vania ia diba Dirava ese ia rakatania lasi. Ia gwau: “Lau diba Dirava be lauma tauna korikorina mai ena kara namodia. Iena lalokau ese ia doria dainai ena Natuna be tanobada dekenai ia siaia ita dekenai mauri ia henia totona. Unai ita diba be gau badana.”
Marcelo ia gwau iena hetura karana Dirava ida be gau korikorina. Unai pati momo dekenai guna ia lao tauna ia gwau: “Nega momo matamata taudia idia diba lasi dahaka do idia karaia, bona idia sibona idia hadikaia. Haida be lau bamona drag idia ania kava. Lau ura ma momo be lau bamona hereva momokani Dirava bona iena Natuna dekenai idia dibaia karana amo hahenamo do idia abia.”
Baibel idia stadilaia namonamo amo, Vania bona Marcelo ese abidadama goadana Dirava dekenai idia abia bona idia diba momokani Dirava ia ura edia hekwakwanai dekenai ia durudia. Bema idia karaia gauna ita karaia—Baibel ita stadilaia bona ena hereva ita badinaia—ita ese lalo-maino do ita davaria, idia ese idia davaria hegeregerena. Vadaeni aposetolo Paulo ena hagoadaia herevana be ita dekenai do ia guguru, ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.”—Filipi 4:6, 7.
Hari Inai Negai Maino Korikorina Ita Davaria
Iesu Keriso ese hereva momokani totona idia hitolo taudia be tanobada paradaisona ai mauri hanaihanai ia lao henia dalana dekenai ia hakaudia lao. Dirava tomadiho henia dalana goevana dekenai ia hakaudia lao neganai, Baibel lalonai ia gwauraia mainona idia abia: “Dirava ena taudia be do idia laloa hekwarahi lasi, bona mai hadikaia gauna ta lasi do idia noho.” (Isaia 32:18) Bona unai be vaira neganai do idia moalelaia mainona ena mamina matamana sibona. Ita duahia, ia gwau: “Manau taudia ese noho gabuna tano do idia abia, do idia helai namonamo, mai moale bona mai maino danu. Kara maoromaoro taudia ese, Dirava ia henidia tano dekenai do idia noho ela bona hanaihanai.”—Salamo 37:11, 29.
Unai dainai ita ese hari inai negai lalo-maino ita abia diba, a? Oibe. Danu, ita abia dae diba nega sisina murinai, Dirava ese kamonai taudia do ia hanamoa bona guna idia mamia lasi mainona do idia abia. Unai dainai guriguri amo ia oi noia oi dekenai maino ia henia totona be namo, ani? Bema oiemu hekwakwanai ese emu maino idia haorea, King Davida ia guriguri bamona oi guriguri be namo, ia gwau: “Lauegu lalohisihisi do oi hadokoa, bona egu hisihisi dekena amo lau do oi hamauria. Egu laloa hekwarahi bona egu laloa metau do oi laloa, bona egu kara dika ibounai mani do oi gwauatao.” (Salamo 25:17, 18) Namona be oi abia dae momokani Dirava ese unai bamona guriguri ia kamonai. Ia ese ena imana ia toia bona mai edia kudouna ibounai ida maino idia tahua taudia dekenai maino ia henia. Ita be mai lalokau ida ia hagoadaia: “Lohiabada be ia dekenai idia boiboi taudia dekenai ia noho. Idia boiboi henia mai edia momokani danu taudia dekenai, Lohiabada be idia kahirakahira ia noho. Ia dekenai idia gari taudia dekenai, idia ura henia gaudia ia henia noho. Edia taitai ia kamonai, bona ia ese idia ia hamauria noho.”—Salamo 145:18, 19.
[Blurb on page 5]
Taunimanima dekenai aonega bona vaira negana itaia diba karana ia noho lasi dainai sibodia idia lohiaia diba lasi bona mai anina bada heduru korikorina be Dirava sibona amo ia mai
[Blurb on page 6]
Dirava bona Iesu ita diba neganai, Iehova Dirava ida hetura karana namona ita abia diba bona unai ese ita do ia durua lalo-maino ita abia totona
[Picture on page 7]
Baibel ena sisiba badinaia karana ese ruma bese lalonai maino ia havaraia